Read Dagara, Northern Ezekɩɛl 13 Bible Online

Ezekɩɛl 13 - Dagara, Northern bible

Ezekɩɛl 13

¹A Sore tɩ ƴɛ̀r'ɩ a ɩ̃ zie à ŋá:

²«A fʋ̃ʋ nɩsaal bie, a ɩ̃ yúor ƴãw, wo a bɛl na bʋɔlɛ bɛ tʋɔra naaŋmɩn-ƴɛ̀r-manbɛ a Ɩsɩrayɛl tẽw pʋɔ, ɛ́ mɩ́ ƴɛ̀r a bɛl mɩŋa yúor ƴãw a. Yel bɛ kɛ́ bɛ bɛrɛ wone a ɩ̃ ƴɛ̀rʋ.

³À ŋá n'a a mãa, a Sore Naaŋmɩn, ƴɛ̀rɛ: Baw-bio dem'ɩ a naaŋmɩn-ƴɛ̀r-man-gẽgemi dem bɛl na bɛ mɩ́ nyɛ̃ bom za ɛ́ tuur a bɛ tɩɛrʋ a.

⁴Ɩsɩrayɛl nɩbɛ ɛ, a nyɩ naaŋmɩn-ƴɛ̀r-manbɛ ɩ na mɛ̃ gbõgbo-cili na jɛ̃jɛnɛ deboru pʋɔ a!

⁵Bɛ bɛ cen tɩ fɔb a dacin vɛɛ ɩ. Bɛ bɛ ŋmãa dacin viiri koli piw nyɩ tɛr a zɛbr ƴãw a Sore bibir nãà wa vɩɛ a ɩ[19].

⁶Bɛ mɩ́ tɩɛr'a yel a bɛ bʋ̃-nyɛrɩ ɛ́ mɩ́ yel bome na bɛ ɩ sɩza a. Bɛ mɩ́ yel'a: “A Sore yel'a”. Ɛcɛ a mãa Sore, ɩ̃ bɛ mɩ́ tõ bɛ ɩ. Bɛ mɩ́ tɩɛr k'ɩ̃ɩ na tu n a bɛ ƴɛ̀rʋ pùor!

⁷Ɛcɛ ɩ̃ nɩ̃ɛ na mɩ́ yel bɛ: Nyɩ mɩ́ tɩɛr'a yel a nyɩ bʋ̃-nyɛrɩ ɛ́ mɩ́ yel bome na bɛ ɩ sɩza a. Nyɩ mɩ́ yel'a: “A Sore yel'a”, ɛcɛ ɩ̃ bɛ mɩ́ ƴɛ̀r ƴɛ̀rʋ ɛ!

⁸A na ɩ à ŋá a, a mãa Sore Naaŋmɩn yere na: nyɩ na faa mɩ́ tɩɛrɩ a nyɩ ƴɛ̀rʋ yel a, a nyɩ bʋ̃-nyɛrɩ na faa bɛ mɩ́ ɩ sɩza a, ɩ̃ na ìr'ɩ a nyɩ ƴãw. À ŋá n'a a Sore Naaŋmɩn yel!

⁹Ɩ̃ na wul'ɩ a ɩ̃ fãw a naaŋmɩn-ƴɛ̀r-manbɛ bɛl na mɩ́ tɩɛrɩ a bɛ bʋ̃-nyɛrɩ yel, ɛ́ mɩ́ yel bome na bɛ ɩ sɩza a. Bɛ kʋ̃ pʋɔ a ɩ̃ nɩ-bʋʋrɛ lãw pʋɔ ɩ. A bɛ yée kʋ̃ be a Ɩsɩrayɛl bʋʋrɛ yée sɛbɛ pʋɔ ɩ[20], ɛ́ bɛ kʋ̃ lɛb wa a bɛ tẽw pʋɔ ɩ. À ŋá n'a bɛ na bãw kɛ́ mãa n'ɩ a Sore Naaŋmɩn.

¹⁰A naaŋmɩn-ƴɛ̀r-manbɛ bɛ̀lɛ nɩ a ɩ̃ nɩ-bʋʋrɛ. Bɛ mɩ́ yere na: “A yele za cere nɩ vla”. Ɛcɛ bom za bɛ cere vla ɩ. A ɩ̃ nɩbɛ mɩɛr'ɩ dacin ɛ́ a bɛl fɔlɛ ʋ fɔlʋ tɛwr.

¹¹A na ɩ à ŋá a, yel kʋ̀ a bɛlɩ dem na fɔlɛ a dacin a: A nyɩ dacin na lo na! Sa-kpɛ̃ɛ na wa na, sa-bi-kube na lo na, saa-sɛsɛb na cɛr'a.

¹²A dacin wa lo a, bɛ na sowri nyɩ na: A fɔlʋ nyɩ na tɩ fɔlɛ ʋ a pɛr'ɩ bo?

¹³A na ɩ à ŋá a, à ŋá n'a a mãa Sore Naaŋmɩn ƴɛ̀rɛ: A ɩ̃ su-yãyaar pʋɔ a, ɩ̃ na ɩ n a saa-sɛsɛb cɛ̀r, ɩ̃ɩ ɩ sa-bɛrɛ mĩ. A sa-bi-kube na lore nɩ nɩ fãw sãw bom za bɛr.

