Read Dagara, Northern Barukɩ 1 Bible Online

Barukɩ 1 - Dagara, Northern bible

Barukɩ 1

¹Nyɛ̃ a sɛbɛ a Barukɩ na tɩ sɛb a Babɩlɔn tẽw a. A Barukɩ tɩ ɩ n Nerɩasɩ bidɛb, a Nerɩasɩ ɩ Maaseasɩ bidɛb, a Maaseasɩ ɩ Sedesɩasɩ bidɛb, a Sedesɩasɩ ɩ Hasadɩasɩ bidɛb, a Hasadɩasɩ ɩ Hɛlkɩasɩ bidɛb.

²A Babɩlɔn tẽw dem na tɩ zɛb de a Zerizalɛm ɛ́ nyɩw ʋ bɛr a, a yome anũu sob daar tɩ n'a ʋ sɛb, a cuwr anũu sob bibie ayopõi sob[1].

³A Barukɩ tɩ kanɩ nɩ a sɛbɛ ŋa a Zʋakɩm bidɛb, Yekonɩasɩ[2], na ɩ a Zuda tẽw nãà a niŋé, nɩ a zu-sɛbla na tɩ wa kɛ́ bɛ wa bɛr wõ a kanʋ ŋa a niŋé.

⁴A bɛlɩ dem za na tɩ kpɩɛr a Babɩlɔn, a Sudɩ[3] nʋɔr a, tɩ be n be: a tõ-tõ-bi-bɛrɛ, a na-biir, a yie nɩ-bɛrɛ nɩ a nɩbɛ za, a pʋrɩ za tɩ tɔ a kpɛ̃ɛ za.

⁵A nɩbɛ bɛ ŋa tɩ kone na, bɛ tɩ tɛr'ɩ mʋta-tuo puore nɩ a Sore niŋé.

⁶Al pùorí, bɛ tɩ cɩɛr'ɩ libie, ŋa za mɩ́ tɩr lɛ ʋ na tʋ̃ɔ́ a,

⁷bɛ tɩr a Zerizalɛm kʋ̀ a bàwr-maalɛ Zʋakɩm, na ɩ Hɛlkɩasɩ bidɛb nɩ Sálóm yãw a, lãwnɩ a bàwr-maalbɛ bɛl na cɛ a, nɩ a nɩbɛ za na tɩ be a Zerizalɛm a.

⁸A Siwan[4] cuw bibie pie sob, a Barukɩ tɩ lɛb'a de a bome baarɩ, a al bɛ na tɩ de a Sore Ŋmɩn-yir-kpɛ̃ɛ pʋɔ cen nɩ a. Ʋ tɩ bɔbr'a k'ʋʋ lɛb tɩr a a Zuda tẽw. A salm-pla bome a Zozɩasɩ bidɛb nɩ a Zuda tẽw nãà, Sedesɩasɩ, na tɩ ƴãw bɛ maalɩ a n'a,

⁹ɛ́ a tɩ ɩ n a Babɩlɔn tẽw nãà, Nabikodonozɔɔr, na tɩ ír a Yekonɩasɩ, a nɩ-bɛrɛ, a tõ-tonbɛ, a tõ-tõ-bi-bɛrɛ nɩ a nɩbɛ za a Zerizalɛm, cen nɩ a Babɩlɔn a pùorí.

¹⁰A nɩbɛ bɛ na diw cen nɩ a tɩ ƴɛ̀r'ɩ a Zerizalɛm tẽw dem zie à ŋá: Tɩ tɩr'ɩ libie kʋ̀ nyɩ. Nyɩ da dʋn nɩ a libie á ŋá, nyɩw-a-za-bagɛ nɩ yel-bier ír-bɛrʋ bagɛ maalʋ ƴãw. Nyɩ mɩ̀ da n tɩ-suur-zɔ̃-na-nyùur-vla-vla-a. Nyɩ na maal'ɩ a bagɛ á ŋá, tɩr'ɩ de-kʋ̀b bome a Sore tɩ Naaŋmɩn bàwr-maal-kuur zu.

