Read Dagara, Northern Ezekɩɛl 20 Bible Online

Ezekɩɛl 20 - Dagara, Northern bible

Ezekɩɛl 20

¹A diw-cenu pùorí yome ayopõi sob, a cuwr anũu sob bibie pie sob, a Ɩsɩrayɛl nɩ-kore bɛ mɩnɛ tɩ wa na wa zɩ̃ a ɩ̃ niŋé, kɛ́ bɛ sowri mɛ̃ bãw a Sore pʋ-tɩɛrʋ[43].

²Lɛ n'a a Sore tɩ yel mɛ̃:

³«A fʋ̃ʋ, nɩsaal bie, ƴɛ̀r a ƴɛ̀rʋ ŋa kʋ̀ a Ɩsɩrayɛl nɩ-kore a ɩ̃ yúor ƴãw: Nyɩ wa na kɛ́ nyɩ wa bãw a bom nɛ ɩ̃ na bɔbr a! Lɛ bɛ n'a ɩ? A na ɩ lɛ a, ɩ̃ pɔ n nɩ a ɩ̃ nyɔ-vʋʋrʋ, ɩ̃ kʋ̃ sàw nyɩ tɛr sowru a ɩ̃ zie ɩ, a mãa Sore Naaŋmɩn n'ʋ yel!

⁴Fʋ̃ʋ na ɩ nɩsaal tɛwr a, cɔbrɩ fʋ tʋɔra dɩ n bɛ ƴɛ̀rʋ, ta bʋ́nɛ ɩ. Lɛb sɩ̃w a bɛ sãàkʋm-kore ɩ-ɩrɩ na bɛ maal'ɩ wob a, a bɛ zie.

⁵Yel a lɛ a mãa Sore Naaŋmɩn na yere a kʋ̀ bɛ: A lɛn daar ɩ̃ na kaa ír a Ɩsɩrayɛl a, ɩ̃ ƴãw nɩ nʋɔr pɔ a nɩ-bʋʋrɛ bɛ ŋa nɩbɛ za zie. Ɩ̃ ɩ na bɛ bãw mɛ̃ a Eziptɩ tẽw, ɩ̃ zɛw nɩ nũu pɔ yel: “Mãa n'ɩ a Sore nyɩ Naaŋmɩn”.

⁶A ʋlɩ bibir nɛ a, ɩ̃ pɔ na yel bɛ k'ɩ̃ɩ na ƴãw na bɛ yi a Eziptɩ tẽw, ɩ̃ tɛr bɛ cen nɩ tẽw kãw ɩ̃ na nɛb kaa a bɛ ƴãw a. A ten za pʋɔ tẽ-vla vla za n'ʋ, tẽw bʋ̀rʋ nɩ sɩwr na gbɔlɛ a[44].

⁷Ɩ̃ yel'ɩ à ŋá kʋ̀ bɛ: “Ŋa za, ʋ zawrɩ a ŋmɩn-faar faar nyɩ na jɩ́rɛ a bɛr. Nyɩ ta ƴãw dɛwr nyɩ tʋɔra a Eziptɩ tẽw dem tɩbɛ maalʋ zũú ɛ. Mãa n'ɩ a Sore nyɩ Naaŋmɩn.”

⁸Ɛcɛ a nyɩ sãàkʋm-kore tɩ ìr'ɩ a ɩ̃ ƴãw, ɛ́ bɛ tɩ bɔbr kɛ́ bɛ bɛr wõ m ɛ. Kãw za bɛ tɩ bɛr a ŋmɩn-faar faar jɩ́rʋ ɛ, ɛ́ kãw za bɛ tɩ jɛ a Eziptɩ tẽw dem tɩbɛ bɛr ɛ. Tɩɛrʋ tɩ wa m'a k'ɩ̃ɩ bɛr a ɩ̃ su-yãyaar ʋ ìr a bɛ ƴãw, yɛ́r pàw bɛ a Eziptɩ tẽw tɔr za pʋɔ.

