Read Dagara, Northern Zeremi 36 Bible Online

Zeremi 36 - Dagara, Northern bible

Zeremi 36

¹A Zozɩasɩ bidɛb, Yoyakim, na ɩ a Zuda tẽw nãà a, naalʋ-dɩb yome anaar sob daar'a a Sore tɩ ƴɛ̀r a Zeremi zie à ŋá:

²«De gan-sɛbɛ na na tʋ̃ɔ́ pili a, sɛb a ʋ pʋɔ, a ƴɛ̀rʋ al za ɩ̃ na ƴɛ̀r càar'ɩ a Ɩsɩrayɛl naalʋ-tẽw, a Zuda naalʋ-tẽw nɩ a tẽ-yoru a, a na tĩ a lɛn daar ɩ̃ na ƴɛ̀r a fʋ zie, a Zozɩasɩ naalʋ-dɩb daar, wa tɔ a dɩ̃a a.

³Kapaw a Zuda tẽw nɩbɛ nãà wa bãwnɩ a na ɩ̃ na bɔbr k'ɩ̃ɩ ɩ a faa páw bɛ a, ɛ́ ŋa za na bɛr'ɩ a ʋ ɩb na bɛ vɩɛl a. A lɛ pʋɔ a, ɩ̃ na dɩ n a bɛ sãwna nɩ a bɛ yel-bebe suur kʋ̀ bɛ.»

⁴A Zeremi tɩ zɛlɩ nɩ Neriya bidɛb, Barukɩ, sõwfʋ. Ʋ tɩ yel'ɩ a ƴɛ̀rʋ al za a Sore na yel kʋ̀ ʋ a, ɛ́ a Barukɩ sɛb a ƴãw sɛb-pila pʋɔ.

⁵Al pùorí, a Zeremi yel a Barukɩ: «Bɛ piw mɛ̃ nɩ sɔ́r, ɩ̃ kʋ̃ tʋ̃ɔ́ cen a Ŋmɩn-yir-kpɛ̃ɛ pʋɔ ɩ̃ mɩŋa ɩ.

⁶Ɛcɛ fʋ̃ʋ a, cen fʋ mɩŋa a Ŋmɩn-yir-kpɛ̃ɛ pʋɔ mʋta-tuo tɛrʋ bibir kãw, tɩ zɛw kɔkɔr kanɩ a Sore ƴɛ̀rʋ al za ɩ̃ na yel fʋ sɛb a. Fʋ na kanɩ a na kʋ̀ a bɛlɩ dem za na na be a Ŋmɩn-yir-kpɛ̃ɛ pʋɔ a, nɩ a bɛlɩ dem za na na yi a Zuda tẽ-bɛrɛ pʋɔ wa a.

⁷Lɛ n'a, a mɩnɛ kãw, bɛ na lɔbr nuru zɛlɛ nɩ a Sore, ɛ́ ŋa za na mɩ́ bɛr'ɩ a ʋ ɩb na bɛ vɩɛl a. Bʋ̃ʋ n'ʋ vɛ̃, a Sore yel'a k'ʋʋ nyɛ̃ nɩ nɩ a nɩbɛ bɛ ŋa suur yaga yaga za.»

⁸A Neriya bidɛb, Barukɩ, tɩ ɩ n a lɛ tɔr za a naaŋmɩn-ƴɛ̀r-manɛ Zeremi na tɩ yel k'ʋʋ ɩ a. Ʋ tɩ cen nɩ a Ŋmɩn-yir-kpɛ̃ɛ pʋɔ tɩ kanɩ a Sore ƴɛ̀rʋ na sɛb ƴãw a sɛb-pila ʋl pʋɔ a.

⁹Bʋ̃ʋ n'ʋ vɛ̃, a Zozɩasɩ bidɛb, Yoyakim, na ɩ a Zuda tẽw nãà a, naalʋ-dɩb yome anũu sob daar, a cuwr piwaɩ sob[60], bɛ tɩ bʋɔl'ɩ a Zerizalɛm tẽw nɩbɛ za nɩ a Zuda tẽw tẽ-bɛrɛ nɩbɛ za na mɩ́ tɩ wa a Zerizalɛm, mʋta-tuo tɛrʋ ƴãw a, a Sore niŋé.

¹⁰A Ŋmɩn-yir-kpɛ̃ɛ pʋɔ a, a Barukɩ tɩ zɛw nɩ kɔkɔr kanɩ a Zeremi ƴɛ̀rʋ za na sɛb a sɛb-pila pʋɔ a, a bɛlɩ dem za na tɩ be a be a niŋé. Safan na tɩ dãw ɩ a sɛ-sɛbrɛ a bidɛb, Gemarɩahu, dĩó n'a ʋ tɩ àr. A dĩo ŋa tɩ be n a Ŋmɩn-yir-kpɛ̃ɛ davʋra ʋl na be a saa-zu a pʋɔ, pɩɛlɩ a dɩ̃dɔ-Paala.