¹¹Nyɩ mɩ̀ puori kʋ̀ a Babɩlɔn tẽw nãà, Nabikodonozɔɔr, nɩ a ʋ bidɛb Baltazaar[5], k'aa bɛ nyɔ-vʋʋrʋ cɛlɩ mɛ̃ a lɛ daar za a salom na be a tẽw zu-sɔw a.

¹²A lɛ pʋɔ a, a Sore na kʋ̀ tɩ nɩ fãw, ʋ na ɩ na tɩ lɛb bãw a nʋ̃ɔ̀, tɩ na vʋʋrɛ na, ɛ́ a Babɩlɔn tẽw nãà, Nabikodonozɔɔr, nɩ a ʋ bidɛb Baltazaar gùre tɩ. Tɩ na tõ n a bɛ tome cɛlɩ, ɛ́ bɛ tɛr pʋ-pɩɛlʋ a tɩ ƴãw.

¹³Nyɩ mɩ̀ puori a Sore tɩ Naaŋmɩn kʋ̀ tɩ. Bʋ̃ʋ n'ʋ vɛ̃, tɩ sãw ʋ na, ɛ́ cãà wa tɩ tɔ a dɩ̃a a, ʋ bɛ bɛr a ʋ su-faa faa a tɩ ƴãw ɛ.

¹⁴Nyɩ kanɩ a sɛbɛ ŋa tɩ na tɩrɛ kʋ̀rɛ nyɩ a, a nɩbɛ za niŋé, a Sore Ŋmɩn-yir-kpɛ̃ɛ pʋɔ, a Sɛwr cuw daar nɩ a bibie al na sɛw taa nɩ a.

¹⁵Nyɩ na yel'a: A Sore tɩ Naaŋmɩn tɛr'ɩ yel-mɩŋa, ɛcɛ tɩmɛ so vĩ, mɛ̃ a lɛ a na sãá a dɩ̃a a. A tɩɩm, Zuda tẽw nɩ Zerizalɛm tẽw dem,

¹⁶tɩmɛ so vĩ, a tɩɩm, a tɩ na-mɩnɛ, a tɩ nɩ-bɛrɛ, a tɩ bàwr-maalbɛ, a tɩ naaŋmɩn-ƴɛ̀r-manbɛ nɩ a tɩ sãàkʋm-kore.

¹⁷Bʋ̃ʋ n'ʋ vɛ̃, tɩ sãw nɩ a Sore.

¹⁸Tɩ bɛ tu ʋ ɛ, tɩ bɛ bɛr wõ a Sore tɩ Naaŋmɩn, a lɛn daar ʋ na tɩ yere kʋ̀rɛ tɩ, kɛ́ tɩ tuur a nɛ-ƴãwnɩ ʋ na bin a tɩ niŋé a ɩ.

¹⁹A na tĩ a ʋlɩ bibir a Sore tɩ Naaŋmɩn na ɩ a tɩ sãàkʋm-kore yi a Eziptɩ tẽw, ɛ́ wa tɩ tɔ a dɩ̃a a, tɩ bɛ tu ʋ ɛ, tɩ bɛ bɛr wõ a ʋ ƴɛ̀rʋ ɛ, ɛ́ bɛ mɩ́ tɩɛrɩ kɛ́ ɩ ɛ[6].

²⁰Alɛ so, mɛ̃ a lɛ a na sãá a dɩ̃a a, a faa tu tɩ na, lãwnɩ a ŋmɛ-ƴãw a Sore na tɩ ƴãw a ʋ tõ-tõ-bie Moyiir yel, a ʋlɩ bibir ʋ na ɩ a tɩ sãàkʋm-kore yi a Eziptɩ tẽw, k'ʋʋ kʋ̀ tɩ tẽw bʋ̀rʋ nɩ sɩwr na gbɔlɛ a[7].

²¹Ʋ tõ n a ʋ ƴɛ̀r-manbɛ a tɩ zie, ɛcɛ tɩ bɛ bɛr wõ a lɛ ʋ na mɩ́ tɩ ƴãw bɛ yere kʋ̀rɛ tɩ a ɩ.

²²A tɩ kãw za nɩ̃ɛ na mɩ́ tɩ tuur a ʋ soci-faa tɩɛrʋ, maalɛ ŋmɩn-yoru, ɩrɛ nɩ lɛ na bɛ vɩɛl a Sore tɩ Naaŋmɩn zie a[8].