Read Dagara, Northern Barukɩ 2 Bible Online

Barukɩ 2 - Dagara, Northern bible

Barukɩ 2

¹«A lɛ n'a a Sore tu a lɛ ʋ na tɩ ƴɛ̀r càar'ɩ tɩ a, a lɛ ʋ na tɩ ƴɛ̀r càar'ɩ a tɩ ƴɛ̀r-dɩrbɛ na tɩ dɩ n a Ɩsɩrayɛl nɩbɛ a ƴɛ̀rʋ a, a lɛ ʋ na tɩ ƴɛ̀r càar'ɩ a tɩ na-mɩnɛ, a tɩ nɩ-bɛrɛ nɩ a Ɩsɩrayɛl nɩ a Zuda nɩbɛ a.

²A dɔwrʋ ʋ na ɩ a páw a Zerizalɛm, a tu a lɛ na sɛb a Moyiir wulu pʋɔ a, nɩr bɛ tɩ dãw nyɛ̃ a a tẽw zu zie kãw za ɩ.

³A wa tɩ ɩ n fɛrʋ a nɩbɛ 'wɔb a bɛ bidɛbr nɩ a bɛ pɔwyaar ƴã-gã-nɛn[9].

⁴Ʋ mɩ̀ lɛb tɩ bɛr bɛ na kʋ̀ a naalʋ-ten al za na viiri koli bɛ a. Lɛ n'a bɛ tɩ nyɛ̃ zʋmɛ nɩ kpɩɛrʋ yaga a nɩ-bʋʋrɛ bɛl na kpɩɛr pɩɛlɩ bɛ a zie, a bɛl pʋɔ a Sore na tɩ diw bɛ yaarɩ a.

⁵Bɛ só tɩ na, a tɩɩm nãá tɩ tʋ̃ɔ́ bɛ a. Bʋ̃ʋ n'ʋ vɛ̃, tɩ bɛ bɛr wõ a lɛ a Sore tɩ Naaŋmɩn na tɩ yere kʋ̀rɛ tɩ a ɩ, maalɩ yel-bier sãw ʋ.

⁶A Sore tɩ Naaŋmɩn tɛr'ɩ yel-mɩŋa, ɛcɛ tɩmɛ nɩ a tɩ sãàkʋm-kore só vĩ, mɛ̃ a lɛ a na sãá a dɩ̃a a.

⁷A yel-faar al za a Sore na tɩ yel càar'ɩ tɩ a, a lo n a tɩ zu.

⁸Ɛcɛ tɩ bɛ puori zɛlɩ ʋ k'ʋʋ ɩ ŋa za mɩ́ bɛr a ʋ socir tɩɛr-faar ɛ.

⁹Lɛ n'a a Sore tɩ bãwnɩ a yel-faar á ŋá, ɩ̀ a páw tɩ. Bʋ̃ʋ n'ʋ vɛ̃, a alɩ bome nɛ za a Sore na tɩ yel kɛ́ tɩ ɩ a, ɩ n yel-mɩŋa.

¹⁰Ɛcɛ tɩ bɛ bɛr wõ ʋ ɛ, tɩ bɛ tu a nɛ-ƴãwnɩ ʋ na bin a tɩ niŋé a ɩ.»

¹¹«Sore e, Ɩsɩrayɛl Naaŋmɩn i, fʋ ɩ n nɩ fãw a fʋ nɩ-bʋʋrɛ yi a Eziptɩ tẽw pʋɔ, a fʋ kpɛnʋ na ɩ kpɛ̃ɛ a nɩ a fʋ kpãkpãw-kpɛ̃w zũú, nɔ-ɓãa-yele nɩ yel-bɛ-dãw-nyɛrɩ fʋ na maalɩ a ƴãw. Fʋ wul'ɩ sob nɛ na tɩ nɛ b a, mɛ̃ a lɛ a na cãà sãá a dɩ̃a a. Ɛ́ ƴɛrɛŋa a,

¹²tɩ sàw na kɛ́ tɩ maal'ɩ yel-bier, tɩ gaarɩ na, tɩ zawr'ɩ a fʋ nɛ-ƴãwnɩ za, Sore tɩ Naaŋmɩn i.

¹³Tɩ bɛ cãà saalɩ a nɩ-bʋʋr-yoru sɔgɔ fʋ na diw tɩ yaarɩ a ɩ. A na ɩ à ŋá a, lɛb bɛr a fʋ suur a tɩ ƴãw.

