Read Dagara, Northern Zeremi 31 Bible Online

Zeremi 31 - Dagara, Northern bible

Zeremi 31

¹A Sore yere na: «A daar ʋl ɩ̃ na na ɩ a Ɩsɩrayɛl yie za Naaŋmɩn, ɛ́ a ɩ a ɩ̃ nɩ-bʋʋrɛ a na ta na.»

²À ŋá n'a a Sore yere: «A wɛja-kpalɛ pʋɔ a, ɩ̃ wul'ɩ a ɩ̃ nɔ̃wfʋ a nɩbɛ na bɛ tʋ̃ɔ́ kpi a. A na ɩ lɛ a, a Ɩsɩrayɛl na tʋ̃ɔ́ na nyɛ̃ a pɩ̃ɛnʋ.

³Ʋ tɩ yere na: “A Sore wul mɛ̃ nɩ ʋ tʋɔra zi-zãána.” Ɩ̃ɩ tɩ sɔw ʋ na: “Ɩ̃ nɔnɛ fʋ na nɩ nɔ̃wfʋ na be kʋralɛ a. Alɛ n'a so ɩ̃ cãà tu b yaga za.

⁴Ɩ̃ na lɛb'a maalɩ fʋ ƴãw, ɩ̃ nɩ-nɔna Ɩsɩrayɛl i, ɩ̃ na lɛb'a mɛ b. Fʋ na lɛb'a de a fʋ gãgali-vɩɛlɩ tɩ lãw nɩ a bɩn-ƴawrbɛ na maalɛ cuw a.

⁵Fʋ na lɛb'a sɛl divɛ̃ tɩɩr a Samaari tan zu, ɛ́ a divɛ̃ tɩ-wɔmɛ pɔrbɛ na pãa tʋ̃ɔ́ na mɩ́ ír a divɛ̃ tɩɩr bɛ na sɛl a tɔnɛ.

⁶Bibir na vɩɛ na, a zi-gùrbɛ na na cɩɩrɛ yere à ŋá a Efarayim tãli zu a: Nyɩ ìr! Nyɩ ɩ tɩ do a Sɩyɔ̃, a Sore tɩ Naaŋmɩn zie!”»

⁷À ŋá n'a a Sore yere: «Nyɩ lɔbr nʋ̃ɔ̀ cɛlsɩ a Ɩsɩrayɛl ƴãw, nyɩ cɩɩrɛ nɩ nyɩ pʋɔ za a nɩ-bʋʋr-yoru niw-diere ƴãw! Nyɩ ɩ bɛ wone a nyɩ danʋ, ɛ́ nyɩ yere: “Sore e, faa a fʋ nɩbɛ, a Ɩsɩrayɛl nɩbɛ bɛl na cɛ a!”

⁸Ɩ̃ na sɩrɩ na ɩ bɛ yi a tẽw saa-pɛrɩ́-gʋba-lowr lɛb wa, ɩ̃ na tɛr bɛ nɩ a tẽw zi-zãánɩ za lɛb wa ɓã taa. A bɛ pʋɔ a, zɔn, wʋbr, pɔw-pée nɩ pɔ-dɔwrbɛ be n be. Zu-sɛbla na bɛ tɩ dɩ vuo a nɛbɛ lɛbr waar a ka.

⁹Bɛ kone na lɔbr'ɩ nɩbaal-nuru tarɛ nɩ, ɩ̃ɩ bɩɛlɛ bɛ. Ɩ̃ na tɛr bɛ na cen nɩ bàrʋ na paalɩ kʋ̃ɔ a zie. Ɩ̃ na tu n bɛ nɩ sɔ́r na man taa ʋ za bɛ kʋ̃ʋ tʋ̃ɔ́ ŋmɛ gbɛ́r lo a. Bʋ̃ʋ n'ʋ vɛ̃, ɩ̃ ɩ n sãà a Ɩsɩrayɛl zie, ɛ́ a Efarayim ɩ a ɩ̃ bidɛb-dãw.»

¹⁰Nɩ-bʋʋr-yoru u, nyɩ bɛrɛ wone a Sore ƴɛ̀rʋ! Nyɩ hieri ʋ a kʋ̃ɔ-kpɛ̃ɛ-sɔgɔ-ten na zãá a pʋɔ. Nyɩ yel: «A Sore tɩ diw nɩ a Ɩsɩrayɛl yaarɩ, ɛcɛ ƴɛrɛŋa a, ʋ lɛb'a ɓanɛ bɛ taa ɛ́ gùre bɛ mɛ̃ dʋ̃-cɩ̃ɩnɛ na gùre ʋ dʋn a.»

