Read Dagara, Northern Ezekɩɛl 28 Bible Online

Ezekɩɛl 28 - Dagara, Northern bible

Ezekɩɛl 28

¹A Sore tɩ yel mɛ̃ na:

²«A fʋ̃ʋ nɩsaal bie, yel a ƴɛ̀rʋ ŋa a mãa Sore Naaŋmɩn na yere kʋ̀rɛ a Tɩ́ɩ̀r tẽw nãà a kʋ̀ ʋ: A fʋ socir tɩ ɩ n pɔ̀lʋ̀ tɛwr fʋ yel: “Ɩ̃ ɩ n naaŋmɩn. Ɩ̃ tɛr'ɩ zie na sɛw taa nɩ ŋmɩmɛ tɛrʋ a, a kʋ̃ɔ-bɛrɛ sɔgɔ.” Fʋ tɩɛrɛ kɛ́ fʋ zɛ̃ n naaŋmɩn, ɛcɛ nɩsaal tɛwr nɛ b, fʋ bɛ ɩ naaŋmɩn ɛ!

³Fʋ tɩɛrɛ kɛ́ fʋ tɛr'ɩ yã-bãwfʋ zuo a Danɩɛl[67], ɛ́ na tʋ̃ɔ́ bãw a yel-sɔwlɩ nɩr na kʋ̃ tʋ̃ɔ́ bãw tɩ ɓɩɩlɩ a.

⁴A fʋ tome bãwfʋ nɩ a fʋ yã-bãwfʋ zũú a, fʋ páw nɩ naalʋ, fʋ gbõ n salm-zɩɛ nɩ salm-pla taa a fʋ na-bome pʋɔ.

⁵A fʋ bãwfʋ a yɛ̀rʋ́ pʋɔ na ɩ kpɛ̃ɛ a zũú, fʋ ɩ na a fʋ naalʋ dɔwlɩ, ɛ́ a tɛra á ŋá ɩ na a fʋ socir ɩ pɔ̀lʋ̀ tɛwr.

⁶À na ɩ à ŋá a, à ŋá n'a a mãa Sore Naaŋmɩn yere: Fʋ tɩɛrɛ kɛ́ fʋ zɛ̃ n naaŋmɩn.

⁷À à ŋá ƴãw a, ɩ̃ na ɩ n a nɩ-bʋʋr-sãanbɛ bɛl na kpɛmɛ zuo bɛ za a, bɛ wa a fʋ ƴãw. Bɛ na sãw nɩ a fʋ yã-bãwfʋ bʋ̃-vɩɛlɩ za bɛr nɩ zɛbr-sɔ-kpɛ̃ɛ, bɛ na ɩ n a fʋ yúor na yi a la.

⁸Bɛ na ɩ na fʋ siw a yàa-bɔw pʋɔ, fʋ na kpi n zɛbr-sɔ-kpɛ̃ɛ kũu a kʋ̃ɔ-kpɛ̃ɛ sɔwlɩsɔw.

⁹A bɛlɩ dem na na kʋ b a niŋé a, fʋ na cãà na yere kɛ́ fʋ ɩ n naaŋmɩn ɩ? Fʋ na ɩ n nɩsaal tʋ̃tʋba, ɛ́ kʋ̃ ɩ naaŋmɩn a bɛlɩ dem na na kʋ b a niŋé ɩ.

¹⁰Fʋ na kpi n yɔ-ɓile dem kũu nɩ-sãanbɛ nuru pʋɔ. A mãa Sore Naaŋmɩn n'ʋ ƴɛ̀rɛ, ɛ́ a lɛ n'a ɩ̃ yel.»

¹¹A Sore tɩ lɛb'a yel mɛ̃:

¹²«A fʋ̃ʋ nɩsaal bie, kõ lãw-mʋɔlɛ ƴãw a Tɩ́ɩ̀r tẽw nãà. Yel ʋ: À ŋá n'a a Sore Naaŋmɩn ƴɛ̀rɛ: “Fʋ tɩ ɩ n vɩɛlʋ na sɛw nɩ cɔwrʋ a, fʋ tɩ ɩ n yã-bãwfʋ tɛwr ɛ́ pɔ̀l bɛ cɛ ɩ.

¹³Fʋ tɩ kpɩɛr'ɩ Edɛn[68], a Naaŋmɩn zaadɛ̃ pʋɔ, ɛ́ kʋsɛ-bi-nyɩlɩ pɛ-bʋʋrɛ za tɩ viir'a koli fʋ: iribi, topaazʋ nɩ dɩamã, kirizolitɩ, konalin nɩ zasɩpʋ, safɩɩr, girena nɩ emerodɩ. Fʋ mɩ́ tɩ ƴãw nɩ salm-zɩɛ pɩ̃ɛm-pɛ-bʋʋrɛ za bɛ na cɔbrɩ a fʋ íru bibir a.

¹⁴Ɩ̃ tɩ ƴãw nɩ seribɛ̃ na bɛ dɩ vuo a ʋ pɩɛlɩ fʋ, gùre fʋ. Fʋ tɩ kpɩɛr'ɩ a ɩ̃ tãw-sõw zu, fʋ tɩ cɔlɛ nɩ a vũu-bie sɔgɔ.

¹⁵A fʋ íru daar za a, a fʋ ɩb tɩ vɩɛl'a bɛ cɛ ɩ, ɛ́ gù bɛ wa tɩ nyɛ̃ a faa a fʋ zie.

