Read Dagara, Northern A Lãw-mʋɔlɛ 3 Bible Online

A Lãw-mʋɔlɛ 3 - Dagara, Northern bible

A Lãw-mʋɔlɛ 3

¹Ɩ̃ ɩ n a nɩr[3] ʋl na nyɛ̃ a kpɩɛrʋ a Sore su-yãyaar ŋmɩɛrʋ pʋɔ a.

²Ʋ dáa mɛ̃ na ƴãw niŋé ɩ ɩ̃ cere lige pʋɔ ɛ́ bɛr a cãà.

³Sɩza, mãa yõ zu n'a a ʋ nũu siwr a bibie za.

⁴Ʋ ɩ na a ɩ̃ ƴã-gan sɩr ʋ za, ʋ kar mɛ̃ nɩ a kɔbɛ.

⁵Ʋ piw mɛ̃ na, ʋ ɩ na kɛ̀ pʋ-sãwna nɩ kpɩɛrʋ jil koli mɛ̃.

⁶Ʋ ɩ na ɩ̃ kpɩɛr lige pʋɔ mɛ̃ a bɛlɩ dem na kpi koro za a.

⁷A Sore mɛ n dacĩ-kpɛ̃ɛ piw nɩ mɛ̃, k'ɩ̃ɩ taa wa yire ɩ, ʋ ƴãw mɛ̃ nɩ bãzɔl-tɩbrʋ.

⁸Ɩ̃ na saa mɩ́ ŋmɩɛr a cɛlsɩ zɛlɛ nɩ sõwfʋ a, ʋ mɩ́ fur'ɩ a ʋ tobe a ɩ̃ puoru ƴãw.

⁹Ʋ fur'ɩ a ɩ̃ sɔ́r nɩ kʋsɛ-bɛrɛ, ʋ ɩ na ɩ̃ tuli a ɩ̃ sɔ́r.

¹⁰A Sore ɩ n a ɩ̃ zie mɛ̃ wɛ-dʋ̃-faa kãw bɛ na bʋɔlɛ ursɩ na cɔbrɩ gù bom a, mɛ̃ gbẽw na ũú gù bom a.

¹¹Ʋ ɩ na ɩ̃ tuli a ɩ̃ sɔ́r, ʋ taw mɛ̃ na cɩɛrɩ, ɛ́ sãw mɛ̃ bɛr.

¹²Ʋ dúor'ɩ a ʋ tam, ʋ lɩɛb'ɩ a ʋ pime cɔw mɛ̃.

¹³A ʋ lɔw pime za kpɛ n a ɩ̃ sɩɛmɩ́.

¹⁴A ɩ̃ bʋʋrɛ nɩbɛ za kpɔwrɛ mɛ̃ na, bɛ yiele na ɩrɛ nɩ mɛ̃ laar bibie za.

¹⁵A Sore ɩ na k'ɩ̃ wõ to-lawlaw, ʋ kʋ̀ mɛ̃ nɩ lɔw ɩ̃ nyũ.

¹⁶Ʋ fɛr mɛ̃ na ƴãw ɩ̃ 'wɔb kʋsɛbɛ, ʋ nɛb'ɩ mɛ̃ nɩ gbɛ́ɛ uuru pʋɔ.

¹⁷Ʋ ɩ na ɩ̃ bɛ tɛr ƴã-ɓaarʋ ɛ, ɩ̃ yiir'ɩ a nʋ̃ɔ̀ bɛr.

¹⁸Lɛ n'a ɩ̃ yel: ɩ̃ bɛ cãà tɛr nɩdaar ɛ, ɩ̃ bɛ lɛb gùre bom za a Sore zie ɩ.

¹⁹Ɩ̃ ɩ n nɩ-cɔla nɩ vĩ-nɩr, a ɩ̃ kpɩɛrʋ tɩɛrʋ ɩ na mɛ̃ lɔw-tuo a, a ɩ̃ zie.

²⁰Tɩɛrʋ ƴãw a, ɩ̃ tɩɛrɛ na, ɩ̃ kʋ̃ tʋ̃ɔ́ yiiri ɛ, ɩ̃ɩ bàl'a.

