Read Dagara, Northern Zeremi 8 Bible Online

Zeremi 8 - Dagara, Northern bible

Zeremi 8

¹A lɛn daar a, a Sore n'ʋ yere, bɛ na yaw nɩ a Zuda tẽw na-mɩnɛ, a tõ-tõ-bi-bɛrɛ, a bàwr-maalbɛ, a naaŋmɩn-ƴɛ̀r-manbɛ nɩ a bɛlɩ dem na kpɩɛr a Zerizalɛm a kɔbɛ.

²Bɛ na dɩ̀ɛl'a nɩ a mʋ̃tɔ̃w, a cuw nɩ a ŋmar-bie niŋé, al a nɩbɛ bɛ ŋa na tɩ nɔ̃w, na tɩ maalɩ, na tɩ tu, na tɩ sowri ɛ́ puori a. Nɩr za kʋ̃ wob a kɔbɛ á ŋá tɩ ũù ɛ, a na lɩɛb'ɩ pʋɔrʋ a tẽsɔw zu.

³A bɛlɩ dem za nãà wa cɛ vʋʋrɛ a nɩ-bʋʋr-faa nɩbɛ bɛ ŋa pʋɔ, ɛ́ be a ziir al za pʋɔ ɩ̃ nãà wa diw bɛ zɔ yaarɩ be a, bɛ na bɔbr'ɩ a kũu zuo a nyɔ-vʋʋrʋ. A Sore, a kpɛnʋ-za-sob, ʋlɛ n'ʋ yel.

⁴«Fʋ na tɩ yel bɛ na: “À ŋá n'a a Sore yere: Nɩr wa lo a, ʋ bɛ mɩ́ lɛb ìr bɩɩ? Nɩr wa tuli a sɔ́r a, ʋ bɛ mɩ́ lɛb lɩɛb wa pùor bɩɩ?

⁵Ɛ́ bʋ̃ʋ n'ʋ so a Zerizalɛm nɩbɛ na tuli a sɔ́r a, cãà zawrɩ a ɩ̃ tub? A nɩbɛ bɔbr'ɩ a bɛ ŋmɩn-bɛlɛbɛlɛ á ŋá tuotuo, bɛ zawr'a na lɛb wa a ɩ̃ zie.

⁶Ɩ̃ bɛr'a wõ a lɛ bɛ na yere a vla vla: a lɛ za bɛ na yere a bɛ tɛr pɛr ɛ. A bɛ kãw za bɛ bɛr a ʋ ɩ-faar ɛ, ɛ́ bɛ sowre ʋ tʋɔra: “Bʋ̃ʋ n'ɩ à ŋá ɩ̃ na ɩ a?” Ŋa za mɩ́ lɛb'a nyɔw a zɔba, mɛ̃ wur na garɛ zɛbr zie a.

⁷A gʋ̃ɔnagʋ̃ɔna tɛɛ za a salom zu, bãw nɩ a lɛn daar ʋ na mɩ́ yi zie ŋa cen tɩ kpɩɛr zie ŋa a. A ŋmam, a bɛlaarɛkule nɩ a tɩ̃ɩtɩ̃ɩ bãw nɩ a lɛb-waa daar. Ɛcɛ a ɩ̃ nɩbɛ bɛ bãw a tub al ɩ̃ na ƴãw a ɩ.”»

⁸Nyɩ yere na: «Yã-bãwnbɛ n'ɩ tɩ, tɩmɛ nɛbɛ tɛr a Sore wulu.» Ɛcɛ ŋmɩŋmɩn n'a nyɩ na tʋ̃ɔ́ yere a lɛ? A wulu bãw-bãw-karɩ ɩ n zir-ŋmarbɛ na ɩ a wulu bɛ cãà tori a.

⁹Vĩ n'a a yã-bãwnbɛ zie. Bɛ bɛ bãw ŋmɩŋmɩn za n'a ɩ, bɛlɛ n'ɩ bɛ ŋa lo bɛra pʋɔ. Bɛ na bɛ bɔbr a Sore ƴɛ̀rʋ a, bʋ̃ʋ yel-ɩra n'ʋ a bɛ yã-bãwfʋ na tɛr a bɛ zie?

¹⁰A Sore yere na: «Ɩ̃ na de nɩ a bɛ pɔwbɛ kʋ̀ nɩ-yoru, ɛ́ kʋ̀ a bɛ póru a bɛlɩ dem na na de a a. Bʋ̃ʋ n'ʋ vɛ̃, a pʋrmɛ tɩ tɔ a bɛrɛ a, bɛ za bɔbr'ɩ a bɛ tɔnɛ. A naaŋmɩn-ƴɛ̀r-manbɛ tɩ tɔ a bàwr-maalbɛ a, bɛ za tɛr'ɩ libelibe yã.

¹¹Bɛ de nɩ dɩ̃ɛnʋ ƴãw a ɩ̃ nɩbɛ kpɩɛrʋ ƴãw, mɩ́ yel: “A yele za cere nɩ vla, a yele za cere nɩ vla!” Ɛcɛ bom za bɛ cere ɩ.

