Read Dagara, Northern Ezekɩɛl 1 Bible Online

Ezekɩɛl 1 - Dagara, Northern bible

Ezekɩɛl 1

¹A ɩ̃ yome lɩzɛr'ɩ pie sob, a cuwr anaar sob, a bibie anũu sob, a mãa Ezekɩɛl na ɩ a bàwr-maalɛ Buuzɩ bidɛb a, ɩ̃ tɩ pʋɔ nɩ a Zifʋ mɩnɛ bɛl bɛ na tɩ diw cen nɩ a pʋɔ, a Kebaar man nʋɔr. Ɩ̃ tɩ nyɛ̃ nɩ a salom ʋ yuo, ɛ́ a Naaŋmɩn tɩ tɩr bʋ̃-nyɛrɩ kʋ̀ m ɩ̃ nyɛ̃.

²A nãà Yoyakin diw-cenu yome anũu sob tɩ n'a[1].

³A Babɩlɔn tẽw pʋɔ, a Kebaar man nʋɔr, a Sore tɩ ƴɛ̀r'ɩ a ɩ̃ zie, a mãa Ezekɩɛl, na ɩ a bàwr-maalɛ Buuzɩ bidɛb a. Be n'a a Sore fãw tɩ siw a ɩ̃ zu.

⁴Bom ŋa n'ʋ ɩ̃ tɩ nyɛ̃: sɛsɛb-pɩl tɩ yi n a saa-pɛrɩ́-gʋba-lowr waar'ɩ zũzuwr-kpɛ̃ɛ cãà na viiri koli a. Saa-nyɩwrʋ tɩ yire nɩ a ʋ ziir za. A ʋ sɔwlɩsɔw tɩ nyɔw nɩ vũu dɩrɛ mɛ̃ kure na nyɩwrɛ a.

⁵A tɩ ɩ na mɛ̃ bʋ̃-vʋʋrɩ anaar'a be a sɔwlɩsɔw a. A tɩ ŋmɛ̃ na taa nɩ nɩsaalbɛ.

⁶A bʋ̃-vʋʋrɩ á ŋá kãw za tɩ tɛr'ɩ niŋe anaar nɩ pɩgɛ anaar.

⁷A gbɛ́ɛ tɩ tori na, a gbɛ-ceni tɩ ŋmɛ̃ na taa nɩ nále nafɩlɛ, ɛ́ tɩ nyɩwrɛ mɛ̃ kur-zɩɛ bɛ na kàr a.

⁸A pɩwr za pile a, nɩr nũu tɩ be n be. A nuru á ŋá tɩ lɩɛb'a tori a lowe anaar mɛ̃ a niŋe nɩ a pɩgɛ a.

⁹A pɩgɛ nyɛɛ tɩ tɔ n taa. A bʋ̃-vʋʋrɩ tɩ tori nɩ niwn cere ɛ́ bɛ ŋmɛlɛ kaar ɛ.

¹⁰A niŋe tɩ ŋmɛ̃ na taa nɩ nɩsaal niwn, ɛ́ ŋa za tɩ tɛr gbẽw niwn a dʋrʋ-lowr, nadɛr niwn a gʋba-lowr nɩ sɩla niwn.

¹¹A pɩgɛ ayi tɩ tur'a cɔw a saa-zu ɛ́ tɩ tuori taa, ɛ́ a ayi al na cɛ a tɩ pàw a a ƴã-gamɛ.

¹²Ŋa za mɩ́ tɩ cere na tori a ʋ niŋé. A mɩ́ tɩ tori nɩ niwn cere a be a na bɔbr'a, ɛ́ bɛ lɩɛbɛ ɩ.

¹³A bʋ̃-vʋʋrɩ cara pʋɔ a, bɛ mɩ́ tɩ nyɛ̃ nɩ bʋ̃-kãw na ŋmɛ̃ taa nɩ vũu-bie na nyɔw vũu 'lere a, bɛ mɩ́ tɩ nyɛ̃ nɩ mɔ̃-'leni vũu na damnɛ a. A vũu tɩ dele nɩ mimie, ɛ́ saa-nyɩwrʋ tɩ yire a pʋɔ.

¹⁴A bʋ̃-vʋʋrɩ tɩ cere na ɛ́ waar fɔ̃w fɔ̃w za, mɛ̃ saa-nyɩwrʋ a.

¹⁵Ɩ̃ na tɩ jɩ́rɛ a a, ɩ̃ tɩ nyɛ̃ nɩ gbɛr-vilo vilo na tɩ tɔ tẽw a, à ŋà za pɛr.

¹⁶A gbɛ́ɛ á ŋá tɩ nyɩwrɛ na mɛ̃ kʋsɛ-bi-nyɩla a. A tɩ ŋmɛ̃ n taa a za anaar ɛ́ ɩ mɛ̃ bɛ maal'a na a sawlɩ sawlɩ taa a.