¹⁶A fʋ yɛ̀rʋ́ do n saa. A ƴãw fʋ nɩ po-to-fãw-ɩb ƴãw, ɛ́ fʋ maalɩ faa. Lɛ so, ɩ̃ diwr fʋ nɩ a ɩ̃ tãw zu, ɛ́ siwre fʋ manɛ taa nɩ a nɩbɛ za. A seribɛ̃ na gùre fʋ a diwr fʋ na zãánɛ nɩ a vũu-bi-cõcole sɔgɔ.

¹⁷A fʋ socir ɩ n pɔ̀lʋ̀ tɛwr a fʋ vɩɛlʋ zũú. A fʋ na ɩ nɩr, a sãá daadaa a, a ɩ na fʋ jɩɩrɩ zu. Alɛ n'a so ɩ̃ lɔbr fʋ bɛrɛ tẽsɔw, ɛ́ wule a fʋ ŋmɛ̃a a na-mɩnɛ bɛl na cɛ a.

¹⁸Fʋ maal'ɩ sãwna yaga. Fʋ ɩ n libelibe-ɩb a fʋ yɛ̀rʋ́ bome kʋɔrʋ pʋɔ, ɛ́ à ŋá n'a fʋ dɛw a fʋ maalʋ-ziir bɛr. Alɛ n'a so ɩ̃ ƴãwnɛ vũu na na dɩ b sãw bɛr a, a fʋ tẽ-kpɛ̃ɛ pʋɔ. Ɩ̃ na ɩ na fʋ ɩ tãpɛlʋ a bɛlɩ dem za na jɩ́rɛ fʋ a mimirí.

¹⁹A nɩ-bʋʋrɛ bɛl za na bãw fʋ a na be n pʋ-sãwna kpɛ̃ɛ pʋɔ a fʋ ƴãw. Fʋ na ƴãwnɛ nɩ a nɩbɛ za dɛ̃bɩ̃ɛ, fʋ na sãw na a nʋɔr kʋ.”»

²⁰A Sore tɩ yel mɛ̃ na:

²¹«A fʋ̃ʋ nɩsaal bie, lɩɛb a fʋ niwn cɔw a Sɩdɔ̃ tẽ-kpɛ̃ɛ ɛ́ ƴɛ̀r a ʋ ƴãw a ɩ̃ yúor ƴãw.

²²Yel a lɛ a mãa Sore Naaŋmɩn na yere a kʋ̀ ʋ: Ɩ̃ na ɩ b'a, Sɩdɔ̃ i! À ŋá a, ɩ̃ na wul'ɩ a ɩ̃ yúor-vɩɛlʋ-danʋ a tẽ-kpɛ̃ɛ sɔwlɩsɔw. Ɩ̃ na ɩ n a fʋ ƴãw a lɛ ɩ̃ na yel a. Ɛ́ a nɩbɛ za na bãw na kɛ́ mãa n'ɩ a Sore. À à ŋá n'a ɩ̃ na wul kɛ́ mãa n'ɩ a Naaŋmɩn na ɩ sõw a.

²³Ɩ̃ na ɩ n jɛ̀lmɛ̃ bàalʋ na nyɔwr nɩbɛ lʋɔrɛ taa a, ʋ wa a fʋ ƴãw, ɛ́ zɩ̃ɩ na gbɔlɛ nɩ a fʋ sɛ́ɛ pʋɔ. A fʋ dɔ̃ dem na zɛbr'ɩ fʋ nɩ a lõbowe za, ɛ́ a bɛlɩ dem na kpɩɛr a fʋ pʋɔ a na lo n yaga a tẽ-kpɛ̃ɛ sɔwlɩsɔw. Lɛ n'a a nɩbɛ za na bãw kɛ́ mãa n'ɩ a Sore.»

²⁴«A nɩ-bʋʋrɛ na pɩɛlɩ a, bɛ been kãw za kʋ̃ lɛb ɩ a Ɩsɩrayɛl nɩbɛ la ɩ. Bɛ kʋ̃ cãà ɩ a ʋ zie mɛ̃ gɔ-tuw na cɔ̀rɛ ɛ́ tawr cɩɛrɛ a ɩ. Lɛ n'a a nɩbɛ za na bãw kɛ́ mãa n'ɩ a Sore.

²⁵A mãa Sore Naaŋmɩn yere na: Ɩ̃ na ɩ n a Ɩsɩrayɛl nɩbɛ bɛ yi a nɩ-bʋʋrɛ bɛl sɔgɔ ɩ̃ na diw bɛ yaarɩ a, lɛb wa ɓã taa, ɛ́ à à ŋá n'a ɩ̃ na wul a nɩ-bʋʋrɛ bɛl na cɛ a, kɛ́ mãa n'ɩ a Naaŋmɩn na ɩ sõw a. A Ɩsɩrayɛl nɩbɛ na kpɩɛr'ɩ a bɛ tẽw, a ʋl ɩ̃ na kʋ̀ a ɩ̃ tõ-tõ-bie Zakɔb a.

²⁶Bɛ na vʋʋrɛ nɩ a be nɩ ƴã-ɓaarʋ, bɛ na mɛ n yie ɛ́ sɛl divɛ̃ tɩɩr. Bɛ na vʋʋrɛ nɩ nɩ ƴã-ɓaarʋ, bʋ̃ʋ n'ʋ vɛ̃, ɩ̃ na dɔwr'ɩ a bɛ kpɛ-pɩɛl dem za nãà wa ɩ bɛ la a. Lɛ n'a bɛ na bãw kɛ́ mãa n'ɩ a Sore, a bɛ Naaŋmɩn.»