Read Dagara, Northern Ezekɩɛl 14 Bible Online

Ezekɩɛl 14 - Dagara, Northern bible

Ezekɩɛl 14

¹Bibir kãw, a Ɩsɩrayɛl nɩ-kore bɛ mɩnɛ tɩ wa na wa zɩ̃ a ɩ̃ niŋé kɛ́ bɛ nyɛ̃ m[23].

²Lɛ n'a a Sore tɩ yel mɛ̃:

³«Fʋ̃ʋ nɩsaal bie e, bɛrɛ wone! A nɩbɛ bɛ ŋa ƴãw nɩ a bɛ ŋmɩn-bɛlɛbɛlɛ a bɛ socir pʋɔ. Bɛ bɔbr'ɩ kʋralɛ a bom nɛ na mɩ́ ɩ bɛ lo a yel-bier pʋɔ a. Ɩ̃ na bɛr'a bɛ tɛr sowru a ɩ̃ zie e?

⁴A na ɩ lɛ a, ƴɛ̀r a ƴɛ̀rʋ ŋa kʋ̀ bɛ: À ŋá n'a a mãa Sore Naaŋmɩn yere: A ɩ mɛ̃ Ɩsɩrayɛl nɩr kãw wa ƴãw nɩ a ʋ ŋmɩn-bɛlɛbɛlɛ a ʋ socir pʋɔ, ɛ́ bɔbr kʋralɛ a bom nɛ na mɩ́ ɩ ʋ lo a yel-bier pʋɔ a, ɛ́ wa k'ʋʋ wa nyɛ̃ naaŋmɩn-ƴɛ̀r-manɛ a, a mãa Sore n'ʋ na sɔw ʋ. Ɩ̃ na sɔw ʋ na tu n a ŋmɩn-bɛlɛbɛlɛ yaga ʋ na puore a.

⁵A ɩ̃ sɔwfʋ na dam'ɩ a Ɩsɩrayɛl nɩbɛ yaga, bɛl na jɛ m bɛr a bɛ ŋmɩn-bɛlɛbɛlɛ nɔ̃wfʋ zũú a.

⁶Alɛ n'a so, yel kʋ̀ a Ɩsɩrayɛl nɩbɛ: “A Sore Naaŋmɩn zɛlɛ nyɩ na kɛ́ nyɩ lɩɛbɩ a nyɩ nyɔ-vʋʋrʋ, kɛ́ nyɩ ír nũu ɛ́ bɛr a nyɩ ŋmɩn-bɛlɛbɛlɛ, kɛ́ nyɩ ŋmɛlɩ kpaar cɔw a nyɩ ɩb na bɛ maal'ɩ wob a.”

⁷A ɩ mɛ̃ Ɩsɩrayɛl nɩr kãw bɩɩ sãan na kpɩɛr a Ɩsɩrayɛl tẽw pʋɔ a[24] jɛ m'a bɛr. Ʋlɛ wa ƴãw a ʋ ŋmɩn-bɛlɛbɛlɛ a ʋ socir pʋɔ, ɛ́ bɔbr kʋralɛ a bom nɛ na mɩ́ ɩ ʋ lo a yel-bier pʋɔ, ɛ́ wa k'ʋʋ wa nyɛ̃ naaŋmɩn-ƴɛ̀r-manɛ tʋ̃ɔ́ bãw a ɩ̃ pʋ-tɩɛrʋ a, a mãa Sore mɩŋa n'ʋ na sɔw ʋ.

⁸Ɩ̃ na ír'ɩ mimir ƴãw a nɩr ŋa. Ɩ̃ na ɩ na a ʋ yel ɩ zʋkpar bɛ lɔbr, ɩ̃ɩ ír ʋ bɛr a ɩ̃ nɩ-bʋʋrɛ sɔgɔ. Lɛ n'a nyɩ na bãw kɛ́ mãa n'ɩ a Sore.

⁹Naaŋmɩn-ƴɛ̀r-manɛ wa bɛr bɛ bɛlɩ ʋ, ʋ sɔw ʋl mɩŋa a, a mãa Sore n'ʋ na ƴãw ʋ ʋ ɩ a lɛ. Ɩ̃ na dɔl'ɩ nũu a ʋ ƴãw, ɛ́ ɩ ʋ bɔr a ɩ̃ nɩ-bʋʋrɛ Ɩsɩrayɛl sɔgɔ.

¹⁰A naaŋmɩn-ƴɛ̀r-manɛ ŋa nɩ a ʋlɩ sob na sowri ʋ a, bɛ za ayi so a sãwna been nɛ.

¹¹À ŋá n'a a Ɩsɩrayɛl nɩbɛ kʋ̃ lɛb bɔr zãá nɩ mɛ̃ ɩ. Bɛ kʋ̃ lɛb ɩ dɛwr dem a bɛ sãwna za zũú ɛ. Ɛcɛ bɛ na ɩ n a ɩ̃ nɩ-bʋʋrɛ, ɩ̃ɩ ɩ a bɛ Naaŋmɩn.» À ŋá n'a a Sore Naaŋmɩn yel.

¹²A Sore tɩ yel mɛ̃ na:

¹³«Nɩsaal bie e, bɛrɛ wone! A ɩ mɛ̃ tẽw kãw nɩbɛ ɩ n sãwna dem a ɩ̃ zie bɛ na bɛ tu a ɩ̃ pùor a ƴãw. A lɛ pʋɔ a, ɩ̃ na wul bɛ nɩ a ɩ̃ kpɛnʋ. Ɩ̃ na ɩ n a bɛ bʋ̃-dɩrɩ baarɩ. Ɩ̃ na ɩ na kɔ̃ lo a bɛ zu. Ɩ̃ na ɩ n a tẽw nɩbɛ nɩ a dʋn kpi.

