Read Dagara, Northern Levitɩ mɩnɛ 4 Bible Online

Levitɩ mɩnɛ 4 - Dagara, Northern bible

Levitɩ mɩnɛ 4

¹A Sore tɩ yel'ɩ a Moyiir

²k'ʋʋ ƴɛ̀r à ŋá a Ɩsɩrayɛl nɩbɛ zie: «Nɩr bɛ wa bãwnɩ a ɛ́ maalɩ yel-bier gãw a Sore nɔ-ƴãwna kãw na yel kɛ́ bɛ ta ɩ bom a, nyɛ̃ a lɛ a na fɛr kɛ́ bɛ tu a:

³A bàwr-maal-kara wa n'ʋ maalɩ a yel-bier ƴãw a nɩbɛ za tɛr sãwna a, ʋ na ír'ɩ nadɛr a ƴã-gan zie kãw za na bɛ sãw a, maal'ɩ yel-bier ír-bɛrʋ bàwr kʋ̀ a Sore.

⁴Ʋ na cen nɩ nɩ a nadɛr a Sore niŋé, a tuor-taa pɛn-sɛw dɩ̃dɔr nʋɔr. Ʋ na dɔwl'ɩ a nũu a dʋ̃w zũú, ɛ́ ŋmãa ʋ a kɔkɔr a be.

⁵A bàwr-maal-kara na ɩ n a zɩ̃ɩ kpɛ n a tuor-taa pɛn-sɛw pʋɔ,

⁶mɩ́ tɩ tõ nobir a zɩ̃ɩ pʋɔ mɩr'ɩ a zi-sõw-za-zi-sõw pʋɔ pɛn-yawla lõbowr ʋl na sãá a gb'a ayopõi, a Sore niŋé.

⁷Al pùorí, a bàwr-maal-kara na ɩ n a zɩ̃ɩ ƴãw a bàwr-maal-kuur na be a tuor-taa pɛn-sɛw pʋɔ a ɩ́lɛ́ ƴãw, a ʋl zu bɛ na mɩ́ nyɩw a parfɛ̃ a. Al pùorí ʋ yi n a zɩ̃ɩ na cɛ a, tɩ cir a za ƴãw a nyɩw-a-za-bàwr bàwr-maal-kuur na be a tuor-taa pɛn-sɛw dɩ̃dɔrɩ́ a sɩɛ ƴãw.

⁸Ʋ na ír'ɩ a dʋ̃w zi-kãánɩ: a kãá na pàw a nyagɛ nɩ a púor a,

⁹a alãbie a za ayi nɩ a kãá na pàw a ɛ́ mɛr a dʋ̃w lõbowe ƴãw a, pãa de nɩ a sabr lõbowr-kpɛ̃ɛ bɛ na lãw ír'ɩ a alãbie a

¹⁰—a ɩ n a alɩ ziir nɛ tɔr za bɛ na mɩ́ ír bɛlɛ wa kʋ nadɛr maal'ɩ lãw-taa bàwr a—. A bàwr-maal-kara na nyɩw a nɩ a nyɩw-a-za-bàwr bàwr-maal-kuur zu.

¹¹Al pùorí, a nadɛr gán, a nɛn, a zu, a gbɛ́ɛ, a nyagɛ nɩ a púor na bɛ pɛ a,

¹²a dʋ̃w bom za na cɛ a, ʋ na ƴãw na bɛ tuo a za yi n a laɩ pʋɔ cen nɩ zie na bɛ tɛr dɛwr a, a be bɛ na mɩ́ cir a tãpɛl-kãánɩ bɛr a, tɩ nyɩw a bɛr dà-ŋmaarɛ vũu pʋɔ. A be tɔr za n'a a fɛr kɛ́ bɛ nyɩw a za bɛr, a tãpɛl-kãánɩ zu.»

¹³«A Ɩsɩrayɛl nɩbɛ lãw za wa n'ʋ bɛ bãwnɩ a ɛ́ maalɩ yel-bier gãw a Sore nɔ-ƴãwna kãw na yel kɛ́ bɛ ta ɩ bom a, a Ɩsɩrayɛl nɩbɛ ɩ n sãwna dem, bɛ na saa bɛ bãwnɩ a.