⁹Ɛcɛ a ɩ̃ yúor zũú n'a ɩ̃ bɛ ɩ a lɛ ɩ. Ɩ̃ bɛ tɩ bɔbr k'aa nɩ-bʋʋrɛ bɛl sɔgɔ a nyɩ sãàkʋm-kore na tɩ kpɩɛr a jewre mɛ̃ ɩ. Bʋ̃ʋ n'ʋ vɛ̃, a nɩ-bʋʋrɛ bɛ ŋa tɩ sɩrɩ na nyɛ̃ k'ɩ̃ɩ tɩ wul'ɩ ɩ̃ tʋɔra a Ɩsɩrayɛl nɩbɛ k'ɩ̃ɩ tʋ̃ɔ́ ɩ bɛ yi a Eziptɩ tẽw.

¹⁰Lɛ n'a so ɩ̃ tɩ ɩ bɛ yi a tẽw ŋa, ɩ̃ɩ tɩ tɛr bɛ cen nɩ a wɛja-kpalɛ pʋɔ.

¹¹Ɩ̃ tɩ kʋ̀ bɛ nɩ a ɩ̃ wulu, ɩ̃ tɩ wul bɛ nɩ a ɩ̃ nɛ́ɛ, ɛ́ a kʋ̀rɛ nɩ nyɔ-vʋʋrʋ a bɛlɩ dem na sàwr a a.

¹²Ɩ̃ mɩ̀ tɩ kʋ̀ bɛ nɩ a pɩ̃ɛnʋ-bibir. Bãwfʋ tɩ n'ʋ a mãa nɩ a bɛl cará, k'ɩ̃ɩ lɛb sɩ̃w a bɛ tɩɛrʋ k'aa mãa Sore, ɩ̃ ka n nũu ƴãw bɛ a ɩ̃ tome ƴãw.

¹³Ɛcɛ a Ɩsɩrayɛl nɩbɛ tɩ ìr'ɩ a ɩ̃ ƴãw a wɛja-kpalɛ pʋɔ. Bɛ bɛ sàw a ɩ̃ wulu ɛ, bɛ zawr'ɩ a ɩ̃ nɛ́ɛ bɛr. Ɛcɛ a kʋ̀rɛ nɩ nyɔ-vʋʋrʋ a bɛlɩ dem na sàwr a a. Gb'aa yaga za a, bɛ tɩ ɩ n a pɩ̃ɛnʋ-bibir la. Tɩɛrʋ tɩ lɛb'a wa m k'ɩ̃ɩ bɛr a ɩ̃ su-yãyaar ʋ ìr a bɛ ƴãw ɛ́ kʋ bɛ.

¹⁴Ɛcɛ a ɩ̃ yúor zũú n'a ɩ̃ bɛ tɩ ɩ a lɛ ɩ. Ɩ̃ bɛ tɩ bɔbr k'aa nɩ-bʋʋr-yoru jewre mɛ̃ ɩ. Bʋ̃ʋ n'ʋ vɛ̃, bɛ tɩ nyɛ̃ na k'ɩ̃ɩ tɩ ɩ n a nyɩ sãàkʋm-kore bɛ yi a Eziptɩ tẽw.

¹⁵Ɛcɛ a wɛja-kpalɛ pʋɔ a, ɩ̃ tɩ pɔ na yel bɛ k'ɩ̃ɩ kʋ̃ tɛr bɛ cen nɩ a tẽw ʋl ɩ̃ na tɩ kʋ̀ bɛ a pʋɔ ɩ. A ten za pʋɔ tẽ-vla vla za tɩ n'ʋ, tẽw bʋ̀rʋ nɩ sɩwr na gbɔlɛ a.

¹⁶Alɛ n'a so ɩ̃ kõ a nʋɔr ŋa: bɛ bɛ ŋmɛlɩ kaa a ɩ̃ nɛ́ɛ ɩ, bɛ bɛ tu a ɩ̃ wulu ɛ, bɛ ɩ n a pɩ̃ɛnʋ-bibir la. Bʋ̃ʋ n'ʋ vɛ̃, a bɛ socie tɩ cãà na tu a ŋmɩn-bɛlɛbɛlɛ bɛ lɛb pùor ɛ.

¹⁷Ɛcɛ a bɛ kʋ-pàw-pɛr ƴãw a, ɩ̃ tɩ zɔ n bɛ nɩbaalʋ yaga, ɛ́ bɛ ɩ bɛ kpi a wɛja-kpalɛ pʋɔ ɩ[45].»

