Read Dagara, Northern Ezekɩɛl 34 Bible Online

Ezekɩɛl 34 - Dagara, Northern bible

Ezekɩɛl 34

¹A Sore tɩ yel mɛ̃ na:

²«A fʋ̃ʋ nɩsaal bie, ƴɛ̀r naaŋmɩn-ƴɛ̀r-manɛ ƴɛ̀rʋ càar'ɩ a Ɩsɩrayɛl nɩbɛ nɩ-bɛrɛ. Ƴɛ̀r mɛ̃ naaŋmɩn-ƴɛ̀r-manɛ a yel bɛ: À ŋá n'a a mãa Sore Naaŋmɩn yere: Baw-bio páw nyɩ na, a nyɩɩm Ɩsɩrayɛl nɩbɛ cɩ̃ɩnbɛ[78]! Nyɩ kaarɛ nɩ nyɩ mɩŋa zie! A píir zie bɛ tʋ̃ɔ́ n'a a pi-cɩ̃ɩnbɛ mɩ́ sɛw kɛ́ bɛ kaarɛ ɩ?

³Ɛcɛ a nyɩɩm a, nyɩ nyúur'ɩ a píir bʋ̀rʋ, nyɩ mɩ́ de nɩ a kɔblʋ a nyɩ bʋ̃-suuri maalʋ ƴãw, nyɩ mɩ́ kʋ n a dʋ̃-'wɔɩ 'wɔɩ. Ɛcɛ a píir a, nyɩ bɛ kaarɛ a zie ɩ.

⁴Nyɩ bɛ kʋ̀ fãw a píir al na bɛ tɩ tɛr fãw a ɩ. Nyɩ bɛ sanɩ a al na tɩ ɩ bàalbɛ a ɩ. Nyɩ bɛ sanɩ a al na tɩ tɛr gbɛ-kaba a ɩ. Nyɩ bɛ lɛb ŋmãa a al na tɩ zãá nɩ a taabɛ a lɛb wa n ɛ. Nyɩ bɛ bɔ a al na tɩ bɔr a ɩ. Ɛcɛ nyɩ dɩ n naalʋ a píir zu nɩ po-to-fãw-ɩb nɩ mimi-kõw.

⁵A píir yaar'ɩ a ziir za, a na bɛ tɩ tɛr cɩ̃ɩnɛ a ƴãw, ɛ́ a wɛ-dʋn za za a vɔl.

⁶A ɩ̃ dʋn cen na tɩ bɔr a tã-bɛrɛ nɩ a tãli zu. A ɩ̃ píir yaar'ɩ a ziir za a tẽw za pʋɔ. Nɩr za bɛ cere a bɔb ɛ, nɩr za bɛ kaarɛ a zie ɩ.

⁷Alɛ n'a so, Ɩsɩrayɛl tẽw pi-cɩ̃ɩnbɛ ɛ, nyɩ bɛrɛ wone a lɛ ɩ̃ na yere a.

⁸Ɩ̃ pɔ n nɩ a ɩ̃ nyɔ-vʋʋrʋ, à ŋá n'a a mãa Sore Naaŋmɩn yere: A ɩ̃ dʋn be n nyãnyuwr nuru pʋɔ. A wɛ-dʋn za nyɔw nɩ a píir 'wɔb, bʋ̃ʋ n'ʋ vɛ̃, a bɛ tɩ tɛr cɩ̃ɩnɛ ɩ. A ɩ̃ pi-cɩ̃ɩnbɛ bɛ cen tɩ bɔ a ɩ. Ɛcɛ a pi-cɩ̃ɩnbɛ bɛ ŋa kaarɛ nɩ bɛl mɩŋa zie, bɛ bɛ kaarɛ a ɩ̃ dʋn zie ɩ.

⁹Alɛ n'a so, Ɩsɩrayɛl tẽw pi-cɩ̃ɩnbɛ ɛ, nyɩ bɛrɛ wone a lɛ ɩ̃ na yere a.

¹⁰Mãa, a Sore Naaŋmɩn, ɩ̃ yere na kʋ̀rɛ nyɩ. Ɩ̃ na ìr'ɩ a nyɩ ƴãw, a nyɩɩm pi-cɩ̃ɩnbɛ. Ɩ̃ na lɛb'a de a ɩ̃ dʋn a nyɩ zie, ɩ̃ na piw nyɩ nɩ sɔ́r a kaafʋ ƴãw. Lɛ n'a nyɩ kʋ̃ mɩ́ lɛb páw tɔnɛ a zie ɩ. Ɩ̃ na faa nɩ a ɩ̃ píir a nyɩ nʋɔrɩ́, ɛ́ a kʋ̃ mɩ́ lɛb ɩ a nyɩ bʋ̃-dɩrɩ ɛ.