¹¹Bʋ̃ʋ n'ʋ vɛ̃, a Sore faa nɩ a Ɩsɩrayɛl nɩbɛ, ʋ ír bɛ nɩ nɩr na kpɛmɛ zuo bɛ a nuru pʋɔ.

¹²Bɛ na lɔb'ɩ nʋ̃ɔ̀ cɛlsɩ ta n a Sɩyɔ̃ tãw zu. A bɛ niŋe na caal'ɩ a za a Sore bʋ̃-vɩɛlɩ niŋé: a ble, a divɛ̃-paala, a kãá-paala, píir, bʋʋr nɩ nĩi. Bɛ na ɩ na mɛ̃ zaadɛ̃ bɛ na cɔ̀r vla vla a, ɛ́ a bɛ fãw kʋ̃ lɛb siwri towtow ɛ.

¹³Lɛ n'a nʋ̃ɔ̀ na ɩrɛ a pɔwsɩrali bɛ ƴawr, lãwnɩ a pɔlbili nɩ a dɛb-nyamɛ. Ɩ̃ na ɩ na a bɛ wahala lɩɛbɩ nʋ̃ɔ̀, ɩ̃ na mɔwlɩ bɛ na. A pʋ-sãwna pùorí a, a na ɩ n a nʋ̃ɔ̀.

¹⁴Ɩ̃ na kʋ̀ n a bàwr-maalbɛ nɛ̃-kãánɩ yaga za, ɛ́ paalɩ a ɩ̃ nɩbɛ nɩ a ɩ̃ maalʋ. À à ŋá n'a a Sore yel.

¹⁵À ŋá n'a a Sore yere: «Kon kone na yire Arama[48] tẽw pʋɔ, mʋta-zɩ̃ɩ kon a, Arasɛl'ʋ kone a ʋ bibiir, ɛ́ bɛ sàwr bɛ na mɔwl'ʋ, a ʋ bibiir na bɛ cãà a ƴãw.»

¹⁶Ɛcɛ à ŋá n'a a Sore yere kʋ̀rɛ ʋ: «Ta cãà kone siwre nɩ ɛ, fɩɛlɩ a fʋ mʋta-kʋ̃ɔ bɛr! A mãa, a Sore, ɩ̃ yere nɩ à ŋá: Ɩ̃ na ya b'ɩ a hanʋ fʋ na hanɩ a. A fʋ bibiir na yi n a bɛ dɔ̃ dem tẽw lɛb wa.»

¹⁷A Sore yere na: «A na ɩ lɛ a, fʋ na tʋ̃ɔ́ na ƴãw tɩɛrʋ a fʋ nɩdaar ƴãw. A fʋ bibiir na lɛb'a wa a bɛ tẽ-dɔwra pʋɔ.

¹⁸Ɩ̃ sɩrɩ na wõ a Efarayim tẽw nɩbɛ na kone zɛbr yere nɩ a: “Sore e, fʋ kpãa tɩ nɩ faa faa, mɛ̃ a lɛ bɛ na mɩ́ dɔwrɩ nadɛr-pɔl na bɛ sàwr cere a. Ɛcɛ ɩ tɩ lɛb wa a fʋ zie, kɛ̀ tɩ tʋ̃ɔ́ sɩrɩ lɛb wa a fʋ zie. Bʋ̃ʋ n'ʋ vɛ̃, a fʋ̃ʋ a, Sore e, fʋ̃ʋ n'ɩ a tɩ Naaŋmɩn.

¹⁹Sɩza, tɩ cen na zãá nɩ fʋ, ɛcɛ ƴɛrɛŋa a, tɩ ciire nɩ a tɩ sãwna. Fʋ ɩ na tɩ bãw a tɩ sãwna pɛr, ɛ́ ƴɛrɛŋa a, tɩ wore a na. A tɩ yúor sãw na ɛ́ vĩ nyɔw tɩ. Tɩ bɛ ɩ vla a tɩ pɔ̀lʋ daarɩ́ ɛ, a lɛb lo a tɩ zu.”»

²⁰A Sore yere na: «A Efarayim n'ɩ a ɩ̃ bidɛb-nɔna nɔna za, ɩ̃ nɔnɛ ʋ na zuo a ʋ taabɛ. Alɛ n'a so, kʋralɛ mãa wa yere ʋ a, ɩ̃ mɩ́ cãà na tɛr a ʋ tɩɛrʋ. Ɩ̃ nɔnɛ ʋ na bɛ dɩ vuo ɩ. Sɩza, ɩ̃ sɩrɩ na zɔrɛ a ʋ nɩbaalʋ.»

²¹Ƴãw kʋsɛbɛ tu n a fʋ sɔ́r, ƴãw ƴãw bãwfʋ. Cɛlɛ a sɔ́r fʋ na de a zie, a sɔ́r fʋ na tu a, ɛ́ lɛb wa, ɩ̃ nɩ-nɔna za Ɩsɩrayɛl i, lɛb wa a tẽ-bɛrɛ fʋ na so a pʋɔ.

²²Pɔwli-gaara a, debor'a fʋ na cere a ziir za tɩ ta? Bʋ̃ʋ n'ʋ vɛ̃, a Sore ír'ɩ yel-sãw a tẽw zu: a pɔw n'ʋ na bɔ a dɛb[49].

²³À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: «Mãa wa lɛb maalɩ a Zuda tẽw nɩ a ʋ tẽ-bɛrɛ ƴãw a lɛn daar a, a nɩbɛ na lɛb'a yere a ƴɛ̀r-bie á ŋá: “A Sore, ʋ maalɩ fʋ, Sɩyɔ̃ tãli-sõw i, fʋ na ɩ zie a faafʋ na kpɩɛr a!”

²⁴Lɛ n'a a Zuda tẽw kura nɩ a ʋ tẽ-bɛrɛ nɩbɛ za na lãw kpɩɛr, a ka-kʋ́ɔrbɛ nɩ a bɛlɩ dem na mɩ́ cɔlɛ nɩ a bɛ dʋn a.

²⁵Bʋ̃ʋ n'ʋ vɛ̃, ɩ̃ na ɓãa nɩ a bɛlɩ dem za na bàl a kʋ̃ɔ-nyúur, ɩ̃ na kʋ̀ n a bɛlɩ dem za na bɛ cãà tɛr fãw a, a alɩ bome nɛ na fɛrɛ a.

²⁶Lɛ n'a ɩ̃ tɩ zaw ìr ɛ́ tɩ nyɛ̃ k'aa ɩ̃ gʋ̃ɔ́ tɩ maalɩ mɛ̃ na.

²⁷A Sore yere na: Ɩ̃ kʋ̃ yaa kɛ́ ɩ nɩsaalbɛ nɩ dʋn yɛ̀r pàw a Ɩsɩrayɛl nɩ a Zuda naalʋ-ten, mɛ̃ a lɛ bɛ na mɩ́ yaarɩ bʋ̃-bʋʋrɛ púo pʋɔ a ɩ.

²⁸Wa tɩ tɔ ka a, ɩ̃ tɩ àr'ɩ a bɛ ƴãw k'ɩ̃ɩ vɔ̃ bɛr, k'ɩ̃ɩ ŋmɛ lɔb, k'ɩ̃ɩ da lɔb, k'ɩ̃ɩ sãw bɛr, k'ɩ̃ɩ ɩ a kpɛ. Ɛcɛ ƴɛrɛŋa a, ɩ̃ na lɩɛb'a cɔw bɛ, k'ɩ̃ɩ lɛb mɛ ɛ́ lɛb sɛl, a Sore n'ʋ yere.

²⁹Lɛ n'a nɩr kʋ̃ mɩ́ lɛb lɔb a zʋkpar ŋa ɩ: “A dɔwrbɛ 'wɔb'ɩ suw-kɛrɛ ɛcɛ a bibiir nyɩmɛ n'a mĩi[50].”

³⁰Bʋ̃ʋ n'ʋ vɛ̃, nɩr wa 'wɔb divɛ̃ tɩ-wɔ̃-kɛrɛ a, ʋl mɩŋa nyɩmɛ n'a na mĩi. Ŋa za n'ʋ na mɩ́ kpi a ʋ sãwna kũu.

³¹A Sore yere na: Ɩ̃ kʋ̃ yaa kɛ́ maal'ɩ a Ɩsɩrayɛl nɩbɛ nɩ a Zuda nɩbɛ wõ-ta-paala ɩ.

