Read Dagara, Northern Zeremi 3 Bible Online

Zeremi 3 - Dagara, Northern bible

Zeremi 3

¹A Sore yel'a: A ɩ mɛ̃ dɛb zawr'ɩ a ʋ pɔw bɛr, ʋ yi a ʋ zie tɩ kul dɛb-yũo a, ʋ tɛr'ɩ sɔ́r na lɛb kul a pɔw ŋa a[10]? Ʋ̃ʋ'hʋ̃! A tẽw na dɛw nɩ ʋ za. Ɛcɛ a fʋ̃ʋ a, Ɩsɩrayɛl i, fʋ tõ n pɔw-yɛm tome nɩ nɩ-yaga ɛ́ bɔbr kɛ́ fʋ lɛb wa a ɩ̃ zie! A Sore n'ʋ yel.

²Dʋɔ a zu a tãli lowr ɛ́ jɩ́r nyɛ̃, tãli-been be n be zie fʋ bɛ gã nɩ a fʋ sɛn kãw ɛ? Fʋ mɩ́ tɩ zɩ̃ n a sɔ́r nʋɔr gùre a fʋ sɛnbɛ, mɛ̃ a wɛja-kpalɛ pʋɔ nɩ-yʋɔra na gùre a nɩbɛ ʋ na na ŋmãa a. Fʋ dɛw nɩ a tẽw nɩ a fʋ pɔw-yɛm ɩ-ɩrɩ, nɩ a fʋ cenu na bɛ vɩɛl a.

³Lɛ n'a ɩ̃ bɛ tɩ bɛr a saa kʋ̀ b ɛ, ɛ́ a saa bɛ wa a sɩ̃ɔ ɛ. Ɛcɛ fʋ cãà na kpãa tobr tone a fʋ pɔw-yɛm tome, fʋ bɛ sàw a fʋ sãwna ɩ.

⁴Ɛ́ ƴɛrɛŋa fʋ sʋ̃ɔmɩ sàw kone cɔwr mɛ̃ yere: «Ɩ̃ sãà, fʋ̃ʋ ɩ̃ pɔ̀lʋ daarɩ́ bá a!» Fʋ sowre nɩ fʋ tʋɔra:

⁵«Ʋ na tɛr'ɩ a ʋ suur kʋralɛ bɩɩ? Ʋ kʋ̃ bɛr a baarɩ ɛ?» À ŋá n'a fʋ mɩ́ yere ɛ́ cãà maalɛ a faa a, ɛ́ mɩ́ bãw ʋ maalɩ vla za!

⁶A nãà Zozɩasɩ[11] daar a, a Sore tɩ yel mɛ̃ na: «Fʋ nyɛ̃ nɩ a ʋlɩ bom nɛ a Ɩsɩrayɛl a tɩɛrʋ na lɩɛbɛ a na ɩ a? Ʋ do n tãw za na kɛrɩ a zu, ʋ cen nɩ tɩ-zimpiri za pile tɩ tõ a pɔw-yɛm tome a be.

⁷Ɩ̃ tɩ tɩɛr'ɩ ɩ̃ pʋɔ à ŋá: “À á ŋá za pùorí a, ʋ na lɛb'a wa a ɩ̃ zie.” Ɛcɛ a ʋ yɛb, a Zuda na bɛ tu a Sore a, nyɛ̃ a na.

⁸Ɩ̃ zawr'ɩ a Ɩsɩrayɛl a tɩɛrʋ na lɩɛbɛ a bɛr, ʋ na tɩ maalɩ pɩ̃ɔ-yele a ƴãw, ɛ́ kʋ̀ ʋ a zawr-bɛrʋ sɛbɛ. Ɛcɛ, ɩ̃ nyɛ̃ na k'aa ʋ yɛb, a Zuda na bɛ tu a Sore a, bɛ zɔ dɛ̃bɩ̃ɛ kãw za ɩ. Ʋ mɩ̀ nɩ̃ɛ na cen tɩ tõ a pɔw-yɛm tome.

