Read Dagara, Northern Ezekɩɛl 33 Bible Online

Ezekɩɛl 33 - Dagara, Northern bible

Ezekɩɛl 33

¹A Sore tɩ yel mɛ̃ na:

²«A fʋ̃ʋ nɩsaal bie, lɛb kpaalɩ a Ɩsɩrayɛl nɩbɛ bom nɛ na mɩ́ ɩ, mãa wa ɩ zɛbr lo tẽw kãw pʋɔ a. A bɛlɩ dem na kpɩɛr a tẽw nɛ pʋɔ a mɩ́ kaa na ír nɩr a bɛ pʋɔ, ʋ ɩ a bɛ zi-piwre.

³A zi-piwre wa dɛ nyɛ̃ a dɔ̃ dem sojarɩ bɛ waar a, ʋ mɩ́ pɛbl'ɩ a wɩ́ɛ ɩ a ʋ tẽ-bi-taabɛ bɛ bãwnɩ a.

⁴A ɩ mɛ̃ nɩr wõ n a wɩ́ɛ kon ɛ́ bɛ cɛlɩ be ɩ, a dɔ̃ sob ta kʋ ʋ. A na ɩ à ŋá a, a nɩr ŋa so a ʋl mɩŋa kũu.

⁵Ʋ wõ n a wɩ́ɛ kon ɛ́ bɛ cɛlɩ be ɩ. À ŋá a, ʋlɛ so a ʋ kũu. Ʋlɛ tɩ cɛlɩ be a, ʋ nãà tɩ vʋʋrɛ na.

⁶Ɛcɛ, a ɩ mɛ̃ a zi-piwre nyɛ̃ nɩ a dɔ̃ dem sojarɩ bɛ waar, ʋ bɛ pɛblɩ a wɩ́ɛ ɩ, ɛ́ a ʋ tẽ-bi-taabɛ bɛ bãwnɩ a ɩ. A dɔ̃ sob ta kʋ nɩr, a zi-piwre so a sãwna, ɩ̃ɩ na sowr'ʋ nɩ bom à á ŋá ƴãw.

⁷Ɛcɛ a fʋ̃ʋ nɩsaal bie, fʋ̃ʋ n'ʋ ɩ̃ ƴãw fʋ ɩ a Ɩsɩrayɛl nɩ-bʋʋrɛ zi-piwre. Fʋ na bɛrɛ na wone a ɩ̃ ƴɛ̀rʋ, ɛ́ fʋ na kpaalɛ nɩ a Ɩsɩrayɛl nɩbɛ a ɩ̃ yúor ƴãw.

⁸A ɩ mɛ̃ ɩ̃ sɛw na k'ɩ̃ɩ yel kʋ̀ nɩ-faa kãw k'aa bɛ tɛr bʋnʋ ɛ, k'ʋʋ na kpi na. Ɛcɛ fʋ bɛ kpaal'ʋ ɛ, fʋ bɛ yel ʋ k'ʋʋ lɩɛbɩ a ʋ nyɔ-vʋʋrʋ ɛ. À ŋá a, a nɩr ŋa na kpi n a ʋ sãwna zũú, ɛcɛ ɩ̃ na sowri fʋ nɩ bom a ʋ kũu ƴãw.

⁹Ɛcɛ fʋ̃ʋ wa yel kʋ̀ a nɩ-faa k'ʋʋ lɩɛbɩ a ʋ ɩb, ɛ́ ʋlɛ bɛ wa lɩɛbɩ a, ʋ na kpi n a ʋ sãwna zũú, ɛcɛ fʋ̃ʋ a, fʋ na faa nɩ a fʋ nyɔ-vʋʋrʋ.»

¹⁰A fʋ̃ʋ nɩsaal bie, yel a Ɩsɩrayɛl nɩbɛ: «Nyɩ yere nɩ à ŋá: “A tɩ sãwna nɩ a tɩ yel-bebe tɩbrɛ nɩ a tɩ zu. A al zũú a, tɩ bɛ tɛr fãw ɛ. Ŋmɩŋmɩn n'a tɩ na tʋ̃ɔ́ vʋʋrɛ?”

¹¹Yel bɛ a ɩ̃ yúor ƴãw à ŋá: A mãa Sore Naaŋmɩn n'ʋ yere, ɩ̃ pɔ n nɩ a ɩ̃ nyɔ-vʋʋrʋ, a nɩ-faar kũu bɛ mɩ́ ɩrɛ mɛ̃ nʋ̃ɔ̀ ɩ. Bom nɛ ɩ̃ na bɔbr a n'ɩ kɛ́ bɛ lɩɛbɩ a bɛ ɩb, ɛ́ vʋʋrɛ. Ɩ̃ zɛlɛ nyɩ na, nyɩ jɛ a nyɩ mil-faar bɛr. Bʋ̃ʋ n'ʋ so nyɩ bɔbr kɛ́ nyɩ kpi, Ɩsɩrayɛl nɩbɛ ɛ?