¹⁸«A wɛja-kpalɛ pʋɔ a, ɩ̃ tɩ yel'ɩ a nyɩ sãàkʋm-kore bibiir: “Nyɩ ta sàwr a nyɩ sãà mɩnɛ wulu ɛ, nyɩ ta tuur a bɛ tub ɛ, nyɩ ta ƴãw nyɩ tʋɔra dɛwr pʋɔ a bɛ ŋmɩn-bɛlɛbɛlɛ maalʋ zũú ɛ.

¹⁹Mãa n'ɩ a Sore nyɩ Naaŋmɩn! Nyɩ sàwr a ɩ̃ wulu, ɛ́ tuur a ɩ̃ tub.

²⁰Nyɩ ɩ a pɩ̃ɛnʋ-bibir ɩ bibi-sõw a ɩ̃ ƴãw, tʋ̃ɔ́ wul a wõ-taa na lãw a nyɩɩm nɩ a mãa taa, ɛ́ mɩ́ lɛb sɩ̃w a nyɩ tɩɛrʋ kɛ́ mãa n'ɩ a Sore nyɩ Naaŋmɩn a.”

²¹Ɛcɛ a bɛ bibiir mɩ̀ tɩ ìr'ɩ a ɩ̃ ƴãw. Bɛ bɛ tɩ sàw a ɩ̃ wulu ɛ, bɛ bɛ tɩ tu a ɩ̃ tub ɛ. Ɛcɛ alɛ n'a kʋ̀rɛ a nyɔ-vʋʋrʋ a bɛlɩ dem na sàwr a a. Bɛ tɩ jewr'ɩ a pɩ̃ɛnʋ-bibir. Tɩɛrʋ tɩ wa m'a k'ɩ̃ɩ bɛr a ɩ̃ su-yãyaar ʋ ìr a bɛ ƴãw, yɛ́r pàw bɛ a wɛja-kpalɛ pʋɔ.

²²Ɛcɛ a ɩ̃ yúor zũú n'a ɩ̃ bɛ tɩ ɩ a lɛ ɩ. Ɩ̃ bɛ tɩ bɔbr k'aa nɩ-bʋʋr-yoru jewre mɛ̃ ɩ. Bʋ̃ʋ n'ʋ vɛ̃, bɛ tɩ nyɛ̃ na k'ɩ̃ɩ ɩ n a nyɩ sãàkʋm-kore bɛ yi a Eziptɩ tẽw.

²³A wɛja-kpalɛ pʋɔ a, ɩ̃ tɩ pɔ na yel bɛ k'ɩ̃ɩ na diw bɛ na yaarɩ nɩ-bʋʋr-yoru pʋɔ, tẽ-yoru pʋɔ.

²⁴Bʋ̃ʋ n'ʋ vɛ̃, bɛ bɛ tɩ tu a ɩ̃ nɛ́ɛ ɩ, bɛ bɛ tɩ ŋmɛlɩ kaa a ɩ̃ wulu ɛ, bɛ tɩ jewr'ɩ a pɩ̃ɛnʋ-bibir, bɛ tɩ bɛr'ɩ a bɛ sãàkʋm-kore ŋmɩn-bɛlɛbɛlɛ bɛlɩ nyɔw bɛ.

²⁵Ɩ̃ mɔ̃ mɩ̀ tɩ kʋ̀ bɛ nɩ wulu na bɛ vɩɛl a, nɩ wulu na bɛ tɩrɛ nyɔ-vʋʋrʋ a[46].

²⁶Ɩ̃ tɩ bɛr bɛ na bɛ ɩ dɛwr dem. Bʋ̃ʋ n'ʋ vɛ̃, bɛ tɩ cɔbr'ɩ de-kʋ̀b bome na tɩ fɛr bɛ bɛ kʋ a bɛ bidɛb-dan a. Ɩ̃ tɩ bɔbr'a kɛ́ dɛ̃bɩ̃ɛ kpɛ a bɛl mɩŋa a lɛ bɛ na tɩ ɩrɛ a zũú. Lɛ n'a bɛ tɩ bãw kɛ́ mãa n'ɩ a Sore.»

²⁷«A na ɩ à ŋá a, nɩsaal bie e, yel kʋ̀ a Ɩsɩrayɛl nɩbɛ a bom nɛ a mãa Sore Naaŋmɩn na yere a: A nyɩ sãàkʋm-kore mɩ̀ sãw mɛ̃ na bɛ tu a ɩ̃ pùor ɛ.