¹⁴Bɛlɛ wa dɛ bãwnɩ a yel-bier ŋa a, bɛ na ír'ɩ nadɛr maal'ɩ yel-bier-ír-bɛrʋ bàwr. Bɛ na cen nɩ nɩ a nadɛr a tuor-taa pɛn-sɛw dɩ̃dɔr nʋɔr.

¹⁵A lãw nɩ-kore na dɔwl'ɩ a bɛ nuru a nadɛr zũú, ɛ́ a bɛ kãw ŋmãa ʋ a kɔkɔr a be, a Sore niŋé.

¹⁶A bàwr-maal-kara na ɩ n a zɩ̃ɩ blã kpɛ n a tuor-taa pɛn-sɛw pʋɔ,

¹⁷mɩ́ tɩ tõ nobir a zɩ̃ɩ pʋɔ mɩr'ɩ a zi-sõw-za-zi-sõw pʋɔ pɛn-yawla lõbowr ʋl na sãá a gb'a ayopõi, a Sore niŋé.

¹⁸Ʋ mɩ̀ na ɩ n a zɩ̃ɩ ƴãw a bàwr-maal-kuur na be a tuor-taa pɛn-sɛw pʋɔ a ɩ́lɛ́ ƴãw, a Sore niŋé, ɛ́ yi n a zɩ̃ɩ na cɛ a, tɩ cir a za ƴãw a nyɩw-a-za-bàwr bàwr-maal-kuur na be a tuor-taa pɛn-sɛw dɩ̃dɔrɩ́ a sɩɛ ƴãw.

¹⁹Ʋ na ír'ɩ a dʋ̃w ziir al za na tɛr kãá a nyɩw a bàwr-maal-kuur zu,

²⁰ʋ na ɩ n a nadɛr ŋa mɛ̃ a lɛ tɔr za ʋ na ɩ a nadɛr ʋ na maal'ɩ a bàwr a ʋl mɩŋa yel-bier ƴãw a. Ʋ na tu n a yel-bebe suur-dɩ-kʋ̀b tub a Ɩsɩrayɛl nɩbɛ ƴãw, ɛ́ a Naaŋmɩn dɩ a bɛ yel-bebe suur kʋ̀ bɛ.

²¹Al pùorí, ʋ na ƴãw na bɛ tuo a dʋ̃w na cɛ a yi n a laɩ pʋɔ tɩ lɔb ƴãw a vũumí mɛ̃ a lɛ ʋ na tu a nadɛr ʋl ƴãw ʋ na maal'ɩ a bàwr a ʋl mɩŋa yel-bier ƴãw a. A Ɩsɩrayɛl nɩbɛ lãw yel-bier-ír-bɛrʋ bàwr'ɩ à ŋà.»

²²«A nɩbɛ nɩ-kpɛ̃ɛ kãw wa n'ʋ bɛ bãwnɩ a ɛ́ maalɩ yel-bier gãw a Sore ʋ Naaŋmɩn nɔ-ƴãwna kãw na yel kɛ́ bɛ ta ɩ bom a, ʋ ɩ n sãwna sob a lɛ.

²³Ʋlɛ wa dɛ bãwnɩ a yel-bier ŋa a, ʋ na ír'ɩ bʋra a ƴã-gan zie kãw za na bɛ sãw a maal'ɩ bàwr.

²⁴Ʋ na ír'ɩ nũu dɔwl'ɩ a dʋ̃w zũú ɛ́ ŋmãa ʋ a kɔkɔr a Sore niŋé, a be bɛ na mɩ́ ŋma a nyɩw-a-za-bagɛ dʋn kɔkɛɛ a. Yel-bier-ír-bɛrʋ bàwr'ʋ.

²⁵A bàwr-maalɛ na ír'ɩ nobir tõ a dʋ̃w zɩ̃ɩ pʋɔ ɩ n a zɩ̃ɩ ƴãw a nyɩw-a-za-bàwr bàwr-maal-kuur ɩ́lɛ́ ƴãw. Al pùorí ʋ cir a zɩ̃ɩ za na cɛ a ƴãw a ʋlɩ bàwr-maal-kuur nɛ sɩɛmɩ́.

