Read Dagara, Northern Zeremi 41 Bible Online

Zeremi 41 - Dagara, Northern bible

Zeremi 41

¹Zɩ̃ k'aa ʋlɩ yũon nɛ, a cuwr ayopõi sob a, a Netanɩa bidɛb, Yisɩmayɛl, na ɩ Elisama yãw, ɛ́ yi a Zuda tẽw nãà yir a, ɛ́ ɩ a nãà yir nɩr kãw nɩ a nãà yir tõ-tõ-bi-kpɛ̃ɛ kãw a, tɩ tɛr'ɩ nɩbɛ pie wa n a Gedalɩasɩ zie a Misɩpa. Bɛ tɩ lãw na dɩrɛ,

²wa bere, a Yisɩmayɛl nɩ a nɩbɛ pie bɛl na bɩɛl'ʋ a, lãw ìr, gɔr gɔr a Gedalɩasɩ nɩ zɛbr-sɔ-bɛrɛ kʋ. À ŋá n'a bɛ tɩ kʋ a nɩr nɛ a Babɩlɔn tẽw nãà na tɩ kaa ír ƴãw ʋ kaarɛ a Zuda tẽw a.

³Al pùorí, a Yisɩmayɛl mɩ̀ tɩ kʋ n a Zuda tẽw dem za na tɩ be a Misɩpa, a Gedalɩasɩ zie a, lãwnɩ a Babɩlɔn tẽw sojarɩ na tɩ be a be a.

⁴Bɛ tɩ kʋ n a Gedalɩasɩ maalɩ bibie ayi, ɛ́ nɩr za cãà bɛ tɩ bãwnɩ a ɩ.

⁵Lɛ n'a nɩbɛ lɩz'a anaar tɩ yi Sisɛm, Silo nɩ Samaari wa ta. A bɛ tɩ̃ɛmɛ tɩ põ na, a bʋ̃-suuri cɩɛr cɩɛr, ɛ́ a ƴã-gamɛ za wɛr wɛr[61]. Bɛ tɩ tɛr'ɩ ble de-kʋ̀b bome nɩ tɩ-suur-zɔ̃-na-nyùur-vla-vla-a, kɛ́ bɛ cen nɩ tɩ kʋ̀ a Sore a Zerizalɛm Ŋmɩn-yir-kpɛ̃ɛ́.

⁶A Yisɩmayɛl tɩ yi na kone tuore nɩ bɛ. Ʋ na tɩ ta a bɛ zie a, ʋ yel bɛ na: «Nyɩ wa a Ahikam bidɛb, Gedalɩasɩ zie.»

⁷Ɛcɛ bɛ na tɩ kpɛ a tẽ-kpɛ̃ɛ pʋɔ a, a Yisɩmayɛl nɩ a ʋ nɩbɛ tɩ kʋ kʋ bɛ na, ɛ́ lɔb a bɛ ƴã-gamɛ ƴãw sa-bie-kʋ̃ɔ-bɔw pʋɔ.

⁸Nɩbɛ pie a bɛ pʋɔ tɩ yel'ɩ a Yisɩmayɛl: «Ta kʋ tɩ ɛ, bʋ̃ʋ n'ʋ vɛ̃, tɩ tɛr'ɩ bome tɩ na sɔwlɩ bɛr a póru pʋɔ a: ble, ɔɔzʋ, kãá nɩ sɩwr.» Lɛ n'a a Yisɩmayɛl tɩ bɛr bɛ, bɛ tʋ̃ɔ́ kʋ bɛ lãwnɩ a bɛ taabɛ ɩ.

⁹A sa-bie-kʋ̃ɔ-bɔw ʋl pʋɔ a Yisɩmayɛl na tɩ ƴãw bɛ lɔb a nɩbɛ bɛ na kʋ kʋ a ƴã-gamɛ ƴãw a, tɩ n'ɩ a sa-bie-kʋ̃ɔ-bɔw kpɛ̃ɛ ʋl a nãà, Asa, na tɩ ƴãw bɛ tuw, a lɛn daar a Ɩsɩrayɛl tẽw nãà, Baesa[62], na tɩ wa zɛb'ɩ ʋ a. A Yisɩmayɛl tɩ paalɩ ʋ na nɩ a nɩbɛ bɛ na kʋ kʋ a ƴã-gamɛ.

