Read Dagara, Northern Ezekɩɛl 24 Bible Online

Ezekɩɛl 24 - Dagara, Northern bible

Ezekɩɛl 24

¹A diw-cenu pùorí yome piwaɩ sob, a cuwr pie sob bibie pie sob, a Sore tɩ ƴɛ̀r'ɩ a ɩ̃ zie à ŋá:

²«A fʋ̃ʋ nɩsaal bie, sɛb a dɩ̃a bibir ƴãw sɛbɛ pʋɔ, bʋ̃ʋ n'ʋ vɛ̃, a dɩ̃a bibir tɔr za n'a a Babɩlɔn tẽw nãà tĩ zɛbr'ɩ a Zerizalɛm.

³Lɔb zʋkpar kʋ̀ a nɩ-bʋʋr-gaarɩ bɛ ŋa. Yel kʋ̀ bɛ kɛ́ à ŋá n'a a Sore Naaŋmɩn ƴɛ̀rɛ: “Cɔbrɩ daasɩ̃ɛ[59]. Paalɩ ʋ kʋ̃ɔ.

⁴De nɛ̃-gbile ƴãw a ʋ pʋɔ, a nɛ̃-bi-vɩɛlɩ vɩɛlɩ za: gbɛkpɛ̃ɛ nɩ bawŋman. Báa paalɩ ʋ nɩ a kɔbr-vɩɛlɩ vɩɛlɩ.

⁵De a píir na vɩɛl zuo a za a nɛn, sɩɛbɩ a daasɩ̃ɛ pɛr nɩ a kɔbɛ. Ɩ a ka tɩ pu, bʋ̃ʋ n'ʋ vɛ̃, a kɔbɛ mɩ̀ sɛw na k'aa bɩ.

⁶À ŋá n'a a mãa Sore Naaŋmɩn yere: Wahala wɛ, a tẽ-nɩ-kʋrɛ ƴãw! Ʋ ŋmɛ̃ na mɛ̃ daasɩ̃ɛ na lo bazɩ̃ɩ bɛ kʋ̃ tʋ̃ɔ́ pɛ́w a. Wɩl a nɛ̃-gbile za, been been, ɛ́ ta ŋmɛ gbãw kaa ír ɛ.

⁷A zɩ̃ɩ a Zerizalɛm na ɩ a cir a cãà na be a tẽ-kpɛ̃ɛ pʋɔ. Kʋsɛ-kpálɛ zu n'a bɛ ɩ a cir, a tẽsɔw bɛ nyũ a ɩ, ɛ́ nɩr bɛ ga tanɛ pàw a ɩ.

⁸Mãa a, ɩ̃ bɛr'ɩ a zɩ̃ɩ a kʋsɛ-kpálɛ zu, be a na kʋ̃ tʋ̃ɔ́ sɔwlɩ a, k'aa ɩ a ɩ̃ su-tʋlʋ kpãkpã ìr, ɛ́ ɩ ɩ̃ yaa a san.

⁹Sɩza, a mãa Sore Naaŋmɩn yere na: Wahala wɛ, a tẽ-nɩ-kʋrɛ ƴãw! Bʋ̃ʋ n'ʋ vɛ̃, ɩ̃ na gbɔw nɩ da-ŋmaarɛ vũu-kpɛ̃ɛ!

¹⁰De dàar gbõ taa, gbɔw a vũu, dʋw a nɛn a bɩ tɩ tɔ, ƴãw mɩɩla, ɛ́ bɛr a kɔbɛ a dɩ kab cʋmcʋm.

¹¹A pùorí, de a daasɩ̃ɛ dɔwlɩ a vũu-bie zu ʋ tʋ̃ɔ́ tʋl, a kure mʋ̃ɔ. Lɛ n'a a dɛwr na be a ʋ pʋɔ a na yi, ɛ́ a bazɩ̃ɩ dɩ kab.”

¹²Ɛcɛ à á ŋá za ɩ n zawla. A bazɩ̃ɩ á ŋá za bɛ bɔrɛ a vũumí ɛ.

¹³Zerizalɛm i, fʋ ɩ n dɛwr sob fʋ na bʋnɩ vʋʋrɩ sãsaralɛ a ƴãw. Ɩ̃ tɩ bɔbr'a k'ɩ̃ɩ ɩ fʋ vɩɛl, ɛcɛ fʋ bɛ sàw ɛ. A na ɩ lɛ a, fʋ kʋ̃ lɛb tʋ̃ɔ́ vɩɛl ɛ, ɛ́ gù a ɩ̃ su-tʋlʋ kpãkpã tɩ ìr a fʋ ƴãw.

