Read Dagara, Northern Ezekɩɛl 17 Bible Online

Ezekɩɛl 17 - Dagara, Northern bible

Ezekɩɛl 17

¹A Sore tɩ yel mɛ̃ na:

²«A fʋ̃ʋ nɩsaal bie, lɔb zʋkpar kʋ̀ a Ɩsɩrayɛl nɩbɛ, suoli suolu kʋ̀ bɛ.

³Yel kʋ̀ bɛ k'aa mãa Sore Naaŋmɩn n'ʋ suole suolu kʋ̀rɛ bɛ. Ʋlɛ n'ɩ ŋa: “Sɩl-kpɛ̃ɛ kpɛ̃ɛ[32] tɩ be n be tɛr pɩw-yɛlsɩ, kɔbl-wowr a sãáfʋ bʋʋrɛ na yãwmɛ a. Ʋ tɩ ƴaw na tɩ ta a Libã tan ƴãw. Ʋ tɩ ka n sɛɛdɩr tɩɛ yã.

⁴Ʋ tɩ ŋmãa nɩ a ʋ wuli-zãána za. Ʋ tɩ cen nɩ ʋ nɩ yɛ-yɛrbɛ tẽw tɩ bin ʋ bʋ̃-kʋ̀ɔrbɛ tẽ-kpɛ̃ɛ pʋɔ[33].

⁵Al pùorí, ʋ tɩ de nɩ a Ɩsɩrayɛl tẽw tɩ-yũo[34] tɩ ƴãw zie bɛ na mɩ́ kaarɛ tɩ-vɔ̃-sɛlɩ zie a. Ʋ tɩ sɛl ʋ nɩ man-kpɛ̃ɛ nʋɔr, mɛ̃ tɩɛ na nɔ̃w kʋ̃ɔ a.

⁶A tɩɛ ŋa tɩ vo na, ʋ tɩ lɩɛb'ɩ divɛ̃ tɩ-vla vla na zɔrɛ gbɛ́ɛ a tẽsɔw a. A ʋ wuli tɩ kɛrɛ na tuur a sɩla lowr ɛ́ a ʋ nyɩgɛ bule a ʋ pɩgɛ pile. A divɛ̃ tɩɛ ŋa tɩ vore nɩ wul-paalɛ kʋralɛ.

⁷Ɛcɛ a sɩlɩ ayi sob mɩ̀ na ɩ kpɛ̃ɛ[35] a tɩ ta na. A ʋ pɩgɛ tɩ yɛlmɛ na, ɛ́ a ʋ kɔblʋ yãwmɛ. Lɛ n'a a divɛ̃ tɩɛ tɩ lɩɛbɩ a ʋ nyɩgɛ cɔw ʋ, ɛ́ ɩ a ʋ wuli tu a ʋ lowr. À à ŋá a, ʋ tɩ tɩɛrɛ na k'ʋʋ na lɛb'a bãw páw kʋ̃ɔ zuo a tẽsɔw ʋl pʋɔ bɛ na tɩ sɛl ʋ a.

⁸Ɛcɛ, púo na tɛr pʋɔrʋ a pʋɔ n'a bɛ tɩ sɛl ʋ, man-kpɛ̃ɛ nʋɔr, k'ʋʋ vore wuli, wɔnɛ wɔmɛ, ɛ́ lɩɛbɩ divɛ̃ tɩ-vla vla.”

⁹Ɛ́ a mãa Sore Naaŋmɩn, ɩ̃ sowre na: “A divɛ̃ tɩɛ ŋa na tʋ̃ɔ́ na baa a? A sɩl-dãw-niwn sob kʋ̃ vɔ̃ a ʋ nyɩgɛ ɛ́ sãw a ʋ wɔmɛ bɛr ɛ? A pùorí a, a ʋ wul-paalɛ kʋ̃ ko ɩ? A ʋ vʋ̃ɔfʋ ƴãw a, bɛ kʋ̃ tɛr fãw-yaga nɩ nɩ-yaga yel-ɩra ɩ.

¹⁰A divɛ̃ tɩɛ sɛl'ɩ vla, ɛcɛ ʋ kʋ̃ tʋ̃ɔ́ baa ɩ. A saa-pɛrɩ́ sɛsɛb wa fu a ʋ zu a, ʋ na ko n ʋ za kpɛ̃lɛ̃kpɛ̃lɛ̃. Ʋ na ko n a tẽsɔw ʋl zu ʋ na tɩ sɛw k'ʋʋ bul a!”»

¹¹A Sore tɩ yel mɛ̃ na:

¹²«Sowri a nɩ-gaarɩ bɛ ŋa nyɛ̃ bɛlɛ bɛ wa bãw a zʋkpar ŋa pɛr a. Lɛb sɩ̃w a bɛ tɩɛrʋ à ŋá: A Babɩlɔn tẽw nãà kpɛ n a Zerizalɛm, ʋ nyɔw nɩ a nãà nɩ a nɩ-bɛrɛ cen nɩ a Babɩlɔn tẽw.

¹³Al pùorí, ʋ kaa na ír a nãà yir nɩr kãw. Ʋ maal'ɩ ʋ nɩ wõ-taa, ɛ́ ƴãw k'ʋ pɔ k'ʋʋ na tu n a Babɩlɔn tẽw nãà kʋ̃ lɛb pùor ɛ. Ʋ tɛr'ɩ a tẽw nɩ-tɩbr cen nɩ

¹⁴k'aa naalʋ-tẽw tʋ̃ɔ́ ɩ pʋrɩ, ta tɛr a ɩ, ɛ́ maal tɛr a ʋ wõ-taa vla.

