Read Dagara, Northern A Lãw-mʋɔlɛ 2 Bible Online

A Lãw-mʋɔlɛ 2 - Dagara, Northern bible

A Lãw-mʋɔlɛ 2

¹'Woi! A ʋ suur pʋɔ a, a Sore ɩ na zũzu-sɛblɛ pàw a Sɩyɔ̃ tẽ-kpɛ̃ɛ! A ʋlɩ bom nɛ na tɩ ɩ a Ɩsɩrayɛl yúor[2] a, ʋ lɔb ʋ na bɛr ʋ yi a saa-zu wa lo tẽw. A ʋ suur na tɩ ìr a Sɩyɔ̃ ƴãw a, ʋ yiir'a kɛ́ ʋlɛ n'ɩ a ʋ gbɛ́ɛ dɔwlʋ zie.

²A Sore ɩ na a ʋ nɩ-bʋʋrɛ Ɩsɩrayɛl zi-sóri za bɔr, ʋ bɛ zɔ nɩbaalʋ ɛ. A ʋ su-yãyaar pʋɔ a, ʋ sãw nɩ a Zuda tẽw tẽ-kpɛn za bɛr. Ʋ ɩ na a naalʋ-tẽw nɩ a nɩ-bɛrɛ lo, ʋʋ ƴãw bɛ vĩ.

³A ʋ su-tʋlʋ kpãkpã pʋɔ a, ʋ sãw nɩ a Ɩsɩrayɛl fãw za bɛr. A dɔ̃ sob na wa ta a, a Sore bɛ tɩ bɔbr k'ʋʋ sõw a ʋ nɩ-bʋʋrɛ ɩ. Ɛcɛ ʋ nyɩw nɩ vũu a dɩ bom za na viiri koli ʋ a.

⁴Ʋ dúor'ɩ a ʋ tam mɛ̃ dɔ̃ sob a, a ʋ dʋrʋ nũu gù n a tɛb. Mɛ̃ dɔ̃ sob a, ʋ kʋ n a bɛlɩ dem tɩ na tɩ nɔnɛ a jɩ́rʋ a. Ʋ bɛr'ɩ a ʋ suur ʋ siw a Sɩyɔ̃ Ŋmɩn-yir-kpɛ̃ɛ zu mɛ̃ vũu a.

⁵A Sore ɩ n a ɩb mɛ̃ dɔ̃ sob a. Ʋ sãw nɩ a Ɩsɩrayɛl nɩ a ʋ yir-vɩɛlɩ bɛr. Ʋ ŋmɛr'ɩ a ʋ zɛbr-yir-kpɛn bɛr, ƴãw kon nɩ pʋ-sãwna a zie za, a Zuda nɩbɛ pʋɔ.

⁶Ʋ kpɛ n nɩ fãw a ʋ zie na ŋmãa pàw a pʋɔ. Ʋ sãw nɩ a zie ʋl ʋ na mɩ́ tɩ tuori tɩ a bɛr. A Sɩyɔ̃ tẽw a, a Sore ɩ na bɛ yiiri a cuwr bibie nɩ a pɩ̃ɛnʋ-bibie bɛr. A ʋ su-tʋlʋ pʋɔ a, ʋ jewr'ɩ a nãà nɩ a bàwr-maalbɛ.

⁷A Sore zawr'ɩ a ʋ bàwr-maal-kuur bɛr, ʋ jɛ n a ʋ zi-sõw bɛr. Ʋ bɛr'ɩ a Sɩyɔ̃ yir-vɩɛlɩ a lo a dɔ̃ dem nuru pʋɔ. Gɔmɛ tɩ pàw nɩ a Sore yir mɛ̃ cuw bibir a.

