Read Dagara, Northern Zeremi 17 Bible Online

Zeremi 17 - Dagara, Northern bible

Zeremi 17

¹«A Zuda nɩbɛ sãwna sɛb'a nɩ kur-nɔ-cɩlʋ bɩɩ kʋsɛ-bi-nyɩla kãw bɛ na bʋɔlɛ dɩamã a nɔ-cɩlʋ. Ʋ sɛb'ɩ a bɛ socie pʋɔ nɩ a bɛ bàwr-maal-kube ɩ́lɛ́ zu.

²Bɛ mɩ́ tɩɛrɛ nɩ a bɛ bàwr-maal-kube, a bɛ dà-barɩ nɩ a tɩ-zimpiri zimpiri a tãli-kɛrɩ zu, mɛ̃ a lɛ bɛ na mɩ́ tɩɛrɛ a bɛ bibiir a.

³Zuda nɩbɛ ɛ, nyɩɩm na maalɛ a ŋmɩn-bɛlɛbɛlɛ a tan zu nɩ a wɩ̀ɛ pʋɔ a, ɩ̃ na de nɩ a nyɩ tɛra, a nyɩ na-bome nɩ a nyɩ maalʋ-ziir tɩr bɛ zá. Ɩ̃ na ɩ n à à ŋá za a sãwna nyɩ na sãw a nyɩ tẽw za pʋɔ a zũú.

⁴A na fɛr'a kɛ́ nyɩ bɛr a tẽw nyɩ na so a, a ʋl ɩ̃ na tɩ kʋ̀ nyɩ a. Ɩ̃ na ɩ na nyɩ ɩ a nyɩ dɔ̃ dem gbãgbaar tẽ-yũo nyɩ na bɛ bãw a pʋɔ. Bʋ̃ʋ n'ʋ vɛ̃, nyɩ ɩ na a ɩ̃ suur vũu 'le, ɛ́ na dɩrɛ kʋralɛ.»

⁵À ŋá n'a a Sore yere: «Ŋmɛ-ƴãw, a páw a sob nɛ na ƴãw a ʋ tɩɛrʋ a nɩsaal ƴãw a, na bɔbr a ʋ fãw a nɩsaal bʋ̃-tɛrɩ pʋɔ, ɛ́ a ʋ socir zãá nɩ mɛ̃ a!

⁶Ʋ ŋmɛ̃ na mɛ̃ tɩle na be dɩlãpʋɔ pʋɔ a: ʋ kʋ̃ nyɛ̃ a nʋ̃ɔ̀ waa ɩ. Ʋ na be n a wɛja-kpalɛ kʋsɛbɛ pʋɔ, nyaarʋ tẽsɔw zu, be nɩr za na bɛ kpɩɛr a.

⁷Ɛcɛ maalʋ, a páw a sob nɛ na ƴãw a ʋ tɩɛrʋ a ɩ̃ ƴãw, ɩ̃ɩ lɩɛbɩ a ʋ tɩ̀ɛrɛ a.

⁸Ʋ ɩ na mɛ̃ tɩɛ na sɛl kʋ̃ɔ nʋɔr ɛ́ a ʋ nyɩgɛ tɛ siw a bàa lowr a. A tʋlʋ wa waar'a, ʋ bɛ zɔrɛ bom za ɩ, a ʋ váar mɩ́ sɔb'ɩ kʋralɛ. Wɛr yũon tɔr za bɛ vʋ̃ɔnɛ ʋ pʋ̀lá ɩ, ʋ mɩ́ wɔnɛ nɩ kʋralɛ[33].

⁹Bom bɛ be be bɛ̀lɛ zuo a nɩsaal socir ɛ. Nɩr kʋ̃ tʋ̃ɔ́ ʋ sanɩ ɛ, nɩr kʋ̃ tʋ̃ɔ́ ʋ bãw ɛ.