²⁸Ɩ̃ tɩ tɛr bɛ na cen nɩ a tẽw ʋl ɩ̃ na tɩ pɔ yel k'ɩ̃ɩ na kʋ̀ bɛ na a pʋɔ. A be a, bɛ tɩ nyɛ̃ nɩ a tãli nyɛɛ na ɩ tɩɩr na tɛr váar zimpiri zimpiri a, ɛ́ tɩ maalɩ a bɛ bagɛ. Bɛ tɩ ɩ n a ɩ̃ suur ìr nɩ a bʋ̃-kʋ̀rɩ, a de-kʋ̀b bome a nyũu na ɓãanɛ suur, nɩ a divɛ̃ de-kʋ̀b bɛ na tɩ dier tɩrɛ a.

²⁹Lɛ n'a ɩ̃ tɩ sowri bɛ: “A maalʋ-ziir á ŋá zie nyɩ na cere a, bʋ̃ʋ n'a?” A lɛn daar za n'a bɛ bʋɔlɛ a ziir á ŋá kɛ́ maalʋ-ziir.

³⁰A na ɩ lɛ a, yel kʋ̀ a Ɩsɩrayɛl nɩbɛ a bom nɛ a mãa Sore Naaŋmɩn na yere a: Ŋmɩŋmɩn za n'a! Nyɩ ɩrɛ na mɛ̃ a nyɩ sãàkʋm-kore a, nyɩ ƴãwnɛ nɩ nyɩ tʋɔra dɛwr ɛ́ ɩrɛ pɔw-yɛm ɩb maalɛ nɩ a bɛ tɩb-faar faar.

³¹A ƴɛrɛŋa mɩ̀ a, nyɩ na mɩ́ wa n a nyɩ bʋ̃-kʋ̀rɩ a, nyɩ na mɩ́ nyɩw a nyɩ bibiir maal'ɩ bàwr kʋ̀ a nyɩ ŋmɩn-bɛlɛbɛlɛ a, nyɩ ƴãwnɛ nɩ nyɩ tʋɔra dɛwr. Ɩsɩrayɛl nɩbɛ ɛ, a yele á ŋá pʋɔ a, nyɩ tɩɛr k'ɩ̃ɩ na sàw na nyɩ mɩ́ tɛr sowru a ɩ̃ zie e? Towtow! Ɩ̃ pɔ n nɩ a ɩ̃ nyɔ-vʋʋrʋ, ɩ̃ kʋ̃ sàw nyɩ tɛr sowru a ɩ̃ zie ɩ!

³²Nyɩ yel'a: Tɩ bɔbr'a kɛ́ tɩ ɩ mɛ̃ a nɩ-bʋʋr-yoru a, mɛ̃ a tẽ-yoru nɩbɛ a, tɩ bɔbr'a kɛ́ tɩ maalɛ tɩɩr nɩ kʋsɛbɛ. Ɛcɛ a lɛ nyɩ na tɩɛr'a kʋ̃ ɩ ɛ.

³³Ɩ̃ pɔ n nɩ a ɩ̃ nyɔ-vʋʋrʋ, a mãa Sore Naaŋmɩn n'ʋ yere, fãw n'a ɩ̃ na ɩ n, ɩ̃ na bɛr'ɩ a ɩ̃ su-tʋlʋ kpãkpã ʋ ìr, ɛ́ lɛ n'a ɩ̃ na dɩ naalʋ a nyɩ zu.

³⁴Ɩ̃ na ɩ na nyɩ yi a nɩ-bʋʋrɛ nɩ a ten sɔgɔ, a be nyɩ na tɩ yaarɩ be a. À à ŋá ƴãw a, ɩ̃ na wul nyɩ nɩ a ɩ̃ fãw za nɩ a ɩ̃ gãdaalʋ za, ɩ̃ɩ na nyɛ̃ nɩ nyɩ nɩ suur faa faa.

³⁵Ɩ̃ na tɛr nyɩ na cen nɩ wɛja-kpalɛ pʋɔ, zãá nɩ a nɩ-bʋʋr-yoru[47], ɛ́ a be a, tɩ na tɩ tori nɩ taa ɩ̃ɩ sowri nyɩ bom.

