Read Dagara, Northern Ezekɩɛl 32 Bible Online

Ezekɩɛl 32 - Dagara, Northern bible

Ezekɩɛl 32

¹A diw-cenu pùorí yome pie nɩ ayi sob, a cuwr pie nɩ ayi sob bibi-dãw-niwn sob daar, a Sore tɩ ƴɛ̀r'ɩ a ɩ̃ zie à ŋá:

²«A fʋ̃ʋ nɩsaal bie, ŋmãa lãw-mʋɔlɛ a Eziptɩ tẽw nãà, Faarawɔ̃, ƴãw: “Fʋ ŋmɛ̃ na mɛ̃ gbẽw-pɔl a, a nɩ-bʋʋrɛ sɔgɔ. Ɛcɛ fʋ mɩ̀ ɩrɛ na mɛ̃ ɩba na be kʋ̃ɔ-kpɛ̃ɛ pʋɔ a. Fʋ damnɛ nɩ fʋ tʋɔra a fʋ man pʋɔ, fʋ dɛwr ʋ na bɛrɛ nɩ a fʋ gbɛ́ɛ, fʋ ɓʋɔlɛ nɩ a ʋ kʋ̃ɔ.

³À ŋá n'a a Sore Naaŋmɩn yere: A lɛn daar nɩ-bʋʋr-yaga wa ɓã taa a, ɩ̃ na lɔb'ɩ a ɩ̃ mɩ̃ɛ pàw fʋ, ɛ́ bɛ na taw fʋ na wa n a kõkowrí a ɩ̃ mɩ̃ɛ pʋɔ.

⁴Ɩ̃ na lɔb fʋ na bɛr tẽw, a póru sɔwlɩsɔw. Lɛ n'a a lili za na siw a fʋ zu, ɛ́ a wɛ-dʋn za 'wɔb a fʋ ƴã-gã-nɛn.

⁵Ɩ̃ na yaar'ɩ a fʋ ƴã-gan pʋɔrʋ a tan zu, ɛ́ paalɩ a a fʋɔlɩ.

⁶Ɩ̃ na cɔr'ɩ a tẽw nɩ a fʋ zɩ̃ɩ. A na pàw nɩ a tan ɛ́ paalɩ a fʋɔlɩ.

⁷A fʋ nyɔ-vʋʋrʋ wa baarɩ a lɛn daar a, ɩ̃ na ɩ n a salom ʋ liw, ɩ̃ na piw nɩ a ŋmar-bie cãà, ɩ̃ na ɩ n zũzuwe pàw a mʋ̃tɔ̃w ɛ́ a cuw kʋ̃ cãà tɛr cãà ɩ.

⁸A fʋ̃ʋ zũú a, ɩ̃ na kpiir'ɩ a salom cãà za bɛr, ɛ́ ɩ a fʋ tẽw ʋ be lige pʋɔ. A mãa Sore Naaŋmɩn n'ʋ yere.

⁹Nɩ-bʋʋr-yaga socie na dam'ɩ a lɛn daar ɩ̃ nãà wa ɩ a fʋ sãw-bɛrʋ yele yi tɩ ta a ten al fʋ na bɛ bãw a.

¹⁰A fʋ̃ʋ zũú a, nɩ-bʋʋr-yaga na tɛr'ɩ pʋ-sãwna. Dɛ̃bɩ̃ɛ na nyɔw nɩ a bɛ na-mɩnɛ ɩ̃ nãà wa zɛw a ɩ̃ zɛbr-sɔ-kpɛ̃ɛ a bɛ niŋé a. A fʋ loba bibir a, bɛ kʋ̃ bɛr a mawfʋ ɛ, ŋa za na mɩ́ zɔrɛ nɩ dɛ̃bɩ̃ɛ a ʋ nyɔ-vʋʋrʋ ƴãw.

¹¹À ŋá n'a a Sore Naaŋmɩn yere: A Babɩlɔn tẽw nãà zɛbr-nɩbɛ na lo n a fʋ zu.

¹²Ɩ̃ na tõ n a sojarɩ bɛl na kpɛ po-tuo zuo a bɛ za a, bɛ wa kʋ a bɛlɩ dem za na kpɩɛr a fʋ pʋɔ a. Bɛ na sãw nɩ a Eziptɩ tẽw na ɩrɛ a pɔ̀lʋ̀ a bɛr, ɛ́ kʋ a ʋ nɩ-bʋʋrɛ za pàw pɛr.