¹¹Ɛcɛ Gemarɩahu bidɛb, Mɩkayehu, na ɩ Safan yãw a, tɩ wõ n a Sore ƴɛ̀rʋ za a Barukɩ na tɩ kanɩ a sɛbɛ pʋɔ a.

¹²Ʋ tɩ siw nɩ a nãà yir, tɩ ta a sɛ-sɛbrɛ tome dĩo pʋɔ. A tõ-tõ-bi-bɛrɛ za tɩ tɛr'ɩ kpaarʋ. A bɛlɩ dem za na tɩ be a be a, tɩ n'ɩ bɛ ŋa: a sɛ-sɛbrɛ Elisama, nɩ Semayahu bidɛb Delayahu, nɩ Akɩbɔɔr bidɛb Ɛlnatan, nɩ Safan bidɛb Gemarɩahu, nɩ Hananɩahu bidɛb Sedesɩasɩ, nɩ a tõ-tõ-bi-bɛrɛ bɛ mɩnɛ.

¹³A ƴɛ̀rʋ al za a Mɩkayehu na tɩ wõ, a lɛn daar a Neriya bidɛb, Barukɩ, na tɩ kanɛ a sɛbɛ kʋ̀rɛ a zu-sɛbla a, ʋ tɩ manɩ a na kʋ̀ bɛ.

¹⁴Lɛ n'a a tõ-tõ-bi-bɛrɛ tɩ tõ Netanɩahu bidɛb, Yehudɩ, na ɩ Selemɩahu yãw, ɛ́ ɩ Kusi yãw-suwle a, a Barukɩ zie, k'ʋʋ tɩ yel ʋ: «De a sɛbɛ fʋ na kanɩ kʋ̀ a nɩbɛ a wa n ka.» A Neriya bidɛb, Barukɩ, tɩ de nɩ a sɛbɛ wa n wa páw nɩ bɛ.

¹⁵Bɛ tɩ yel ʋ na: «Zɩ̃, ɛ́ kanɩ a sɛbɛ ŋa kʋ̀ tɩ.» A Barukɩ kanɩ a sɛbɛ kʋ̀ bɛ.

¹⁶Bɛ na wa wõ a ƴɛ̀rʋ á ŋá za a, pʋ̀lá tɩ vʋ̃ɔ nɩ bɛ za, bɛ jɩ́rɛ taa, ɛ́ wa yel a Barukɩ: «A fɛr'a kɛ́ tɩ manɩ a ƴɛ̀rʋ á ŋá kʋ̀ a nãà.»

¹⁷Al pùorí bɛ yel a Barukɩ: «Manɩ kʋ̀ tɩ a lɛ fʋ na ɩ sɛb à á ŋá za a.»

¹⁸A Barukɩ tɩ sɔw bɛ na: «A Zeremi n'ʋ tɩ ƴɛ̀rɛ a ƴɛ̀rʋ á ŋá za kʋ̀rɛ mɛ̃, ɩ̃ɩ tɩ sɛbr a nɩ sɛb-dale-kʋ̃ɔ ƴãwnɛ a sɛb-pila pʋɔ.»

¹⁹Lɛ n'a a tõ-tõ-bi-bɛrɛ tɩ yel a Barukɩ: «Cen tɩ sɔwlɩ, a Zeremi mɩ̀ a lɛ. Nɩr za, ʋ ta bãw a nyɩ beba zie ɩ.»

²⁰A tõ-tõ-bi-bɛrɛ tɩ bɛr'ɩ a sɛb-pila a sɛ-sɛbrɛ Elisama tome dĩó, ɛ́ cen a nãà yir davʋra pʋɔ, tɩ manɩ a yele za na ɩ a kʋ̀ a nãà.

²¹Lɛ n'a a nãà tɩ tõ Yehudɩ k'ʋʋ tɩ de a sɛbɛ wa n. Ʋ tɩ de nɩ a sɛbɛ a sɛ-sɛbrɛ Elisama tome dĩo pʋɔ, wa kanɩ kʋ̀ a nãà nɩ a tõ-tõ-bi-bɛrɛ za na tɩ àr viiri koli ʋ a.

²²A na tɩ ɩ a yũon cuwr piwaɩ sob daar a, a nãà tɩ zɩ̃ n a ʋ ƴawr daar dĩo pʋɔ, ɛ́ bɛ tɩ gbɔw vũu a ʋ niŋé.

