Read Dagara, Northern Zeremi 23 Bible Online

Zeremi 23 - Dagara, Northern bible

Zeremi 23

¹A Sore yere na: «Nyɛ̃ baw-bio a! A ɩ̃ nɩbɛ kaarbɛ ɩ n dʋ̃-cɩ̃ɩn-faar na bɛr a ɩ̃ dʋn a kpiir ɛ́ bɔrɛ gʋɔr a.»

²À ŋá n'a a Sore, a Ɩsɩrayɛl Naaŋmɩn, yere a dʋ̃-cɩ̃ɩnbɛ bɛ ŋa ƴãw: «Nyɩ bɛr'ɩ a ɩ̃ dʋn a bɔrɛ ɛ́ yaarɛ a ziir za. Nyɩ bɛ kaa a zie ɩ. A lɛ pʋɔ a, a mãa, ɩ̃ na kaa nɩ a nyɩ zie, a faa nyɩ na maalɩ a zũú, a Sore n'ʋ yel!

³Mãa mɩŋa na ɓã n a ɩ̃ dʋn al na cɛ a taa, a ten al za pʋɔ ɩ̃ na diw a yaarɩ a. Ɩ̃ na lɛb'a tɛr a wa n a mʋ̃ɔ 'wɔbrʋ ziir. A na wa dɔw na yɛ̀r a be yaga za.

⁴Ɩ̃ na ƴãw nɩ dʋ̃-cɩ̃ɩn-sɩza mɩnɛ bɛ cɩ̃ɩnɛ a. Ɛ́ a bɛl zũú a, a kʋ̃ cãà bãw dɛ̃bɩ̃ɛ nɩ pʋl-vʋ̃ɔ ɩ. Been za bɛ lɛb cɩ́ɛr ɛ, a Sore n'ʋ yere.»

⁵A Sore yere na: «A bibir vɩɛrɛ na, ɩ̃ na ɩ Daviir bi-mɩŋa dɔw. Ʋ na ɩ n nãà na bãw a naalʋ-dɩb a, ʋ na ɩrɛ nɩ a lɛ-na-tu-sɔr-a, ɛ́ tuur a mɩnʋ a tẽw pʋɔ.

⁶A ʋ daar a, a Zuda na nyɛ̃ nɩ a faafʋ, a Ɩsɩrayɛl na vʋʋrɛ nɩ zoom bɛ bãw damnʋ ɛ. Nyɛ̃ a yúor bɛ na na bʋɔlɛ ʋ a: “A Sore n'ɩ a tɩ mɩnʋ.”

⁷A Sore yere na: Bibir na vɩɛ na, nɩr kʋ̃ mɩ́ lɛb yel: “Ɩ̃ pɔrɛ nɩ nɩ a Sore na vʋʋrɛ a, ʋl na ɩ a Ɩsɩrayɛl nɩbɛ yi a Eziptɩ tẽw a ɩ...!”

⁸Ɛcɛ bɛ na mɩ́ yel'a: “Ɩ̃ pɔrɛ nɩ nɩ a Sore na vʋʋrɛ a, ʋl na ɩ a Ɩsɩrayɛl nɩbɛ yi a saa-pɛrɩ́-gʋba-lowr ten nɩ a ziir al za ʋ na diw bɛ yaarɩ a, lɛb wa zɩ̃ a bɛ tẽw pʋɔ a!”»

⁹Ƴɛ̀rʋ na ƴɛ̀r càar'ɩ a naaŋmɩn-ƴɛ̀r-manbɛ a. A ɩ̃ pʋɔ za sãw na, a ɩ̃ ƴã-gan za màwr'a. Ɩ̃ ɩ na mɛ̃ dã-kuole a, mɛ̃ nɩr divɛ̃ na tʋ̃ɔ́ a. A Sore, a Naaŋmɩn na ɩ sõw a ƴãw n'a, nɩ a ʋlɩ bom nɛ ʋ na yel a:

¹⁰«A tẽw paal'ɩ pɩ̃ɔ-yel-maalbɛ. A faa maalʋ ƴãw n'a bɛ mɩ́ zɔrɛ, bɛ tɛr'ɩ kanyir a yele al na bɛ sɛwnɩ ɩb a ƴãw. A tẽw be n wahala pʋɔ ŋmɛ-ƴãw kãw zũú. A dʋn mʋ̃ɔ 'wɔbrʋ ziir ko n a za.»

