Read Dagara, Northern Ezekɩɛl 22 Bible Online

Ezekɩɛl 22 - Dagara, Northern bible

Ezekɩɛl 22

¹A Sore tɩ yel mɛ̃ na:

²«A fʋ̃ʋ nɩsaal bie, cɔbrɩ fʋ tʋɔra dɩ n ƴɛ̀rʋ a Zerizalɛm na ɩ tẽ-kpɛ̃ɛ-nɩ-kʋrɛ a, ta bʋ́nɛ ɩ! Ɩ ʋ lɛb tɩɛrɩ bãw a ʋ ɩb na bɛ maal'ɩ wob a.

³Yel a lɛ a mãa Sore Naaŋmɩn na yere a kʋ̀ ʋ: Zerizalɛm i, a bɛlɩ dem na kpɩɛr a fʋ pʋɔ a kʋrɛ nɩ nɩbɛ ɛ́ cɔbrɛ a fʋ loba. Bɛ maalɛ nɩ ŋmɩn-bɛlɛbɛlɛ dasuli a bɛ ƴãw, ƴãw fʋ ɩ dɛwr sob.

⁴A zɩ̃ɩ fʋ na ɩ a cir a zũú a, fʋ ɩ n sãwna sob. A tɩbɛ fʋ na mɛ a zũú a, fʋ ɩ n dɛwr sob. Fʋ ɩ n à à ŋá ƴãw a fʋ kũu bibir taw pɩɛlɩ, fʋ ta n a fʋ yome nʋɔr kʋb zie. Alɛ n'a so ɩ̃ ɩ fʋ ɩ vĩ bom a nɩ-bʋʋrɛ niŋé, ɛ́ ɩ laarʋ bom a ten za zie.

⁵A fʋ yúor sãw na, fʋ na ɩ yel-faar tɛwr a ƴãw. Ɛ́ a tẽ-zãánɩ nɩ a tẽ-pɩɛlɩ na ɩrɛ fʋ na laar.

⁶A fʋ pʋɔ a, Zerizalɛm i, a Ɩsɩrayɛl nɩ-bɛrɛ pʋɔ a, ŋa za mɩ́ de nɩ a ʋ fãw kʋrɛ nɩ a ʋ taabɛ[51].

⁷A fʋ pʋɔ a, nɩbɛ ɩrɛ nɩ a bɛ sãà nɩ a bɛ mã laar, bɛ dɔwrɛ nɩ a nʋʋrɩ, bɛ nɛbr'ɩ a bi-kpebe nɩ a pɔw-kɔbɛ[52].

⁸Bɛ jewre nɩ a ɩ̃ bʋ̃-son, bɛ ɩ n a ɩ̃ pɩ̃ɛnʋ-bibie tɛr dɛwr.

⁹A fʋ pʋɔ a, bɛ mɩnɛ ŋmarɛ nɩ ziri ƴãwnɛ a bɛ mɩnɛ a bɛ kʋb ƴãw. A bɛlɩ dem na kpɩɛr a fʋ pʋɔ a dɩrɛ nɩ bàwr-maal bʋ̃-dɩrɩ a tan zu, ɛ́ vʋʋrɛ sãsaralɛ.

¹⁰Dɛbr bɛ mɩnɛ mɩ́ gã nɩ nɩ a bɛ sãà pɔw, bɩɩ mɩ́ fɛr gã nɩ a pɔwbɛ a bɛ sɩɛ-loba daar[53].

¹¹Bɛ mɩnɛ ganɛ nɩ nɩ a bɛ taabɛ pɔwbɛ, bɛ mɩnɛ mɩ́ fɛr'ɩ a bɛ bie-pɔw bɩɩ a bɛ yeepuule na ɩ a bɛ sãà pɔwyaa a gã nɩ bɛ.

¹²A fʋ pʋɔ a, Zerizalɛm i, nɩbɛ sàwr'ɩ bʋ̃-kʋ̀rɩ nɩbɛ kʋb ƴãw. Bɛ mɩ́ pɛ̃w nɩ libie gùre nɩ tɔnɛ yaga, bɛ mɩ́ nɛb'ɩ a bɛ tẽ-bi-taabɛ kpɛ naalʋ. Ɛ́ mãa a, bɛ yiiri mɛ̃ na bɛr a nʋɔr kʋ, a mãa Sore Naaŋmɩn n'ʋ yere.

¹³Ɛcɛ, Zerizalɛm nɩbɛ ɛ, ɩ̃ na zɛw nɩ nũu a nyɩ ƴãw, a nyɩ tɔnɛ na bɛ tu mɩnʋ nɩ a nɩbɛ nyɩ na kʋ a zũú.

¹⁴Nyɩ na tɛr'ɩ kanyir nɩ fãw a sɛw a ʋlɩ bibir nɛ ɩ̃ nãà wa ìr a nyɩ ƴãw a a? A mãa Sore n'ʋ ƴɛ̀rɛ, ɛ́ tuur a lɛ ɩ̃ na yel a.

¹⁵Ɩ̃ na diw nyɩ na yaarɩ nɩ-bʋʋr-yoru nɩ tẽ-yoru pʋɔ. Ɩ̃ na ɩ na a nyɩ ɩ-dɛgɛ za nʋɔr kʋ.

¹⁶A nɩ-bʋʋr-yoru niŋé a, nyɩ bɛ cãà tɛr yúor ɛ, a nyɩ sãwna zũú, ɛcɛ lɛ n'a nyɩ na bãw kɛ́ mãa n'ɩ a Sore.»

