Read Dagara, Northern Zeremi 51 Bible Online

Zeremi 51 - Dagara, Northern bible

Zeremi 51

¹À ŋá n'a a Sore yere: «Ɩ̃ na ɩ na sɛsɛb na sãwnɛ bom za a, ʋ fu a Babɩlɔn tẽw nɩ a ʋ nɩbɛ zu.

²Ɩ̃ na bɛr'ɩ nɩ-sãanbɛ bɛ wa a Babɩlɔn tẽw ƴãw, wa diw a ʋ nɩbɛ yaarɩ, mɛ̃ sɛsɛb na mɩ́ yɛ́lɩ mɔ̃-kon a. Bɛ na sãw nɩ a ʋ tẽw bɛr. Bʋ̃ʋ n'ʋ vɛ̃, bɛ na ìr'a jil koli ʋ a kpɩɛrʋ bibir.»

³A tam-tɛbrbɛ, bɛ tɛbr a dɔ̃ dem tam-tɛbrbɛ! Ɛ́ a dɔ̃ dem ta pɔrɛ nɩ a bɛ zɛbr-nyãa-kpali ɛ! Nyɩ ta bɛr a Babɩlɔn soja-pɔlɛ bɛ vʋʋrɛ ɩ! Nyɩ kʋ a ʋ zɛbr-nɩbɛ pàw pɛr!

⁴A bɛlɩ dem bɛ na ƴãw a bàalʋ a, na gã gã nɩ tẽw a Babɩlɔn tẽw pʋɔ, ɛ́ a bɛlɩ dem bɛ na kʋ a zɛbr zie a pàw a tẽ-bɛrɛ sɛ́ɛ.

⁵Bʋ̃ʋ n'ʋ vɛ̃, a bɛ tẽw paal'ɩ a sãwfʋ bɛ na ɩ sãw a Ɩsɩrayɛl Naaŋmɩn na ɩ sõw a. Ɛcɛ a Ɩsɩrayɛl nɩ a Zuda bɛ bɔr a bɛ Naaŋmɩn, a Sore kpɛnʋ-za-sob, bɛr ɛ.

⁶Nyɩ yi záa a Babɩlɔn tẽw pʋɔ, ŋa mɩ́ zɔ faa ʋ tʋɔra! Alɛ bɛ ɩ lɛ, nyɩ na kpi n a lɛn daar ʋlɛ wa yarɛ a ʋ ɩ-faar san a. Bʋ̃ʋ n'ʋ vɛ̃, a Sore san-yaafʋ daar'ʋ ta. Ʋ na ya ʋ na mɛ̃ a lɛ a na sɛw taa nɩ ʋ a.

⁷A Babɩlɔn tɩ ɩ n salm-zɩɛ koli-nyúura a Sore nũú. Ʋ mɩ́ tɩ ɩ n a tẽ-daa za ʋ kuoli. A nɩ-bʋʋrɛ mɩ́ tɩ nyũ n a ʋ divɛ̃ tɩ bol'ɩ.

⁸Bɛ wa bere na a Babɩlɔn lo, lo ŋmɛr yàarɩ. «Nyɩ kone ʋ! Nyɩ ɩ kãá sɔ a ʋ natɩɛ, kapaw ʋ na sanɩ na.»

⁹«Tɩ yel kɛ́ tɩ sanɩ a Babɩlɔn, ɛcɛ ʋ bɛ tɛr sanʋ ɛ. Nyɩ ɩ tɩ bɛr ʋ, ɛ́ ŋa za mɩ́ kul a ʋ tẽw! Bʋ̃ʋ n'ʋ vɛ̃, a ʋ dɔwrʋ do na tɩ tɔ a salom, ʋ do na tɩ tɔ a zũzuwe.

¹⁰A Sore dɩ n a ƴɛ̀rʋ kpɛ tɩ. Nyɩ ɩ tɩ cen a Sɩyɔ̃ tɩ manɩ a lɛ za a Sore tɩ Naaŋmɩn na ɩ a.»

¹¹A Sore tɛr'ɩ tɩɛrʋ k'ʋʋ sãw a Babɩlɔn tẽw. Ʋ sɩ̃wnɛ nɩ a Mɛdɩ mɩnɛ na-mɩnɛ tɩɛrʋ a al ƴãw. A Sore san-yaafʋ n'a, ʋ yáarɛ nɩ a ʋ yir-sõw san. Nyɩ kàr a nyɩ pime, nyɩ ƴãw a paalɩ a nyɩ lɔwr.

