Read Dagara, Northern Zeremi 14 Bible Online

Zeremi 14 - Dagara, Northern bible

Zeremi 14

¹Nyɛ̃ a ƴɛ̀rʋ a Sore na ƴɛ̀r kʋ̀ a Zeremi a wɛr na nyɔw a ƴãw a.

²«A Zuda nɩbɛ be n wahala pʋɔ, a ʋ tẽ-bɛrɛ fãw siwre na. Bɛ be n pʋ-sãwna kpɛ̃ɛ pʋɔ, bɛ zɩ̃ n tẽw, a Zerizalɛm cɛlsɩ dúor'ɩ saa.

³A nɩ-bɛrɛ tone nɩ a bɛ tõ-tõ-biir kɛ́ bɛ tɩ bɔ a kʋ̃ɔ. Bɛ mɩ́ ta n a sa-bie-kʋ̃ɔ-bɔwrɩ pɛr, bɛ nyɛ̃ kʋ̃ɔ-bir za ɩ, bɛ mɩ́ lɛb'a wa n bʋ̃-zawlɛ, a bɛ tɩɛrʋ sãw, pʋ-sãwna tɛr bɛ, bɛ su zuru.

⁴A saa na bɛ wa, ɛ́ a tẽsɔw pur pur a zũú a, a ka-kʋ́ɔrbɛ tɩɛrʋ sãw na, bɛ su n zuru.

⁵A wɩ̀ɛ pʋɔ a, a wala tɛɛ za mɩ́ dɔw nɩ a ʋ bile, cen kɛ́ bɛr, bʋ̃ʋ n'ʋ vɛ̃, va-ɓaar bɛ cãà be ɩ.

⁶A bòn-gaarɩ mɩ́ àr'ɩ a tãli na kpal a zu. A mɩ́ fõwne nɩ a sɛsɛb mɛ̃ gbõgbo-cili a. A mimie mɩ́ tɩ bàl'ɩ a mʋ̃ɔ na bɛ cãà be a bɔb ƴãw.»

⁷«A tɩ yel-bebe wa wule tɩ na sãw a, fʋ̃ʋ a, Sore e, ɩ ɩb kãw a fʋ yúor zũú. Sɩza n'a, kʋralɛ n'a tɩ zawrɛ fʋ, tɩ ɩ n sãwna dem a fʋ zie.

⁸A fʋ̃ʋ ƴãw a Ɩsɩrayɛl na ƴãw a ʋ tɩɛrʋ a, a fʋ̃ʋ na tɩ faa ʋ a kpɩɛrʋ daar a, bʋ̃ʋ n'ʋ so fʋ ɩrɛ mɛ̃ sãan a, a tẽw pʋɔ, mɛ̃ sɔr-tɔlɛ na bɩɛ k'ʋʋ gã ìr a?

⁹Bʋ̃ʋ n'ʋ so fʋ ɩrɛ mɛ̃ nɩr na bɛ tɛr fãw a, mɛ̃ gãdaa na kʋ̃ tʋ̃ɔ́ nɩr faa a? Ɛcɛ fʋ̃ʋ n'ɩ ŋa be a tɩ sɔgɔ, Sore e, fʋ̃ʋ so tɩ, ta bɛr tɩ tɩ lo ɩ.»

¹⁰À ŋá n'a a Sore ƴɛ̀rɛ a nɩbɛ bɛ ŋa ƴãw: «Sɩza, a nɩbɛ bɛ ŋa nɔnɛ nɩ cɔlʋ, bɛ bɛ zɩnɛ zi-been ɛ.» Ɛcɛ, bɛ na bɛ pɛlɩ a Sore pʋɔ a, ƴɛrɛŋa a, ʋ lɛb'a tɩɛrɩ a bɛ sãwna ɛ́ na dɔwrɩ bɛ a bɛ yel-bebe zũú.

¹¹A Sore yel mɛ̃ na: «Taa zɛlɛ bom kãw za a ɩ̃ zie a nɩ-bʋʋrɛ bɛ ŋa vla ƴãw ɛ.

¹²Bɛlɛ saa tɛr mʋta-tuo a, ɩ̃ kʋ̃ bɛr wõ a bɛ yãayãa zɛlʋ ɛ. Bɛlɛ saa maalɩ nyɩw-a-za-bagɛ, tɩr'ɩ de-kʋ̀b bome kʋ̀ m a, à á ŋá za kʋ̃ pɛlɩ a ɩ̃ pʋɔ ɩ. Ɛcɛ zɛbr, kɔ̃ nɩ jɛ̀lmɛ̃ bàalʋ n'a ɩ̃ na kʋ n bɛ pàw pɛr.»

¹³Ɩ̃ tɩ sɔw na: «'Woi, Sore Naaŋmɩn i, a ƴɛ̀r-manbɛ yere na kʋ̀rɛ a nɩbɛ à ŋá: “Nyɩ kʋ̃ bãw zɛbr ɛ, nyɩ kʋ̃ bãw kɔ̃ ɩ, ɛcɛ Naaŋmɩn na kʋ̀ nyɩ nɩ ƴã-ɓaarʋ mɩŋa a zie ŋa pʋɔ.”»