¹⁷A Sore tɩ yel mɛ̃ na:

¹⁸«A fʋ̃ʋ nɩsaal bie, bɛrɛ wone! A Ɩsɩrayɛl nɩbɛ lɩɛb'ɩ kur-bine. Bɛ ɩ na mɛ̃ salm-pla, kur-zɩɛ, kur-pla mɔrmɔr, kure bɩɩ kur-mɔrmɔr bine sãa-kpɩɛrɛ vũu-bɔw pʋɔ a[54].

¹⁹Alɛ n'a so a mãa Sore Naaŋmɩn yere à ŋá kʋ̀rɛ bɛ: Nyɩ za lɩɛb'ɩ kur-bine. A lɛ pʋɔ a, ɩ̃ na gbõ nyɩ nɩ taa a Zerizalɛm tẽw sɔwlɩsɔw.

²⁰Mɛ̃ a lɛ bɛ na mɩ́ gbõ salm-pla, kur-zɩɛ, kure, kur-pla mɔrmɔr nɩ kur-mɔrmɔr vũu-bɔw pʋɔ ɛ́ zuw a vũu ƴãw a pile a tʋ̃ɔ́ nyɩl a, lɛ mɩ̀ n'a ɩ̃ na ɓã nyɩ taa a ɩ̃ su-tʋlʋ kpãkpã pʋɔ ɛ́ ɩ nyɩ nyɩl.

²¹A Zerizalɛm pʋɔ tɔr za a, ɩ̃ na ɓã nyɩ nɩ taa ɛ́ pɛblɩ a ɩ̃ su-tʋlʋ kpãkpã vũu ƴãw nyɩ, ʋ ɩ nyɩ nyɩl mɛ̃ kure a.

²²Nyɩ na ŋmɛ̃ na mɛ̃ a salm-pla na nyɩlɛ a vũu pʋɔ a. Lɛ n'a nyɩ na bãw kɛ́ mãa n'ɩ a Sore na bɛr a ɩ̃ su-tʋlʋ kpãkpã ìr a nyɩ ƴãw a.»

²³A Sore tɩ yel mɛ̃ na:

²⁴«A fʋ̃ʋ nɩsaal bie, yel kʋ̀ a Ɩsɩrayɛl nɩbɛ k'aa bɛ tẽw ŋmɛ̃ na mɛ̃ tẽsɔw na bɛ páw saa a. Saa bɛ cɔ̀r ʋ a ɩ̃ suur bibir ɛ.

²⁵A bɛ nɩ-bɛrɛ ŋmɛ̃ na mɛ̃ wɛ-baar na ùore ɛ́ tawr a dʋ̃w a na nyɔw a ɓɛlɛ a. Bɛ kʋrɛ nɩ nɩbɛ, zure a bɛ taabɛ na-bome nɩ a bɛ tɛra, ɩrɛ a pɔw-kɔbɛ nʋɔr dɔwlɛ.

²⁶A bɛ bàwr-maalbɛ bɛ sàwr a ɩ̃ wulu, ɛ́ bɛ ƴãwnɛ a ziir bɛ na ɩ a ɩ son a ɩ̃ ƴãw a ɩ. Bɛ bɛ owre a bom na ɩ sõw nɩ a bom na bɛ ɩ sõw a ɩ. Bɛ bɛ zanɛ nɩ a nɩbɛ kɛ́ bɛ bãw bom na ɩ bʋ̃-vla nɩ bom na ɩ bʋ̃-dɛwr a ɩ. Bɛ ɩrɛ nɩ a pɩ̃ɛnʋ-bibir laar. Alɛ n'a so nɩr za bɛ ƴãwnɛ mɛ̃ a bɛ pʋɔ ɩ.

²⁷A nɩbɛ nɩ-bɛrɛ ɩ na mɛ̃ wɛ-baar na tawr a dʋ̃w a na nyɔw a ɓɛlɛ a. Bɛ kʋrɛ nɩ a nɩbɛ a bɛ tɛra zub ƴãw.

²⁸A bɛ naaŋmɩn-ƴɛ̀r-manbɛ bʋl'ɩ à á ŋá za pàw. Bɛ mɩ́ tɩɛr'ɩ bʋ̃-nyɛrɩ yel, ɛ́ manɩ yele na bɛ ɩ sɩza a. Bɛ mɩ́ yel'a: “À ŋá n'a a Sore Naaŋmɩn yere”. Ɛcɛ ɩ̃ bɛ ƴɛ̀r bɛ zie ɩ.

²⁹A tẽw pʋɔ a ziir za a, fãw nɩ po-to-fãw-ɩb'a a nɩbɛ ɩrɛ. Bɛ zure na, bɛ nɛbr'ɩ a nan dem nɩ a bãbàalbɛ, bɛ dɔwrɛ nɩ a nʋʋrɩ ɛ́ bɛ tuur a mɩnʋ ɛ[55].

³⁰Ɩ̃ bɔ n a bɛ pʋɔ nɩr na na ŋmãa dacĩ-kpɛ̃ɛ piw nɩ a tẽw a, nɩr na na gù a dacine a ɩ̃ niŋé a tẽw vla ƴãw, ɩ̃ taa sãwnɛ ʋ bɛrɛ a. Ɛcɛ ɩ̃ bɛ nyɛ̃ nɩr za ɩ.

³¹Lɛ n'a ɩ̃ tɩ ɩ a ɩ̃ su-tʋlʋ kpãkpã ìr a bɛ ƴãw. Ɩ̃ ɩ na bɛ bɔr a suur ŋa vũu pʋɔ, ɩ̃ ɩ na bɛ ya a bɛ ɩ-faar san. A mãa Sore Naaŋmɩn n'ʋ yel.»