¹²Nyɩ zɛw a dɩrapo[81] a zɛbr tib ƴãw, a Babɩlɔn tẽw dacĩ-bɛrɛ ŋmɛr bɛ́rʋ ƴãw. Nyɩ ɩ a sojarɩ yãwmɛ dɔwlɩ, a ziir bɛ na gùre a pʋɔ. Nyɩ ƴãw zi-piwrbɛ! Nyɩ sɔwlɩ nɩbɛ a zɛbr ƴãw! À à ŋá n'a a Sore maalɛ a lɛ ʋ na tɩɛrɩ bin a, a ʋlɩ bom nɛ ʋ na yel a Babɩlɔn tẽw dem ƴãw a.

¹³Babɩlɔn i, fʋ̃ʋ na kpɩɛr a man-kpɛ̃ɛ nʋɔr a, fʋ̃ʋ na tɛr na-bome bɛ dɩ vuo a, a fʋ baarʋ ta na, fʋ zu n a fʋ taabɛ a sɛw.

¹⁴A Sore, a kpɛnʋ-za-sob, pɔ n nɩ a ʋl mɩŋa à ŋá: «Sɩza, ɩ̃ na paalɩ fʋ na nɩ nɩbɛ mɛ̃ sãsoge a, ɛ́ bɛ na ŋmɛ n a zɛb-tʋ̃ɔ́fʋ cɛlsɩ a fʋ ƴãw.»

¹⁵A Sore maal'ɩ a tẽw nɩ a ʋ fãw, ʋ ɩ n a tẽ-daa ʋ àr nɩ a ʋ yã-bãwfʋ, ɛ́ dɔl a salom nɩ a ʋ yã.

¹⁶Ʋlɛ wa ƴɛ̀rɛ a, a kʋ̃ɔnɩ mɩ́ ɓanɛ nɩ taa a salom zu, zũzu-bɛrɛ mɩ́ yi n saa-pɛrɩ́ dúor, a saa-nyɩwrʋ mɩ́ ɩ na a saa waar, a sɛsɛb mɩ́ yi n a ʋ beba ziir.

¹⁷A nɩbɛ za dɛ na mɩ́ àr lɛ, gem, ɛ́ bɛ bãw a pɛr ɛ. Vĩ nyɔw nɩ salm-nyɩlɛ za a ʋ tɩɩb ƴãw. A ʋ tɩbɛ dasuli ɩ n bɛ̀lʋ: vʋʋrʋ kãw za bɛ be a pʋɔ ɩ.

¹⁸A bɛ tɛr pɛr ɛ, laarʋ tɛwr'a a ɩrɛ. A Sore wa ìr a ƴãw a lɛn daar a, a na bɔr a.

¹⁹Ɛcɛ a Zakɔb Naaŋmɩn, na ɩ a Ɩsɩrayɛl na-bom a, ʋ bɛ ŋmɛ̃ taa nɩ a ɩ. A ʋl a, ʋlɛ n'ɩ a bome za íre, ɛ́ a Ɩsɩrayɛl'ɩ a dɔwlʋ ʋ na so a. A ʋ yúor'ɩ: «A Sore, a kpɛnʋ-za-sob.»

²⁰A Sore yere na: «Babɩlɔn i, fʋ ɩ n dakpuli-ŋmãa a ɩ̃ zie, zɛbr bom. Fʋ̃ʋ n'ʋ ɩ̃ pɔb'ɩ ten tʋ̃ɔ́ pelẽpelẽ, ɛ́ sãw nɩ naalʋ-ten bɛr.

²¹Fʋ̃ʋ n'ʋ ɩ̃ pɔb'ɩ wie nɩ a zɔmnbɛ tʋ̃ɔ́ pelẽpelẽ, zɛbr-torkori nɩ a dãan-dãanbɛ.

²²Fʋ̃ʋ n'ʋ ɩ̃ pɔb'ɩ dɛbr nɩ pɔwbɛ tʋ̃ɔ́ pelẽpelẽ, dɛb-nyamɛ nɩ pɔlbili, dɛbli nɩ powli.