²³A Yehudɩ na mɩ́ tɩ kanɩ a sɛbɛ ziir ata bɩɩ anaar baar'a, a nãà mɩ́ tɩ ŋma a na nɩ a sɛ-sɛbrɛ sɔle lɔb a ƴãw vũumí. Ʋ tɩ ɩ n a lɛ tɩ nyɩw a sɛbɛ ʋ za bɛr.

²⁴A nãà nɩ a ʋ tõ-tõ-bi-bɛrɛ za tɩ wõ n a ƴɛ̀rʋ á ŋá za vla. Ɛcɛ a bɛ tɩ ɩ bɛ dɛ̃bɩ̃ɛ ɩ, ɛ́ bɛ bɛ tɩ wul pʋ-sãwna kãw za ɩ.

²⁵Ɛcɛ Ɛlnatan, Delayahu nɩ Gemarɩahu tɩ ƴãw nɩ fãw zɛlɛ a nãà k'ʋʋ ta nyɩw a sɛbɛ bɛr ɛ. Ɛcɛ ʋ bɛ tɩ bɛr wõ bɛ ɩ.

²⁶Ʋ nɩ̃ɛ na tɩ yel kʋ̀ a nãà bidɛb, Yeramɩɛl, nɩ Azirɩɛl bidɛb, Serayahu, nɩ Avɩdɩɛl bidɛb, Selemɩahu, kɛ́ bɛ nyɔw a sɛ-sɛbrɛ Barukɩ nɩ a naaŋmɩn-ƴɛ̀r-manɛ Zeremi. Ɛcɛ a Sore tɩ sɔwlɩ bɛ na.

²⁷A nãà na tɩ nyɩw a sɛbɛ ʋl na tɛr a ƴɛ̀rʋ al a Zeremi na tɩ ƴɛ̀r a Barukɩ sɛb a bɛr baarɩ a, a Sore tɩ ƴɛ̀r'ɩ a Zeremi zie à ŋá:

²⁸«Bɔ sɛb-yũo sɛb a ƴɛ̀rʋ al za na tɩ be a sɛb-dãw-niwn sob pʋɔ a ƴãw, a ʋl a Zuda tẽw nãà Yoyakim na nyɩw bɛr a.

²⁹Ɛ́ a Zuda tẽw nãà Yoyakim ƴãw a, fʋ na yel'ɩ à ŋá: À ŋá n'a a Sore yere: “A Zeremi tɩ sɛb'ɩ à ŋá: A Babɩlɔn tẽw nãà na sɩrɩ na wa, wa sãw a tẽw ŋa bɛr.” Ʋ na kʋ n a nɩbɛ nɩ a dʋn. Fʋ yere nɩ a Zeremi ɛ́ nyɩw a sɛbɛ bɛr.”

³⁰A na ɩ à ŋá a, à ŋá n'a a Sore yere: “A Yoyakim kʋ̃ tɛr nɩr a ʋ yir pʋɔ, ʋ lɩɛr'ʋ ɩ a nãà a Daviir naalʋ-tẽw pʋɔ ɩ. Ʋlɛ wa kpi a, a ʋ kũu na gã nɩ yẽw, a mʋ̃tɔ̃w tʋlʋ pʋɔ, nɩ a tɩ̃ɩsɔw ƴawr pʋɔ.

³¹Ɩ̃ na ìr'ɩ a ʋl, a ʋ bʋʋrɛ, nɩ a ʋ tõ-tõ-biir ƴãw, a bɛ sãwna zũú. Ɩ̃ na ɩ n a faa al za ƴɛ̀rʋ ɩ̃ na tɩ ƴɛ̀r a bɛ zie, ɛ́ bɛ bɛ bɛr wõ a, a wa a bɛl, a Zerizalɛm tẽw dem nɩ a Zuda tẽw dem zu.”»

³²Lɛ n'a a Zeremi tɩ bɔ sɛb-pila ƴen sob kʋ̀ a Neriya bidɛb, Barukɩ, na ɩ a sɛ-sɛbrɛ a. A Barukɩ tɩ sɛb'ɩ a lɛ za a Zeremi na tɩ yere kʋ̀rɛ ʋ a, ƴãw a sɛbɛ ʋl pʋɔ: a ƴɛ̀rʋ al za na tɩ be a sɛb-dãw-niwn sob ʋl a Zuda tẽw nãà na tɩ nyɩw bɛr a pʋɔ a. Ƴɛ̀rʋ yaga na tɩ ŋmɛ̃ taa nɩ a al a, tɩ sɛb'a ƴãw pʋɔ.