¹²A fʋ̃ʋ nɩsaal bie, lɛb yel à ŋá kʋ̀ a fʋ tẽ-bi-taabɛ: Nɩ-mɩŋa wa ìr bibir kãw ɩrɛ faa a, a vla ʋ na tɩ dãw maalɩ a kʋ̃ faa ʋ ɛ. Nɩ-faa wa ìr bibir kãw bɛr a ʋ sɔr-faa a, a faa ʋ na tɩ dãw maalɩ a kʋ̃ ɩ ʋ kpi ɛ. A lɛ pʋɔ a, a nɩ-mɩŋa ɩ-vla kʋ̃ bɛr ʋ ʋ vʋʋrɛ a bibir nɛ ʋ nãà wa maalɩ faa a ɩ.

¹³A ɩ mɛ̃ ɩ̃ yel'a k'ɩ̃ɩ na kʋ̀ n a nyɔ-vʋʋrʋ nɩ-mɩŋa kãw: ʋlɛ wa tɩɛrɛ k'aa vla ʋ na tɩ maalɩ a sɛw na, ɛ́ maalɛ a faa a, bɛ na yiir'ɩ a ɩ-vɩɛlɩ al za bɛr, ʋʋ na kpi na, a faa ʋ na maalɩ a zũú.

¹⁴Ɛcɛ, a ɩ mɛ̃ ɩ̃ yel'a kʋ̀ nɩ-faa kãw k'ʋʋ sɛwnɩ nɩ kũu: ʋlɛ wa bɛr a ʋ ɩ-faa ɛ́ ɩrɛ tu n a lɛ-na-tu-sɔr-a nɩ a mɩnʋ a, ʋ kʋ̃ kpi ɛ.

¹⁵Ʋlɛ wa lɛb tɩr a san-bãwfʋ-bom ʋ na tɩ de bom kãw pɛ̃wfʋ daar a, bɩɩ a bom nɛ ʋ na zu a, ʋlɛ bɛ wa lɛb maalɩ faa ɛcɛ tu a nɛ́ɛ na tɩrɛ a nyɔ-vʋʋrʋ a pùor a, ʋ kʋ̃ kpi ɛ, ʋ na vʋʋrɛ na, a bɛ tɛr bʋnʋ ɛ.

¹⁶Bɛ na yiir'ɩ a ʋ ɩ-faar za bɛr, ʋʋ na vʋʋrɛ na, ʋ na dɛ faa tu a lɛ-na-tu-sɔr-a nɩ a mɩnʋ a.”

¹⁷A Ɩsɩrayɛl nɩbɛ mɩ́ yere na: “A lɛ a Sore na ɩrɛ a bɛ vɩɛl ɛ.” Ɛcɛ a bɛl na ɩrɛ a lɛ a nɩ̃ɛ bɛ n'a bɛ vɩɛl ɛ?

¹⁸Nɩ-mɩŋa wa zawrɩ na ɩrɛ vla ɛ́ ɩrɛ faa a, ʋ na kpi n à á ŋá ƴãw.

¹⁹Ɛcɛ nɩ-faa wa bɛr a ʋ ɩ-faa ɛ́ tɛr ɩb na tu mɩnʋ ɛ́ tori a pùor a, ʋ na vʋʋrɛ nɩ à á ŋá ƴãw.

²⁰“A nyɩɩm Ɩsɩrayɛl nɩbɛ, nyɩ mɩ́ yere na k'aa lɛ a Sore na ɩrɛ a bɛ vɩɛl ɛ. A na ɩ lɛ a, nyɩ bãwnɩ a k'ɩ̃ɩ na dɩ n nɩ a nyɩ been been za ƴɛ̀rʋ, tu n à ŋà za ɩb!”»

²¹A diw-cenu pùorí yome pie nɩ ayi sob, a cuwr pie sob bibie anũu sob daar, nɩr kãw na tɩ cãà vʋʋrɛ a Zerizalɛm zɛb-deb pùorí a tɩ wa na wa yel mɛ̃: «A tẽ-kpɛ̃ɛ lo na!»

²²A zaanʋɔra, ʋ na bɛ tɩ ta sɛr a, a Sore tɩ ɩ na k'ɩ̃ lɛb ƴɛ̀rɛ, ʋʋ wul mɛ̃ a ʋ kpɛnʋ. A nɩr ŋa na tɩ ta a bio daarɩ́ biɓaara a, ɩ̃ bɛ tɩ cãà ɩ a nɩ-gbili ɛ, ɩ̃ tɩ tʋɔr'a ƴɛ̀rɛ.

