Read Dagara, Northern Zeremi 5 Bible Online

Zeremi 5 - Dagara, Northern bible

Zeremi 5

¹Nyɩ cɔlɩ a Zerizalɛm tẽw sɛ́ɛ, nyɩ jɩ́r vla, nyɩ sowri kaa nyɛ̃, nyɩ bɔ a nɩ-yaga tuor-taa ziir. Nyɩmɛ wa nyɛ̃ nɩr, ʋ ɩrɛ a lɛ-na-tu-sɔr-a, ʋ bɔbr k'ʋʋ mɩ́ yel a yel-mɩŋa a, a lɛ pʋɔ a, ɩ̃ na dɩ n suur kʋ̀ a Zerizalɛm.

²Bɛ na saa mɩ́ yel: «A Sore na vʋʋrɛ a zũú!» a, pɔ-ziri n'a bɛ mɩ́ pɔ.

³Sore e, a yel-mɩŋa bɛ n'a fʋ bɔbr ɛ? Fʋ ŋmɛ bɛ na, ɛ́ a bɛ ɩ bɛ bom ɛ, fʋ tɩ bɔbr'a kɛ́ fʋ kʋ bɛ pàw pɛr, ɛcɛ bɛ bɛ sàw a kpãàfʋ ɛ. Bɛ nyar'ɩ a bɛ niŋe a kpɛmɛ zuo kʋsɩɛr, bɛ zawr'ɩ a fʋ zie lɛb-waa.

⁴Ɩ̃ tɩɛr'ɩ ɩ̃ pʋɔ: «Nɩ-sãsaralɛ ɩb'ɩ à à ŋá, bɛ bɛ tɛr yã k'a sɛw ɛ, bʋ̃ʋ n'ʋ vɛ̃, bɛ bɛ bãw a Sore pʋ-tɩɛrʋ ɛ, nɩ ʋlɩ bom nɛ a bɛ Naaŋmɩn na bɔbr a ɩ.

⁵A na ɩ lɛ a, ɩ̃ na cen nɩ a nɩ-bɛrɛ zie tɩ ƴɛ̀r'ɩ bɛ. Bɛl a, bɛ bãw nɩ a Sore pʋ-tɩɛrʋ, nɩ a ʋlɩ bom nɛ a bɛ Naaŋmɩn na bɔbr a.» Ɛcɛ bɛ za ɩ n been: bɛ gaarɩ na, ɛ́ ŋma a lãw-taa mie na tɩ 'lẽ bɛlɛ nɩ a bɛ Naaŋmɩn a bɛr.

⁶Alɛ so a gbẽw mɩ́ yi a tuwr pʋɔ bɛ bɛrɛ bɛ ɩ, a wɛja-kpalɛ pʋɔ wɛ-baar 'wɔbr bɛ. A nyũo mɩ́ gù a tẽ-bɛrɛ ƴãw tawr nɩr za na yire a cɩɛrɛ. Bʋ̃ʋ n'ʋ vɛ̃, a bɛ na gaarɩ a ɩ-ɩrɩ dɔwlɛ nɩ taa, ɛ́ nɩr kʋ̃ tʋ̃ɔ́ sɔ́r a Sore pùor-bɛ-tub ɩ-ɩrɩ ɛ.

⁷A na ɩ à ŋá a, ŋmɩŋmɩn n'a ɩ̃ na dɩ suur kʋ̀ b? A fʋ bibiir zawrɛ mɛ̃ na bɛrɛ, bɛ mɩ́ pɔ n nɩ ŋmɩn-bɛlɛbɛlɛ yúor. Ɩ̃ tɩ kʋ̀ bɛ nɩ alɩ bome nɛ a na tɩ fɛr kɛ́ bɛ tɛr a, ɛcɛ bɛ cãà na maalɩ a pɩ̃ɔ-yele, bɛ darɛ nɩ taa a pɔw-yɛmɛ yir.

⁸Wur-daar na 'wɔr 'wɔr ɛ́ a wur-pɔw vʋla tɛr a a, à ŋá n'a bɛ ŋmɛ̃. Ŋa mɩ́ kone nɩ a ʋ tɔ pɔw ƴãw.

⁹A Sore yere na: A bɛ fɛr k'ɩ̃ɩ dɔwrɩ a nɩbɛ bɛ ŋa faa faa ɛ? A bɛ fɛr k'ɩ̃ɩ yáa a san a nɩ-bʋʋr-ŋa-tɔ zie ɩ?