²¹Ɛcɛ, nyɛ̃ a ʋlɩ bom nɛ ɩ̃ na bɔbr k'ɩ̃ɩ bãwnɩ a, a ʋlɩ bom nɛ na n'ʋ so ɩ̃ na tɩɛrɛ a:

²²A Sore vɩɛlʋ-ɩb bɛ baar ɛ, ʋ bɛ wul a ʋ nɔ̃wfʋ baarɩ ɛ.

²³A ʋ vɩɛlʋ-ɩb nɩ a ʋ nɔ̃wfʋ mɩ́ lɩɛb'ɩ paalɛ biɓaarɛ za. Sore e, a fʋ na ŋmɛ̃ a fʋ ŋmɛ̃a a sɩrɩ na ɩ kpɛ̃ɛ.

²⁴Ɩ̃ yel'a: a Sore n'ɩ a ɩ̃ na-bom, alɛ n'a so ɩ̃ ƴãw a ɩ̃ tɩɛrʋ a ʋ ƴãw.

²⁵A Sore ɩ n nɩ-vla a sob nɛ na tɩ́ɛrɛ ʋ a zie, a sob nɛ na bɔbr ʋ a zie.

²⁶Yel-vla n'ʋ kɛ́ fʋ ɩ gbili ɛ́ gùre a Sore faafʋ.

²⁷Yel-vla n'ʋ k'aa nɩsaal bãw yel-fɛrɩ a ʋ pɔ̀lʋ daarɩ́.

²⁸A fɛr'a k'ʋʋ mɩ́ taw yi pùor tɩ zɩ̃ gbili a lɛn daar a Sore na mɩ́ wa ƴãw ʋ kpɩɛrʋ a,

²⁹k'ʋʋ mɩ́ siwri ʋ tʋɔra, vɔblɩ a ʋ niwn a tẽw, kapaw, a nãà tɛr'ɩ ɩb!

³⁰K'ʋʋ mɩ́ lɩɛbɩ a kɔ́r cɔw a sob nɛ na ɓarɛ ʋ a, ɛ́ sàw ɩ a zʋmɛ nɩr.

³¹Bʋ̃ʋ n'ʋ vɛ̃, a Sore bɛ lɔbr nɩr bɛrɛ a nʋɔr kʋrɛ ɛ.

³²Ʋlɛ saa mɩ́ dɔwrɩ a nɩr a, ʋ mɩ́ cãà na ɩ nɔ̃wfʋ tɛwr, bʋ̃ʋ n'ʋ vɛ̃, a ʋ nɔ̃wfʋ ɩ n kpɛ̃ɛ.

³³Ʋ na mɩ́ wa ƴãw a nɩsaalbɛ vĩ bɩɩ ɩ a kpɛ bɛ a, a bɛ mɩ́ ɩ ʋ nʋ̃ɔ̀ ɩ.

³⁴Bɛlɛ wa dɔwrɛ tẽw kãw gaso-biir za a,

³⁵bɛlɛ bɛ wa sàw kʋ̀ nɩr a lɛ a na tɛr sɔ́r k'ʋʋ ɩrɛ a Naaŋmɩn-na-do-saa-bɛ-pɩɛl-a niŋé a,

³⁶bɛlɛ mɩ́ wa dɩ a ƴɛ̀rʋ a bɛ tu mɩnʋ a, a Sore bɛ mɩ́ nyɛ̃ a bɩɩ?

³⁷Ãa n'ʋ mɩ́ ƴɛ̀r, ɛ́ a bome be? A Sore bɛ n'ʋ mɩ́ yel ɛ?

³⁸A Naaŋmɩn-na-do-saa-bɛ-pɩɛl-a nʋɔrɩ́ bɛ n'a a faa nɩ a nʋ̃ɔ̀ mɩ́ yi e?

³⁹A lɛ pʋɔ a, bʋ̃ʋ n'ʋ so nɩsaal na mɩ́ zɛbr ʋ na saa mɩ́ tɛr sãwna ɛ́ cãà vʋʋrɛ a?

⁴⁰Tɩ maal jieli a tɩ ɩb kaa vla, ɛ́ lɛb wa a Sore zie.

⁴¹Tɩ puori nɩ a tɩ socir za, zɛw nɩ a tɩ nuru cuw a Naaŋmɩn na be a salom zu a.

⁴²Tɩɩm a, tɩ gaarɩ na, tɩ ɩ n nɔ-zawrbɛ, ɛ́ fʋ̃ʋ a, Sore e, fʋ bɛ dɩ suur ɛ!