²³A Sore tɩ yel mɛ̃ na:

²⁴«A fʋ̃ʋ nɩsaal bie, bɛrɛ wone! A nɩbɛ na be a Ɩsɩrayɛl tẽw tẽ-bɛrɛ bɛ na sãw bɛr a pʋɔ a yere na: “A Abraham tɩ ɩ n ʋ yõ, ɛcɛ ʋlɛ n'ʋ tɩ so a tẽw za. Tɩɩm na yãwmɛ a, tɩmɛ nɛbɛ a sɛw kɛ́ tɩ so a tẽw a ƴɛrɛŋa.”

²⁵A na ɩ à ŋá a, yel bɛ: À ŋá n'a a Sore Naaŋmɩn yere: Nyɩ mɩ́ 'wɔb'ɩ a nɛn lãwnɩ a zɩ̃ɩ[77], nyɩ puore nɩ a ŋmɩn-bɛlɛbɛlɛ, nyɩ kʋrɛ nɩ nɩbɛ. À ŋá pʋɔ a, ŋmɩŋmɩn n'a nyɩ na tʋ̃ɔ́ so a tẽw?

²⁶A nyɩ zɛbr bome tɛwr ƴãw n'a nyɩ ƴãw a nyɩ tɩɛrʋ. Nyɩ ɩrɛ nɩ ɩb na bɛ maal'ɩ wob a, nyɩ maalɛ nɩ pɩ̃ɔ-yele, ŋmɩŋmɩn n'a nyɩ na tʋ̃ɔ́ so a tẽw?

²⁷Yel bɛ k'aa mãa Sore Naaŋmɩn yere nɩ à ŋá kʋ̀rɛ bɛ: “Ɩ̃ pɔ n nɩ a ɩ̃ nyɔ-vʋʋrʋ, bɛ na kʋ n a bɛl na be a tẽ-bɛrɛ bɛ na sãw bɛr a pʋɔ, wɛ-dʋn na 'wɔb'ɩ a bɛl na be a wɩ̀ɛ pʋɔ a, ɛ́ a bɛl na sɔwlɛ a tan pʋɔ nɩ a pìe bɔwrɩ pʋɔ a, bɛ na kpi n jɛ̀lmɛ̃ bàalʋ kũu.

²⁸Ɩ̃ na sãw nɩ a tẽw bɛr, ɩ̃ na ɩ na ʋ lɩɛbɩ wɛja-kpalɛ. A fãw na tɩ ɩ a bɛlɩ dem na kpɩɛr a ʋ pʋɔ ɩrɛ pɔ̀lʋ̀ a na bɔr'a. A Ɩsɩrayɛl tẽw tan na ɩ n wɛja-kpalɛ, nɩr za kʋ̃ lɛb tu tɔl a be ɩ.

²⁹Ɩ̃ na ɩ n a tẽw ŋa za ʋ lɩɛbɩ wɛja-kpalɛ, a ɩb na bɛ maal'ɩ wob a Ɩsɩrayɛl nɩbɛ na ɩ a zũú. A lɛn daar a, bɛ na bãw na kɛ́ mãa n'ɩ a Sore.

³⁰A fʋ̃ʋ nɩsaal bie, bɛrɛ wone! A Ɩsɩrayɛl nɩbɛ ƴɛ̀rɛ nɩ a fʋ ƴɛ̀rʋ a tẽ-kpɛ̃ɛ dacine ƴãw, bɩɩ a bɛ yie dɩ̃dɛɛ ƴãw. Bɛ yere nɩ a bɛ cara pʋɔ à ŋá: “A na ɩ lɛ a, tɩ cen tɩ bɛr wõ a lɛ a Sore na yere a.”

³¹Lɛ n'a bɛ tɩ wa yaga wa zɩ̃ a fʋ niŋé. Bɛ bɛrɛ na wone a fʋ ƴɛ̀rʋ, ɛcɛ bɛ bɛ tuur a pùor ɛ. Bɛ ɩrɛ nɩ a lɛ bɛ na nɔ̃w a, ɛ́ bɔbr a bɛ tɔnɛ tɛwr.

³²A fʋ̃ʋ a, fʋ ɩ n a bɛ zie mɛ̃ yiel-yiele na tɛr nɔ-nʋ̃ɔ̀ a, yiel-yiele na tɛr kɔkɔr-vla ɛ́ bʋ̃-ŋmɩɛrɩ ŋmɛb na vɩɛl a bɩɛlɛ a. Bɛ bɛrɛ na wone a fʋ ƴɛ̀rʋ, ɛcɛ bɛ bɛ tuur a pùor ɛ.

³³Alɛ n'a so, a yele á ŋá wa ta a lɛn daar a — ɛ́ a na ta n ƴɛrɛŋa — bɛ na bãw na kɛ́ naaŋmɩn-ƴɛ̀r-manɛ tɩ be n a bɛ sɔgɔ.»