²⁶Ʋ na nyɩw nɩ a dʋ̃w zi-kãánɩ za a bàwr-maal-kuur zu, mɛ̃ a lɛ a na mɩ́ ɩ a lãw-taa bàwr ƴãw a. Ʋ na tu n a yel-bebe suur-dɩ-kʋ̀b tub a nɩ-kpɛ̃ɛ nɛ ƴãw, ɛ́ a Naaŋmɩn dɩ a ʋ yel-bebe suur kʋ̀ ʋ.»

²⁷«Nɩ-zawla wa n'ʋ bɛ bãwnɩ a ɛ́ maalɩ yel-bier gãw a Sore nɔ-ƴãwna kãw na yel kɛ́ bɛ ta ɩ bom a, ʋ ɩ n sãwna sob a lɛ.

²⁸Ʋlɛ wa dɛ bãwnɩ a yel-bier ŋa a, ʋ na ír'ɩ bʋ-nyãw a ƴã-gan zie kãw za na bɛ sãw a, a yel-bier ʋ na maalɩ a ƴãw.

²⁹Ʋ na ír'ɩ a nũu dɔwlɩ a dʋ̃w zũú, ɛ́ ŋmãa ʋ a kɔkɔr a be bɛ na mɩ́ ŋma a nyɩw-a-za-bagɛ dʋn kɔkɛɛ a.

³⁰A bàwr-maalɛ na ɩ n a dʋ̃w zɩ̃ɩ nɩ nobir ƴãw a nyɩw-a-za-bàwr bàwr-maal-kuur ɩ́lɛ́ ƴãw, ɛ́ cir a zɩ̃ɩ za na cɛ a ƴãw a ʋlɩ bàwr-maal-kuur nɛ sɩɛmɩ́.

³¹Bɛ na ír'ɩ a dʋ̃w zi-kãánɩ mɛ̃ a lɛ a na mɩ́ ɩ a lãw-taa bàwr ƴãw a. A bàwr-maalɛ na nyɩw a nɩ a bàwr-maal-kuur zu, k'aa bàwr ŋa zʋ̀ʋ́r na nyùur vla vla a pɛlɩ a Sore pʋɔ. Ʋ na tu n a yel-bebe suur-dɩ-kʋ̀b tub a sãwna sob ƴãw, ɛ́ a Naaŋmɩn dɩ a ʋ yel-bebe suur kʋ̀ ʋ.»

³²«Pɛ́rʋ wa n'ʋ a sãwna sob maalɛ nɩ a yel-bier-ír-bɛrʋ bàwr a, ʋ na ɩ n pɛ-nyãw a ƴã-gan zie kãw za na bɛ sãw a.

³³Ʋ na ír'ɩ a nũu dɔwlɩ a dʋ̃w zũú, ɛ́ ŋmãa ʋ a kɔkɔr a be bɛ na mɩ́ ŋma a nyɩw-a-za-bagɛ dʋn kɔkɛɛ a.

³⁴A bàwr-maalɛ na ɩ n a dʋ̃w zɩ̃ɩ nɩ nobir ƴãw a nyɩw-a-za-bàwr bàwr-maal-kuur ɩ́lɛ́ ƴãw, ɛ́ cir a zɩ̃ɩ za na cɛ a ƴãw a ʋlɩ bàwr-maal-kuur nɛ sɩɛmɩ́.

³⁵Bɛ na ír'ɩ a dʋ̃w zi-kãánɩ mɛ̃ a lɛ bɛ na mɩ́ ɩ pɛ́rʋ bɛ na maal'ɩ lãw-taa bàwr a ƴãw a, a bàwr-maalɛ na nyɩw a nɩ a bàwr-maal-kuur zu, lãwnɩ a bàwr nɛnɛ bɛ na nyɩw a Sore ƴãw a. Ʋ na tu n a yel-bebe suur-dɩ-kʋ̀b tub a sãwna sob ƴãw, ɛ́ a Naaŋmɩn dɩ a ʋ yel-bebe suur kʋ̀ ʋ.»