¹⁰A mãa, a Sore, ɩ̃ mɩ́ jiel'ɩ a nɩsaalbɛ za tɩɛrʋ nɩ a bɛ bʋ̃-bɔbrɩ. À ŋá n'a ɩ̃ mɩ́ tʋ̃ɔ́ ya ŋa za man nɩ a ʋ ɩ-ɩrɩ, man nɩ a ʋlɩ bom nɛ a ʋ tome na wa n a.

¹¹Kɔrnyɛ̃ na ũú nɩ jɛlɛ ʋ na bɛ lɔb a, à ŋá n'a nɩr na kpɛ nyãnyu-naalʋ a ŋmɛ̃. A ʋ nyɔ-vʋʋrʋ põ-zɛ̃-taa pʋɔ a, a ʋ naalʋ mɩ́ bɛr ʋ na, ɛ́ a baarʋ daar ʋ ɩ mɛ̃ dãbol a.»

¹²Naalʋ-dà-kɔw-yúor be n a saa-zu a pɛr-tib daar za: a tɩ zi-sõw beba zie n'a.

¹³Sore e, a Ɩsɩrayɛl ƴãw nɩ a ʋ tɩɛrʋ a fʋ ƴãw. Vĩ, a nyɔw a bɛlɩ dem na zawrɛ fʋ bɛrɛ a! A bɛlɩ dem na zãánɛ nɩ fʋ a, bɛ ɩ mɛ̃ yée na sɛb tanɛ pʋɔ a! Bʋ̃ʋ n'ʋ vɛ̃, bɛ zawrɩ fʋ na bɛr, Sore e, fʋ̃ʋ na ɩ a bul-nʋɔr na tɩrɛ a nyɔ-vʋʋrʋ a.

¹⁴Sanɩ mɛ̃ Sore e, ɩ̃ɩ na sanɩ na. Faa mɛ̃, ɩ̃ɩ na nyɛ̃ nɩ a faafʋ. Bʋ̃ʋ n'ʋ vɛ̃, a fʋ danʋ n'a ɩ̃ yiele.

¹⁵A nɩbɛ yere nɩ a ɩ̃ zie à ŋá: «A Sore ƴɛ̀rʋ ʋ na ƴɛ̀r a wa? A ƴɛ̀rʋ ŋa ʋ tu wɛ!»

¹⁶Ɩ̃ bɛ fɛr fʋ kɛ́ fʋ ɩ a kpɩɛrʋ wa ɩ, Sore e. Ɩ̃ bɛ tɩ bɔbr k'aa bibi-faa ŋa ta ɩ, fʋ bãwnɩ a na. A ʋlɩ bom nɛ ɩ̃ na yel a, a fʋ niŋé na ɩ̃ yel.

¹⁷Ta ɩ dɛ̃bɩ̃-bom a ɩ̃ zie ɩ, a fʋ̃ʋ na ɩ a ɩ̃ tɩ̀ɛrɛ a kpɩɛrʋ bibir a.

¹⁸Vĩ, a nyɔw a bɛlɩ dem na dɔwrɛ mɛ̃ a, ɛ́ bɛr a mãa! Dɛ̃bɩ̃ɛ, a tɛr bɛ bɛ màwr, ɛ́ bɛr a mãa! Ɩ a kpɩɛrʋ bibir wa a bɛ zu, sãw bɛ bɛr pelẽpelẽ!

¹⁹À ŋá n'a a Sore yel mɛ̃: «Cen tɩ àr a dɩ̃dɔ-kpɛ̃ɛ ʋl a Zuda tẽw na-mɩnɛ na mɩ́ tuur kpɩɛr ɛ́ yire a ƴãw. Al pùorí, ɩ a lɛ mɩ̀ a Zerizalɛm dɩ̃dɛɛ za ƴãw.»

²⁰Fʋ na yel bɛ nɩ à ŋá: Zuda tẽw na-mɩnɛ ɛ, Zuda tẽw nɩbɛ nɩ a nyɩɩm za na kpɩɛr a Zerizalɛm, ɛ́ tuur a dɩ̃dɛɛ á ŋá ƴãw kpɩɛr a, nyɩ bɛr wõ a Sore ƴɛ̀rʋ.

