Read Dagara, Northern Zeremi 48 Bible Online

Zeremi 48 - Dagara, Northern bible

Zeremi 48

¹A Mowab tẽw ƴãw. À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: «Nyɛ̃ kpɩɛrʋ na páw a Nebo[69] tẽw a, bɛ sãw ʋ na bɛr! Nyɛ̃ vĩ na nyɔw a Kiriyatayim tẽ-kpɛ̃ɛ a, bɛ zɛb'a de ʋ! Nyɛ̃ vĩ na nyɔw a zɛbr-yir-kpɛ̃ɛ ŋa a, ʋ lo na!

²A Mowab tẽw yúor bɔr'a. Nɩbɛ tɩɛrɛ nɩ faa a Hɛsɩbon tẽw ƴãw, yere: “Tɩ cen! Tɩ ír a tẽ-kpɛ̃ɛ ŋa bɛr a nɩ-bʋʋrɛ sɔgɔ!” A fʋ̃ʋ mɩ̀ a, Madɩmɛn i, fʋ na lo na, bɛ na sãw fʋ na bɛr, a zɛbr ta na tu fʋ.

³Cɛlsɩ yire nɩ a Horonayim tẽw pʋɔ: “Bom za sãw na! Kpɩɛrʋ kpɛ̃ɛ n'ʋ!”

⁴A Mowab tẽw lo na, a ʋ bibiir lɔbr'ɩ cɛlsɩ.

⁵A nɩbɛ dúor'ɩ a Luhitɩ dob zie kone nɩ. Bɛ wone nɩ cɛlsɩ na ɩrɛ nɩbaalʋ a, a Horonayim siwfʋ zie:

⁶“Nyɩ zɔrɛ! Nyɩ zɔrɛ ŋmɩɛr taa! Nyɩ be a wɛja-kpalɛ pʋɔ mɛ̃ bõw-gaara a!”

⁷Mowab tẽw i, fʋ tɩ ɩrɛ na ƴãwn a fʋ tome nɩ a fʋ na-bome ƴãw. Ɛcɛ, bɛ mɩ̀ na zɛb'a de b. A fʋ ŋmɩn Kemɔsɩ na cen nɩ tẽ-yũo lãwnɩ a fʋ bàwr-maalbɛ nɩ a fʋ nɩ-bɛrɛ, bɛ za.

⁸A zi-sãwnɛ na lʋɔr'ɩ a tẽ-bɛrɛ za, tẽ-kpɛ̃ɛ kãw za kʋ̃ cɛ ɩ. A fʋɔla na bɔr'a, ɛ́ a tã-sɛr sãw.» À ŋá n'a a Sore yel.

⁹Nyɩ kʋ̀ pɩgɛ a Mowab, bʋ̃ʋ n'ʋ vɛ̃, ʋ bɔbr'a k'ʋʋ ƴaw cen! A ʋ tẽ-bɛrɛ lɩɛb'ɩ ziir na sãw gã a, a bɛ cãà tɛr a nɩbɛ ɩ.

¹⁰Ŋmɛ-ƴãw, a páw sob nɛ na tone a Sore tome salalala, ɛ́ bɛ sàw a Sore na sãw a Mowab tẽw bɛr a!

¹¹«A Mowab pɔ̀lʋ daarɩ́ za a, ʋ tɩ vʋʋrɛ na nɩ ƴã-ɓaarʋ. Bɛ bɛ dãw diw ʋ cen nɩ tẽ-yoru ɛ. Ʋ tɩ vʋʋrɛ nɩ zoom, mɛ̃ divɛ̃ na tewli gã a divɛ̃-pɛr zu a. Bɛ bɛ dãw lɩɛb'ʋ ƴãw bʋ̃-yoru pʋɔ ɩ. Alɛ n'a so ʋ cãà tɛr a ʋ nʋ̃ɔ̀ ɛ́ a ʋ nyũu cãà ŋmɛ̃ ʋ ŋmɛ̃a.»