⁸A Sore tɩ yel'a k'ʋʋ na ŋmɛr'ɩ a dacine na piw a Sɩyɔ̃ tẽw a bɛr. Ʋ dɔl'ɩ a miw-máná, ʋ bɛ bɛr a ŋmɛr-bɛrʋ ɛ, ɛ́ gù bom bɛ tɩ cãà be ɩ. Ʋ ŋmɛ n a dacine a za ayi, ɛ́ a za ayi lo.

⁹A tẽ-kpɛ̃ɛ pamɛ sãw na, a Sore kar kár'ɩ a pamɛ bʋ̃-kparɩ bɛr. A ʋ nãà nɩ a ʋ tõ-tõ-bi-bɛrɛ lɩɛb'ɩ nɩ-pàwrɩ a nɩ-bʋʋr-yoru sɔgɔ. Nɩr bɛ cãà be tɩrɛ a Sore wulu ɛ. A naaŋmɩn-ƴɛ̀r-manbɛ tɛɛ za bɛ cãà páwr ƴɛ̀rʋ na yire a Sore zie a ɩ.

¹⁰A Sɩyɔ̃ tẽ-kpɛ̃ɛ nɩ-kore zɩ̃ n gbili gbili a tẽw. Bɛ 'wɔ̃w nɩ tanɛ ƴãw a zurú, bɛ su n vʋɔrɩ kparɩ. A Zerizalɛm pɔwsɩrali su n zuru.

¹¹A ɩ̃ mimie kõ na tɩ bàl, a ɩ̃ tɩɛrʋ za dam'a, ɩ̃ mɩ́ nyɔw nɩ ɩ̃ tʋɔra gú, a dɔwrʋ na páw a ɩ̃ nɩ-bʋʋrɛ a ƴãw. Bʋ̃ʋ n'ʋ vɛ̃, a bibiir nɩ a bi-pɩɩlɛ fãw báarɛ nɩ a nɩbɛ tuor-taa ziir a tẽ-kpɛ̃ɛ pʋɔ.

¹²Bɛ sowre nɩ a bɛ mã mɩnɛ: «Nyɩnɛ n'a a bʋ̃-dɩrɩ be?» Bɛ lore nɩ a nɩbɛ tuor-taa ziir a tẽ-kpɛ̃ɛ pʋɔ mɛ̃ nɩbɛ bɛ na ƴãw bàalʋ a, ɛ́ kpiir a bɛ mã mɩnɛ gbɛ́ɛ zu.

¹³Zerizalɛm i, ɩ̃ bɛ bãw bom nɛ ɩ̃ na na yel kʋ b a ɩ. A fʋ yele bɛ ŋmɛ̃ taa nɩ yel kãw za ɩ. Ɩ̃ de fʋ man nɩ anʋ, tʋ̃ɔ́ mɔwlɩ fʋ, Sɩyɔ̃ tẽ-kpɛ̃ɛ-vla a? A fʋ dɔwrʋ ɩ n kpɛ̃ɛ sɛw a kʋ̃ɔ-kpɛ̃ɛ. Ãa n'ʋ na tʋ̃ɔ́ sanɩ fʋ?

¹⁴Yel-ziri nɩ yele na bɛ tɛr pɛr a n'a a fʋ naaŋmɩn-ƴɛ̀r-manbɛ nyɛ̃ a fʋ ƴãw. Bɛ bɛ ɩ a fʋ sãwna ʋ sãá, kɛ́ bɛ tʋ̃ɔ́ ɩ a fʋ yele lɩɛbɩ ɛ. Ziri nɩ ƴɛ̀r-ziri n'a bɛ ƴɛ̀r kʋ̀ b.

¹⁵Zerizalɛm i, a bɛlɩ dem za na tɔlɛ pɩɛlɛ fʋ a puore nɩ nuru a fʋ loba ƴãw. Bɛ fuole na gɔwrɛ nɩ zuru kɛ́ bɛ tʋ̃ɔ́ ɩ b la: «A tẽ-kpɛ̃ɛ ŋa n'ʋ bɛ tɩ bʋɔlɛ a vɩɛl-bɛ-cɛ nɩ a tẽ-daa za nʋ̃ɔ̀ ʋ?»