¹¹A Sore yere na: «A naaŋmɩn-ƴɛ̀r-manbɛ nɩ a bàwr-maalbɛ ɩ n nɩ-faar: a ɩ̃ yir tɛɛ za pʋɔ a, ɩ̃ nyɛ̃ nɩ a faa bɛ na maalɩ a.

¹²Alɛ n'a so a bɛ sɔ́r na lɩɛbɩ sãsaalʋ. Bɛ na ŋmɩɛr'ɩ taa a lige pʋɔ lore. Ɩ̃ na ɩ na kpɩɛrʋ wa a bɛ zu, a yũon ʋl ɩ̃ nãà wa sowre bɛ bom a.» À à ŋá na a Sore yere.

¹³«A ʋlɩ bom ɩ̃ na tɩ nyɛ̃ a Samaari tẽw dem naaŋmɩn-ƴɛ̀r-manbɛ zie a tɩ dam mɛ̃ nɩ yaga za, a Sore n'ʋ yel. Bɛ tɩ ƴɛ̀rɛ nɩ a Báàl yúor ƴãw, bɛ tɩ ɩrɛ nɩ a ɩ̃ nɩ-bʋʋrɛ, a Ɩsɩrayɛl, ʋ bɔrɛ.

¹⁴Ɛcɛ a Zerizalɛm naaŋmɩn-ƴɛ̀r-manbɛ zie, ɩ̃ nyɛ̃ nɩ yele na kpɛ faa ɩrɛ dɛ̃bɩ̃ɛ a: bɛ maalɛ nɩ pɩ̃ɔ-yele, bɛ vʋʋrɛ nɩ a gɛgɛrʋ pʋɔ, ziri n'ɩ a bɛ bom, bɛ mɩ́ tɩ̀ɛ nɩ a bɛlɩ dem na maalɛ a faa a. A na ɩ à ŋá a, nɩr za kʋ̃ tʋ̃ɔ́ lɛb bɛr a faa maalʋ ɛ. Mãa zie a, bɛ za ŋmɛ̃ na mɛ̃ a Sodɔm tẽw dem a. A Zerizalɛm tẽw dem ŋmɛ̃ na mɛ̃ a Gomɔɔr tẽw dem a.»

¹⁵A lɛ pʋɔ a, à ŋá n'a a Sore, a kpɛnʋ-za-sob yere a naaŋmɩn-ƴɛ̀r-manbɛ ƴãw: «Ɩ̃ na ƴãw na bɛ 'wɔb tɩ-va-tuo, ɛ́ ƴãw bɛ nyũ kʋ̃ɔ na tɛr lɔw a, bʋ̃ʋ n'ʋ vɛ̃, a Zerizalɛm tẽw naaŋmɩn-ƴɛ̀r-manbɛ zie n'a a faalʋ yire pàwr a tẽw za.»

¹⁶À ŋá n'a a Sore, a kpɛnʋ-za-sob yere: «Nyɩ ta bɛrɛ wone a naaŋmɩn-ƴɛ̀r-manbɛ bɛ ŋa ƴɛ̀rʋ ɛ, bɛ bɛlɛ nyɩ na. A yele bɛ na yere kʋ̀rɛ nyɩ a ɩ n a bɛl mɩŋa pʋ-tɩɛrʋ, a bɛ yi a mãa zie ɩ.

¹⁷Bɛ mɩ́ nyɔw nɩ nyãa ɛ́ yel kʋ̀ a bɛlɩ dem na ɩrɛ mɛ̃ laar a à ŋá: “A Sore yel'a: A yele za na ɩ n vla a nyɩ zie!” Ɛ́ yel a bɛlɩ dem na tuur a bɛl mɩŋa pʋ-tɩɛrʋ tɛwr a: “Faa kʋ̃ páw nyɩ ɛ.”