¹²A Sore yere na: «Alɛ n'a so, a daar ɩ̃ na na tõ nɩbɛ bɛ wa lɩɛb'ʋ ƴãw bʋ̃-yoru pʋɔ a tarɛ na. A sɩn al za pʋɔ ʋ na be a, bɛ na lɩɛb'ʋ na, ɛ́ ŋmɛr a sɩn bɛr.

¹³A Mowab na nyɛ̃ nɩ vĩ a ʋ ŋmɩn Kemɔsɩ ƴãw, mɛ̃ a lɛ a Ɩsɩrayɛl nɩbɛ na tɩ ƴãw a bɛ tɩɛrʋ a Betɛl ŋmɩn[70] ƴãw, wa nyɛ̃ vĩ a.

¹⁴Mowab tẽw nɩbɛ ɛ, ŋmɩŋmɩn za n'a nyɩ sàw yel: “Soja-gãdaar'ɩ tɩ, zɛbr-nɩbɛ mɩŋa”?

¹⁵Bɛ sãw nɩ a Mowab tẽw bɛr, bɛ cere na kɛ́ bɛ tɩ zɛb'ɩ a ʋ tẽ-bɛrɛ. Bɛ nyɔw nɩ a soja-pɔlɛ vɩɛlɩ vɩɛlɩ zie cere nɩ a kʋb zie.» À ŋá n'a a Na-kpɛ̃ɛ, a yúor na dɩ kɛ́ “Sore kpɛnʋ-za-sob” a, yere:

¹⁶A Mowab tẽw loba pɩɛl'a, a kpɩɛrʋ na wa n fɔ̃w fɔ̃w a ʋ ƴãw.

¹⁷Nyɩ puor'ʋ a ʋ wahala, nyɩɩm nɩ-bʋʋrɛ za na kpɩɛr pɩɛl'ʋ ɛ́ bãw ʋ vla vla a. Nyɩ yel: «Ŋmɩŋmɩn za n'a a fãw-kpɛ̃ɛ ŋa, a kpɛnʋ na vɩɛl vɩɛl a, wa tɩ baarɩ?»

¹⁸Divon tẽw nɩbɛ ɛ, nyɩ siw a nyɩ da-kɔw-yúor zu, nyɩ zɩ̃ a sagɛ pʋɔ. Bʋ̃ʋ n'ʋ vɛ̃, a sob nɛ na sãwnɛ a Mowab tẽw a, waar'ɩ a nyɩ ƴãw. Ʋ darɛ nɩ a nyɩ zɛbr-yir-kpɛn lɔbr.

¹⁹Arowɛɛr tẽw dem i, nyɩ cen a sɔ́r zu tɩ gùre. Nyɩ sowri a bɛlɩ dem na zɔrɛ a nɩ a bɛlɩ dem na cɩ̃ɛ a, à ŋá: «Bʋ̃ʋ n'ʋ ɩ?»

²⁰Bɛ na sɔw na: «A Mowab tẽw lo n ʋ za, vĩ nyɔw ʋ na!» Nyɩ cɩɩrɛ, nyɩ kone bɔbr'ɩ sõwfʋ! Nyɩ yel a Arnon man nʋɔr, k'aa Mowab tẽw sãw na!

²¹A ƴɛ̀rʋ a Sore na dɩ a n'ʋ páwr a tã-sɛr vuo, nɩ Holon, Yahasɩ, Mefaatɩ,

²²Divon, Nebo, Bɛtɩ-Divilatayim,

²³Kiriyatayim, Bɛtɩ-Gamul, Bɛtɩ-Meon,

²⁴Keriyɔtɩ, nɩ Bɔsɩra tẽ-bɛrɛ. Ʋ páwr'ɩ a Mowab tẽ-bɛrɛ za, a al na pɩɛlɩ a, nɩ a al na zãá a.

²⁵A Sore yere na: «A Mowab fãw za bɔr'a, a ʋ kpɛnʋ bɛ cãà ɩ.»

²⁶A Mowab tɩ tɩɛr'a k'ʋʋ gãw nɩ a Sore. A lɛ pʋɔ a, bɛ ƴãw k'ʋ nyũ a ʋ divɛ̃ tɩ ti! A lɛn daar a, a nɩbɛ za mɩ̀ na ɩrɛ ʋ na laar.