¹²Vĩ ɩrɛ bɛ na, bɛ na ɩ ɩ-faar na bɛ maal'ɩ wob a? Towtow! Bɛ bɛ bãw k'aa tɩ sɛw na kɛ́ bɛ sàw a bɛ sãwna ɩ. A Sore yere na: Alɛ n'a so bɛ na lo mɛ̃ a nɩbɛ za a, bɛ na lo n tẽw a lɛn daar ɩ̃ nãà wa ìr a bɛ ƴãw a.»

¹³A Sore yere na: «Mãa wa bɔbr bʋ̃-dieri deb a bɛ zie a, divɛ̃ tɩ-wɔmɛ bɛ mɩ́ be a divɛ̃ tɩɛ zu ɛ! Kãkamɛ bɛ mɩ́ be a kãkã-tɩɛ zu ɛ! A váar tɛɛ za mɩ́ vàr'a. A na ɩ lɛ a, ɩ̃ na bɛr'a na kʋ̀ sɔr-tɔlbɛ.»

¹⁴«Bʋ̃ʋ n'ʋ so tɩ zɩ̃ bɛ damnɛ damnʋ? Nyɩ ɩ tɩ ɓã taa, tɩ kpɛ a tẽ-bɛrɛ bɛ na cɔbrɩ a kpɛmɛ a zɛbr ƴãw a pʋɔ, tɩ gù a kũu a be. Bʋ̃ʋ n'ʋ vɛ̃, a Sore tɩ Naaŋmɩn bɛ sàw tɩ na dam ɛ, ʋ ɩ na tɩ nyũ kʋ̃ɔ na tɛr lɔw a, tɩ na sãw ʋ a ƴãw.

¹⁵Tɩ tɩ gùre nɩ a ƴã-ɓaarʋ, ɛcɛ bʋ̃-vla za bɛ wa ɩ. Tɩ tɩ gùre nɩ a sanʋ daar, ɛcɛ dɛ̃bɩ̃ɛ n'a waar.

¹⁶A dɔ̃ sob ta n a Dan tẽw[29] baarɩ. A ʋ wie na vʋʋrɛ nɩ fãw a vʋʋrʋ yire nɩ a tẽ-kpɛ̃ɛ ŋa pʋɔ. A gɔmɛ a na kone ɩrɛ a ɩ na a tẽw za màwr. A waar'a k'aa wa sãw a tẽw nɩ bom za na be a ʋ pʋɔ a bɛr, a tẽ-kpɛ̃ɛ nɩ a ʋ nɩbɛ.»

¹⁷Ɩ̃ na bɛr'ɩ wɩɩr a wa a nyɩ ƴãw. Dɔpamɛ na bɛ wone bɛ̀lʋ a, ɛ́ a na wa dʋnɛ nyɩ na. A Sore n'ʋ yel.

¹⁸A ɩ̃ pʋ-sãwna bɛ tɛr tɩ̃ɩ ɛ, a ɩ̃ socir kone nɩ a ɩ̃ pʋ̃ɔmɩ za.

¹⁹Nyɩ wone: a ɩ̃ nɩbɛ nɛbɛ kone zɛlɛ sõwfʋ a tẽw za pʋɔ: «A Sore bɛ cãà be a Sɩyɔ̃ tẽw pʋɔ bɩɩ? A Sɩyɔ̃ tẽw bɛ cãà tɛr nãà bɩɩ?» «Bʋ̃ʋ n'ʋ so bɛ sãwnɛ mɛ̃ a suur nɩ a bɛ tɩbɛ, a nɩ-bʋʋr-yoru ŋmɩn-bɛlɛbɛlɛ na bɛ tɛr pɛr a?»

²⁰A bʋ̃-dieri de na baarɩ, a tʋlʋ tɔl'a, ɛ́ tɩ cãà bɛ nyɛ̃ a faafʋ ɛ!

²¹A kpɩɛrʋ na páw a ɩ̃ nɩbɛ a ɩ na a ɩ̃ fãw za baarɩ. Pʋ-sãwna nyɔw mɛ̃ na, a ɩ̃ tɩɛrʋ wɛ na.

²²Kãá na mɩ́ ɩ a 'wɔbrʋ siwri a bɛ cãà a Galaadɩ tẽw pʋɔ bɩɩ? Tɩ̃ɩ-ɩrɛ bɛ cãà a be bɩɩ? Bʋ̃ʋ n'ʋ so a ɩ̃ nɩbɛ wʋ̀ʋr kʋ̃ tʋ̃ɔ́ baarɩ mɔ̃?

²³Ãa n'ʋ na lɩɛbɩ a ɩ̃ zu ʋ ɩ bule, ɛ́ a ɩ̃ mimie ɩ mʋta-kʋ̃ɔ̀ bul-nɛ́ɛ, ɩ̃ tʋ̃ɔ́ kone a ɩ̃ nɩbɛ kũuni mʋ̃tɔ̃w nɩ tɩ̃ɩsɔw a?