¹⁴A Sore tɩ sɔw mɛ̃ na: «Ziri n'ɩ a lɛ za a ƴɛ̀r-manbɛ na yere a ɩ̃ yúor ƴãw a. Ɩ̃ bɛ tõ bɛ ɩ, ɩ̃ bɛ yel yel za kʋ̀ bɛ ɩ, ɩ̃ bɛ ƴɛ̀r bɛ zie ɩ. A bɛ bʋ̃-nyɛrɩ ɩ n ziri, a yele bɛ na yere a bɛ tɛr pɛr ɛ, bɛl mɩŋa pʋ-tɩɛrʋ n'a.

¹⁵Alɛ n'a so a mãa, a Sore, ɩ̃ yere à ŋá a naaŋmɩn-ƴɛ̀r-manbɛ bɛ ŋa ƴãw: “A nɩbɛ bɛ ŋa yere na kɛ́ mãa yúor ƴãw n'a bɛ ƴɛ̀rɛ, ɛcɛ ɩ̃ bɛ tõ bɛ ɩ. Bɛ manɛ na kɛ́ zɛbr nɩ kɔ̃ kʋ̃ be a tẽw ŋa pʋɔ ɩ. Ɛcɛ a zɛbr nɩ a kɔ̃ n'a na baarɩ bɛ za!

¹⁶A kɔ̃ nɩ a zɛbr na kʋ n a bɛlɩ dem bɛ na ƴɛ̀r a naaŋmɩn-ƴɛ̀r-manbɛ ƴɛ̀rʋ ŋa kʋ̀ a. Bɛ na lɔb lɔb'ɩ a bɛ kũuni bɛr a Zerizalɛm sɛ́ɛ pʋɔ, ɛ́ nɩr za kʋ̃ be be ũù bɛ ɩ, a bɛl, a bɛ pɔwbɛ, a bɛ bidɛbr nɩ a bɛ pɔwyaar. Ɩ̃ na ɩ na a bɛ faa lɩɛbɩ lo a bɛ zu.”»

¹⁷«Fʋ na ƴɛ̀r'ɩ a ƴɛ̀rʋ ŋa kʋ̀ bɛ: Ɩ̃ bɔbr'a k'aa ɩ̃ mʋta-kʋ̃ɔ nãá gbɔlɛ ta tɛr ŋmãafʋ ɛ, mʋ̃tɔ̃w nɩ tɩ̃ɩsɔw! Bʋ̃ʋ n'ʋ vɛ̃, kpɩɛrʋ kpɛ̃ɛ páw nɩ a ɩ̃ nɩ-bʋʋrɛ na ɩrɛ nɩbaalʋ a, a ʋ natɩr sɩrɩ bɛ tɛr sanʋ ɛ.

¹⁸Mãa wa yi a wɩ̀ɛ pʋɔ a, nɩbɛ a zɛbr na kʋ a tɛwr nɛbɛ ɩ̃ mɩ́ nyɛ̃. Mãa wa kpɛ a tẽ-kpɛ̃ɛ pʋɔ a, nɩbɛ a kɔ̃ na kʋrɛ a tɛwr nɛbɛ ɩ̃ mɩ́ nyɛ̃. A naaŋmɩn-ƴɛ̀r-manbɛ nɩ a bàwr-maalbɛ cɔlɛ nɩ a tẽw: bɛ bɛ bãw a yel pɛr ɛ.»

¹⁹«Sore e, fʋ sɩrɩ na lɔb a Zuda bɛr bɩɩ? A Sɩyɔ̃ vʋla baar'ɩ a fʋ zie e? Bʋ̃ʋ n'ʋ so fʋ ƴãw tɩ bàalʋ na bɛ tɛr sanʋ a? Ƴã-ɓaarʋ n'a tɩ tɩ gùre, ɛcɛ bʋ̃-vla kãw za bɛ wa wa ɩ. Tɩ tɩ gù n a sanʋ daar, ɛcɛ dɛ̃bɩ̃ɛ n'a wa wa.

²⁰Sore e, tɩ sàw na kɛ́ tɩ bɛ tõ vla ɩ, tɩ sàw nɩ a tɩ sãàkʋm-kore sãwna. Tɩ sãw fʋ na.

²¹A fʋ yúor zũú a, ta jɛ a fʋ naalʋ-dà-kɔw-yúor bɛr ɛ, ta jewr'ʋ ɛ! Lɛb tɩɛrɩ a wõ-taa fʋ na maal'ɩ tɩ a, ta sãw ʋ bɛr ɛ.

²²A nɩ-bʋʋr-yoru ŋmɩn-bɛlɛbɛlɛ pʋɔ a, been be n be na tʋ̃ɔ́ ɩ kɛ̀ saa wa a? A salom tɛɛ za n'ʋ mɩ́ bɛr a kʋ̃ɔ a siw ɩ? Fʋ̃ʋ bɛ n'ɩ a Sore tɩ Naaŋmɩn ɛ? A fʋ ƴãw n'a tɩ ƴãw a tɩ tɩɛrʋ, bʋ̃ʋ n'ʋ vɛ̃, fʋ̃ʋ n'ʋ maalɛ à á ŋá za.»