²³Fʋ̃ʋ n'ʋ ɩ̃ pɔb'ɩ dʋ̃-cɩ̃ɩnbɛ nɩ a bɛ dʋn tʋ̃ɔ́ pelẽpelẽ, ka-kʋ́ɔrbɛ nɩ a bɛ na-kʋɔrɩ na caw caw a, na-kpɛ̃ɛ-lɩɛrbɛ nɩ tẽli-kaarbɛ.

²⁴Ɛcɛ, a mãa Sore, ɩ̃ yere na: nyɩ na nyɛ̃ nɩ a lɛ ɩ̃ na na ƴãw a Babɩlɔn tẽw nɩ a Babɩlɔn tẽw dem ya a faa al za bɛ na maalɩ a Sɩyɔ̃ tẽw a.

²⁵Mãa nɩ fʋ̃ʋ nɛbɛ, Babɩlɔn i, a Sore n'ʋ yel. A sãw-bɛrʋ ƴãw a, fʋ kpɛmɛ na mɛ̃ tãw a, ɛ́ fʋ sãwnɛ nɩ a tẽ-daa za! Ɩ̃ na zɛw nɩ nũu a fʋ ƴãw, ɩ̃ na ɩ na fʋ yi a pìe nyʋɔrɩ́ za bili siw, ɩ̃ na ɩ na fʋ lɩɛb'ɩ tãw na ɩ vũu a.

²⁶Bɛ kʋ̃ lɛb tuw ír dacĩ-goraa kʋsɩɛr nɩ yir-pɛr kʋsɩɛr a fʋ pʋɔ ɩ. Fʋ na lɩɛb'ɩ wɛja-kpalɛ na ɩrɛ nɩbaalʋ kʋralɛ a.» À à ŋá n'a a Sore yel.

²⁷Nyɩ zɛw a dɩrapo a tẽw pʋɔ, nyɩ pɛblɩ ɩɩl a nɩ-bʋʋr-yoru sɔgɔ. Nyɩ ɓã a nɩ-bʋʋrɛ taa a Babɩlɔn tẽw ƴãw, nyɩ bʋɔlɩ a Araratɩ, a Mini, a Asɩkenaazɩ[82] naalʋ-ten a ʋ ƴãw. Nyɩ ƴãw sojarɩ nɩ-bɛrɛ bɛ ír sojarɩ. Nyɩ ƴãw wie na yãwmɛ mɛ̃ sãsoge a, a cen a ʋ ƴãw.

²⁸Nyɩ ɓã a nɩ-bʋʋrɛ taa a ʋ ƴãw, baa zuo a za a Mɛdɩ mɩnɛ na-mɩnɛ, a bɛ na-kpɛ̃ɛ-lɩɛrbɛ, a bɛ tẽli-kaarbɛ nɩ a tẽw ʋl za bɛ na kaarɛ a.

²⁹A tẽsɔw màwr'a, ʋ màwr'ɩ dɛ̃bɩ̃-mawfʋ a lɛn daar a Sore na tuur a lɛ ʋ na tɩɛrɩ a Babɩlɔn tẽw ƴãw a: ʋ ɩrɛ na a Babɩlɔn tẽw lɩɛbɛ wɛja-kpalɛ na ɩrɛ nɩbaalʋ a, tẽw nɩr za na bɛ cãà kpɩɛr a.

³⁰A Babɩlɔn tẽw soja-gãdaar bɛr'ɩ a zɛbr, bɛ sɔwlɛ nɩ a gõgone pʋɔ. A bɛ gãdaalʋ baar'a, bɛ lɩɛb'ɩ pɔwbɛ! A tẽ-kpɛ̃ɛ dɩ̃dɛɛ yuori na, a ʋ yie dɩrɛ nɩ vũu.

³¹A nɩbɛ bɛ na tõ a zɔrɛ na lɩɛrɛ taa kɛ́ bɛ tɩ yel kʋ̀ a Babɩlɔn tẽw nãà: «Bɛ zɛb'a de a tẽ-kpɛ̃ɛ ʋ za,

³²a tɔlʋ ziir piw na, bɛ nyɩw nɩ a zi-kpɛn na gù ʋ a bɛr, pʋl-vʋ̃ɔ tɛr'ɩ a sojarɩ.»