²⁷Mowab i, lɛb tɩɛrɩ a lɛ fʋ na tɩ ɩrɛ a Ɩsɩrayɛl laar a. Fʋ tɩ ɩ na mɛ̃ fʋ de ʋ na k'ʋ ɩ nyãnyuwe a. Bʋ̃ʋ n'ʋ vɛ̃, fʋ bɛ tʋ̃ɔ́ mɩ́ tɩ ƴɛ̀rɛ a ʋ ƴɛ̀rʋ, ɛ́ ɩrɛ ʋ laar gɔwrɛ nɩ zu ɛ?

²⁸Mowab tẽw dem i, nyɩ yi a tẽ-bɛrɛ pʋɔ, nyɩ cen tɩ kpɩɛr pìe pʋɔ. Nyɩ cɔwrɩ a naŋmamɛ na wob a cowr ziir na bɛ tɛr tab, fʋɔl-zulu nʋɔr a.

²⁹Tɩ wõ n a Mowab pɔ̀lʋ yele. Nyɛ̃ pɔ̀l-ɩb na sɛw a! Nyɛ̃ nyɔka-ɩb a! Nyɛ̃ pɔ̀l-ɩb a! Nyɛ̃ ʋ na manɛ kɛ́ ʋlɛ n'ʋ bɛ wõ a! Nyɛ̃ ʋ na tɩɛrɛ k'ʋʋ zuo nɩ nɩr za a!

³⁰A Sore yere na: «Ɩ̃ mɩ̀ bãwnɩ a na: Ʋ ƴãw nɩ manʋ. Ɛcɛ, ƴɛ̀r-foli n'a ʋ ƴɛ̀rɛ, a ʋ ɩb bɛ tɛr bir ɛ.»

³¹Alɛ n'a so ɩ̃ ùore a Mowab tẽw ƴãw, ɩ̃ lɔbr cɛlsɩ a Mowab tẽw za ƴãw, ɛ́ kone a 'woi 'woi a Kɩɩr-Hɛrɛsɩ tẽw dem ƴãw.

³²Sivima tẽw divɛ̃ tɩɛ ɛ, ɩ̃ kone fʋ na gãw a Yazɛɛr tẽw nɩbɛ ɩ̃ na kone a. Fʋ tɩ tɛ n a fʋ wuli bɛr a tɩ gãw a kʋ̃ɔ-kpɛ̃ɛ-kũu bɛr, a cen tɩ tɔ a Yazɛɛr tẽw. Ɛcɛ, a zi-sãwnɛ lo na nyɛ a fʋ divɛ̃ tɩ-wɔmɛ nɩ a fʋ bʋ̃-dieri.

³³A nʋ̃ɔ̀ cáarʋ na tɩ cáarɛ a bɛ cãà be a Mowab tẽw tɩ-wɔnɩ zaadɛnɩ pʋɔ ɩ. A divɛ̃ bɛ cãà a sɩn pʋɔ ɩ. Nɩbɛ bɛ cãà be nɛbr íre a divɛ̃ ɩ. Nɩr bɛ cãà wone a bɛ cɛlsɩ na ŋmɩɛr manɛ taa a ɩ.

³⁴A Hɛsɩbon tẽw dem kone na bɔbr'ɩ sõwfʋ. A bɛ kon yire nɩ Eleale tẽw. A bɛ kɔkɛɛ yire nɩ Yahasɩ, ɛ́ yire Sowaar tɩ ta Horonayim nɩ Egilatɩ-Selisiya. Bʋ̃ʋ n'ʋ vɛ̃, a Nimirim kʋ̃ɔnɩ zie tɛɛ za lɩɛb'ɩ wɛja nɩr na bɛ kpɩɛr a.

³⁵«A mãa Sore, ɩ̃ yere na: Ɩ̃ na ɩ na a bɛlɩ dem na mɩ́ cen a maalʋ-ziir tɩ maalɩ bagɛ kʋ̀ a bɛ ŋmɩmɛ a, bɛ bɔr a Mowab tẽw pʋɔ.»

