Read Dagara, Northern Zeremi 38 Bible Online

Zeremi 38 - Dagara, Northern bible

Zeremi 38

¹Matan bidɛb, Sefatɩa, Pasehuur bidɛb, Gedalɩahu, Selemɩahu bidɛb, Yukal, nɩ Malkɩa bidɛb, Pasehuur tɩ wõ n a ƴɛ̀rʋ á ŋá a Zeremi na ƴɛ̀rɛ kʋ̀rɛ a nɩbɛ a:

²«À ŋá n'a a Sore yere: “Sob nɛ na na cãà be a tẽ-kpɛ̃ɛ ŋa pʋɔ a na kpi n zɛbr, kɔ̃, nɩ jɛ̀lmɛ̃ bàalʋ kũu. Ɛcɛ sob nɛ na na yi cen tɩ páw a Babɩlɔn tẽw dem a, ʋ na vʋʋrɛ na, ʋ na nyɛ̃ na ʋ tɛr zu-nʋ̃ɔ̀ ʋ na bɛ kpi a. Yel-mɩŋa za, ʋ na cãà na vʋʋrɛ.”»

³«A Sore ƴɛ̀rʋ cãà n'ɩ ŋa: “Ɩ̃ na sɩrɩ na ƴãw a tẽ-kpɛ̃ɛ ŋa a Babɩlɔn tẽw nãà zɛbr-nɩbɛ nuru pʋɔ, ɛ́ bɛ na zɛb'a de ʋ.”»

⁴A pùorí a, a tõ-tõ-bi-bɛrɛ tɩ yel'ɩ a nãà Sedesɩasɩ: «Bɛ kʋ a Zeremi! Bʋ̃ʋ n'ʋ vɛ̃, a ʋ ƴɛ̀rʋ pʋɔ a, ʋ ɩrɛ nɩ a zɛbr-nɩbɛ na cãà be a tẽ-kpɛ̃ɛ pʋɔ, nɩ a tẽw nɩbɛ za kanyir báarɛ. A bɛ ɩ a tẽw nɩbɛ vla n'a ʋ bɔbr ɛ, a bɛ faa n'a.»

⁵Lɛ n'a a nãà tɩ sɔw bɛ à ŋá: «Nyɩ ɩrɛ ʋ lɛ nyɩ na bɔbr a. Ɩ̃ ɩ n a nãà, ɛcɛ ɩ̃ kʋ̃ tʋ̃ɔ́ diw nyɩ bɛr ɛ.»

⁶A tõ-tõ-bi-bɛrɛ tɩ nyɔw nɩ a Zeremi lɔb ƴãw a nãà bidɛb, Malkɩa, sa-bie-kʋ̃ɔ-bɔw pʋɔ, a ʋl na be a soja-zi-gùrbɛ davʋra pʋɔ a. Bɛ tɩ ƴãw nɩ mie a Zeremi tùr a bɔw pʋɔ. A kʋ̃ɔ tɩ baar'ɩ a sa-bie-kʋ̃ɔ-bɔw pʋɔ, ɛ́ tɩ cɛ a mɛ̃mɛrɛ. A Zeremi tɩ siw na kpa gbɛ́ɛ a mɛ̃mɛrɛ pʋɔ.

⁷Etiopi tẽw nɩr kãw bɛ na bʋɔlɛ kɛ́ Evɛdɩ-Mɛlɛkɩ a, tɩ ɩ n a nãà yir tõ-tõ-bi-kpɛ̃ɛ kãw. A nãà tɩ wõ na kɛ́ bɛ ƴãw nɩ a Zeremi a sa-bie-kʋ̃ɔ-bɔw pʋɔ. A nãà tɩ zɩ̃ n a Bɛ̃zamɛ dɩ̃dɔr ƴãw.

⁸Lɛ n'a a Evɛdɩ-Mɛlɛkɩ tɩ yi a nãà yir cen tɩ páw a nãà yel ʋ:

⁹«Sore ɩ̃ nãà a, a lɛ za a nɩbɛ bɛ ŋa na ɩ a naaŋmɩn-ƴɛ̀r-manɛ Zeremi a bɛ vɩɛl ɛ. Ʋ na kpi n kɔ̃ a ʋ bɔw pʋɔ. Bʋ̃ʋ n'ʋ vɛ̃, bʋ̃-dɩra bɛ cãà be a tẽ-kpɛ̃ɛ pʋɔ ɩ.»