³³À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: «Bɛ nɛbr'ɩ a Babɩlɔn na ɩrɛ nɩbaalʋ a, mɛ̃ zie bɛ na cɔbrɛ ble vab ƴãw a. Ka nɩ blã a, a na ɩ n a bʋ̃-dieri-deb daar a ʋ zie.»

³⁴«A Babɩlɔn tẽw nãà, Nabikodonozɔɔr, za mɛ̃ na vɔl, ʋ ŋmɔwrɩ mɛ̃ na ɛ́ bɛr mɛ̃, mɛ̃ la-zawla a. Ʋ vɔl mɛ̃ na mɛ̃ wa-bɩɛ[83] a. Ʋ paal'ɩ a ʋ púor nɩ a ɩ̃ bʋ̃-vɩɛlɩ vɩɛlɩ zie, ɛ́ diw mɛ̃ bɛr.

³⁵A Sɩyɔ̃ tẽw dem na tʋ̃ɔ́ na yel: a kpɩɛrʋ nɩ a dɔwrʋ a Babɩlɔn na ƴãw tɩ a, a lɛb lo a ʋ zu! A Zerizalɛm tẽw dem na tʋ̃ɔ́ na yel: a tɩ zɩ̃ɩ a Babɩlɔn tẽw dem na ɩ a cir a, a sãwna, a lɛb lo a bɛ zu!»

³⁶A na ɩ à ŋá a, nyɛ̃ a lɛ a Sore na yere a Zerizalɛm ƴãw a: «Ɩ̃ na tu n a fʋ yele pùor ɛ́ yáa a fʋ san: ɩ̃ na ɩ na a Babɩlɔn tẽw man ʋ ko, ɛ́ ɩ a ʋ bul-nʋɔr ʋ sɩr.

³⁷A Babɩlɔn na lɩɛb'ɩ kʋsɛbɛ na gbõ taa a, gbõgbo-cili kpɛb zie, zi-faa bɛ na mɩ́ nyɛ̃ ŋmɩɛr pʋl-vʋ̃ɔ cɛlsɩ a. Nɩr za kʋ̃ cãà kpɩɛr ʋ ɛ.

³⁸Ƴɛrɛŋa a, a Babɩlɔn tẽw dem za ɩ na mɛ̃ gben na ùore a, bɛ kone na mɛ̃ wɛ-dʋ̃-faar a.

³⁹A bɛ bʋ̃-bɔbra tuo dɩrɛ bɛ na, ɩ̃ɩ cɔbrɛ cuw dɩb a bɛ ƴãw. Ɩ̃ na ƴãw na bɛ nyũ tɩ kuoli gã kpãlãkpãlã. Bɛ na gúr'ɩ gʋ̃ɔ na bɛ tɛr baarʋ a, bɛ kʋ̃ lɛb ìr towtow ɛ, a mãa Sore, mãa n'ʋ yere.

⁴⁰Ɩ̃ tɛr bɛ na cere nɩ a kʋb zie mɛ̃ píir a, mɛ̃ pʋ́rɩ bɩɩ bʋrɩ a.»

⁴¹Ŋmɩŋmɩn za n'a? A Sesakɩ[84] tẽ-kpɛ̃ɛ a yúor na yi a tẽ-daa za zu a, bɛ de ʋ na, bɛ zɛb'a de ʋ! Ŋmɩŋmɩn za n'a? A Babɩlɔn tẽw lɩɛb'ɩ wɛja-kpalɛ na ɩrɛ nɩbaalʋ a nɩ-bʋʋrɛ sɔgɔ a!

⁴²A kʋ̃ɔ-kpɛ̃ɛ do na ta a Babɩlɔn tẽw, a ʋ kʋ̃ɔ-mie na ɩrɛ gɔmɛ a, paal'a pàw ʋ.

⁴³A ʋ tẽ-bɛrɛ lɩɛb'ɩ ziir na kpɛ faar a. A tẽw lɩɛb'ɩ dɩlãpʋɔ-kõw, zie nɩr za na bɛ kpɩɛr a, nɩr za na bɛ tɔlɛ a.