¹⁵Ɛcɛ a na-paala ìr'ɩ a Babɩlɔn tẽw nãà zu. Ʋ tõ n nɩbɛ bɛ cen Eziptɩ tẽw kɛ́ bɛ tɩ zɛlɩ wie nɩ sojarɩ yaga. A sob nɛ na ɩ à à ŋá a, ʋ na tʋ̃ɔ́ na a? Ʋ na tʋ̃ɔ́ na cɩ̃ɛ ɛ? Ʋ̃ʋ'hʋ̃, ʋ kʋ̃ tʋ̃ɔ́ cɩ̃ɛ ɩ, ʋ na sãw a wõ-taa bɛr a zũú!

¹⁶Ɩ̃ pɔ n nɩ a ɩ̃ nyɔ-vʋʋrʋ yel, a mãa Sore Naaŋmɩn: A Ɩsɩrayɛl nãà na kpi n a Babɩlɔn nãà tẽw pʋɔ, ʋl na zɩɩlɩ ʋ a naalʋ-dà-kɔw zu a. Bʋ̃ʋ n'ʋ vɛ̃, ʋ bɛ tu a pɔb ʋ na tɩ pɔ a ɩ, ʋ sãw nɩ a wõ-taa bɛr. A na ɩ lɛ a, a Babɩlɔn tẽw n'a a Ɩsɩrayɛl nãà na kpi.

¹⁷A zɛbr-nɩbɛ saa yãwmɛ ɛ́ kpɛmɛ zɛ̃ ŋmɩn a, a Eziptɩ tẽw nãà kʋ̃ tʋ̃ɔ́ zɛb faa ʋ ɛ. Bʋ̃ʋ n'ʋ vɛ̃, a zɛbr daar a, a Eziptɩ tẽw dem na kaal'ɩ tanɛ ɓã taa a do a zɛbr ƴãw, ɛ́ bɛ wɛr bɔwrɩ kɛ́ bɛ tʋ̃ɔ́ kʋ a Babɩlɔn tẽw dem.

¹⁸Ʋ na bɛ tu a pɔb ʋ na tɩ pɔ a, a Ɩsɩrayɛl nãà sãw nɩ a wõ-taa bɛr. Ʋ tɩ ƴãw nɩ nʋɔr ɛ́ wa ɩ à à ŋá. A lɛ pʋɔ a, ʋ kʋ̃ cɩ̃ɛ ɩ!

¹⁹Ɩ̃ pɔ n nɩ a ɩ̃ nyɔ-vʋʋrʋ yere à ŋá, a mãa Sore Naaŋmɩn: A Ɩsɩrayɛl nãà bɛ tu a pɔb ʋ na tɩ pɔ a ɩ̃ niŋé a ɩ. Ʋ bɛ tu a wõ-taa ʋ na sàw maalɩ a ɩ̃ yúor ƴãw a ɩ. Alɛ n'a so ɩ̃ na ɩ ʋ ya a san.

²⁰Ɩ̃ na ƴãw ʋ nɩ bɛra nyɔw ʋ. Ɩ̃ na tɛr ʋ na cen nɩ a Babɩlɔn tẽw tɩ dɩ n ʋ ƴɛ̀rʋ ƴãw ʋ dɔwrʋ, ʋ na bɛ tu m ɛ́ lɛb pùor a zũú.

²¹A ʋ soja-yée na kpi n a zɛbr zie, ɛ́ a bɛl na na cãà vʋʋrɛ a na zɔ na yaarɩ a ziir za. Lɛ n'a nyɩ na bãw kɛ́ mãa n'ɩ a Sore na ƴɛ̀r a nyɩ zie a.»

²²«À ŋá n'a a mãa Sore Naaŋmɩn yere: Mãa mɩŋa na de nɩ wuli-pɔl[36] a sɛɛdɩr tɩɛ nyʋɔrɩ́, ɩ̃ na ka ʋ nɩ a ʋ wuli nyʋɔrɩ́ za zu. Ɩ̃ na sɛl ʋ nɩ tãw na kɛrɩ yaga yaga a zu.

²³Ɩ̃ na sɛl ʋ nɩ Ɩsɩrayɛl tãw na kɛrɩ a zu. Ʋ na vo n wuli, ʋ na wɔ̃ n bie, ʋ na lɩɛb'ɩ sɛɛdɩr tɩ-vla vla. Lili-bʋʋrɛ bʋʋrɛ na mɩ́ dɔm'ɩ a ʋ wuli zu ɛ́ nyɛ̃ sɔwlʋ zie a ɓaarʋ́.

²⁴Lɛ n'a a mʋ̃ɔ pʋɔ tɩɩr za na bãw kɛ́ mãa n'ɩ a Sore. Ɩ̃ mɩ́ siwr'ɩ a tɩɩr al na kɛrɩ a, ɛ́ ɩ a al na ɩ cãpili a, a kɛrɩ. Ɩ̃ mɩ́ ɩ n a tɩ-ɓaar a ko, ɛ́ ɩ a al na ko a, a tɛr puuru. A mãa Sore n'ʋ yel ɛ́ mɩ́ ɩ a lɛ ɩ̃ na yel a.»