Read Dagara, Northern Zeremi 52 Bible Online

Zeremi 52 - Dagara, Northern bible

Zeremi 52

¹A Sedesɩasɩ tɩ tɛr'ɩ yome lɩzɛr'ɩ been a lɛn daar ʋ na lɩɛbɩ a nãà a, ɛ́ dɩ a naalʋ yome pie nɩ been a Zerizalɛm. A ʋ mã yúor tɩ dɩ na kɛ́ Hamutal, na ɩ Yirmeyahu na yi Livina a, pɔwyaa.

²A Sedesɩasɩ tɩ ɩ n a lɛ na bɛ vɩɛl a Sore zie a, mɛ̃ a lɛ tɔr za a Yoyakim na tɩ ɩ a.

³A alɩ bome nɛ na tɩ ɩ a Zerizalɛm nɩ a Zuda tẽw a, a tɩ ɩ na a Sore suur ìr, ʋ wa tɩ diw a ʋ nɩ-bʋʋrɛ bɛr a ʋ niŋé. A Sedesɩasɩ tɩ ìr'a gaarɩ a Babɩlɔn tẽw nãà zu.

⁴Lɛ n'a a Nabikodonozɔɔr, a Babɩlɔn tẽw nãà, tɩ wa a Zerizalɛm, nɩ a ʋ zɛbr-nɩbɛ za, wa maalɩ a ʋ laɩ tori nɩ a tẽ-kpɛ̃ɛ. A Babɩlɔn tẽw dem tɩ wɛr'ɩ bɔwrɩ viiri koli a tẽw. A Sedesɩasɩ naalʋ-dɩb yome piwaɩ sob tɩ n'a, a cuwr pie sob bibie pie daar.

⁵Bɛ tɩ piw nɩ a tẽw tɩ ta a ʋ naalʋ-dɩb yome pie nɩ been sob.

⁶A kɔ̃ tɩ kpɛ n faa a tẽw pʋɔ. A nɩbɛ bɛ tɩ cãà tɛr bʋ̃-dɩrɩ ɛ. A cuwr anaar sob, a bibie piwaɩ sob,

⁷a Babɩlɔn tẽw dem tɩ ŋmɛ n a tẽw dacĩ-kpɛ̃ɛ puo. A Zuda tẽw sojarɩ tɩ yi n a tɩ̃ɩsɔw zɔ. A Babɩlɔn tẽw dem na saa tɩ jil a Zerizalɛm a, bɛ tɩ tu n a dɩ̃dɔr na be a dacĩ-bɛrɛ ayi na pɩɛlɩ a nãà zaadɛ̃ a cará yi. Bɛ tɩ de nɩ a sɔ́r na cere a Zurdɛ̃ fʋɔla pʋɔ a.

⁸Ɛcɛ a Babɩlɔn tẽw sojarɩ tɩ ta na tu a nãà Sedesɩasɩ, tɩ páw ʋ a Zeriko tɩ̃tal pʋɔ. A ʋ zɛbr-nɩbɛ za tɩ zɔ na yaarɩ ɛ́ bɛr ʋ.

⁹A Babɩlɔn tẽw dem tɩ nyɔw ʋ na, tɛr ʋ cen nɩ a Babɩlɔn tẽw nãà zie, na tɩ be Irivɩla a, a Hamatɩ tẽw. Be n'a a Nabikodonozɔɔr tɩ dɩ n a Sedesɩasɩ a ƴɛ̀rʋ.

¹⁰A be tɔr za n'a ʋ tɩ ƴãw bɛ kʋ a Sedesɩasɩ bidɛbr a bɛ sãà Sedesɩasɩ mimirí, lãwnɩ a Zuda tẽw tõ-tõ-bi-bɛrɛ za.

¹¹Al pùorí a Nabikodonozɔɔr ƴãw bɛ cɔ̀r a Sedesɩasɩ mimie kpol, ɛ́ 'lẽ ʋ nɩ kur-zɩɛ bãzɔlɛ ayi na ɓɛrɩ taa a, cen nɩ a Babɩlɔn tɩ ƴãw ʋ gaso pʋɔ, ʋ tɩ kpi a be.