⁹Ʋ maal'ɩ pɩ̃ɔ-yele nɩ kʋsɩɛr nɩ dàa ŋmɩmɛ, ʋ dɛw nɩ a tẽw nɩ a ʋ pɔw-yɛm ɩ-ɩrɩ na ɩrɛ vĩ a.

¹⁰Ɛ́ a na saa ɩ à ŋá a, a Ɩsɩrayɛl yɛb Zuda na bɛ tu a Sore a bɛ lɛb wa ɩ̃ zie nɩ ʋ pʋɔ za ɩ: a ʋ ɩb-lɩɛbʋ bɛ ɩ sɩza ɩ, a mãa, a Sore, mãa n'ʋ yere.»

¹¹A Sore tɩ yel'a ƴãw pʋɔ: «A Zuda na bɛ tu a Sore a niŋé a, a Ɩsɩrayɛl a tɩɛrʋ na lɩɛbɛ a na tʋ̃ɔ́ na yel k'ʋʋ ɩ n nɩ-mɩŋa.

¹²Cen tɩ cɩɩrɛ a ƴɛ̀r-bie á ŋá bɛrɛ a saa-pɛrɩ́-gʋba-lowr: “Lɛb wa, fʋ̃ʋ Ɩsɩrayɛl a tɩɛrʋ na lɩɛbɛ a! Ɩ̃ kʋ̃ cãà sãw niwn ƴãw fʋ ɛ. Sɩza, ɩ̃ ɩ n bá na-bɛ-lɛbr-pùor a, ɩ̃ bɛ tɛrɛ nɩ fʋ suur kʋralɛ ɩ, mãa n'ʋ yel, a mãa, a Sore.

¹³Dɛ́ sàw a fʋ sãwna: fʋ gáarɩ nɩ a ɩ̃ zu, a mãa Sore fʋ Naaŋmɩn zu. Fʋ zɔ na cɔlɩ a ziir za, a ŋmɩn-sãanbɛ zie, a tɩ-zimpiri za pile, ɛ́ bɛ bɛr wõ a ɩ̃ ƴɛ̀rʋ ɛ, a Sore n'ʋ yel.”»

¹⁴Bibiir a tɩɛrʋ na lɩɛbɛ a, nyɩ lɛb wa, a Sore n'ʋ yere, bʋ̃ʋ n'ʋ vɛ̃, mãa n'ʋ ɩ a nyɩ zu-sob! Ɩ̃ na de nyɩ na, nɩ-been tẽ-kpɛ̃ɛ pʋɔ, nɩbɛ ayi tẽle pʋɔ, ɩ̃ɩ na lɛb'a tɛr nyɩ wa n a Sɩyɔ̃ tẽw pʋɔ.

¹⁵Ɩ̃ na kʋ̀ nyɩ nɩ cɩ̃ɩnbɛ[12] na pɛlɩ a ɩ̃ pʋɔ a. Bɛ na kaarɛ nyɩ na nɩ yã nɩ yã-bãwfʋ.

¹⁶«A Sore cãà na lɛb yere: a lɛn daar a, nyɩ na yãwmɛ na ɛ́ dɔw paalɩ a tẽw. Bɛ kʋ̃ lɛb ƴɛ̀rɛ a wõ-taa daga ƴɛ̀rʋ ɛ, nɩr kʋ̃ cãà tɛr a ʋ tɩɛrʋ ɛ, bɛ na yiir ʋ na bɛr, bɛ kʋ̃ bãwnɩ ʋ na bɛ ka be a ɩ, nɩr bɛ lɛb maalɛ bʋ̃-yoru ɛ.

¹⁷A lɛn daar a, bɛ na bʋɔlɛ nɩ a Zerizalɛm kɛ́ “Sore naalʋ-dà-kɔw”. A nɩ-bʋʋr-yoru na zɔ na ɓã taa a ɩ̃ zie, a Sore yúor na kʋ̀ a Zerizalɛm a zũú, ɛ́ bɛ na zawr'ɩ a bɛ tɩɛr-faar bɛr.