¹⁴Sore e, bɛr wõ a ʋlɩ bom nɛ tɩ na zɛlɛ a fʋ zie a tɩ puoru pʋɔ a, faa tɩ a fʋ̃ʋ mɩŋa zũú, ɛ́ ɩ a bɛlɩ dem na diw tɩ wa n a ka a tɛr pʋ-pɩɛlʋ a tɩ ƴãw.

¹⁵Lɛ n'a a tẽw za na bãw kɛ́ fʋ̃ʋ n'ɩ a Sore tɩ Naaŋmɩn, nɩ k'aa tɩɩm, Ɩsɩrayɛl bʋʋrɛ, tɩ ɩ n a fʋ nɩ-sori.

¹⁶Sore e, be a fʋ zi-sõw pʋɔ a saa-zu, ɛ́ jɩ́r tɩ kaa, ɛ́ tɛr a tɩ tɩɛrʋ, cɩɩl a fʋ tobr cɔw tɩ ɛ́ bɛr wõ.

¹⁷Yuo a mimie ɛ́ nyɛ̃: a bɛlɩ dem na íre a fʋ yúor-vɩɛlʋ-danʋ nɩ a fʋ mɩnʋ a, a kũuni na be a kpɩmɛ tẽw a bɛ nɛbɛ ɩ, bɛl a vʋʋrʋ na yi zaa a bɛ pʋ̃ɔmɩ a.

¹⁸Ɛcɛ a sob nɛ na na íre a fʋ yúor-vɩɛlʋ-danʋ nɩ a fʋ mɩnʋ a, Sore e, ʋlɛ n'ɩ a nɩr ʋl pʋ-sãwna na tɛr yaga za a, ʋʋ mɩ́ cere kà gùr ɛ́ bɛ tɛr fãw a, ʋlɛ n'ɩ a nɩr ʋl a mimie na bàl ɛ́ kɔ̃ kʋrɛ a.

¹⁹A na ɩ à ŋá a, Sore tɩ Naaŋmɩn i, a lɛn daar tɩ na mɩ́ wa zɛlɛ fʋ a yãayãa a, a tɩ sãàkʋm-kore bɩɩ a tɩ na-mɩnɛ mɩnʋ ɩ-ɩrɩ ƴãw bɛ mɩ́ n'a ɩ.

²⁰Bʋ̃ʋ n'ʋ vɛ̃, tɩɩm ƴãw n'a fʋ ɩ a fʋ su-tʋlʋ ìr, mɛ̃ à à ŋá fʋ na tɩ ƴãw a fʋ ƴɛ̀r-manbɛ na ɩ a fʋ tõ-tõ-biir a yel a:

²¹“À ŋá n'a a Sore ƴɛ̀rɛ: Nyɩ gʋ̀r a zɩgɛ, ɛ́ tone a Babɩlɔn tẽw nãà tome. Lɛ n'a nyɩ na zɩ̃ a tẽw ɩ̃ na kʋ̀ a nyɩ sãàkʋm-kore a.

²²Ɛcɛ nyɩmɛ wa zawrɩ na tone a Babɩlɔn tẽw nãà tome, mɛ̃ a lɛ ɩ̃ na yere kʋ̀rɛ nyɩ a,

²³ɩ̃ na ɩ na nɩr kʋ̃ cãà wone a cuw gɔmɛ, a nʋ̃ɔ̀ cɛlsɩ nɩ a dɛb-sãan nɩ a pɔw-sãan yielu a Zuda tẽ-bɛrɛ pʋɔ, nɩ a Zerizalɛm tẽw pʋɔ ɩ. A tẽw za na sãw nɩ ʋ za, ʋ kʋ̃ cãà tɛr a ʋ nɩbɛ ɩ[10].”

²⁴Ɛcɛ a lɛ fʋ na tɩ yere kʋ̀rɛ tɩ kɛ́ tɩ tone a Babɩlɔn tẽw nãà tome a, tɩ bɛ bɛr wõ ɩ. Lɛ n'a fʋ tɩ tu a ƴɛ̀rʋ fʋ na tɩ ƴãw a fʋ ƴɛ̀r-manbɛ na ɩ a fʋ tõ-tõ-biir a ƴɛ̀r a: bɛ na yaw nɩ a nyɩ na-mɩnɛ nɩ a nyɩ sãàkʋm-kore kɔbɛ a bɛ yarʋ pʋɔ.