¹⁶A fʋ dɔ̃ dem za ƴɛ̀rɛ nɩ ƴɛ̀r-faar cáarɛ nɩ fʋ. Bɛ fuole na nyɩrɛ nɩ nyɩmɛ a fʋ ƴãw, Bɛ yere na: «Tɩ vɔl ʋ na. A bibir tɩ na gùre a n'ʋ pãa nanɩ ta. Ʋ vɩɛ na, tɩ nyɛ̃ ʋ na!»

¹⁷A Sore ɩ n a lɛ ʋ na tɩɛrɩ bin a, ʋ tu n a lɛ ʋ na yel a, a lɛ ʋ na ƴãw a nʋɔr a koro kãw za a. Ʋ sãw nɩ bom za bɛr, ɛ́ bɛ zɔ nɩbaalʋ ɛ. Ʋ ɩ na a dɔ̃ sob cɩlɛ a fʋ kpɩɛrʋ ƴãw, ʋ ɩ na a fʋ bɛ-nɔnbɛ tɛr fãw dɔwlɩ.

¹⁸A Zerizalɛm nɩbɛ lãw nɩ socir been cɩɩrɛ nɩ a Sore zie. Sɩyɔ̃ tẽw dacĩ-kpɛ̃ɛ ɛ, bɛr a fʋ mʋta-kʋ̃ɔ a gbɔlɛ mɛ̃ bà-fʋɔla kʋ̃ɔ a, mʋ̃tɔ̃w nɩ tɩ̃ɩsɔw. Taa yel kɛ́ fʋ pɩ̃ɛnɛ na ɩ, a mʋta-kʋ̃ɔ, a taa ŋmaarɛ towtow ɛ.

¹⁹Taa nyɔwr fʋ tʋɔra ɩ: kone a tɩ̃ɩsɔw, tɛm tɛm za. Wɛl a fʋ pʋɔ za a Sore niŋé. Zɛw a fʋ nuru cɔw ʋ, tʋ̃ɔ́ faa a fʋ bibiir na kpiir a kɔ̃ a sɛ́ɛ gõgone za pʋɔ a.

²⁰Sore e, jɩ́r nyɛ̃: ãa n'ʋ fʋ dɔwrɩ à à ŋá? Pɔwbɛ na tʋ̃ɔ́ na tɛr tɩ 'wɔb a bɛ bibiir, a bɛ bibi-pʋrmɛ bɛ na nɔnɛ nɔnɛ a bɩɩ? Nɩr na tʋ̃ɔ́ na kʋ bàwr-maalbɛ nɩ naaŋmɩn-ƴɛ̀r-manbɛ a fʋ zi-sõw pʋɔ bɩɩ?

²¹A pɔlbili nɩ a dɛb-nyamɛ lo na gã gã a sɛ́ɛ zu. A zɛbr-sɔ-kpɛ̃ɛ kʋ n a ɩ̃ pɔwsɩrali nɩ a ɩ̃ pɔlbili. A fʋ suur bibir a, fʋ kʋ bɛ na, fʋ ŋmaarɩ bɛ nɩ a kɔkɛɛ bɛ zɔ n nɩbaalʋ ɛ.

²²Fʋ bʋɔl'ɩ a ɩ̃ kpɛ-pɩɛl dem na ɩrɛ mɛ̃ dɛ̃bɩ̃ɛ a, mɛ̃ cuw bibir ƴãw a. Sore e, a fʋ suur bibir a, nɩr bɛ tɩ cɩ̃ɛ ɩ, nɩr bɛ tɩ cãà vʋʋrɛ ɩ. A bɛlɩ dem ɩ̃ na tɩ guoli ɛ́ nɔ̃w yaga za a, a ɩ̃ dɔ̃ sob kʋ n bɛ za pàw pɛr.