⁴³A fʋ suur na tɩ pili pàw fʋ a zũú a, fʋ ta na tu tɩ ɛ́ kʋ tɩ faa faa bɛ zɔ n nɩbaalʋ ɛ.

⁴⁴Fʋ sɔwlɩ nɩ zũzuwr pʋɔ, k'aa tɩ puoru ta ta b ɛ.

⁴⁵Fʋ ɩ na tɩ ɩ sagɛ, bom na bɛ tɛr vʋla a, a nɩ-bʋʋr-yoru sɔgɔ.

⁴⁶A tɩ dɔ̃ dem za bɔbr tɩ nɩ nɔhaarʋ.

⁴⁷Tɩmɛ so dɛ̃bɩ̃ɛ, niw-viir, zi-sãwna nɩ yel-sãwna.

⁴⁸A mʋta-kʋ̃ɔ gbɔlɛ mɛ̃ na mɛ̃ kʋ̃ɔ a, a ɩ̃ nɩbɛ yele na sãw a ƴãw.

⁴⁹A ɩ̃ mʋta-kʋ̃ɔ cire mɛ̃ na bɛ tɛr ŋmãafʋ ɛ, pɩɛlʋ ŋmɛb na bɛ ka be a ƴãw,

⁵⁰ɛ́ gù k'aa Sore na be a salom zu a wa gũu bɛl nyɛ̃.

⁵¹A ɩ̃ mimie 'wɔbr mɛ̃ na, ɩ̃ na mɩ́ nyɛ̃ a alɩ bome nɛ na mɩ́ tarɛ a ɩ̃ tẽ-kpɛ̃ɛ powli a.

⁵²A bɛlɩ dem na tɛr'ɩ mɛ̃ dɔ̃ ɛ́ a bɛ tɛr pɛr a diw mɛ̃ na mɛ̃ lile a.

⁵³Bɛ pàw mɛ̃ nɩ mimir bɔw pʋɔ, ɛ́ de kʋsɩɛr fur pàw a bɔw nʋɔr.

⁵⁴A kʋ̃ɔ tɩ lim'ɩ a ɩ̃ zu za, ɩ̃ɩ tɩ yel: «Ɩ̃ kpi na!»

⁵⁵Sore e, a bɔw-zulu pɛrɩ́ be a, ɩ̃ bʋɔlɩ fʋ na.

⁵⁶Fʋ wõ n a ɩ̃ kɔkɔr: «Ta fur a fʋ tobe a ɩ̃ puoru nɩ a ɩ̃ bʋɔlʋ ƴãw ɛ.»

⁵⁷Ɩ̃ na tɩ bʋɔlɩ fʋ a, fʋ taw na pɩɛlɩ, ɛ́ yel mɛ̃: «Ta zɔrɛ dɛ̃bɩ̃ɛ ɩ!»

⁵⁸Sore e, fʋ ƴɛ̀r'a kpɛ m, fʋ faa nɩ a ɩ̃ nyɔ-vʋʋrʋ.

⁵⁹Sore e, nyɛ̃ a lɛ bɛ na ɩ a kpɛ m a, ɩ a ɩ̃ dem de!

⁶⁰Fʋ nyɛ̃ nɩ a lɛ bɛ na yáa a san a ɩ̃ zu a, fʋ nyɛ̃ nɩ a lɛ za bɛ na cɔbrɩ a ɩ̃ ƴãw a.

⁶¹Sore e, fʋ wõ n a zʋmɛ bɛ na tʋʋr a, nɩ a lɛ za bɛ na cɔbrɩ a ɩ̃ ƴãw a.

⁶²Bibie za a, a ɩ̃ dɔ̃ dem ƴɛ̀rʋ nɩ a tɩɛrʋ bɛ mɩ́ vɩɛl a ɩ̃ ƴãw ɛ.

⁶³Bɛ zɩ̃ na o, bɛ àr'ɩ saaƴẽwn o, jɩ́r bɛ kaa, mãa n'ʋ bɛ ƴãw nɩ a yielu.

⁶⁴Sore e, ɩ bɛ mɛ̃ a lɛ bɛ na ɩ m a.

⁶⁵Liw a bɛ yã, a na ɩ n a fʋ ŋmɛ-ƴãw a bɛ zu.

⁶⁶Ta tu bɛ nɩ suur tɩ ír bɛ bɛr a tẽw zu.