²⁵A tɩ sãàkʋm-kore nɩ a tɩ na-mɩnɛ kpi n nɩ kpɩɛrʋ na bɛ dɩ vuo a: bɛ kpi n nɩ kɔ̃, bɛ kpi n zɛbr zie, bɛ diw bɛ nɩ a bɛ tẽw pʋɔ cen nɩ. A bɛ kũuni n'ɩ a ŋan gã yẽw, a tʋlʋ dɩrɛ a a mʋ̃tɔ̃w, ɛ́ ƴawr kpɩɛr a a tɩ̃ɩsɔw.

²⁶Ɛ́ a Ŋmɩn-yir-kpɛ̃ɛ bɛ na por a fʋ yúor ƴãw a, fʋ ɩ na ʋ ŋmɛ̃ à à ŋá bɛ na mɩ́ nyɛ̃ ʋ a dɩ̃a a, a Ɩsɩrayɛl nɩ a Zuda bʋʋrɛ ɩ-faar zũú.

²⁷Ɛcɛ, Sore tɩ Naaŋmɩn i, fʋ ɩ n a tɩ zie nɩ suur-nyɔwfʋ yaga nɩ nɩbaal-zɔba kpɛ̃ɛ,

²⁸mɛ̃ a lɛ fʋ na tɩ ƴãw a fʋ tõ-tõ-bie Moyiir yel, a ʋlɩ bibir fʋ na tɩ ƴãw ʋ sɛb a fʋ wulu a Ɩsɩrayɛl nɩbɛ ƴãw a. Fʋ tɩ yel'a:

²⁹“Nyɩmɛ bɛ wa bɛrɛ wone a lɛ ɩ̃ na yere a, a zu-sɛbla ŋa za nyɩ na ɩ bɛ dɩ vuo a, nãà cɛ nɩ zaa pʋrɩ a nɩ-bʋʋrɛ bɛl sɔgɔ ɩ̃ na na diw nyɩ yaarɩ a.

³⁰Ɩ̃ bãwnɩ a na, nyɩ kʋ̃ bɛr wõ m ɛ, nyɩ na ɩ nɩ-bʋʋrɛ a zuru na kpɛmɛ a ƴãw. Ɛcɛ a tẽw ʋl pʋɔ bɛ na na diw nyɩ cen nɩ a, nyɩ na tɩ lɛb'a tɩɛrɩ,

³¹ɛ́ nyɩ na bãw na kɛ́ mãa n'ɩ a Sore, a nyɩ Naaŋmɩn. Lɛ n'a ɩ̃ na kʋ̀ nyɩ tɩɛrʋ na cɛlɛ be a, nɩ tobe na bɛrɛ wone a.

³²Nyɩ na danɛ mɛ̃ nɩ a tẽw ʋl pʋɔ bɛ na diw nyɩ cen nɩ a, ɛ́ nyɩ na lɛb'a tɩɛrɛ a ɩ̃ yele.

³³Nyɩ na bɛr'ɩ a nyɩ zu-kpɛnʋ nɩ a nyɩ ɩ-faar, nyɩ na na lɛb tɩɛrɩ a nyɩ sãàkʋm-kore ɩ-ɩrɩ a ƴãw, bɛl na tɩ maalɩ yel-bebe sãw a mãa Sore a.

³⁴Lɛ n'a ɩ̃ na lɛb tɛr nyɩ wa n a tẽw ɩ̃ na tɩ yel k'ɩ̃ɩ na kʋ̀ n a nyɩ sãàkʋm-kore a, a Abraham, Ɩzaakɩ nɩ Zakɔb a, ɛ́ nyɩ na só ʋ na. Ɩ̃ na ɩ na nyɩ yãwmɛ, a nyɩ nʋɔr kʋ̃ lɛb siwri ɛ.

³⁵Ɩ̃ na maal'ɩ nyɩ nɩ wõ-taa na be kʋralɛ a, k'ɩ̃ɩ ɩ a nyɩ Naaŋmɩn, ɛ́ nyɩ ɩ a ɩ̃ nɩ-bʋʋrɛ. Ɩ̃ɩ kʋ̃ lɛb ɩ a ɩ̃ nɩ-bʋʋrɛ Ɩsɩrayɛl yi zaa a tẽw ɩ̃ na kʋ̀ bɛ a pʋɔ ɩ.»