¹⁰Nyɩ do a ʋ divɛ̃ tɩɩr púo pʋɔ tɩ sãw ʋ bɛr. Ɛcɛ nyɩ taa sãwnɛ ʋ bɛrɛ pelẽpelẽ ɩ! Nyɩ ár a ʋ wuli bɛr, mãa bɛ so a ɩ.

¹¹Sɩza n'a, a Ɩsɩrayɛl naalʋ-tẽw nɩ a Zuda naalʋ-tẽw za bɛ tu m ɛ. À à ŋá n'a a Sore yere.

¹²A Zuda tẽw dem bɛ bãw a Sore ɩ, ɛ́ yere: «Ʋ bɛ tɛr fãw kãw za ɩ. A faa kʋ̃ lo a tɩ zu ɛ, tɩ kʋ̃ bãw zɛbr nɩ kɔ̃ ɩ.

¹³A naaŋmɩn-ƴɛ̀r-manbɛ ɩ n sɛsɛb! Naaŋmɩn bɛ ƴɛ̀r a bɛ zie ɩ. A faa ƴɛ̀rʋ bɛ na ƴɛ̀rɛ a, a lɛb lo a bɛ zu!»

¹⁴A na ɩ à ŋá a, à ŋá n'a a Sore, a Naaŋmɩn kpɛnʋ-za-sob, yere: «Bɛ na faa ƴɛ̀rɛ à ŋá a, Zeremi i, a ƴɛ̀rʋ ɩ̃ na ƴãwnɛ a fʋ nʋɔrɩ́ a na ɩ na mɛ̃ vũu a. A nɩbɛ bɛ ŋa na ɩ na mɛ̃ dàar a vũu na na dɩ a.»

¹⁵A Sore yere na: Ɩsɩrayɛl nɩbɛ ɛ, ɩ̃ na ɩ na nɩ-bʋʋr-yoru na yi zi-zãána a wa a nyɩ ƴãw. Nɩ-bʋʋrɛ nɩr na kʋ̃ tʋ̃ɔ́ zɛb tʋ̃ɔ́ a nɛbɛ, nɩ-bʋʋrɛ na be koro kãw za a, nɩ-bʋʋrɛ nyɩ na bɛ wone a ƴɛ̀rʋ, ɛ́ bɛ mɩ́ bãw a ƴɛ̀r-bie pɛr a nɛbɛ.

¹⁶A bɛ pime mɩ́ gaalɛ nɩ a kũuni bɛrɛ, bɛ za ɩ n soja-gãdaar.

¹⁷Bɛ na baar'ɩ a nyɩ bom za: a nyɩ bʋ̃-dieri nɩ a nyɩ bʋ̃-dɩrɩ, a nyɩ bidɛbr nɩ a nyɩ pɔwyaar, a nyɩ píir nɩ a nyɩ nĩi, a nyɩ divɛ̃ tɩɩr nɩ a nyɩ kãkã-tɩɩr wɔmɛ. Zɛbr na sãw nɩ a tẽ-kpɛn bɛr, al pʋɔ nyɩ na tɩɛrɛ kɛ́ nyɩ kʋ̃ bãw damnʋ a.

¹⁸A lɛn daar mɩ̀ a, a Sore n'ʋ yere, ɩ̃ kʋ̃ kʋ nyɩ pàw pɛr ɛ.

¹⁹A nɩbɛ wa sowre: “Bʋ̃ʋ n'ʋ so a Sore tɩ Naaŋmɩn ƴãw tɩ a dɔwrʋ á ŋá za?” A fʋ̃ʋ Zeremi, fʋ na sɔw na: “Nyɩ zawrɩ ʋ na bɛr ɛ́ maalɛ ŋmɩn-sãanbɛ a nyɩ mɩŋa tẽw pʋɔ. Lɛ n'a nyɩ mɩ̀ na tõ nɩ-sãanbɛ tome, tẽw na bɛ ɩ a nyɩ tẽw a pʋɔ”.

²⁰A Sore yere na: «Nyɩ yel a yel ŋa kʋ̀ a Zakɔb bʋʋrɛ, nyɩ ɩ a Zuda nɩbɛ wõ ʋ.