¹⁰Lɛ n'a a nãà tɩ yel a Etiopi tẽw nɩr, Evɛdɩ-Mɛlɛkɩ: «Tɛr nɩbɛ lɩzɛr'ɩ pie cen tɩ ír'ɩ a Zeremi a sa-bie-kʋ̃ɔ-bɔw pʋɔ, ʋʋ bãw wa kpi!»

¹¹A Evɛdɩ-Mɛlɛkɩ tɩ tɛr'ɩ a nɩbɛ lɩzɛr'ɩ pie cen nɩ a nãà yir, tɩ kpɛ n dĩo kãw na be a na-bome dĩo pile a pʋɔ. A be a, ʋ tɩ de nɩ pɛn-zawr 'lẽ ƴãw mie ƴãw tùr a Zeremi a sa-bie-kʋ̃ɔ-bɔw pʋɔ.

¹²Al pùorí, a Etiopi tẽw nɩr, Evɛdɩ-Mɛlɛkɩ, tɩ yel'ɩ a Zeremi: «Ƴãw a pɛn-zawr a fʋ bàwlome pʋɔ, ɛ́ a mie be a pɛnɛ zu.» A Zeremi tɩ ɩ n a lɛ.

¹³Lɛ n'a a nɩbɛ tɩ taw a Zeremi nɩ a mie, do n yi n a sa-bie-kʋ̃ɔ-bɔw pʋɔ. Al pùorí, a Zeremi tɩ be n a soja-zi-gùrbɛ davʋra pʋɔ.

¹⁴A nãà Sedesɩasɩ tɩ tõ na bɛ tɩ bʋɔlɩ a naaŋmɩn-ƴɛ̀r-manɛ Zeremi, ƴãw ʋ wa a Ŋmɩn-yir-kpɛ̃ɛ dɩ̃dɛɛ ata sob ƴãw. A nãà tɩ yel'ɩ a Zeremi: «Ɩ̃ bɔbr'a k'ɩ̃ɩ sowri fʋ bom kãw!»

¹⁵A Zeremi tɩ sɔw nɩ a Sedesɩasɩ: «Mãa wa yel a yel-mɩŋa kʋ̀ b a, fʋ na ƴãw na bɛ kʋ m. Ɛ́ mãa wa wul fʋ yã a, fʋ kʋ̃ tu ɛ!»

¹⁶Lɛ n'a a nãà Sedesɩasɩ tɩ sɔwlɩ pɔ a Zeremi zie à ŋá: «A Sore na vʋʋrɛ a, na kʋ̀ tɩ a nyɔ-vʋʋrʋ ŋa a zũú a, ɩ̃ bɛ kʋrɛ fʋ ɛ, ɩ̃ bɛ dier fʋ ƴãwn a bɛlɩ dem na bɔbr a fʋ kʋb a nuru pʋɔ ɩ.»

¹⁷Lɛ n'a a Zeremi tɩ yel a Sedesɩasɩ: «À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: “Fʋ̃ʋ wa yi tu a Babɩlɔn tẽw nãà zɛbr-nɩbɛ nɩ-bɛrɛ a, fʋ na faa nɩ a fʋ̃ʋ nɩ a fʋ yir dem nyɔ-vʋʋrʋ. Ɛ́ bɛ kʋ̃ nyɩw a Zerizalɛm bɛr ɛ.

¹⁸Ɛcɛ, fʋ̃ʋ bɛ wa yi tu a Babɩlɔn tẽw nãà zɛbr-nɩbɛ nɩ-bɛrɛ a, a Zerizalɛm tẽw na lo n a bɛ nuru pʋɔ, bɛ nyɩw ʋ bɛr. Ɛ́ a fʋ̃ʋ a, fʋ bɛ cɩ̃ɛnɛ a bɛ zie ɩ.”»

