Read Dagara, Northern A Lãw-mʋɔlɛ 1 Bible Online

A Lãw-mʋɔlɛ 1 - Dagara, Northern bible

A Lãw-mʋɔlɛ 1

¹'Woi! Bɛ jɛ ʋ na bɛr, a tẽ-kpɛ̃ɛ ŋa na tɩ ɩ nɩbɛ kʋrkʋrkʋr a! Ʋ ɩ na mɛ̃ pɔw-kʋɔr a, ʋl a yúor na tɩ yi yaga a nɩ-bʋʋr-yoru sɔgɔ a, ʋl na tɩ ɩ pɔw-nãà so a tẽ-ŋma-kʋ̀rɩ a, ʋlɛ n'ɩ ŋan wa ɩ gbãgbaa!

²Ʋ mɩ́ kõ n a tɩ̃ɩsɔw a ʋ kɔ́rɛ za tɩ vʋɔrɛ mʋta-kʋ̃ɔ. A bɛlɩ dem za na tɩ nɔnɛ ʋ a pʋɔ a, nɩr bɛ ka be mɔwlɛ ʋ ɛ. A ʋ bárɩ za mɩl ʋ na, ƴɛrɛŋa a, bɛ lɩɛb'ɩ a ʋ dɔ̃ dem.

³Vĩ nɩ gbãgba-tuo pʋɔ n'a bɛ diwr a Zuda tẽw nɩbɛ za cere nɩ. Bɛ kpɩɛr'ɩ nɩ-bʋʋr-yoru sɔgɔ, ɛ́ bɛ nyɛrɛ zie na zɩ̃ ɛ. A bɛlɩ dem za na tɩ diwr bɛ a páw bɛ nɩ zie vo-yira na bɛ ka be a.

⁴A Sɩyɔ̃ tẽw sɛ́ɛ be n wahala pʋɔ, nɩr bɛ cãà tuur a waar a cuwr ƴãw ɛ, a ʋ nɩbɛ tuor-taa ziir gã nɩ zawlɛ. A ʋ bàwr-maalbɛ kone na, Pʋ-sãwna tɛr'ɩ a ʋ pɔwsɩrali. Nyɛ̃ kpɩɛrʋ na tɛr a Sɩyɔ̃ a!

⁵A ʋ dɔ̃ dem tʋ̃ɔ́ ʋ na, a ʋ dɔ̃dɔmɛ ƴãw ɓãa na. Bʋ̃ʋ n'ʋ vɛ̃, a Sore n'ʋ dɔwrɛ ʋ, a ʋ sãwna na yãwmɛ a zũú. A nɩbɛ na zɛb tʋ̃ɔ́ bɛ a dáa nɩ a bɛ bi-pɔlɛ ƴãw niŋé bɛ cere a gbãgbaalʋ pʋɔ.

⁶A Sɩyɔ̃ tẽ-kpɛ̃ɛ nyɛ̃ nɩ a alɩ bome nɛ na tɩ ɩ a ʋ yúor a, a cere. A ʋ tõ-tõ-bi-bɛrɛ ɩ na mɛ̃ dʋn na bɛ nyɛrɛ mʋ̃ɔ na 'wɔb a. Bɛ bɛ tɛr fãw na zɔ a bɛlɩ dem na diwr bɛ a niŋé ɩ.

⁷A ʋ bibie al ʋ na tɩ bɔrɛ gʋɔr ɛ́ nyɛrɛ vĩ a, a Zerizalɛm tɩ lɛb'a tɩɛrɛ a ʋ bʋ̃-vɩɛlɩ za ʋ na tɩ tɛr a koro za a. A lɛn daar a ʋ nɩbɛ na tɩ lo a bɛ dɔ̃ dem nuru pʋɔ a, nɩr kãw za bɛ tɩ wa sõw ʋ ɛ. A ʋ dɔ̃ dem tɩ nyɛ̃ ʋ na ɛ́ ɩ ʋ la ʋ na tɩ lo a ƴãw.