²¹Nyɩ bɛr wõ yel ŋa, nyɩɩm na gem ɛ́ bɛ tɛr yã a. Nyɩ tɛr'ɩ mimie ɛ́ bɛ nyɛrɛ ɩ, nyɩ tɛr'ɩ tobe ɛ́ bɛ wone ɩ[18].

²²A Sore yere na: A ɩ lɛ nyɩ bɛ ƴãwnɛ mɛ̃ ʋ? A ɩ lɛ nyɩ bɛ màwr a ɩ̃ niŋé ʋ? Mãa n'ʋ ɩ a biire ɩ a kʋ̃ɔ-kpɛ̃ɛ tɛwfʋ zie, tʋr-bɔw n'ʋ gã kʋralɛ a kʋ̃ɔ-kpɛ̃ɛ kʋ̃ tʋ̃ɔ́ gãw ɛ. A ʋ kʋ̃ɔ-mie na saa mɩ́ ìre dúor a, ɛcɛ a bɛ tɛr fãw ɛ, a na tʋ̃ɔ́ na mɩ́ ɩrɛ gɔmɛ, ɛcɛ a bɛ gãwnɛ a tʋr-bɔw ɛ.

²³Ɛcɛ a nyɩɩm a, nyɩ ɩ n nɩbɛ na bɛ wone wulu ɛ́ ɩ nɩ-gaarɩ a. Nyɩ mɩ́ lɩɛb'a tɔlɛ cere.

²⁴Nyɩ bɛ mɩ́ yel: “Nyɩ ɩ tɩ tɛr ƴãwfʋ a Sore tɩ Naaŋmɩn zie ɩ. Ʋ mɩ́ kʋ̀ tɩ nɩ a saa a ʋ daar, a kpãcãan nɩ a sɩ̃ɛ-kpɛ-paala, ɛ́ yũon za, ʋ mɩ́ bãwnɩ nɩ a tɩ bʋ̃-dieri-deb dàrʋ.”

²⁵A nyɩ sãwna dam'ɩ à á ŋá za nyaw taa, a nyɩ yel-bebe n'a piw nyɩ nyɩ bɛ páw a yel-vɩɛlɩ á ŋá ɩ.

²⁶Bʋ̃ʋ n'ʋ vɛ̃, nɩ-faar be n a ɩ nɩbɛ pʋɔ. Bɛ mɩ́ sɔwl'a gù mɛ̃ mʋ̃ɔ pʋɔ lili-nyɔwrbɛ a. Bɛ ƴãw nɩ bɛrɩ kɛ́ bɛ nyɔw nɩ a nɩsaalbɛ.

²⁷A bɛ yie paal'ɩ bome bɛ na ɩ nyãnyu-ɩb páw a, mɛ̃ kasow na paalɩ lili a. Alɛ so bɛ lɩɛbɩ nɩ-tɩbr nɩ tɛra dem,

²⁸bɛ kpɛ bɛrɛ 'wɔra 'wɔra. Bɛ de nɩ a faa maalʋ jala. Bɛ bɛ dɩrɛ a ƴɛ̀rʋ nɩ mɩnʋ ɛ, bɛ bɛ dɩrɛ a ƴɛ̀rʋ nɩ mɩnʋ kʋ̀rɛ a bi-kpebe ɩ, alɛ bɛ ɩ lɛ, a nãá mɩ́ tɛr bɛ nɩ ɩb. Bɛ bɛ mɩ́ tu a nan dem yele pùor ɛ.

²⁹A Sore yere na: A bɛ fɛr k'ɩ̃ɩ ìr a bɛ ƴãw ɛ? a bɛ fɛr k'ɩ̃ɩ yáa a san a nɩ-bʋʋr-ŋa-tɔ zie bɩɩ?

³⁰Yele na kpɛ faa bɛ maal'ɩ wob ɛ́ ɩrɛ suur a ɩrɛ nɩ a tẽw pʋɔ:

³¹A naaŋmɩn-ƴɛ̀r-manbɛ ƴɛ̀rɛ nɩ ŋmɩn-bɛlɛbɛlɛ yúor ƴãw, a bàwr-maalbɛ bɔbr'ɩ a bɛl yõ tɔnɛ, ɛ́ a ɩ̃ nɩbɛ nɔ̃w a lɛ. Ɛcɛ a yele baarʋ daar a, bʋ̃ʋ n'ʋ nyɩ na ɩ?»