¹⁴Ɩ̃ na dáa nɩ a dacin nyɩ na fɔl a lɔb. Ɩ̃ na sãw ʋ na bɛr tɩ ta n a sɩɛmɩ́ ɛ́ bɛ na nyɛ̃ nɩ a ʋ pɛr na bin a. A dacin na lo na, ɛ́ a kʋsɛbɛ lo dĩ nyɩ ŋmɛr. Lɛ n'a nyɩ na bãw kɛ́ mãa n'ɩ a Sore.

¹⁵Ɩ̃ na bɛr'ɩ a ɩ̃ su-tʋlʋ kpãkpã ìr a dacin nɩ a bɛl na fɔl ʋ a ƴãw. Ɩ̃ na yel nyɩ na: “A dacin sãw na! A bɛl na fɔl ʋ a kpi na!

¹⁶A Ɩsɩrayɛl naaŋmɩn-ƴɛ̀r-manbɛ na tɩ ƴɛ̀rɛ a Zerizalɛm nɩdaar yele ƴɛ̀rʋ a, bɛ bɛ cãà ɩ. A bɛ bʋ̃-nyɛrɩ tɩ yere na kɛ́ bom za cere nɩ vla. Ɛcɛ bom za bɛ tɩ cere vla ɩ!”[21] À ŋá n'a a Sore Naaŋmɩn yel.»

¹⁷«Fʋ̃ʋ nɩsaal bie e, pãa lɩɛbɩ a fʋ niwn cɔw a Ɩsɩrayɛl pɔwbɛ na ƴɛ̀rɛ a bɛl mɩŋa yúor ƴãw a. Wo bɛ a ɩ̃ yúor ƴãw.

¹⁸Yel bɛ: À ŋá n'a a Sore ƴɛ̀rɛ: Baw-bio dem'ɩ nyɩ! Bʋ̃ʋ n'ʋ vɛ̃, nyɩ sɩɛr'ɩ pɛnɛ ƴãwnɛ a nusuwli za ƴãw, nyɩ wobr'ɩ fãtarɩ a yome bʋʋrɛ za nɩbɛ ƴãw, kɛ́ nyɩ tʋ̃ɔ́ so a bɛ nyɔ-vʋʋrʋ[22]. Nyɩ bɔbr'a kɛ́ nyɩ de a ɩ̃ nɩ-bʋʋrɛ nɩbɛ nyɔ-vʋʋrʋ ɛ́ maal tɛr a nyɩɩm mɩŋa dem.

¹⁹Nyɩ jewre mɛ̃ nɩ a ɩ̃ nɩ-bʋʋrɛ niŋé, nũ-kue ɔɔzʋ bɩɩ bʋ̃-dɩrɩ blã tɛwr ƴãw. Nyɩ ŋmarɛ nɩ ziri kʋ̀rɛ a ɩ̃ nɩ-bʋʋrɛ bɛ sàwr a nyɩ ziri. Lɛ n'a nyɩ mɩ́ ɩ a bɛl na bɛ sɛw kɛ́ bɛ kpi a, bɛ kpi, ɛ́ ƴãw a bɛl na bɛ sɛw kɛ́ bɛ vʋʋrɛ a, bɛ vʋʋrɛ!

²⁰Alɛ n'a so a mãa Sore Naaŋmɩn yere kʋ̀rɛ nyɩ: Ɩ̃ nyɛ̃ nɩ nɩ a nyɩ pɛnɛ suur, al nyɩ na mɩ́ de nɩ a nɩbɛ nyɔ-vʋʋrʋ a. Ɩ̃ na cɩɛrɩ a na ír bɛr a nyɩ kpãkpamɛ ƴãw, ɛ́ faa a bɛl nyɩ na nyɔw bɛ ɩ gaso-biir a.

²¹Ɩ̃ mɩ̀ na cɩɛrɩ nɩ a nyɩ fãtarɩ bɛr, ɛ́ faa a ɩ̃ nɩ-bʋʋrɛ a nyɩ nuru pʋɔ. Bɛ kʋ̃ lɛb lo a nyɩ bɛrɩ pʋɔ ɩ, ɛ́ nyɩ na bãw na kɛ́ mãa n'ɩ a Sore.

²²A nyɩ ziri zũú, nyɩ ɩ na nɩ-mɩn kanyir baarɩ, bɛl ɩ̃ na bɛ tɩ bɔbr k'ɩ̃ɩ maalɩ faa a. Nyɩ mʋʋrɩ nɩ nɩ-faar ƴãw bɛ be a bɛ ɩ-faar pʋɔ, ɛ́ à à ŋá n'a nyɩ ɩ kũu jɩɛrɛ a bɛ nyɔ-vʋʋrʋ.

²³A na ɩ à ŋá a, nyɩ kʋ̃ lɛb mɩ́ tɩɛrɩ yel a nyɩ bʋ̃-nyɛrɩ ɛ, nyɩ kʋ̃ lɛb mɩ́ yel bome na bɛ ɩ sɩza a ɩ. Ɩ̃ na faa nɩ a ɩ̃ nɩ-bʋʋrɛ a nyɩ nuru pʋɔ, ɛ́ nyɩ na bãw na kɛ́ mãa n'ɩ a Sore.»