¹⁰Al pùorí ʋ tɩ nyɔw a nɩbɛ na tɩ cɛ be a Misɩpa a, bɛ ɩ gaso nɩbɛ ʋ cen nɩ: a nãà pɔwyaar nɩ a nɩbɛ bɛl za na tɩ be a Misɩpa a, a bɛl a soja-zi-gùrbɛ nɩ-kpɛ̃ɛ, Nebuzaradan, na tɩ ƴãw a Gedalɩasɩ kaarɛ a. Al pùorí, a Yisɩmayɛl tɩ tɛr'ɩ a gaso nɩbɛ cen nɩ Amɔ̃ tẽw.

¹¹A Karea bidɛb, Yohanan, nɩ a zɛbr-nɩbɛ nɩ-bɛrɛ bɛl za na tɩ be a ʋ zie a, tɩ wõ n a faa al za a Netanɩa bidɛb, Yisɩmayɛl, na tɩ maalɩ a.

¹²Bɛ tɩ ɓã n a bɛ zɛbr-nɩbɛ taa, ɛ́ cen nɩ kɛ́ bɛ tɩ zɛb'ɩ ʋ. Bɛ tɩ páw ʋ nɩ a Gabaɔ̃ gbãtar-kpɛ̃ɛ pɛr.

¹³A Yisɩmayɛl gaso nɩbɛ na tɩ nyɛ̃ a Yohanan nɩ a zɛbr-nɩbɛ nɩ-bɛrɛ na bɩɛlɛ ʋ a, nʋ̃ɔ̀ tɩ kpɛ bɛ na bɛ dɩ vuo ɩ.

¹⁴Lɛ n'a a nɩbɛ bɛl za a Yisɩmayɛl na tɩ tɛr a Misɩpa cen nɩ a, tɩ lɛb pùor wa páw a Yohanan.

¹⁵Ɛcɛ a Yisɩmayɛl tɩ zɔ n nɩ nɩbɛ ani a lɛn daar a Yohanan na tɩ pɩɛlɛ a, ʋ tɩ zɔ na cen a Amɔ̃ tẽw dem zie.

¹⁶A yele á ŋá pùorí, a Yohanan nɩ a zɛbr-nɩbɛ nɩ-bɛrɛ na tɩ bɩɛlɛ ʋ a, tɩ ɓã n a bɛlɩ dem za na tɩ cãà vʋʋrɛ a taa. A Yisɩmayɛl tɩ tɛr bɛ na bɛ ɩ gaso nɩbɛ, ʋ cen nɩ a Misɩpa, a Gedalɩasɩ kʋb pùorí: a dɛbr, a pɛr lɛ k'aa sojarɩ, a pɔwbɛ, a bibiir, a dɛ-vaɩ, a bɛlɩ dem za bɛ na tɩ tɛr a Gabaɔ̃ lɛb wa n a.

¹⁷Bɛ tɩ lo n a sɔ́r cen tɩ ta Kimham sãanbɛ gaa zie, na pɩɛlɩ a Bɛtɩlɛm a, tɛw a be. Bɛ tɩ bɔbr'a kɛ́ bɛ cen Eziptɩ tẽw.

¹⁸Bʋ̃ʋ n'ʋ vɛ̃, bɛ tɩ zɔrɛ nɩ a Babɩlɔn tẽw dem dɛ̃bɩ̃ɛ, a lɛ a Yisɩmayɛl na dɛ tɩ kʋ a Gedalɩasɩ a Babɩlɔn tẽw nãà na tɩ ƴãw ʋ kaarɛ a Zuda tẽw a.