Read Dagara, Northern Zeremi 33 Bible Online

Zeremi 33 - Dagara, Northern bible

Zeremi 33

¹A Sore tɩ lɛb'a ƴɛ̀r a Zeremi zie a gb'a ayi sob ƴãw, a lɛn daar bɛ na tɩ cãà pàw ʋ a soja-zi-gùrbɛ davʋra pʋɔ a.

²À ŋá n'a a sob nɛ na mɩ́ maalɩ a yele a, na mɩ́ cɔbrɩ a, ɛ́ ɩ a be a, yere. A Sore n'ʋ, a ʋ yúor'ɩ lɛ.

³Bʋɔlɩ mɛ̃, ɩ̃ɩ na sɔw fʋ na. Ɩ̃ɩ na ɩ na fʋ bãw yel-sɔwl-bɛrɛ fʋ na bɛ bãw a.

⁴À ŋá n'a a mãa, a Sore, a Ɩsɩrayɛl Naaŋmɩn, yere a Zerizalɛm yie nɩ a Zuda tẽw na-mɩnɛ yie ƴãw. A lo na. Zawlalɛ n'a nyɩ bɛ sàwr a zɛb-deb tome na tõ ɩ, ɛ́ zɛbr'ɩ a Babɩlɔn tẽw dem. A na ɩ na a tẽ-kpɛ̃ɛ paalɩ a nɩbɛ ɩ̃ na na kʋ a ɩ̃ su-faa faa pʋɔ a ƴã-gamɛ.

⁶«Ɛcɛ, ɩ̃ na sanɩ ʋ na, ɛ́ ɩ a ʋ bàalʋ baarɩ. Ɩ̃ na lɛb'a kʋ̀ a ʋ yie a ƴã-ɓaarʋ, ɛ́ ɩ a nɩbɛ bãw a ƴã-ɓaarʋ nɩ zie na bɛ bãw damnʋ a.

⁷Ɩ̃ na lɛb'a maalɩ a Zuda nɩ a Ɩsɩrayɛl nɩbɛ yele ƴãw, ɩ̃ɩ na lɛb'a ɩ bɛ ŋmɛ̃ a bɛ dãwdãw ŋmɛ̃a.

⁸Ɩ̃ na pɛ́w nɩ a sãwna al za bɛ na sãw mɛ̃ a dɛwr bɛr. Ɩ̃ na dɩ n a bɛ gáarʋ sãwna suur kʋ̀ bɛ.

⁹Lɛ n'a nʋ̃ɔ̀ na mɩ́ ɩrɛ mɛ̃ a Zerizalɛm yúor bʋɔlʋ ƴãw. A tẽ-kpɛ̃ɛ ŋa na ɩ na ɩ̃ tɛr yúor, ʋlɛ n'ʋ na so ɩ̃ nyʋʋr a tẽw zu nɩ-bʋʋrɛ za niŋé. Bɛlɛ wa wõ a vla al za ɩ̃ na na maal'ʋ a, bɛ na màwr'ɩ dɛ̃bɩ̃-mawfʋ, ɛ́ pʋ̀lá vʋ̃ɔnɛ bɛ, bɛ na nyɛ̃ a nʋ̃ɔ̀ nɩ a ƴã-ɓaarʋ al za ɩ̃ na na kʋ̀ ʋ a.»

¹⁰À ŋá n'a a Sore yere: «A nyɩɩm, a Zuda tẽw dem a, nyɩ yere na: “A tẽw ɩ n wɛja-kpalɛ, nɩbɛ nɩ dʋn bɛ cãà kpɩɛr ʋ ɛ.” Sɩza n'a, a Zuda tẽ-bɛrɛ nɩ a Zerizalɛm tẽw sɛ́ɛ gã nɩ zawlɛ. Nɩr za bɛ cãà kpɩɛr a pʋɔ ɩ, a nɩsaalbɛ nɩ a dʋn. Ɛcɛ a tẽw ŋa pʋɔ a, bɛ na lɛb'a wone

¹¹a cuw gɔmɛ, a nʋ̃ɔ̀ cɛlsɩ, a dɛb-sãan nɩ a pɔw-sãan yielu. Bɛ na lɛb'a wone a bɛlɩ dem na na wa n a bɛ danʋ bagɛ a Ŋmɩn-yir-kpɛ̃ɛ pʋɔ a, yielu ŋa: “Nyɩ danɛ a Sore, a kpɛnʋ-za-sob, bʋ̃ʋ n'ʋ vɛ̃, ʋ vɩɛl'a, ɛ́ a ʋ nɔ̃wfʋ be n be kʋralɛ.” Sɩza, ɩ̃ na lɛb'a maalɩ a tẽw ŋa ƴãw ʋ lɛb ŋmɛ̃ mɛ̃ a koro za a.» À à ŋá n'a a Sore yel.

¹²À ŋá n'a a Sore, a kpɛnʋ-za-sob, cãà lɛb yere: «A tẽw ŋa na sãw ʋ za gã bɛ tɛr nɩbɛ nɩ dʋn a ʋ pʋɔ, nɩ a ʋ tẽ-bɛrɛ za pʋɔ a, ziir na lɛb'a be be a dʋ̃-cɩ̃ɩnbɛ na na mɩ́ ƴãw a bɛ píir nɩ a bɛ bʋʋr a gã pɩ̃ɛnɩ a.