¹³Ɩ̃ na kʋ n a dʋn za fʋ na tɛr a Nɩl nʋɔr a. A nɩbɛ gbɛ́ɛ bɩɩ a dʋn nafɩlɛ kʋ̃ lɛb ɓʋɔlɩ a ʋ kʋ̃ɔ ɩ.

¹⁴Ɩ̃ na bɛr'ɩ a ʋ kʋ̃ɔ a pɩ̃ɛnɩ, ɩ̃ɩ ɩ a bàrʋ kʋ̃ɔ a gbɔlɛ zoom zoom mɛ̃ kãá a. A mãa Sore Naaŋmɩn n'ʋ yere.

¹⁵Ɩ̃ na ɩ n a Eziptɩ tẽw lɩɛbɩ wɛja-kpalɛ. Ɩ̃ na ír'ɩ bom nɛ za ʋ na tɛr a, ɛ́ kʋ a bɛlɩ dem za na kpɩɛr a ʋ pʋɔ a pàw pɛr. Lɛ n'a bɛ na bãw kɛ́ mãa n'ɩ a Sore.”

¹⁶A lãw-mʋɔlɛ ŋa n'ʋ a nɩ-bʋʋrɛ za pɔwbɛ na ŋmãa a Eziptɩ tẽw nɩ a ʋ nɩ-yaga ƴãw. A mãa Sore Naaŋmɩn n'ʋ yere.»

¹⁷A diw-cenu pùorí yome pie nɩ ayi sob, a cuwr pie nɩ ayi sob bibie pie nɩ anũu sob daar, a Sore tɩ yel mɛ̃ na:

¹⁸«A fʋ̃ʋ nɩsaal bie, ŋmãa lãw-mʋɔlɛ a Eziptɩ tẽw nɩbɛ ƴãw. A fʋ lãw-mʋɔlɛ, ʋ cã bɛ lãwnɩ a nɩ-bʋʋr-kpɛn bɛl na cɛ a lɔb a kpɩmɛ tẽw, a be a kũuni na siwr a.

¹⁹Yel bɛ: Nyɩ tɩɛrɛ kɛ́ nyɩ sɛwnɩ nɩ nɔ̃wfʋ zuo a bɛ mɩnɛ bɩɩ? Nyɩ siw a yaa-bɔw pʋɔ lãwnɩ a yɔ-ɓile dem bɛl bɛ na kʋ a zɛbr zie a.

²⁰Bʋ̃ʋ n'ʋ vɛ̃, a Eziptɩ tẽw nɩbɛ na lo n a zɛbr laɩ pʋɔ. A zɛbr-sɔ-bɛrɛ vɔ̃ na: a kʋ a Eziptɩ tẽw zɛbr-nɩbɛ za!

²¹A kpɩmɛ tẽw a, a zɛbr-nɩbɛ bɛl na kpɛ socir zuo a bɛ za a nɩ a Eziptɩ tẽw nɩbɛ bá-kore na yere na: “Bɛ siwr'a waar wa ganɛ a tɩ sɔgɔ, a yɔ-ɓile dem bɛ ŋa bɛ na kʋ a zɛbr zie a!”

²²A Asiiri tẽw nãà be n ka nɩ a ʋ zɛbr-nɩbɛ. A ʋ sojarɩ yarʋ viir'a koli ʋ. Bɛ kʋ n bɛ za a zɛbr zie.

²³A bɛ yarʋ be n a kpɩmɛ tẽw pʋ̃ɔmɩ viiri koli a nãà yaa. Bɛ kʋ n bɛ za a zɛbr zie, bɛl na tɩ ɩrɛ a nɩ-vʋʋrɩ tẽw màwr dɛ̃bɩ̃-mawfʋ a.

²⁴A Elam[75] tẽw nãà be n ka nɩ a ʋ zɛbr-nɩbɛ. A ʋ sojarɩ yarʋ viir'a koli ʋ. Bɛ kʋ n bɛ za a zɛbr zie. A yɔ-ɓile dem bɛ ŋa na tɩ ɩrɛ a nɩ-vʋʋrɩ tẽw màwr dɛ̃bɩ̃-mawfʋ a, bɛ siw nɩ a tẽsɔw pʋ̃ɔmɩ. Ƴɛrɛŋa a, vĩ nyɔw bɛ na lãwnɩ a bɛl za na be a kũuni zie a.