⁴⁴A Sore yere na: «Ɩ̃ na ìr'ɩ a Bɛl, a Babɩlɔn tẽw ŋmɩn ƴãw. A bom ʋl ʋ na vɔlɛ a, ɩ̃ na ír ʋ nɩ a ʋ nʋɔrɩ́. A nɩ-bʋʋrɛ kʋ̃ cãà darɛ taa cere a ʋ zie ɩ. A dacĩ-kpɛ̃ɛ na piw a Babɩlɔn tẽ-kpɛ̃ɛ a lo na.

⁴⁵Nyɩɩm, ɩ̃ nɩbɛ ɛ, nyɩ yi záa a ʋ pʋɔ, ŋa za ʋ mɩ́ zɔ zãá nɩ a ɩ̃ su-tʋlʋ, tʋ̃ɔ́ faa a ʋ nyɔ-vʋʋrʋ.

⁴⁶Nyɩ taa wa sàw a nyɩ kanyir wa báarɛ ɩ! Nyɩ ta zɔrɛ dɛ̃bɩ̃ɛ a yele bɛ na yere a tẽw pʋɔ a ƴãw ɛ. Yũon ŋa, bɛ mɩ́ yel'ɩ à ŋá, yũon waar bɛ yel bʋ̃-yoru: po-to-fãw-ɩb tɛwr'a a tẽw pʋɔ, nɩ-kpɛ̃ɛ na dɩrɛ nɩ-kpɛ̃ɛnʋ mɛ̃ a lɛ ʋ na bɔbr a diw nɩ a ƴen sob...

⁴⁷Bibie waar'a ɩ̃ na ìr a Babɩlɔn tẽw tɩbɛ ƴãw, vĩ na nyɔw nɩ a tẽw za. A kũuni za na gã gã nɩ a tẽ-kpɛ̃ɛ pʋɔ.

⁴⁸Lɛ n'a a salom nɩ a tẽw nɩ bom za na be a pʋɔ a, na lɔbr zɛb-tʋ̃ɔ́fʋ cɛlsɩ a Babɩlɔn tẽw ƴãw. Bʋ̃ʋ n'ʋ vɛ̃, a bɛlɩ dem na na sãw ʋ bɛr a na yi n saa-pɛrɩ́-gʋba-lowr ta.» À à ŋá n'a a Sore yel.

⁴⁹Kũuni kpi n a tẽ-daa za zu a Babɩlɔn ƴãw. A Babɩlɔn n'ʋ cɛ na lo, a Ɩsɩrayɛl nɩbɛ ʋ na ɩ bɛ kpi a ƴãw.

⁵⁰Nyɩɩm ʋ na bɛ páw kʋ a, nyɩ ìr lo a sɔ́r! Nyɩ ta be a ka ɩ. Nyɩ be a zi-zãána be, ɛ́ tɩɛrɛ a Sore, nyɩ tɛr a Zerizalɛm tɩɛrʋ.

⁵¹«Nʋ̃ɔ̀ bɛ mɩ́ tɩ ɩrɛ tɩ a zʋmɛ tɩ na mɩ́ tɩ wone a ƴãw ɛ. Vĩ tɩ nyɔw tɩ na a lɛn daar a nɩ-sãanbɛ na tɩ kpɛ a Sore zi-sõw pʋɔ a.»

⁵²A Sore yere na: «Alɛ n'a so, bibie waar ɩ̃ na ìr a Babɩlɔn tẽw tɩbɛ ƴãw. A ʋ tẽw za pʋɔ a, bɛ na wone nɩ a nɩbɛ bɛ na ƴãw a bàalʋ bɛ na kpi a kon.

⁵³A Babɩlɔn saa tɩ tʋ̃ɔ́ do a salom zu, ɛ́ tɩ ɩ a saa-zu be a ʋ kpɛb zie bɛ tɛr tab a, a ɩ̃ ƴɛ̀rʋ zũú a, a zi-sãwnbɛ na ta ʋ na.» À à ŋá n'a a Sore yel.

⁵⁴Cɛlsɩ ŋmɩɛr'ɩ a Babɩlɔn tẽw pʋɔ, zie na sãw faa faa a gɔmɛ yire nɩ a tẽw ŋa pʋɔ.