⁸A Zerizalɛm sãw nɩ faa faa, alɛ n'a so ʋ lɩɛbɩ sagɛ. A bɛlɩ dem za na tɩ ƴãwnɛ ʋ a, yàalɛ ʋ na, bʋ̃ʋ n'ʋ vɛ̃, bɛ nyɛ̃ nɩ a ʋ ƴã-gã-kpãkpol. Ʋl ƴãw a, ʋ lɩɛb'a kone cere nɩ.

⁹A ʋ dɛwr mar'ɩ a ʋ kparʋ. Ʋ bɛ tɩ tɩɛr k'aa na wa ŋmɛ̃ ʋ nɩ à ŋá ɩ. A ʋ loba ŋa ùr ʋ na, ɛ́ nɩr za bɛ ka be na mɔwl'ʋ ɛ. Ʋ yere na: «Sore e, nyɛ̃ a ɩ̃ vĩ a, nyɛ̃ a dɔ̃ sob na tʋ̃ɔ́ mɛ̃ a.»

¹⁰A dɔ̃ dem de nɩ a Zerizalɛm na-bome za. Mɔ̃ mɩ̀, a tẽ-kpɛ̃ɛ ŋa nyɛ̃ nɩ a nɩ-bʋʋr-yoru bɛ kpɛ a ʋ zi-sõw pʋɔ. Ɛcɛ Sore e, fʋ tɩ piw bɛ nɩ sɔ́r, kɛ́ bɛ ta kpɛ a fʋ lãw nɩbɛ pʋɔ ɩ.

¹¹A ʋ nɩbɛ za kone na, bɛ bɔbr'ɩ bʋ̃-dɩrɩ. Bɛ de nɩ a bɛ bʋ̃-vɩɛlɩ bɛ na tɩ tɛr a tɛw nɩ bʋ̃-dɩrɩ, kɛ́ bɛ tʋ̃ɔ́ dɩ lɛb páw fãw. A Zerizalɛm yere na: «Sore e, nyɛ̃ a lɛ bɛ na yàalɛ mɛ̃ a.»

¹²A nyɩɩm za na tɔlɛ a ka a, a faa ŋa bɛ páw nyɩ ɛ. Nyɩ jɩ́r nyɛ̃: kpɩɛrʋ be n be ŋmɛ̃ mɛ̃ a ɩ̃ dem, bɩɩ ŋmɛ̃ mɛ̃ a ʋl a Sore na ɩ ʋ lo a ɩ̃ zu a ʋ su-tʋlʋ bibir a?

¹³Ʋ ɩ na vũu yi a saa-zu siw kpɛ a ɩ̃ ƴã-ganɩ́. Ʋ ƴãw nɩ bɛra a ɩ̃ gbɛ́ɛ pile, ɛ́ ɩ ɩ̃ 'law tɩ lo n kpaar. Ʋ ɩ na ɩ̃ ɩ ɩ̃ yõ daadaa, a ɩ m bàalʋ bibie za.

¹⁴Ʋ ír'ɩ mimir ƴãw a ɩ̃ sãwna ƴãw. Ʋ 'lẽ a na ɓã taa ɛ́ de a dɔwlɩ a ɩ̃ bawŋmamɛ zu. A Sore siwr'ɩ a ɩ̃ fãw, ʋ de mɛ̃ n'a ƴãw nɩbɛ ɩ̃ na kʋ̃ tʋ̃ɔ́ ɩ bom a nuru pʋɔ.

¹⁵A Sore jɛ n a soja-gãdaar za na tɩ be a ɩ̃ zie a bɛr. Ʋ ɓã n zɛbr-nɩbɛ taa a ɩ̃ ƴãw, k'ʋʋ tʋ̃ɔ́ nɩ a ɩ̃ pɔ́lɛ́ za pelẽpelẽ. Ʋ nɛb'ɩ mɛ̃ nɩ gbɛ́ɛ, a mãa, a Zuda tẽw Sɩyɔ̃, mɛ̃ divɛ̃ tɩ-wɔmɛ a nɛbrʋ zie a.