¹²A Babɩlɔn tẽw nãà, Nabikodonozɔɔr, naalʋ-dɩb yome lɩzɛwaɩ sob, a cuwr anũu sob bibie pie sob, Nebuzaradan tɩ kpɛ n a Zerizalɛm tẽw pʋɔ. A sojarɩ na gùre a Babɩlɔn tẽw nãà a nɩ-kpɛ̃ɛ tɩ n'ʋ. Ʋ tɩ pʋɔ nɩ a nɩ-tɩbrɛ bɛl na mɩ́ be a nãà zie a pʋɔ.

¹³Ʋ tɩ nyɩw nɩ a Ŋmɩn-yir-kpɛ̃ɛ, a nãà yir nɩ a tẽw yie za bɛr, baa zuo a za a nɩ-tɩbrɛ yie.

¹⁴A Babɩlɔn tẽw sojarɩ, na tɩ bɩɛlɛ a nãà gùrbɛ nɩ-kpɛ̃ɛ a, tɩ da n a dacĩ-bɛrɛ na viiri koli a Zerizalɛm a lɔb.

¹⁵Al pùorí, a Nebuzaradan tɩ diw nɩ a nɩbɛ na tɩ cãà be a tẽw pʋɔ a cen nɩ a Babɩlɔn: nan dem yie a mɩnɛ nɩbɛ nɩ a bɛl na de bɛ tʋɔra kʋ̀ a Babɩlɔn tẽw nãà a, lãwnɩ nuru tõ-tonbɛ na tɩ cɛ a.

¹⁶Ɛcɛ ʋ tɩ bɛr'ɩ a tẽw pʋɔ nan dem bɛ mɩnɛ, kɛ́ bɛ kʋɔr a divɛ̃ tɩɩr póru nɩ a póru a mɩnɛ.

¹⁷A Babɩlɔn tẽw dem tɩ ŋmɛr'ɩ a kur-zɩɛ kpule na be a Ŋmɩn-yir-kpɛ̃ɛ dɩ̃dɔr nʋɔr a bɛr, de nɩ a kur-zɩɛ torkori nɩ a kur-zɩɛ sɩ̃w-kpɛ̃ɛ vilovilo na be a davʋra pʋɔ a. Bɛ tɩ tuo nɩ a kur-zɩɛ á ŋá za cen nɩ a Babɩlɔn.

¹⁸Bɛ mɩ̀ tɩ de nɩ a kur-zɩɛ bome za bɛ na tɩ maalɩ a Ŋmɩn-yir-kpɛ̃ɛ tome tob ƴãw a: a tãpɛlʋ laar, a pɛ́lɛ̀[86], a fɩ̃tɩlɩ-bʋ̃-kpiiri, a zɩ̃ɩ lali nɩ a koli-nyúuri.

¹⁹A sojarɩ na gùre a nãà a nɩ-kpɛ̃ɛ mɩ̀ tɩ cãà na de a salm-zɩɛ nɩ a salm-pla bʋ̃-maalɩ: a sɩn, a tɩ-suur-zɔ̃-na-nyùur-vla-vla-a nyɩwfʋ-koli, nɩ a zɩ̃ɩ lali, a tãpɛlʋ laar, a fɩ̃tɩlɛ dɔwlʋ zie, a koli-nyúuri nɩ a labɛ.

²⁰A kur-zɩɛ bome a nãà Salomɔ̃ na tɩ ƴãw bɛ maalɩ a Ŋmɩn-yir-kpɛ̃ɛ ƴãw a: a kpule ayi, a sɩ̃w-kpɛ̃ɛ vilovilo lãwnɩ a nadɛɛ pie nɩ ayi zu ʋ na dɔwlɩ a, nɩ a torkori. A bɛ tɩ tɛr bɛ na ker a kur-zɩɛ á ŋá za ɩ.

²¹Mɛ̃ à ŋá a, a kpule kɛrʋ tɩ ɩ n mɛtɩr piwaɩ, ɛ́ a viir-kolu ɩ mɛtɩr ayʋɔb. A tɩ ɩ n bʋ̃-vɛɛ, ɛ́ a yɛ̀lʋ ɩ mɛtɩr na põ ziir kʋba (100) a, ziir ani.

²²Kpul za mɩ́ tɩ tɛr'ɩ zu na ɩ salm-zɩɛ a, ɛ́ a kɛrʋ ɩ mɛtɩr ayi nɩ ŋmãa. Pɩ̃ɛmɛ bom kãw na ɩ mɛ̃ mɩ̃ɛ a, nɩ girenadɩ tɩɛ wɔmɛ na ɩ kur-zɩɛ mɩ̀ a, tɩ viir'a koli kpul za zu. A kpule tɩ ɩ n been.

