Read Dagara, Northern Ezekɩɛl 19 Bible Online

Ezekɩɛl 19 - Dagara, Northern bible

Ezekɩɛl 19

¹A Sore tɩ yel mɛ̃ na k'ɩ̃ɩ kõ a lãw-mʋɔlɛ ŋa a càarɩ a Ɩsɩrayɛl nɩ-bɛrɛ:

²«A nyɩ mã tɩ ɩ n gbẽw-nyãw[39] na ta ʋl a gben bʋʋrɛ pʋɔ a! Ʋ tɩ gã nɩ a gben-pɔlɛ sɔgɔ, guole a ʋ bili.

³Ʋ sʋ̃ɔmɩ na wul a ʋ bile kãw. Ʋ na wa lɩɛbɩ gbẽw-pɔl a[40], ʋ zanɩ nɩ dʋ̃w taw-ɓɛlʋ ɛ́ tɩ 'wɔb nɩsaalbɛ.

⁴Nɩ-bʋʋr-yoru tɩ wõ na bɛ ƴɛ̀r a ʋ ƴɛ̀rʋ. Bɛ tɩ nyɔw ʋ nɩ bɛra pʋɔ, ƴãw ʋ bãw a nyɔbɔwrɩ́ cen nɩ Eziptɩ tẽw[41].

⁵A gbẽw-nyãw gù na, a tɩ cɛlɩ. Ʋ na tɩ nyɛ̃ k'aa ʋ tɩɛrʋ wɛ na a, ʋ tɩ de nɩ a ʋ bile kãw ɩ ʋ lɩɛbɩ gbẽw-pɔl-kpɛ̃w

⁶bɛ na guoli gben sɔgɔ a. Ʋ tɩ lɩɛb'ɩ gbẽw-pɔl mɩ̀ zanɩ dʋ̃w taw-ɓɛlʋ ɛ́ tɩ 'wɔb nɩsaalbɛ.

⁷Ʋ tɩ da n a bɛ dacine na piw a tẽw tɛr a lɔb, sãw a bɛ tẽ-bɛrɛ bɛr. Bɛlɛ wa wõ a ʋ ùoru a, a tẽw nɩbɛ mɩ́ màwr'ɩ dɛ̃bɩ̃-mawfʋ.

⁸Lɛ n'a nɩ-bʋʋr-yoru na tɩ yi ziir za wa a, tɩ ɓã taa a ʋ ƴãw. Bɛ tɩ ƴãw ʋ nɩ bɛra, ɛ́ ɩ ʋ lo a ʋ pʋɔ.

⁹Bɛ tɩ ƴãw ʋ nɩ kasow pʋɔ, 'lẽ ʋ nɩ bamɛ, ɛ́ tɩ tɛr ʋ cen nɩ a Babɩlɔn tẽw nãà zie. Bɛ tɩ ƴãw ʋ nɩ gaso pʋɔ k'aa nɩbɛ ta cãà wone a ʋ kɔkɔr, a Ɩsɩrayɛl tan zu ɛ.»

¹⁰«A nyɩ mã tɩ ŋmɛ̃ na mɛ̃ divɛ̃ tɩɛ[42] bɛ na sɛl kʋ̃ɔ nʋɔr a. Ʋ tɩ wɔnɛ nɩ wɔ̃-yaga ɛ́ tɩ tɛr va-yaga, ʋ na tɩ páwr kʋ̃ɔ yaga a ƴãw.

¹¹A wuli tɩ kpɛmɛ na, a wa lɩɛb'ɩ nãà-dabɔlɛ. Ʋ tɩ kɛrɩ na zuo a tɩɩr. Nɩr za tɩ nyɛ̃ ʋ na, a ʋ kɛrʋ nɩ a ʋ wuli za zũú.

¹²Ɛcɛ bɛ tɩ vʋ̃ɔ ʋ na nɩ suur, lɔb bɛr tẽw. A saa-pɛrɩ́ sɛsɛb tɩ ɩ n a ʋ wɔmɛ a ko suori lo. A ʋ wul-kpɛn tɩ ko na, bɛ nyɩw a bɛr.

¹³Ƴɛrɛŋa a, bɛ sɛl'ɩ a divɛ̃ tɩɛ ŋa wɛja-kpalɛ pʋɔ, tẽ-kõw na bɛ tɛr kʋ̃ɔ a pʋɔ.

¹⁴Vũu pur a yi a ʋ sɩɛmɩ́, a sãw nɩ a ʋ wuli nɩ a ʋ wɔmɛ bɛr. Ʋ bɛ cãà tɛr wul-kpɛ̃w na na tʋ̃ɔ́ lɩɛbɩ nãà-dabɔl a ɩ.» A yielu ŋa yiele na mɛ̃ lãw-mʋɔlɛ bɛ na kone a.