⁵⁵A Sore n'ʋ sãwnɛ a Babɩlɔn tẽw, ʋ ɩ na a ʋ gɔmɛ na yire yaga za a baarɩ. A dɔ̃ dem zɛbr-nɩbɛ ɩrɛ nɩ gɔmɛ mɛ̃ a kʋ̃ɔ-kpɛ̃ɛ kʋ̃ɔ-mie a. A bɛ gɔmɛ ɩ na mɛ̃ saa na tanɛ a.

⁵⁶A zi-sãwnɛ waar'ɩ a Babɩlɔn ƴãw, ʋ na wa zɛb'ɩ ʋ na nyɔw a ʋ soja-gãdaar bɛ ɩ gaso nɩbɛ, ʋʋ kar a bɛ tamɛ bɛr. Sɩza, a Sore ɩ n Naaŋmɩn na bãw a san yáafʋ, ɛ́ mɩ́ kʋ̀ ŋa a lɛ ʋ na sɛw taa nɩ a.

⁵⁷«Ɩ̃ na ɩ na a ʋ tõ-tõ-bi-bɛrɛ, a ʋ yã-bãwnbɛ, a ʋ tẽli-kaarbɛ, a ʋ na-kpɛ̃ɛ-lɩɛrbɛ nɩ a ʋ gãdaar nyũ kuoli. Bɛ na gúr'ɩ gʋ̃ɔ na bɛ tɛr baarʋ a, bɛ kʋ̃ lɛb zaw ìr towtow ɛ. A nãà a yúor na dɩ kɛ́ “Sore kpɛnʋ-za-sob a” n'ʋ yere.»

⁵⁸À ŋá n'a a Sore, a kpɛnʋ-za-sob, yere: «A Babɩlɔn tẽw dacĩ-yɛlsɩ ŋmɛr'ɩ a za, ɛ́ vũu dɩ a ʋ pamɛ na kɛrɩ kɛrɩ a. A nɩ-bʋʋrɛ bàlɛ nɩ bɛ tʋɔra zawlalɛ ɛ́ a ten nɩbɛ kʋrɛ bɛ tʋɔra vũu ƴãw!»

⁵⁹Seraya, na ɩ Neriya bidɛb nɩ Maaseya yãw a, tɩ ɩ n a sojarɩ nɩ-kpɛ̃ɛ ʋl na tone a Zuda tẽw nãà, Sedesɩasɩ, tome a. A Sedesɩasɩ naalʋ-dɩb yome anaar sob daar, a Seraya tɩ bɩɛlɩ ʋ na cen nɩ a Babɩlɔn[85]. Zeremi mɩ̀ tɩ sɛb'ɩ sɛb-pila zu a kpɩɛrʋ al za na sɛw k'aa páw a Babɩlɔn a, a ƴɛ̀rʋ al za bɛ na sɛb a tẽ-kpɛ̃ɛ ŋa ƴãw a.

⁶⁰

⁶¹Lɛ n'a a Zeremi tɩ yel a Seraya: «Fʋ̃ʋ wa ta a Babɩlɔn a, fʋ na ƴãw nɩ fãw kanɩ a ƴɛ̀rʋ á ŋá za vla vla.

⁶²Al pùorí, fʋ na yel'a: “Sore e, fʋ̃ʋ mɩŋa n'ʋ yel k'aa tẽ-kpɛ̃ɛ ŋa na sãw na, kɛ́ nɩsaal nɩ dʋ̃w za kʋ̃ cãà kpɩɛr a ʋ pʋɔ ɩ, k'ʋʋ na lɩɛb'ɩ wɛja-kpalɛ na ɩrɛ nɩbaalʋ kʋralɛ a.”

⁶³Fʋ̃ʋ wa kanɩ a sɛbɛ ŋa baar'a, fʋ na de nɩ kʋsɩɛr 'lẽ mɛr'ɩ ʋ, ɛ́ lɔb ʋ ƴãw a Efaratɩ man pʋɔ,

⁶⁴ɛ́ yel à ŋá: “À ŋá n'a a Babɩlɔn mɩ̀ na bɔr. Ʋ kʋ̃ lɛb ìr a kpɩɛrʋ a Sore na na ɩ a páw ʋ a pùorí ɛ.”» «A nɩ-bʋʋrɛ bàlɛ nɩ bɛ tʋɔra»: a Zeremi ƴɛ̀rʋ nʋɔr kʋb zie n'ɩ a ka.