¹⁹A nãà Sedesɩasɩ tɩ sɔw nɩ a Zeremi: «Ɩ̃ zɔrɛ nɩ a Zuda tẽw nɩbɛ bɛl na de bɛ tʋɔra kʋ̀ a Babɩlɔn tẽw dem a dɛ̃bɩ̃ɛ. Bɛ nãà wa de m'a ƴãw a bɛ nuru pʋɔ, bɛ ɩ m la.»

²⁰Ɛcɛ, a Zeremi tɩ sɔw na: «Bɛ kʋ̃ de fʋ ƴãw a bɛ nuru pʋɔ ɩ. Bɛrɛ wone a lɛ ɩ̃ na yere kʋ̀rɛ fʋ a Sore yúor ƴãw a, ɛ́ a yele za na ɩ n vla, ɛ́ fʋ na cãà na vʋʋrɛ.

²¹Ɛcɛ, fʋ̃ʋ wa zawrɩ na de fʋ tʋɔra kʋ̀ bɛ a, nyɛ̃ a yele a Sore na ɩ ɩ̃ bãw a:

²²Bɛ na tɛr'ɩ a pɔwbɛ za na cãà be a fʋ yir a, cen nɩ a Babɩlɔn tẽw nãà zɛbr-nɩbɛ nɩ-bɛrɛ zie. Ɛ́ a pɔwbɛ na yiele nɩ à ŋá a fʋ ƴãw: “Bɛ bɛlɩ fʋ na, bɛ páw fʋ na, a fʋ bá-túor! A fʋ gbɛ́ɛ siwr'a kpɩɛr a mɛ̃mɛrɛ pʋɔ, ɛ́ a bɛl a, bɛ zawrɩ fʋ na bɛr.”

²³Bɛ na tɛr'ɩ a fʋ pɔwbɛ nɩ a fʋ bibiir cen nɩ a Babɩlɔn tẽw dem zie. Ɛ́ a fʋ̃ʋ tɔr za kʋ̃ cɩ̃ɛ a bɛ nuru pʋɔ ɩ. A Babɩlɔn tẽw nãà na ɩ na fʋ ɩ gaso nɩr, ʋʋ nyɩw a Zerizalɛm bɛr.»

²⁴Lɛ n'a a Sedesɩasɩ tɩ yel a Zeremi: «Fʋ̃ʋ wa bɔbr kɛ́ fʋ cãà vʋʋrɛ a, fʋ̃ʋ ta ɩ nɩr za bãwnɩ a tɩ ƴɛ̀r-sɔw-taa ŋa ɩ.

²⁵A tõ-tõ-bi-bɛrɛ na wõ na kɛ́ mãa nɩ fʋ̃ʋ ƴɛ̀r'a sɔw taa. Bɛ na sowre fʋ nɩ a ʋlɩ bom nɛ na n'ʋ tɩ yel a. Bɛ na yel fʋ na: “Fʋ̃ʋ bɛ wa sɔwlɩ tɩ bom a, tɩ bɛ kʋrɛ fʋ ɛ.”

²⁶Fʋ na sɔw bɛ nɩ à ŋá: “Nuru n'a ɩ̃ tɩ lɔbr zɛlɛ nɩ a nãà, k'ʋʋ ta lɛb bɛr mɛ̃ ɩ̃ cen tɩ kpi a Yehonatan yir ɛ.”»

²⁷A tõ-tõ-bi-bɛrɛ za tɩ sɩrɩ na wa páw a Zeremi sowr'ʋ. Ʋ tɩ sɔw bɛ mɛ̃ a lɛ tɔr za a nãà na tɩ yel kʋ̀ ʋ a. Lɛ n'a bɛ tɩ bɛr ʋ zoom ɛ́ lɛb, bʋ̃ʋ n'ʋ vɛ̃, nɩr za bɛ tɩ wõ a bɛ ƴɛ̀r-sɔw-taa ŋa ƴɛ̀r-bie ɩ.

²⁸Lɛ n'a a Zeremi tɩ be a soja-zi-gùrbɛ davʋra pʋɔ tɩ ta a lɛn daar a Babɩlɔn tẽw zɛbr-nɩbɛ na zɛb de a Zerizalɛm a. Nyɛ̃ a yele al na ɩ, bɛ na wa zɛb de a Zerizalɛm a: