Read Dagara, Northern Zeremi 11 Bible Online

Zeremi 11 - Dagara, Northern bible

Zeremi 11

¹Ƴɛ̀rʋ ŋa n'ʋ a Sore tɩ ƴɛ̀r a Zeremi zie:

²«Nyɩ tɛr a wõ-taa ɩ̃ na maal'ɩ nyɩ a. Fʋ na ƴɛ̀r'ɩ a Zuda tẽw nɩbɛ nɩ a Zerizalɛm tẽw dem zie.

³Fʋ na yel bɛ na: “À ŋá n'a a Sore, a Ɩsɩrayɛl Naaŋmɩn, yere: ŋmɛ-ƴãw, a páw sob nɛ na bɛ bɛrɛ wone a wõ-taa ŋa ƴɛ̀r-bie a!

⁴A koro za a, ɩ̃ tɩ ɩ na a nyɩ sãàkʋm-kore yi a Eziptɩ tẽw pʋɔ, bɛ yi a vũu-tʋl-kpãkpã na na tʋ̃ɔ́ nyɩl kure a pʋɔ. A lɛn daar a, ɩ̃ tɩ kʋ̀ bɛ nɩ a wõ-taa ŋa baarɩ. Ɩ̃ tɩ yel bɛ na: Nyɩ bɛrɛ wone a ɩ̃ ƴɛ̀rʋ, ɛ́ sàwr a mɛ̃ a lɛ ɩ̃ na yere kʋ̀rɛ nyɩ a. A lɛn daar a, nyɩ na ɩ n a ɩ̃ nɩbɛ, ɩ̃ɩ ɩ a nyɩ Naaŋmɩn.

⁵À ŋá n'a ɩ̃ na tu a pɔb ɩ̃ na pɔ a nyɩ sãàkʋm-kore zie yel bɛ k'ɩ̃ɩ na kʋ̀ bɛ nɩ tẽw bʋ̀rʋ nɩ sɩwr na gbɔlɛ a. Ɛ́ be n'a nyɩ be a dɩ̃a.”» Ɩ̃ tɩ sɔw n'a: «A ɩ a lɛ, Sore e.»

⁶A Sore tɩ cãà na yel mɛ̃: «Cen tɩ hieri a ƴɛ̀r-bie á ŋá za a Zuda tẽ-bɛrɛ pʋɔ nɩ a Zerizalɛm sɛ́ɛ pʋɔ: “Nyɩ bɛrɛ wone a wõ-taa ŋa ƴɛ̀r-bie ɛ́ tuur a.

⁷A lɛn daar, ɩ̃ tɩ kpaalɩ bɛ nɩ kpɛ̃w kpɛ̃w za. Lɛ mɩ̀ n'a ɩ̃ ƴãw nũu kpaalɛ nɩ a nyɩɩm mɩ̀, yere nɩ: Nyɩ bɛrɛ wone a lɛ ɩ̃ na yere kʋ̀rɛ nyɩ a.”

⁸Ɛcɛ bɛ bɛ tɩ bɛr wõ ɩ, bɛ bɛ tɩ ƴãw tobr ɛ, bɛ tɩ tu n a bɛ pʋ-tɩɛr-faar. Lɛ n'a ɩ̃ tɩ ɩ a wõ-taa ƴɛ̀r-bie ɩ̃ na tɩ ƴãw nʋɔr kɛ́ bɛ tuur, ɛ́ bɛ bɛ tu a, a lo a bɛ zu.»

⁹Al pùorí, a Sore tɩ lɛb'a yel: «A Zuda tẽw nɩbɛ nɩ a Zerizalɛm tẽw dem bʋ n taa.

¹⁰Bɛ lɛb'a lo a bɛ sãàkʋm-kore na tɩ zawrɩ na bɛr wõ a ɩ̃ ƴɛ̀rʋ a yel-bebe pʋɔ. Bɛ tu n ŋmɩn-yoru pùor maalɛ a. A Ɩsɩrayɛl nɩbɛ nɩ a Zuda nɩbɛ sãw nɩ a wõ-taa ɩ̃ na tɩ maal'ɩ a bɛ sãàkʋm-kore a bɛr.

¹¹À na ɩ à ŋá a, à ŋá n'a a Sore yere: Ɩ̃ na ɩ na faa bɛ na kʋ̃ tʋ̃ɔ́ yi a ʋ pʋɔ a wa a bɛ zu. Bɛ na kõ na bʋɔlɩ mɛ̃, ɩ̃ɩ kʋ̃ bɛr wõ bɛ ɩ.

¹²A Zuda tẽ-bɛrɛ nɩbɛ nɩ a bɛlɩ dem na kpɩɛr a Zerizalɛm a zɛlɛ nɩ sõwfʋ a ŋmɩmɛ al bɛ na tɩ maalɩ bàwr kʋ̀ a zie. Ɛcɛ a ŋmɩmɛ á ŋá kʋ̃ tʋ̃ɔ́ faa bɛ a bɛ kpɩɛrʋ daar ɛ.

¹³A Zuda tẽw dem tɛr'ɩ ŋmɩmɛ a yãwmɛ sɛw a bɛ tẽ-bɛrɛ. Ɛ́ a Zerizalɛm tẽw a, bɛ mɛ n bàwr-maal-kube a yãwmɛ sɛw a sɛ́ɛ, kɛ́ bɛ mɩ́ maalɩ bagɛ kʋ̀ a Báàl-na-dɩ-kɛ́-Vĩ a.

¹⁴Ɛ́ a fʋ̃ʋ Zeremi a, taa zɛlɛ bom kãw za a nɩbɛ bɛ ŋa ƴãw ɛ, taa ɩrɛ kɛ̀ puoru bɩɩ yãayãa zɛlʋ kãw za dúor waar a ɩ̃ zie a bɛ ƴãw ɛ. Bʋ̃ʋ n'ʋ vɛ̃, ɩ̃ kʋ̃ bɛr wõ bɛ a lɛn daar bɛ nãà wa be a bɛ kpɩɛrʋ pʋɔ ɛ́ bʋɔlɛ mɛ̃ a ɩ.»

¹⁵«A nɩ-bʋʋrɛ, a mãa, a Sore, na nɔnɛ a maalɛ nɩ a bɛ pʋ-tɩɛr-faar. Bʋ̃ʋ n'ʋ bɛ wa ɩrɛ a ɩ̃ yir pʋɔ? A nɛ́ɛ bɛ na kone kʋ̀rɛ mɛ̃ a nɩ a bàwr-maal-nɛnɛ a, a na tʋ̃ɔ́ na ɩ a kpɩɛrʋ zãá nɩ bɛ bɩɩ? À ŋá n'a bɛ na tʋ̃ɔ́ nɩɩrɩ ʋ bɛr bɩɩ?

¹⁶Ɩ̃ tɩ kʋ̀ bɛ nɩ yúor: “Olivʋ tɩɛ na tɛr va-sɛblɛ kʋralɛ ɛ́ a ʋ wɔmɛ vɩɛl vɩɛl a.” Ɛcɛ damnʋ na dam kpɛ̃w kpɛ̃w za a pʋɔ, ɩ̃ ƴãw nɩ vũu a ʋ váar, ɛ́ a ʋ wuli kar kar.»

¹⁷A Sore, a kpɛnʋ-za-sob'ʋ tɩ sɛl ʋ. Ɛcɛ ƴɛrɛŋa a, ʋ ƴɛ̀rɛ nɩ dɔwrʋ ƴɛ̀rʋ kʋ̀rɛ ʋ, a faa a Ɩsɩrayɛl nɩ a Zuda ten dem na maalɩ a zũú. Bʋ̃ʋ n'ʋ vɛ̃, bɛ maal'ɩ bagɛ kʋ̀ a Báàl ƴãw a Sore suur ìr.

¹⁸A Sore tɩ yel'a kʋ̀ m, ɩ̃ɩ bãwnɩ a. Ʋ ɩ na ɩ̃ nyɛ̃ a ʋlɩ bom nɛ a ɩ̃ dɔ̃ dem na cɔbrɛ a.

¹⁹A mãa a, ɩ̃ tɩ ɩ na mɛ̃ péli-pɔwlɛ bɛ na cere nɩ a kʋb zie a. Ɩ̃ bɛ tɩ bãw ʋlɩ bom nɛ bɛ na cɔbrɛ a ɩ̃ ƴãw a ɩ. Bɛ tɩ yere na: «Tɩ cɛ a tɩɛ na cãà kpɛmɛ a lɔb! Tɩ ír ʋ a nɩ-vʋʋrɩ tẽw pʋɔ bɛr, a ʋ yúor ta cãà pore ɩ!»

²⁰Ɛcɛ a fʋ̃ʋ Sore, kpɛnʋ-za-sob, fʋ mɩ́ dɩ n a ƴɛ̀rʋ nɩ mɩnʋ. Fʋ mɩ́ jɛl'ɩ a nɩbɛ za bʋ̃-bɔbrɩ nɩ a bɛ tɩɛrʋ. Ɩ̃ na tʋ̃ɔ́ na nyɛ̃ a lɛ fʋ na na yáa a san a bɛ zu a, bʋ̃ʋ n'ʋ vɛ̃, fʋ̃ʋ n'ʋ ɩ̃ de a ɩ̃ yele kʋ̀.

²¹A na ɩ à ŋá a, à ŋá n'a a Sore yere cáarɛ nɩ a Anatɔtɩ[31] tẽw dem, a bɛl na bɔbr a ɩ̃ kũu ɛ́ yere: «Ta ƴɛ̀rɛ naaŋmɩn-ƴɛ̀r-manɛ ƴɛ̀rʋ a Sore yúor ƴãw ɛ, alɛ bɛ ɩ lɛ, tɩ na kʋ b a nɩ a tɩ nuru.»

²²Nyɛ̃ a lɛ a Sore, a kpɛnʋ-za-sob, na yere a: «Ɩ̃ na dɔwr'ɩ a nɩbɛ bɛ ŋa faa faa: a bɛ pɔlbili na kpi n a zɛbr zie, ɛ́ kɔ̃ kʋ a bɛ bidɛbr nɩ a bɛ pɔwyaar.

²³A ʋlɩ yũon nɛ ɩ̃ na na ìr a Anatɔtɩ tẽw dem ƴãw, ɩ a faa páw bɛ a, nɩr za bɛ cɩ̃ɛnɛ ɩ.»