¹⁸A lɛn daar a, a Zuda tẽw nɩbɛ na cen na tɩ páw a Ɩsɩrayɛl nɩbɛ, ɛ́ bɛ za ɓã taa yi a saa-pɛrɩ́-gʋba-lowr tẽw wa a tẽw ʋl ɩ̃ na kʋ̀ a bɛ sãàkʋm-kore k'ʋʋ ɩ a bɛ sób a pʋɔ[13].»

¹⁹Ɩ̃ tɩ tɩɛr'ɩ ɩ̃ pʋɔ à ŋá: «Ɩ̃ tɩ bɔbr'a k'ɩ̃ɩ nãà sɔr fʋ ƴãw a ɩ̃ bidɛbr pʋɔ, ɛ́ kʋ̀ b tẽw na vɩɛl vɩɛl a, a tẽ-daa zi-vla za zie!» Ɩ̃ tɩ tɩɛr'ɩ ɩ̃ pʋɔ: Fʋ na bʋɔlɛ mɛ̃ na: “Ɩ̃ sãà”, ɛ́ fʋ kʋ̃ lɛb gùr pùor cɔw mɛ̃ ɩ.

²⁰Ɛcɛ, Ɩsɩrayɛl nɩbɛ ɛ, mɛ̃ a lɛ pɔw na mɩ́ bɛ̀lɩ a ʋ sɩr a, lɛ n'a nyɩ bɛ̀lɩ mɛ̃. A mãa, a Sore, mãa n'ʋ yel a lɛ.

²¹Cɛlsɩ yire nɩ a maalʋ-ziir: a Ɩsɩrayɛl nɩbɛ nɛbɛ kone zɛlɛ nɩ yãayãa. Bʋ̃ʋ n'ʋ vɛ̃, bɛ tuli nɩ a sɔ́r, bɛ yiiri mɛ̃ na bɛr, a mãa, a Sore bɛ Naaŋmɩn.

²²«Bibiir na bɛ tu m a, nyɩ lɛb wa a ɩ̃ zie, ɩ̃ na sanɩ nɩ a nyɩ na-bɛ-tu-m a ɩ-ɩrɩ za!» «Tɩmɛ n'ɩ bɛ ŋa! Tɩ waar'ɩ a fʋ zie, bʋ̃ʋ n'ʋ vɛ̃, a fʋ̃ʋ Sore a, fʋ̃ʋ n'ʋ ɩ a tɩ Naaŋmɩn!

²³Yel-mɩŋa sɩza, a gɔmɛ á ŋá za na ɩrɛ a tan zu a, a maalʋ á ŋá za na maalɛ a tãli zu a, a bɛ̀lɛ nɩ a nɩbɛ. Yel-mɩŋa sɩza, a Sore tɩ Naaŋmɩn zie n'a a Ɩsɩrayɛl páwr a faafʋ.

²⁴Ɛcɛ, a tɩ pɔ̀lʋ daarɩ́ za a, a Báàl maalʋ na ɩrɛ vĩ a baar'ɩ a alɩ bome nɛ za a tɩ sãà mɩnɛ na tɩ bàl bɛ tʋɔra páw a, a bɛ píir, a bɛ bʋʋr, a bɛ nĩi, a bɛ bidɛbr nɩ a bɛ pɔwyaar.[14]

²⁵Tɩ gã nɩ a tɩ vĩ, tɩ sàw a tɩ yúor na sãw a. Bʋ̃ʋ n'ʋ vɛ̃, tɩɩm nɩ a tɩ sãàkʋm-kore mɩnɛ maal'ɩ yel-bier sãw nɩ a Sore tɩ Naaŋmɩn, a tɩ pɔ̀lʋ daarɩ́ za wa tɔ a dɩ̃a. Tɩ bɛ bɛr wõ a lɛ a Sore tɩ Naaŋmɩn na tɩ yere kʋ̀rɛ tɩ a ɩ.»