¹⁸Ɛcɛ ãa n'ʋ tɩ be a ɩ̃ yã-wulbɛ kpaarʋ pʋɔ? Ãa n'ʋ nyɛ̃ ɛ́ wõ a ɩ̃ ƴɛ̀rʋ? Ãa n'ʋ cɛlɩ a ɩ̃ ƴɛ̀rʋ ƴãw, ɛ́ bãw a pɛr?»

¹⁹A Sore saa-sɛsɛb tarɛ na, a ʋ suur ìre na. Sɛsɛb-pɩl kãw lɩɛbɛ na, ʋ lore nɩ a nɩ-faar zurú.

²⁰A Sore suur bɛ ɓãanɛ ʋlɛ bɛ wa tõ a lɛ za ʋ na yel a ɩ. A pùorí n'a nyɩ na bãw a pɛr.

²¹«Ɩ̃ bɛ tõ a naaŋmɩn-ƴɛ̀r-manbɛ bɛ ŋa ɩ, ɛ́ bɛ zɔrɛ. Ɩ̃ bɛ ƴɛ̀r ƴɛ̀rʋ za a bɛ zie ɩ, ɛ́ bɛ ƴɛ̀rɛ a ɩ̃ yúor ƴãw.

²²Bɛlɛ tɩ be a ɩ̃ yã-wulbɛ kpaarʋ pʋɔ a, bɛ nãà ɩ na a ɩ̃ nɩbɛ bãw a ɩ̃ ƴɛ̀rʋ, bɛ nãà ɩ na a nɩbɛ bɛr a bɛ sɔr-faa nɩ a bɛ ɩ-faar bɛ na ɩrɛ a.»

²³A Sore yere na: «Ɩ̃ nɔ̃w ɩ n bom na pɩɛlɩ a Naaŋmɩn tɛwr bɩɩ? Ɩ̃ mɩ̀ bɛ ɩ bom na zãá a Naaŋmɩn ɛ?»

²⁴A Sore sowre na: «Nɩr saa sɔwlɩ a, a mãa, ɩ̃ kʋ̃ nyɛ̃ ʋ bɩɩ? Ɩ̃ be n zie za, a salom zu nɩ a tẽw zu.» À à ŋá n'a a Sore yel.

²⁵«A mãa, a Sore a, ɩ̃ wõ n a naaŋmɩn-ƴɛ̀r-manbɛ ƴɛ̀rʋ. Bɛ yel'a kɛ́ bɛ ƴɛ̀rɛ nɩ a ɩ̃ yúor ƴãw, ɛcɛ ziri n'a. Bɛ yere na: “Ɩ̃ zánɩ nɩ zánʋ! Ɩ̃ zánɩ nɩ zánʋ!”

²⁶Debor'a a na ɩ à à ŋá tɩ ta? Bʋ̃ʋ n'ʋ be a naaŋmɩn-ƴɛ̀r-manbɛ bɛ ŋa zuru pʋɔ, bɛ na mɩ́ wa yere yele na ɩ ziri a, nɩ bome bɛl mɩŋa na tɩɛrɩ a?

²⁷Bɛ mɩ́ tɩɛr'a kɛ́ bɛ ɩ a ɩ̃ nɩbɛ yiiri a ɩ̃ yúor, a bɛ zánʋ bɛ na mɩ́ manɛ kʋ̀rɛ taa a zũú, mɛ̃ a lɛ a bɛ sãàkʋm-kore na tɩ tu a bɛ Báàl yiiri a ɩ̃ yúor bɛr a.

²⁸Naaŋmɩn-ƴɛ̀r-manɛ wa zánɩ zánʋ a, ʋ manɩ a ʋ zánʋ! Ɛcɛ ʋlɛ wa tɛr a ɩ̃ ƴɛ̀rʋ na ƴɛ̀r a, ʋ ƴɛ̀r a tori!» A Sore yere na: «Ùr nɩ bʋ̃-bie na tʋ̃ɔ́ na ɩ been bɩɩ?

²⁹A ɩ̃ ƴɛ̀rʋ bɛ ɩ mɛ̃ vũu a ɩ? A bɛ ɩ mɛ̃ 'hama na mɩ́ ŋmɛ pìir wɛl a ɩ?»