³⁶Ɩ̃ na sowri nyɩ nɩ bom mɛ̃ a koro za ɩ̃ na tɩ sowri bom a nyɩ sãàkʋm-kore a Eziptɩ tẽw wɛja-kpalɛ pʋɔ a. A mãa Sore Naaŋmɩn n'ʋ yere.

³⁷Ɩ̃ na fɛr nyɩ na nyɩ ɩ a ɩ̃ dʋn ɛ́ maal tɛr a wõ-taa na lãw mãa nɩ a nyɩɩm taa a.

³⁸Ɩ̃ na diw nɩ a bɛl na gaarɩ ɛ́ bɛ sàw a ɩ̃ nʋɔr a, a nyɩ pʋɔ. Ɩ̃ na ɩ na bɛ yi a ten al bɛ na kpɩɛr a, ɛcɛ bɛ kʋ̃ cen a Ɩsɩrayɛl tẽw pʋɔ ɩ. Lɛ n'a nyɩ na bãw kɛ́ mãa n'ɩ a Sore.

³⁹À ŋá n'a a mãa Sore Naaŋmɩn yere kʋ̀rɛ nyɩ, Ɩsɩrayɛl nɩbɛ ɛ: A nyɩ kãw za na tʋ̃ɔ́ na cen tɩ maalɛ a ʋ ŋmɩn-bɛlɛbɛlɛ! Ɛcɛ a pùorí a, a na ɩ n fɛrʋ kɛ́ nyɩ sàwr mɛ̃. Nyɩ kʋ̃ lɛb ɩrɛ a ɩ̃ yo-sõw laar, kʋ̀rɛ nɩ bʋ̃-kʋ̀rɩ a nyɩ ŋmɩn-bɛlɛbɛlɛ ɩ.

⁴⁰Bʋ̃ʋ n'ʋ vɛ̃, a Ɩsɩrayɛl nɩbɛ za, a bɛl za na be a tẽw pʋɔ a na maalɛ mɛ̃ na a ɩ̃ tãw-sõw zu, a Ɩsɩrayɛl tãw-kɛra zu. A mãa Sore Naaŋmɩn n'ʋ yel. A be a, ɩ̃ na tuor'a nyɔw nyɩ nɩ nɔ̃wfʋ, ɩ̃ɩ na sàw na de a bom nɛ za nyɩ na na ɩ ʋ ɩ sõw a ɩ̃ ƴãw a, a nyɩ bʋ̃-kʋ̀rɩ nɩ a nyɩ de-kʋ̀b bome pʋɔ bʋ̃-vla vla za.

⁴¹Mãa wa tɛr nyɩ yi n a nɩ-bʋʋrɛ nɩ a ten sɔgɔ, a be nyɩ na tɩ be a, ɛ́ mãa wa ɓã nyɩ taa baar'a, ɩ̃ na sàw na de a nyɩ de-kʋ̀b bome na ɓãanɛ suur a. Mãa wa ɩ à à ŋá a nyɩ zie a, ɩ̃ na wul'ɩ a nɩ-bʋʋr-yoru kɛ́ mãa n'ɩ a Naaŋmɩn-sɩza.

⁴²Ɩ̃ na lɛb'a tɛr nyɩ cen nɩ a Ɩsɩrayɛl tẽw pʋɔ, a tẽw ʋl ɩ̃ na pɔ k'ɩ̃ɩ na kʋ̀ n a nyɩ sãàkʋm-kore a. A lɛn daar a, nyɩ na bãw na kɛ́ mãa n'ɩ a Sore.

⁴³A be a, nyɩ na lɛb'a tɩɛrɩ a nyɩ koro za nyɔ-vʋʋrʋ nɩ a nyɩ ɩb za na ƴãw nyɩ a dɛwr pʋɔ a. A faa al za nyɩ na maalɩ a zũú, kɔkɔrʋ na lɛb'a ŋmɛlɩ ɩrɛ nyɩ.

⁴⁴Ɩsɩrayɛl nɩbɛ ɛ, ɩ̃ kʋ̃ yel k'aa nyɩ nyɔ-vʋʋrʋ nɩ a nyɩ ɩ-faar ƴãw ɛ, ɛcɛ ɩ̃ na ɩ n a nyɩ zie a fɛr kɛ́ nyɩ ƴãwnɛ mɛ̃. Lɛ n'a nyɩ na bãw kɛ́ mãa n'ɩ a Sore.» À ŋá n'a a Sore Naaŋmɩn yel.