²¹À ŋá n'a a Sore yere: A pɩ̃ɛnʋ-bibir a, nyɩ gù nyɩ tʋɔra vla taa tuore tuor ɛ, ɛ́ taa ɩrɛ a yire a Zerizalɛm dɩ̃dɛɛ ƴãw ɛ[34].

²²Nyɩ mɩ̀ kʋ̃ tuo tuor kãw za yi n a nyɩ yie pʋɔ a pɩ̃ɛnʋ-bibir ɛ, nyɩ bɛ tone ton kãw za ɩ. Ɛcɛ nyɩ na de nɩ a pɩ̃ɛnʋ-bibir ʋ ɩ bibi-tuo mɛ̃ a lɛ ɩ̃ na tɩ ƴãw a nʋɔr kʋ̀ a nyɩ sãàkʋm-kore a[35].

²³Bɛl a, bɛ bɛ tɩ bɛr wõ ɩ, bɛ bɛ tɩ ƴãw tobr ɛ, bɛ tɩ tãa nɩ kpaar, bɛ bɛ tɩ bɔbr kɛ́ bɛ bɛr wõ ɛ́ de a wulu ɛ.

²⁴A Sore yere na: «Ɛcɛ a nyɩɩm a, nyɩ bɛrɛ wone vla. A pɩ̃ɛnʋ-bibir a, nyɩ taa ɩrɛ tuor a yire a tẽ-kpɛ̃ɛ ŋa dɩ̃dɛɛ ƴãw ɛ, nyɩ de a bibir ŋa kʋ̀ m ɛ́ taa tone ton kãw za ɩ.

²⁵A lɛn daar a, a na-mɩnɛ na zɩnɛ a Daviir naalʋ-dà-kɔw zu, ɛ́ mɩ́ zɔm a wur bɩɩ zɩ̃ a zɛbr-torko zu a, na tuur'a yire a tẽ-kpɛ̃ɛ ŋa dɩ̃dɛɛ ƴãw kʋralɛ. A bɛ tõ-tõ-bi-bɛrɛ, a Zuda tẽw nɩbɛ nɩ a bɛlɩ dem na kpɩɛr a Zerizalɛm a mɩ̀ na tuur'a yire a be, ɛ́ a tẽ-kpɛ̃ɛ ŋa na tɛr'ɩ nɩbɛ kʋralɛ.

²⁶Nɩbɛ na yi n a Zuda tẽ-bɛrɛ pʋɔ, a ziir na viiri koli a Zerizalɛm a, nɩ a Bɛ̃zamɛ dɔwlʋ tẽw pʋɔ, bɛ na yi n a Ba-Peyi, a Tãw nɩ a Negɛɛvʋ vuo pʋɔ wa. Bɛ na wa n a Ŋmɩn-yir-kpɛ̃ɛ pʋɔ nɩ nyɩw-a-za-bagɛ, bàwr-yoru, de-kʋ̀b bome, tɩ-suur-zɔ̃-na-nyùur-vla-vla-a lãwnɩ danʋ bàwr-maal-bome.

²⁷Ɛcɛ nyɩmɛ bɛ wa bɛr wõ m a, nyɩmɛ bɛ wa sàw de a pɩ̃ɛnʋ-bibir kʋ̀ m ʋ ɩ a ɩ̃ bibir a, nyɩmɛ wa tuore tuor yire nɩ a Zerizalɛm dɩ̃dɛɛ ƴãw a pɩ̃ɛnʋ-bibir a, ɩ̃ na ƴãw nɩ vũu a tẽ-kpɛ̃ɛ ŋa. A vũu na dɩ n a ʋ yir-vɩɛlɩ vɩɛlɩ ɛ́ kʋ̃ kpiiri ɛ.»