³⁰«A na ɩ à ŋá a, ɩ̃ na ìr'ɩ a naaŋmɩn-ƴɛ̀r-manbɛ bɛ ŋa na zure taa a ɩ̃ ƴɛ̀rʋ a ƴãw, a Sore n'ʋ yere.

³¹Ʋ̃ʋ, a Sore yere na, ɩ̃ na ìr'ɩ a naaŋmɩn-ƴɛ̀r-manbɛ bɛ ŋa na mɩ́ de a bɛl mɩŋa ƴɛ̀rʋ ɩ a ɩ a mãa ƴɛ̀rʋ a ƴãw.

³²Ɩ̃ na ìr'ɩ a bɛ ƴãw. A bɛ zánʋ ɩ n ziri tɛwr. Bɛlɛ wa manɛ a a, bɛ mɩ́ bɛlɛ nɩ a nɩbɛ nɩ a bɛ ƴɛ̀r-ziri nɩ a bɛ ƴɛ̀r-zawlɛ. Mãa a, ɩ̃ bɛ yel kɛ́ bɛ ɩ bom ɛ. Bɛ bɛ tɛr yel-ɩra kãw za a ɩ̃ nɩbɛ zie ɩ.» A Sore n'ʋ yel.

³³A Sore yel'ɩ a Zeremi: «Naaŋmɩn-ƴɛ̀r-manɛ, bɩɩ bàwr-maalɛ, bɩɩ nɩ-sãsaralɛ wa sowri fʋ: “A Sore ƴɛ̀rʋ n'ɩ buor? Tuor-buor'ʋ ʋ tuo tɩ a?” Fʋ na sɔw na: “Nyɩmɛ nɛbɛ ɩ tuor, ɩ̃ɩ na tow nyɩ na bɛr.”

³⁴Naaŋmɩn-ƴɛ̀r-manɛ, bɩɩ bàwr-maalɛ, bɩɩ nɩ-sãsaralɛ wa ƴɛ̀rɛ “tuor a Sore na tuo ʋ a” ƴɛ̀rʋ a, ɩ̃ na ìr'ɩ a nɩr nɛ nɩ a ʋ yir dem ƴãw.

³⁵Nyɩ nyɛ̃ a lɛ nyɩ na na sowre taa a: “A Sore sɔw na kɛ́ bʋnʋ?”, “A Sore yel'a kɛ́ bo?”

³⁶Ɛcɛ nyɩ kʋ̃ lɛb ƴɛ̀r “tuor Sore na tuo nɩr a” ƴɛ̀rʋ towtow ɛ. Ŋa za ƴɛ̀rʋ n'ʋ na mɩ́ ɩ a tuor, bʋ̃ʋ n'ʋ vɛ̃, nyɩ mɩ́ sãw nɩ a Naaŋmɩn na vʋʋrɛ a, a Sore kpɛnʋ-za-sob, a tɩ Naaŋmɩn ƴɛ̀rʋ bɛr.

³⁷Nyɛ̃ a lɛ fʋ na na mɩ́ sowri naaŋmɩn-ƴɛ̀r-manɛ a: “A Sore sɔw fʋ na kɛ́ bʋnʋ? A Sore yel'a kɛ́ bo?

³⁸Ɛcɛ, nyɩmɛ wa cãà ƴɛ̀rɛ “tuor a Sore na tuo nyɩ a” ƴɛ̀rʋ, ɩ̃ na saa diw nyɩ kɛ́ nyɩ ta yere a lɛ a, à ŋá n'a a mãa, a Sore, yere:

³⁹Ɩ̃ na tuo nyɩ na mɛ̃ tuor a, ɩ̃ɩ na lɔb nyɩ na bɛr a ɩ̃ niŋé nyɩ zãá, a nyɩɩm nɩ a tẽw ʋl ɩ na kʋ̀ nyɩ, a nyɩɩm nɩ a nyɩ sãàkʋm-kore a.

⁴⁰Ɩ̃ na ƴãw nyɩ nɩ vĩ nɩ yo-sãw kʋralɛ, nɩr na kʋ̃ tʋ̃ɔ́ yiiri a.»