¹⁷A mɩ́ tɩ tʋ̃ɔ́ na cere lɩɛbɛ a loge a za anaar ɛ́ bɛ mɩ́ tɩ ƴawr lɩɛbɛ ɩ.

¹⁸A kɛrʋ tɩ vʋ̃ɔnɛ nɩ pʋ̀lá ɛ́ zili-nyɩwrɩ tɩ yɛ́r pàw a viiri koli.

¹⁹A bʋ̃-vʋʋrɩ na mɩ́ tɩ cere tɔlɛ nidaa a, a gbɛ́ɛ mɩ̀ mɩ́ tɩ taw na tɔl pɩɛl'a, ɛ́ a na mɩ́ tɩ zɛw ìr a tẽw a, a mɩ̀ mɩ́ tɩ zɛw na ìr.

²⁰A bʋ̃-vʋʋrɩ mɩ́ tɩ cere nɩ a be a na bɔbr'a, ɛ́ a gbɛ́ɛ mɩ́ tɩ lãw cere nɩ a mɩ̀. Bʋ̃ʋ n'ʋ vɛ̃, a bʋ̃-vʋʋrɩ pʋ-tɩɛrʋ n'a mɩ́ tɩ ɩ a gbɛ́ɛ cere.

²¹A na ɩ à ŋá a, lɛn daar za alɛ wa tawr tɔlɛ, tɛwr àrɛ bɩɩ zɛwr ìre a tẽw a, a gbɛ́ɛ mɩ́ tɩ lãw na ɩrɛ a bʋ̃-been nɛ, bʋ̃ʋ n'ʋ vɛ̃, a bʋ̃-vʋʋrɩ pʋ-tɩɛrʋ n'a tɩ be a gbɛ́ɛ pʋɔ.

²²A bʋ̃-vʋʋrɩ zu-sɔw a, bʋ̃-kãw tɩ be n be ɩ mɛ̃ bɩwra a, ɛ́ nyɩwrɛ mɛ̃ kʋ̃ɔ-kuur a.

²³A bɩwra ŋa pile a, bʋ̃-vʋʋra za tɩ tɛrɩ pɩgɛ ayi na dɔl cɔw taar a. A ayi al na cɛ a tɩ pàw nɩ a ʋ ƴã-gan.

²⁴Ɩ̃ tɩ wõ n a gɔmɛ a pɩgɛ na tɩ ɩrɛ a bʋ̃-vʋʋrɩ na mɩ́ wa cere tɔlɛ nidaa a. A gɔmɛ á ŋá tɩ ŋmɛ̃ na taa nɩ kʋ̃ɔ-kpɛ̃ɛ damnʋ, saa-tanʋ, a Kpɛnʋ-za-sob kɔkɔr bɩɩ zɛbr-nɩbɛ na yãwmɛ a gɔmɛ a. A na mɩ́ tɩ tɛw àr a, a mɩ́ tɩ ɓã n a pɩgɛ taa.

²⁵Gɔmɛ tɩ ɩrɛ nɩ a bɩwra na tɩ be a bʋ̃-vʋʋrɩ zu-sɔw a pʋɔ.

²⁶A bɩwra na tɩ be a zu-sɔw a saa-zu a pʋɔ a, bɛ tɩ nyɛ̃ nɩ safɩɩr kʋsɩɛr na ŋmɛ̃ taa nɩ naalʋ-dà-kɔw a. A naalʋ-dà-kɔw ŋmɛ̃-ta-tɔ ŋa zu, a saa-zu za a, ŋmɛ̃a na ŋmɛ̃ mɛ̃ nɩr a tɩ àr'a.

²⁷Ɩ̃ tɩ nyɛ̃ nɩ a ŋmɛ̃a ŋa ʋ nyɩwrɛ mɛ̃ kure bɛ na kàr a, ɛ́ tɩ ɩ mɛ̃ vũu viiri na koli ʋ a. A bom ʋl na tɩ ɩ mɛ̃ a ʋ sɩɛ a zu-sɔw nɩ a pile a, ɩ̃ tɩ nyɛ̃ nɩ bom kãw na ɩ mɛ̃ vũu na caalɛ a ziir za a.

²⁸A cãà na viiri koli ʋ a ŋmɛ̃ na taa nɩ sa-gõguo na nyɩwrɛ zũzuwe pʋɔ saa bibir a. A Sore yúor-vɩɛlʋ-danʋ bãwfʋ tɩ n'ʋ. Ɩ̃ tɩ nyɛ̃ nɩ à á ŋá za, ɩ̃ tɩ lo na gbĩ dume gũu tɩ tɔ tẽw. Lɛ n'a ɩ̃ tɩ wõ nɩr ʋ ƴɛ̀rɛ a ɩ̃ zie.