²³Girenadɩ tɩɛ wɔmɛ lɩz'a anaar nɩ pie nɩ ayʋɔb (96) tɩ be n a lõbowe ƴãw, a pɛr lɛ k'aa tɩ-wɔmɛ za na ɓã taa a tɩ ɩ n kʋba (100) na viiri koli a mɩ̃ɛ a.

²⁴A nãà gùrbɛ nɩ-kpɛ̃ɛ tɩ ƴãw na bɛ nyɔw a bàwr-maal-kara, Seraya, a ʋ tuure Sefanɩa, nɩ a bàwr-maalbɛ ata bɛl na gùre a Ŋmɩn-yir-kpɛ̃ɛ dɩ̃dɔr a.

²⁵Ʋ mɩ̀ tɩ ƴãw na bɛ nyɔw a tõ-tõ-bi-kpɛ̃ɛ kãw na so a sojarɩ kaafʋ a, al pùorí a ɩ a nãà yir tõ-tõ-biir ayopõi. Ʋ mɩ̀ tɩ cãà na ƴãw bɛ nyɔw a zɛbr-nɩbɛ nɩ-kpɛ̃ɛ sɛ-sɛbrɛ na so a sojarɩ íru a, nɩ a Zuda tẽw tẽ-biir lɩz'a ata. A nɩbɛ bɛ ŋa za tɩ be n a Zerizalɛm a lɛn daar.

²⁶A Nebuzaradan tɩ tɛr bɛ na cen nɩ a Babɩlɔn tẽw nãà zie, a Irivɩla.

²⁷A Babɩlɔn tẽw nãà tɩ ƴãw na bɛ kʋ bɛ a be, a Hamatɩ tẽw. À à ŋá n'a bɛ tɩ diw a Zuda tẽw nɩbɛ cen nɩ, zãá nɩ a bɛ tẽw.

²⁸Nyɛ̃ a nɩbɛ nʋɔr a Nabikodonozɔɔr na tɩ ƴãw bɛ diw cen nɩ a: a yome ayopõi sob daar: Zuda tẽw nɩbɛ túr ata dɔwlɩ nɩbɛ lɩzɛr'ɩ ata (3 023).

²⁹A Nabikodonozɔɔr naalʋ-dɩb yome pie nɩ ani sob daar: nɩbɛ kɔbr ani dɔwlɩ lɩzɛr'ɩ pie nɩ ayi (832) a Zerizalɛm tẽw pʋɔ.

³⁰A ʋ yome lɩzɛr'ɩ ata sob daar a, a sojarɩ na gùre a nãà a nɩ-kpɛ̃ɛ, Nebuzaradan, tɩ lɛb'a ƴãw bɛ diw a Zuda tẽw nɩbɛ kɔbr ayopõi dɔwlɩ lɩz'a ayi nɩ anũu (745) cen nɩ. Bɛ za ɓã taa ɩ nɩbɛ túr anaar dɔwlɩ kɔbr ayʋɔb[87] (4 600).

³¹A Zuda tẽw nãà, Yoyakin, bɛ na tɩ diw cen nɩ a maalɩ yome lɩzɛr'ɩ pie nɩ ayopõi a n'a, a Ewil-Merodakɩ tɩ lɩɛbɩ a Babɩlɔn tẽw nãà. A ʋlɩ yũon nɛ cuwr pie nɩ ayi sob, bibie lɩzɛr'ɩ ayopõi sob'a ʋ tɩ ɩ pʋ-pɩɛlʋ ɩb a Yoyakin zie, ɩ k'ʋ yi a gaso pʋɔ.

³²Ʋ tɩ ƴɛ̀r'ɩ a ʋ zie nɩ nɔ̃wfʋ, ɛ́ ɩ ʋ ɩ kpɛ̃ɛ gãw a na-mɩnɛ bɛl na tɩ lãwnɩ a Yoyakin be a Babɩlɔn a.

³³A Yoyakin tɩ tɛr'ɩ sɔ́r yaa a ʋ gaso bʋ̃-suuri bɛr, ɛ́ ʋlɛ nɩ a Babɩlɔn tẽw nãà lãw dɩrɛ bibie za.

³⁴À à ŋá n'a a Babɩlɔn tẽw nãà tɩ kaarɛ a Yoyakin zie bibi-vɩɛrɩ za, tɩ ta n a ʋ kũu daar.