³²Ʋ kʋ̃ ŋmɛ̃ mɛ̃ a ʋl ɩ̃ na tɩ maal'ɩ a bɛ sãàkʋm-kore, a lɛn daar ɩ̃ na tɩ nyɔw bɛ a nũú k'ɩ̃ɩ ɩ bɛ yi a Eziptɩ tẽw pʋɔ a ɩ. A wõ-taa ʋl a, bɛ sãw ʋ na bɛr, a mãa na saa tɩ n'ɩ a bɛ zu-sob a. A mãa, a Sore, mãa n'ʋ yere.

³³A Sore cãà na yere: Nyɛ̃ a wõ-taa ʋl ɩ̃ na na maal'ɩ a Ɩsɩrayɛl nɩbɛ a lɛn daar a: Ɩ̃ na ƴãw nɩ a ɩ̃ wulu a bɛ pʋ̃ɔmɩ za, ɩ̃ na sɛb a na ƴãw a bɛ socie pʋɔ. Ɩ̃ na ɩ n a bɛ Naaŋmɩn, ɛ́ bɛ ɩ a ɩ̃ nɩbɛ.

³⁴A Sore yere na: Nɩr za kʋ̃ mɩ́ lɛb wule a ʋ tɔ sob bɩɩ a ʋ yɛb yere nɩ: “Nyɩ bãw a Sore!” ɩ. Bʋ̃ʋ n'ʋ vɛ̃, bɛ za na bãw mɛ̃ na, a pʋrɩ za zie tɩ tɔ a kpɛ̃ɛ za zie. Ɩ̃ na dɩ n a bɛ sãwna suur kʋ̀ bɛ, ɩ̃ kʋ̃ cãà bãwnɩ a bɛ yel-bebe ɩ.»

³⁵À ŋá n'a a Sore yere: Ãa n'ʋ mɩ́ ƴãw a mʋ̃tɔ̃w k'ʋʋ caalɛ a bibir? Ãa n'ʋ mɩ́ yel a cuw nɩ a ŋmar-bie k'aa caalɛ a tɩ̃ɩsɔw? Ãa n'ʋ mɩ́ dam a kʋ̃ɔ-kpɛ̃ɛ ƴãw a kʋ̃ɔ-mie ɩrɛ gɔmɛ? A Sore, a kpɛnʋ-za-sob'ʋ, a ʋ yúor'ɩ a lɛ.

³⁶A na ɩ lɛ a, à ŋá n'a a Sore yere: «Mãa wa sàw bibir kãw k'aa tẽ-daa nɛ́ɛ á ŋá bɛ cãà pʋɔ a, ɩ̃ mɩ̀ na sàw nɩ a lɛn daar k'aa Ɩsɩrayɛl nɩbɛ bɛ cãà ɩ nɩ-bʋʋrɛ a ɩ̃ niŋé ɩ.»

³⁷À ŋá n'a a Sore yere: «Nɩr wa tʋ̃ɔ́ manɩ a salom kɛrʋ, ʋlɛ wa tʋ̃ɔ́ manɩ a tẽsɔw zulu a, a lɛ pʋɔ a, ɩ̃ na zawr'ɩ a Ɩsɩrayɛl bʋʋrɛ bɛr, a faa bɛ na maalɩ a zũú!» À à ŋá n'a a Sore yel.

³⁸A Sore yere na: «Bɛ kʋ̃ yaa kɛ́ lɛb mɛ a Zerizalɛm tẽ-kpɛ̃ɛ a ɩ̃ ƴãw ɛ. Bɛ na yi n ʋ nɩ a Hananeyɛl yir-cõcowla ƴãw tɩ sãá nɩ a Gõgon dɩ̃dɔr ƴãw.

³⁹Bɛ na de nɩ niwn tʋɔrɩ a tẽ-kpɛ̃ɛ tʋr-bɔw-paalɛ tu n a mʋ̃tɔ̃w-kpɛb-lowr, a Garɛvʋ tãle lowr, ɛ́ a be a, a na lɩɛb'a tu Gowa lowr.

⁴⁰A kũuni nɩ a tãpɛl-kãánɩ bà-fʋɔla[51] za nɩ a ziir al za na cen tɩ tɔ a Sedrɔ̃ bà-fʋɔla ɛ́ tɩ sãá a Wie dɩ̃dɔr gõgon ƴãw a, na ɩ n a Sore zi-sóra. Bɛ bɛ vʋ̃ɔnɛ bom, bɛ sãwnɛ bom za bɛrɛ a ziir á ŋá pʋɔ ɩ.»