¹⁶Alɛ n'a so ɩ̃ kone. A ɩ̃ mimie ɩ n mʋta-kʋ̃ɔ cɔb! Bʋ̃ʋ n'ʋ vɛ̃, a sob nɛ nãá mɔwlɩ mɛ̃ ɛ́ lɛb kʋ̀ m fãw ɩ̃ vʋʋrɛ a zãá nɩ mɛ̃ na. A ɩ̃ bibiir bɔr'a, bʋ̃ʋ n'ʋ vɛ̃, a dɔ̃dɔmɛ tɩ tɛr'ɩ fãw zuo.

¹⁷A Sɩyɔ̃ tùre nɩ a nuru, ɛ́ nɩr bɛ mɔwlɛ ʋ ɛ. A Sore na yel a zũú a, a nɩbɛ na kpɩɛr pɩɛlɩ a Ɩsɩrayɛl a, bɛ lɩɛb'ɩ a bɛ dɔ̃ dem. A bɛ sɔgɔ a, a Zerizalɛm lɩɛb'ɩ sagɛ.

¹⁸A Sore dem de na, bʋ̃ʋ n'ʋ vɛ̃, ɩ̃ bɛ tɩ sàw tu a lɛ ʋ na yel a ɩ. Nyɩ bɛr wõ vla, nɩ-bʋʋrɛ za a, ɛ́ nyɛ̃ a ɩ̃ kpɩɛrʋ. Bɛ diw nɩ a ɩ̃ pɔwsɩrali nɩ a ɩ̃ pɔlbili cen nɩ.

¹⁹Ɩ̃ tɩ bʋɔl'ɩ a bɛlɩ dem na nɔnɛ mɛ̃ a, ɛcɛ, bɛ tɩ bɛ̀lɩ mɛ̃ na. A ɩ̃ bàwr-maalbɛ nɩ a ɩ̃ yã-wulbɛ tɩ kpi n a tẽ-kpɛ̃ɛ pʋɔ, a lɛn daar bɛ na tɩ bɔbr a bʋ̃-dɩrɩ, kɛ́ bɛ dɩ lɛb páw fãw a.

²⁰Sore e, nyɛ̃ a ɩ̃ kpɩɛrʋ a! A ɩ̃ pʋɔ 'lere mɛ̃ na! A ɩ̃ tɩɛrʋ za dam'a, bʋ̃ʋ n'ʋ vɛ̃, ɩ̃ sɩrɩ na ɩ nɩsaal-gaara! A sɛ́ɛ pʋɔ a, a zɛbr-sɔ-kpɛ̃ɛ kʋ n a ɩ̃ bibiir. A yir a, fʋ mɩ́ manɛ kɛ́ a kũuni tẽw n'a.

²¹A nɩbɛ wone na ɩ̃ na kone a, ɛcɛ, nɩr bɛ mɔwlɛ mɛ̃ ɩ. A ɩ̃ dɔ̃ dem za wõ n a ɩ̃ kpɩɛrʋ, a ɩrɛ bɛ nɩ nʋ̃ɔ̀ a lɛ fʋ na ɩ m a: fʋ ƴãw nɩ a bibir[1] ʋl fʋ na tɩ yel a ʋ ta. A mɩ̀ ŋmɛ̃ bɛ mɛ̃ a mãa a!

²²Jɩ́r a bɛ ɩ-faar za kaa ɛ́ ɩ bɛ mɛ̃ a lɛ fʋ na ɩ m a ɩ̃ nɛ́ɛ-zawrʋ za zũú a. Fʋ nyɛ̃ na: a 'woi 'woi n'a ɩ̃ dɛ mɩ́ tɛr, ɛ́ a ɩ̃ mɩŋa za ɩ bàal.