Read Dagara, Northern Ezekɩɛl 31 Bible Online

Ezekɩɛl 31 - Dagara, Northern bible

Ezekɩɛl 31

¹A diw-cenu pùorí yome pie nɩ been sob, a cuwr ata sob bibi-dãw-niwn sob daar, a Sore tɩ yel mɛ̃ na:

²«A fʋ̃ʋ nɩsaal bie, nyɛ̃ a lɛ fʋ na na yel kʋ̀ a Eziptɩ tẽw nãà, Faarawɔ̃, nɩ a nɩ-bʋʋr-yaga ʋ na kaarɛ a: Bʋ̃ʋ n'ʋ ɩ̃ na de fʋ manɩ nɩ, fʋ̃ʋ a fãw na sɛw à ŋá za a?

³Fʋ ŋmɛ̃ na taa nɩ a Libã tẽw sɛɛdɩr tɩɛ a wul-vɩɛlɩ vɩɛlɩ na tɩ tɩrɛ ɓaarʋ vla vla a, sɛɛdɩr tɩɛ na kɛrɩ kɛrɩ za, a nyʋɔr tɩ tɔ a zũzuwe a.

⁴A saa tɩ ɩ na ʋ baa. Bàa na be a tẽsɔw pʋ̃ɔmɩ a tɩ ɩ na ʋ kɛrɩ do saa. A kʋ̃ɔ tɩ jil'a koli a ʋ nyɩgɛ, ɛ́ tɩ gbɔlɛ wɩɛr a wɩ̀ɛ pʋɔ tɩɩr zie.

⁵A kʋ̃ɔ yaga á ŋá zũú a, ʋ tɩ kɛrɩ na zuo a wɩ̀ɛ pʋɔ tɩɩr za. A ʋ wuli tɩ yãwmɛ na ɛ́ wõwme.

⁶A lili za tɩ wóbr'ɩ a cowr a ʋ wuli zu, a wɛ-dʋn za tɩ dɔwr'ɩ a ʋ wuli pile, ɛ́ nɩ-bʋʋr-yaga tɩ kpɩɛr a ʋ ɓaarʋ́.

⁷Tɩ-vla vla tɩ n'ʋ, ʋ tɩ kɛrɩ na ɛ́ ta, a ʋ wuli tɩ yɛ́r'ɩ yaga. Bʋ̃ʋ n'ʋ vɛ̃, a ʋ nyɩgɛ tɩ kpɛ n tẽsɔw na paalɩ kʋ̃ɔ a pʋɔ.

⁸A Naaŋmɩn zaadɛ̃[73] pʋɔ a, sɛɛdɩr tɩɛ kãw za bɛ tɩ ŋmɛ̃ taa nɩ ʋ ɛ, sɩpɩrɛ tɩɛ kãw za bɛ tɩ tɛr wuli a maal vɩɛl a lɛ ɩ, tɩɛ kãw za bɛ tɩ tɛr ɓaarʋ man ʋ ɛ, tɩɛ kãw za bɛ tɩ vɩɛl ta ʋ ɛ.

⁹Ɩ̃ tɩ kʋ̀ ʋ nɩ wuli na vɩɛl vɩɛl a, lɛ so a Edɛn tɩɩr za, a Naaŋmɩn zaadɛ̃ pʋɔ, tɩ nyùur'ɩ ʋ.»

¹⁰A na ɩ à ŋá a, à ŋá n'a a mãa Sore Naaŋmɩn yere: «A sɛɛdɩr tɩɛ baa na, ʋ kɛrɩ na do tɩ tɔ a zũzuwe ɛ́ ɩrɛ pɔ̀lʋ̀.

¹¹Alɛ n'a so ɩ̃ jɛ ʋ bɛr, ɛ́ ƴãw ʋ a tẽ-daa za nãà[74] na kpɛmɛ zuo bɛ za a nuru pʋɔ. A sob ŋa na ɩrɛ ʋ na tu n a faa ʋ na maalɩ a.