¹³A Ho-Peyi, a Ba-Peyi nɩ a Negɛɛvʋ tẽ-bɛrɛ pʋɔ, a Bɛ̃zamɛ tẽw pʋɔ, a ziir na viiri koli a Zerizalɛm nɩ a Zuda tẽ-bɛrɛ a pʋɔ a, a píir nɩ a bʋʋr na mɩ́ lɛb'a cɔrɩ yire a sob nɛ na sɔrɛ a a niŋé.» À à ŋá n'a a Sore yel.

¹⁴A Sore yere na: «Ɩ̃ kʋ̃ yaa kɛ́ ɩ a lɛ ɩ̃ na yel kʋ̀ a Ɩsɩrayɛl nɩbɛ nɩ a Zuda nɩbɛ a ɩ.

¹⁵A daar ʋl wa ta a, ɩ̃ na ɩ na a Daviir bi-mɩŋa dɔw. Ʋ na ɩ na bɛ ɩrɛ a lɛ-na-tu-sɔr ɛ́ tu mɩnʋ a, a tẽw pʋɔ.

¹⁶A lɛn daar a, a Zuda naalʋ-tẽw na nyɛ̃ nɩ faafʋ, ɛ́ a nɩbɛ na kpɩɛr a Zerizalɛm tẽw pʋɔ a, na vʋʋrɛ na ɛ́ bom bɛ damnɛ bɛ ɩ. Nyɛ̃ a lɛ bɛ na na bʋɔlɛ ʋ a: “A Sore n'ɩ a tɩ mɩnʋ[56].”»

¹⁷À ŋá n'a a Sore yere: «Nɩr na mɩ́ yi n kʋralɛ a Daviir yir pʋɔ, ɩ a Ɩsɩrayɛl nɩbɛ nãà.

¹⁸Lɛ mɩ̀ n'a a bàwr-maalbɛ na mɩ́ yi a Levi dɔwlʋ pʋɔ a ƴãw: bɛ na mɩ́ be n be kʋralɛ maalɛ a nyɩw-a-za-bagɛ, ɩrɛ a de-kʋ̀b bome zʋ̀ʋ́r dúor waar a ɩ̃ zie, ɛ́ maalɛ a lãw-taa bagɛ bibie za.»

¹⁹A Sore tɩ lɛb'a ƴɛ̀r a Zeremi zie à ŋá:

²⁰«À ŋá n'a a Sore yere: nyɩmɛ wa tʋ̃ɔ́ sãw a wõ-taa na be mãa nɩ a bibir cara pʋɔ, mãa nɩ a tɩ̃ɩsɔw cara pʋɔ, a bɛ mɩ́ lɛb ta a daar ʋl a na sɛw k'aa mɩ́ ta a,

²¹a lɛ pʋɔ a, a wõ-taa na be mãa nɩ a ɩ̃ tõ-tõ-bie Daviir cara pʋɔ a na sãw na. Ʋ kʋ̃ cãà mɩ́ tɛr bʋʋrɛ ʋ lɩɛr'ʋ dɩrɛ a naalʋ ɛ. Lɛ n'a a mɩ̀ na ŋmɛ̃ a wõ-taa na be mãa nɩ a bàwr-maalbɛ na tone a ɩ̃ tome, ɛ́ yi a Levi yir pʋɔ a zie.

²²Mɛ̃ a lɛ bɛ na kʋ̃ tʋ̃ɔ́ sɔ́r a ŋmar-bie na be a salom zu, nɩ a kʋ̃ɔ-kpɛ̃ɛ nʋɔr biire na bɛ dɩ vuo a, lɛ n'a ɩ̃ na ɩ a ɩ̃ tõ-tõ-bie Daviir bʋʋrɛ nɩ a Levi bʋʋrɛ na ɩ bàwr-maalbɛ tone a ɩ̃ tome a, bɛ yãwmɛ.»

²³A Sore tɩ lɛb'a ƴɛ̀r a Zeremi zie à ŋá:

²⁴«Fʋ bɛ wõ a lɛ a nɩbɛ na yere a ɩ? Bɛ na yere k'ɩ̃ɩ zawr'ɩ a Ɩsɩrayɛl nɩ a Zuda bɛr, a yie ayi á ŋá ɩ̃ na tɩ kaa ír a. Bɛ na ƴɛ̀rɛ à à ŋá a, bɛ jewre nɩ a ɩ̃ nɩbɛ. Bɛl zie a, bɛ bɛ cãà ɩ nɩ-bʋʋrɛ mɩ̀ ɛ.

²⁵Ɛcɛ, à ŋá n'a a mãa, a Sore, ɩ̃ yere: “Ɩ̃ maal'ɩ nɩ a bibir nɩ a tɩ̃ɩsɔw wõ-taa. Ɩ̃ ƴãw nɩ a ɩ̃ nɛ́ɛ kʋ̀ a salom nɩ a tẽw.

²⁶A na ɩ à ŋá a, ɩ̃ na tʋ̃ɔ́ na zawrɩ a Zakɔb bʋʋrɛ, nɩ a ɩ̃ tõ-tõ-bie Daviir bʋʋrɛ bɛr bɩɩ? Ɩ̃ na tʋ̃ɔ́ na zawrɩ, bɛ kaa ír nɩ-bɛrɛ a bɛ pʋɔ, bɛ kaarɛ a Abraham, a Ɩzaakɩ nɩ a Zakɔb bʋʋrɛ zie i? Towtow! Ɩ̃ zɔrɛ nɩ a bɛ nɩbaalʋ, ɛ́ na lɛb maalɩ bɛ ƴãw.”»