¹⁴A mãa Sore n'ʋ yere, ɛ́ a na tu na. Ɩ̃ kʋ̃ lɛb pùor, ɛ́ kʋ̃ zɔ nɩbaalʋ ɛ. Ɩ̃ kʋ̃ yel kɛ́ mãa tɩ bãw kɛ́ lɛ bom kãw za ƴãw ɛ. Zerizalɛm i, ɩ̃ na dɩ n fʋ nɩ ƴɛ̀rʋ a fʋ nyɔ-vʋʋrʋ nɩ a fʋ ɩb ƴãw. A mãa Sore Naaŋmɩn n'ʋ yere.»

¹⁵A Sore tɩ yel mɛ̃ na:

¹⁶«A fʋ̃ʋ nɩsaal bie, ɩ̃ na ùr'a ír a sob nɛ fʋ na mɩ́ nyɛ̃ nʋ̃ɔ̀ ɩrɛ fʋ a. Ɛcɛ fʋ kʋ̃ maalɩ a ʋ kuor ɛ, fʋ kʋ̃ tɛr a 'woi 'woi ɛ, ɛ́ kʋ̃ kõ ɩ.

¹⁷Taa wule a fʋ kpɩɛrʋ ɛ, taa tuur a ko-tuolu tub ɛ. Ɛcɛ, 'lẽ a fʋ zu-pɛn-vila, ƴãw a fʋ nafawrɩ. Taa pàwr a fʋ niwn, ɛ́ taa dɩrɛ a kuor bʋ̃-dɩrɩ ɛ[60].»

¹⁸Ɩ̃ tɩ ƴɛ̀r'ɩ a nɩbɛ zie a biɓaara, ɛ́ a zaanʋɔra a ɩ̃ pɔw kpi. A bio daarɩ́ biɓaara a, ɩ̃ tɩ ɩ n a lɛ a Sore na tɩ yel kʋ̀ m a.

¹⁹A nɩbɛ tɩ sowri mɛ̃ na k'ɩ̃ɩ man a ɩ̃ ɩb pɛr kʋ̀ bɛ.

²⁰Ɩ̃ tɩ sɔw bɛ na: «À ŋá n'a a Sore tõ m k'ɩ̃ɩ yel kʋ̀ nyɩ,

²¹a nyɩɩm Ɩsɩrayɛl nɩbɛ: “A mãa Sore Naaŋmɩn, ɩ̃ na bɛr'a bɛ dɛw a ɩ̃ zi-sõw bɛr. Ɛcɛ, ʋ ɩ n a nyɩ dɛpaal bom, ʋ ɩ n a nyɩ mimie nʋ̃ɔ̀, ɛ́ ɩ a nyɩ nyɔ-vʋʋrʋ tɩɛrʋ bom. Bɛ na kʋ n a nyɩ bidɛbr nɩ a nyɩ pɔwyaar nyɩ na bɛr a Zerizalɛm a nɩ zɛbr-sɔ-kpɛ̃ɛ.

²²Lɛ n'a nyɩ na ɩ mɛ̃ a Ezekɩɛl a. Nyɩ kʋ̃ pàw a nyɩ niwn ɛ́ kʋ̃ dɩ a kuor bʋ̃-dɩrɩ ɛ.

²³Nyɩ na tɛr'ɩ a nyɩ zu-pɛn-vili a zũú ɛ́ ƴãw a nyɩ nafawrɩ. Nyɩ kʋ̃ kõ a kuor ɛ́ kʋ̃ tɛr a 'woi 'woi ɛ.

²⁴A Ezekɩɛl ɩ n bãwfʋ a nyɩ zie. Nyɩ na ɩ n a lɛ tɔr za ʋ na ɩ a. Ɛ́ a yele wa ta a, nyɩ na bãw na kɛ́ mãa n'ɩ a Sore Naaŋmɩn.”»

²⁵Ɛcɛ a fʋ̃ʋ nɩsaal bie, bɛrɛ wone: «bibir kãw, ɩ̃ na de nɩ a zi-sõw na ɩ a bɛ sɔwlʋ zie, a bɛ mimie nʋ̃ɔ̀, a bɛ dɛpaalʋ bom nɩ a bɛ tɩɛrʋ a, ɛ́ bɛr bɛ. Ɩ̃ mɩ̀ na de nɩ a bɛ bidɛbr nɩ a bɛ pɔwyaar.

²⁶A ʋlɩ bibir nɛ a, nɩr na cɩ̃ɛ a na wa na wa man a yele kʋ̀ b.

²⁷A ʋlɩ bibir nɛ a, a nɩr na cɩ̃ɛ a waa na ɩ n a fʋ zɛl ʋ cɛ̀r. Fʋ na ƴɛ̀rɛ na, fʋ kʋ̃ cãà ɩ a ɓil ɛ. Fʋ na ɩ n bãwfʋ a bɛ zie. Lɛ n'a bɛ na bãw kɛ́ mãa n'ɩ a Sore Naaŋmɩn.»