¹²Nɩ-sãanbɛ, a bɛl na kpɛ po-tuo zuo a nɩ-bʋʋrɛ za a, cɛ ʋ na lɔb bin bɛr a be. A ʋ wuli za kár'a lo. A pàw nɩ a tẽw tan nɩ a fʋɔlɩ. A nɩ-bʋʋrɛ nɩbɛ za na tɩ kpɩɛr a ʋ ɓaarʋ́ a bɛr ʋ na ɛ́ jɛ a tẽw bɛr.

¹³A lili za zɩnɛ nɩ a sɩɛ bɛ na cɛ a zu, ɛ́ a wɛ-dʋn za nɛbr a ʋ wuli.

¹⁴A ɩ n à à ŋá kɛ́ tɩɛ za na páwr kʋ̃ɔ ɛ́ tɛr'a yaga a, ta tʋ̃ɔ́ lɛb kɛrɩ do tɩ tɔ a zũzuwe, ɛ́ ɩrɛ pɔ̀lʋ̀ a ʋ kɛrʋ zũú ɛ. Bʋ̃ʋ n'ʋ vɛ̃, a tɩɩr bɩɩ a nɩsaalbɛ za na kpi n bibir kãw. Bɛ na siw na kpɛ tẽw lãwnɩ a bɛl na siw a yaa-bɔw pʋɔ a.

¹⁵À ŋá n'a a mãa Sore Naaŋmɩn yere: A ʋlɩ bibir nɛ a sɛɛdɩr tɩɛ na na cen a kpɩmɛ tẽw a, ɩ̃ na ɩ n a wɛja za be ko-tuolu pʋɔ. A sɛɛdɩr tɩɛ zũú a, ɩ̃ na diw nɩ a bàa na be a tẽsɔw pʋ̃ɔmɩ a gbɔlʋ bɛr, ɩ̃ na ɩ n a ʋ mamɛ a tɛw àr, ɩ̃ɩ bɩw a kʋ̃ɔ yaga yaga. A ʋ zũú a, a Libã tẽw tan na liw na, ɛ́ a wɩ̀ɛ pʋɔ tɩɩr za ko.

¹⁶A lɛn daar ɩ̃ na na ƴãw a tɩɛ ŋa ʋ siw a kpɩmɛ tẽw nɩ a bɛl na be a yaa-bɔw pʋɔ a, a nɩ-bʋʋrɛ na na wõ ʋ lo a na màwr'ɩ dɛ̃bɩ̃-mawfʋ. A tẽw pʋ̃ɔmɩ a, a Edɛn tɩɩr za, a Libã tẽw tɩ-vɩɛlɩ vɩɛlɩ nɩ a tɩɩr al bɛ na cɔ̀r vla zuo a za a na cɩlɛ na.

¹⁷A al mɩ̀ na lãw na siw nɩ a sɛɛdɩr tɩɛ a kpɩmɛ tẽw lãwnɩ a zɛbr nɩ-kũuni. A sõw ʋ na ɛ́ vʋʋrɩ a ʋ kpɛnʋ ɓaarʋ́ a nɩ-bʋʋrɛ sɔgɔ.

¹⁸A Edɛn zaadɛ̃ pʋɔ a, tɩɛ kãw za bɛ tɩ vɩɛl ɛ́ kɛrɩ ta b ɛ. Ɛcɛ, ɩ̃ na ɩ na fʋ lãw siw nɩ a tɩɩr á ŋá a kpɩmɛ tẽw. A be a, fʋ na tɩ lãw na gã nɩ a yɔ-ɓile dem nɩ a zɛbr nɩ-kũuni. À à ŋá n'a a na ɩ a Eziptɩ tẽw nãà nɩ a ʋ nɩ-bʋʋrɛ za ƴãw. A mãa Sore Naaŋmɩn n'ʋ yel.»