¹⁴A ɩ mɛ̃ nɩbɛ ata na ŋmɛ̃ taa nɩ Nowe, Danɩɛl nɩ Zɔb a be n a tẽw ŋa nɩbɛ pʋɔ. A nɩbɛ ata bɛ ŋa tɛwr nɛbɛ na tʋ̃ɔ́ faa a bɛl mɩŋa nyɔ-vʋʋrʋ a bɛ pùor-bɛ-lɛbrʋ zũú. A mãa Sore n'ʋ yel à ŋá.

¹⁵Bɩɩ ɩ̃ na bɛr'ɩ dʋ̃-faar a wa a nɩbɛ bɛ ŋa ƴãw. A dʋn na kʋ n bɛ za ɛ́ a tẽw na lɩɛb'ɩ wɛja-kpalɛ. Nɩr za kʋ̃ lɛb tɔl a be ɩ, a dʋn á ŋá zũú.

¹⁶A ɩ mɛ̃ a nɩbɛ ata bɛ ŋa na ŋmɛ̃ taa nɩ a Nowe, a Danɩɛl nɩ a Zɔb a be n a nɩbɛ pʋɔ a, bɛl tɛwr nɛbɛ na vʋʋrɛ. A mãa Sore Naaŋmɩn n'ʋ yere, ɩ̃ pɔ n nɩ a ɩ̃ nyɔ-vʋʋrʋ, bɛ kʋ̃ tʋ̃ɔ́ faa a bɛl mɩŋa bibiir ɛ, ɛ́ a tẽw na lɩɛb'ɩ wɛja-kpalɛ.

¹⁷Bɩɩ ɩ̃ na ɩ n zɛbr lo a nɩbɛ bɛ ŋa zu. Ɩ̃ na kʋ̀ n nʋɔr zɛbr-nɩbɛ kɛ́ bɛ sãw a tẽw bɛr ɛ́ kʋ a nɩbɛ nɩ a dʋn.

¹⁸A ɩ mɛ̃ a nɩbɛ ata bɛl na ŋmɛ̃ taa nɩ a Nowe, a Danɩɛl nɩ a Zɔb a be n a nɩ-bʋʋrɛ bɛ ŋa pʋɔ a, bɛl tɛwr nɛbɛ na vʋʋrɛ. A mãa Sore Naaŋmɩn n'ʋ yere, ɩ̃ pɔ n nɩ a ɩ̃ nyɔ-vʋʋrʋ, bɛ kʋ̃ tʋ̃ɔ́ faa a bɛl mɩŋa bibiir ɛ.

¹⁹Bɩɩ ɩ̃ na ƴãw nɩ jɛ̀lmɛ̃ bàalʋ na nyɔwr nɩbɛ lʋɔrɛ taa a a nɩ-bʋʋrɛ bɛ ŋa. Ɩ̃ na ɩ n a ɩ̃ suur ìr a bɛ ƴãw, a kpɩɛrʋ kpɛ̃ɛ ŋa na na kʋ a tẽw nɩbɛ nɩ a dʋn a ƴãw.

²⁰A ɩ mɛ̃ a nɩbɛ ata bɛ ŋa na ŋmɛ̃ taa nɩ a Nowe, a Danɩɛl nɩ a Zɔb a be n a nɩ-bʋʋrɛ bɛ ŋa pʋɔ a, bɛl tɛwr nɛbɛ a bɛ pùor-bɛ-lɛbrʋ na tʋ̃ɔ́ faa. A mãa Sore n'ʋ yere, ɩ̃ pɔ n nɩ a ɩ̃ nyɔ-vʋʋrʋ, bɛ kʋ̃ tʋ̃ɔ́ faa a bɛl mɩŋa bibiir ɛ.»

²¹Al pùorí, a Sore Naaŋmɩn tɩ yel mɛ̃ na: «Ɩ̃ ɩ na kpɩɛrʋ bɛrɛ anaar ta a Zerizalɛm: a zɛbr, a kɔ̃, a dʋ̃-faar nɩ a jɛ̀lmɛ̃ bàalʋ, k'aa tʋ̃ɔ́ kʋ a nɩbɛ nɩ a dʋn pàw pɛr.

²²Ɛcɛ nɩbɛ bɛ mɩnɛ, dɛbr nɩ pɔwbɛ, cãà na vʋʋrɛ. Bɛ na yi n a Zerizalɛm wa páw nyɩ. Nyɩmɛ wa nyɛ̃ a bɛ cenu nɩ a bɛ ɩb a, nyɩ na nyɛ̃ nɩ mɔwlʋ a kpɩɛrʋ ɩ̃ na ɩ a ta a Zerizalɛm a ƴãw.

²³Nyɩ na nyɛ̃ nɩ mɔwlʋ nyɩmɛ wa nyɛ̃ bɛ a. Bʋ̃ʋ n'ʋ vɛ̃, nyɩ na bãw na k'ɩ̃ɩ tɛr'ɩ yel-mɩŋa ɩ a lɛ ɩ̃ na ɩ a tẽ-kpɛ̃ɛ ŋa a. A mãa Sore n'ʋ yel.»