³⁶Alɛ n'a so ɩ̃ kone a Mowab nɩ Kɩɩr-Hɛrɛsɩ ten dem. A ɩ̃ kon ɩ na mɛ̃ wele kɔkɔr na yere: a na-bome bɛ na bɔ gbõ taa a, bɔr'a.

³⁷A dɛbr za fɔr'ɩ a bɛ zuru, ɛ́ põ a bɛ tɩ̃ɛmɛ. Bɛ wɛr wɛr'ɩ a bɛ nuru, ɛ́ su vʋɔrɩ kparɩ.

³⁸A Mowab tẽw yie gàrɛ za zu a, nɩ a nɩ-yaga tuor-taa ziir za a, kon tɛwr'a. «Ɩ̃ ŋmɛr'ɩ a Mowab tẽw bɛr, mɛ̃ bom bɛ na bɛ cãà nɔnɛ a.» À ŋá n'a a Sore yere.

³⁹Ɛ́ bʋnʋ yaa! A Mowab lo na! Nyɩ kone! Mowab lɩɛb'ɩ pùor, nyɛ̃ vĩ a! Ʋ ɩrɛ nɩ laarʋ nɩ pʋl-vʋ̃ɔ a ʋ sɩman dem za.

⁴⁰À ŋá n'a a Sore yere: «A ɩ na mɛ̃ sidum yɛ̀r'ɩ a ʋ pɩgɛ laarɛ nɩ a Mowab tẽw zu-sɔw a.»

⁴¹Bɛ zɛb'a de a tẽ-bɛrɛ, bɛ zɛb'a de a zɛbr-yir-kpɛn. Lɛ n'a pʋl-vʋ̃ɔ tɛr a Mowab zɛbr-nɩbɛ bɛl na kpɛ socir a, mɛ̃ pɔw na dɔwr a.

⁴²A Mowab tẽw sãw na, ʋ bɛ lɛb cãà ɩ nɩ-bʋʋrɛ ɩ, bʋ̃ʋ n'ʋ vɛ̃, ʋ tɩ tɩɛr'a k'ʋʋ ɩ n kpɛ̃ɛ zuo a Sore.

⁴³A Sore yere na: «Mowab tẽw dem i, dɛ̃bɩ̃ɛ, bɔw-zulu nɩ bɛrɩ n'a, a nyɩ ƴãw!

⁴⁴Sob nɛ na zɔrɛ a dɛ̃bɩ̃ɛ niŋé a, na lo n bɔw-zulu pʋɔ, ɛ́ sob nɛ na lɛb yire a bɔw pʋɔ a, na lo n bɛra pʋɔ. Bʋ̃ʋ n'ʋ vɛ̃, ɩ̃ na ɩ na à á ŋá za wa a ʋ zu, a Mowab zu, a yũon ʋl ɩ̃ nãà wa sowri ʋ bom a. A Sore n'ʋ yel.

⁴⁵A bɛlɩ dem na zɔrɛ a, bɛ bàl'a. Bɛ tɛw na àr a Hɛsɩbon tẽw. Ɛcɛ vũu yi n a Hɛsɩbon tẽw pʋɔ, vũu-zɛlɛ yi n a Sihon[71] nãà yir pʋɔ. A dɩ n a Mowab tacɩlɛ, nɩ a po-to-fãw dem zuŋmamɛ.

⁴⁶Nyɛ̃ kpɩɛrʋ na páw fʋ a, Mowab i! Ŋmɩn Kemɔsɩ nɩbɛ ɛ, nyɩ wɛ na! Bʋ̃ʋ n'ʋ vɛ̃, bɛ nyɔw nɩ a nyɩ bidɛbr nɩ a nyɩ pɔwyaar cen nɩ, bɛ ɩ nɩ-pàwrɩ.»

⁴⁷Ɛcɛ, a Sore yere na: «Bibir kãw a, ɩ̃ na lɛb'a maalɩ a Mowab tẽw ƴãw.» A ƴɛ̀rʋ a Sore na dɩ n a Mowab yel a, tɛwfʋ zie n'ɩ a ka.