²⁵Sɩza, a Elam tẽw nãà lãw na gã nɩ a ʋ zɛbr-nɩbɛ a zɛbr nɩ-kũuni pʋɔ. A ʋ sojarɩ yarʋ viir'a koli ʋ. Bɛ kʋ n a yɔ-ɓile dem bɛ ŋa za a zɛbr zie. A bɛ ƴãw a, a nɩbɛ tɩ màwr'ɩ dɛ̃bɩ̃-mawfʋ a nɩ-vʋʋrɩ tẽw pʋɔ. A ƴɛrɛŋa a, vĩ nyɔw bɛ na lãwnɩ a bɛlɩ dem za bɛ na kʋ a zɛbr zie a.

²⁶Mesɛkɩ nɩ Tubal[76] ten na-mɩnɛ be n ka nɩ a bɛ zɛbr-nɩbɛ. A bɛ sojarɩ yarʋ viir'a koli bɛ. Bɛ kʋ n a yɔ-ɓile dem bɛ ŋa za a zɛbr zie. A bɛ ƴãw a, a nɩbɛ tɩ màwr'ɩ dɛ̃bɩ̃-mawfʋ a nɩ-vʋʋrɩ tẽw pʋɔ.

²⁷Bɛ bɛ ũù bɛ lãwnɩ a koro za soja-yée na tɩ ɩrɛ a nɩ-vʋʋrɩ tẽw màwr dɛ̃bɩ̃-mawfʋ a ɩ. A bɛ zɛbr-sɔ-bɛrɛ mɩ́ tɩ be n a bɛ zuru pile, ɛ́ a bɛ zɛbr-kur-pãgala be a bɛ ƴã-gan zu.

²⁸A nyɩɩm mɩ̀ a, Eziptɩ tẽw dem i, nyɩ na kpi na ɛ́ bɛ na ũù nyɩ nɩ a yɔ-ɓile dem bɛ na kʋ a zɛbr zie a pʋɔ.

²⁹A Edɔm tẽw dem, a bɛ na-mɩnɛ nɩ a bɛ nɩ-bɛrɛ mɩ̀ be n ka. Bɛ na saa tɩ tɛr kanyir a, bɛ ƴãw bɛ na lãwnɩ a bɛl na kpi a zɛbr zie a. Bɛ ũù bɛ na lãwnɩ yɔ-ɓile dem na siw a kũuni zie a.

³⁰A saa-pɛrɩ́-gʋba-lowr nɩ-bʋʋrɛ nɩ-bɛrɛ nɩ a Sɩdɔ̃ tẽw nɩbɛ, na siw a kũuni zie a mɩ̀ be n ka. Bɛ tɩ tɛr'ɩ kanyir yaga, lɛ so bɛ tɩ ɩ a nɩbɛ màwr dɛ̃bɩ̃-mawfʋ. Ɛcɛ ƴɛrɛŋa a, a yɔ-ɓile dem bɛ ŋa lãw na gã nɩ a bɛl na kpi a zɛbr zie a. Ɛ́ vĩ nyɔw bɛ na lãwnɩ a bɛl za na be a kũuni zie a.

³¹A Eziptɩ tẽw nãà wa nyɛ̃ a zɛbr-nɩbɛ bɛ ŋa za a, a kʋ̃ maal ɩ ʋ kpɩɛrʋ a ʋ zɛbr-nɩbɛ ƴãw ɛ. Bʋ̃ʋ n'ʋ vɛ̃, ʋlɛ nɩ a ʋ sojarɩ na kpi n a zɛbr zie. A mãa Sore Naaŋmɩn n'ʋ yel.

³²Sɩza, ɩ̃ bɛr'ɩ a Eziptɩ tẽw nãà ʋ ɩ dɛ̃bɩ̃ɛ kpɛ a nɩ-vʋʋrɩ tẽw, ɛcɛ ƴɛrɛŋa a, bɛ na ũù nɩ a ʋl mɩŋa nɩ a ʋ sojarɩ a yɔ-ɓile dem bɛl bɛ na kʋ a zɛbr zie a sɔgɔ.» A mãa Sore Naaŋmɩn n'ʋ yel.