¹¹À ŋá n'a a mãa Sore Naaŋmɩn yere: a na dɛ tĩ a ƴɛrɛŋa a, mãa mɩŋa n'ʋ na cen tɩ bɔ a ɩ̃ píir, ɩ̃ɩ na kaarɛ nɩ a zie.

¹²Pi-cɩ̃ɩnɛ wa be píir na yaarɩ a ziir za a sɔgɔ a, ʋ mɩ́ kaarɛ nɩ a ʋ píir zie. Lɛ mɩ̀ n'a ɩ̃ na kaa a ɩ̃ dʋn zie. Ɩ̃ na cen na tɩ faa a ɩ̃ píir a be za a na cen, a ulu nɩ a lige bibir a.

¹³Ɩ̃ na ɩ na a yi a tẽ-yoru pʋɔ, ɩ̃ na ɓã a nɩ taa ɛ́ lɛb tɛr a wa n a al mɩŋa tẽw pʋɔ. Ɩ̃ na tɛr a na cen nɩ a Ɩsɩrayɛl tẽw tan zu, a fʋɔlɩ pʋɔ, a tẽw zi-vɩɛlɩ vɩɛlɩ pʋɔ.

¹⁴Ɩ̃ na tɛr a na cen nɩ mʋ̃ɔ 'wɔbrʋ zie na vɩɛl a, ɛ́ a na tɛr'ɩ a mʋ̃ɔ 'wɔbrʋ ziir a Ɩsɩrayɛl tẽw tan zu. A be a, a ɩ̃ píir na tʋ̃ɔ́ na pɩ̃ɛnɛ a mʋ̃ɔ 'wɔbrʋ zi-vɩɛlɩ pʋɔ. A na 'wɔbr'ɩ a mʋ̃ɔ a ziir na tɛr pʋɔrʋ a pʋɔ, a Ɩsɩrayɛl tẽw tan zu.

¹⁵Mãa n'ʋ na ɩ a ɩ̃ dʋn cɩ̃ɩnɛ, mãa n'ʋ na ɩ a pɩ̃ɛnɛ. A mãa Sore Naaŋmɩn n'ʋ yere.

¹⁶A pɛ́rʋ na bɔr a, ɩ̃ na cen na tɩ bɔ ʋ, a ʋl na cen zãá a, ɩ̃ na lɛb'a ŋmãa ʋ wa n. A ʋl na tɛr gbɛ-kaba a, ɩ̃ na sanɩ ʋ na. A ʋl na ɩ bàal a, ɩ̃ na lɛb'a kʋ̀ ʋ fãw. Ɛcɛ a ʋl na 'wɔr ɛ́ kpɛmɛ a, ɩ̃ na kʋ ʋ na. Ɩ̃ na kaarɛ nɩ a ɩ̃ dʋn zie tu n a mɩnʋ nɛ́ɛ.»

¹⁷Ɛcɛ a ɩ̃ dʋn a, à ŋá n'a a mãa Sore Naaŋmɩn yere kʋ̀rɛ a: «Ɩ̃ na ɩ n ƴɛ̀r-dɩrɛ a píir cará, a pʋ́rɩ cará nɩ a bʋrɩ cará.

¹⁸Bʋ̃ʋ n'ʋ so a mɩnɛ bɛ mɩ́ àr àrʋ tɛwr a mʋ̃ɔ 'wɔbrʋ zi-vla vla pʋɔ? Bʋ̃ʋ n'ʋ so a mɩ́ nɛbr a mʋ̃ɔ na cɛ a? A bɛ sɛw nyɩ nyɩ na páw kʋ̃ɔ-walwal a nyub ƴãw a ɩ? Bʋ̃ʋ n'ʋ so nyɩ ɓʋɔlɛ nɩ a nyɩ nafɩlɛ a al nyɩ na bɛ nyu a?

¹⁹A mɩ́ fɛr'ɩ a ɩ̃ dʋn al na cɛ a, k'aa 'wɔb a mʋ̃ɔ nyɩ na nɛb a, ɛ́ nyũ a kʋ̃ɔ nyɩ na ɓʋɔlɩ bɛr a.

²⁰Alɛ n'a so a mãa Sore Naaŋmɩn yere kʋ̀rɛ nyɩ, mãa mɩŋa na ɩ n ƴɛ̀r-dɩrɛ a ɩ̃ dʋn pʋɔ, a pí-kòn nɩ a pí-'wɔɩ cará.

²¹Nyɩ dáa nɩ a dʋn na bàl a bɛr nɩ a bawŋman nɩ a lõbowr, nyɩ cɔ̀r a na nɩ a ɩ́lɛ́. À ŋá a, nyɩ diw a na yaarɩ a ziir za ír a bɛr a mʋ̃ɔ 'wɔbrʋ zie.

²²Alɛ n'a so ɩ̃ wa k'ɩ̃ɩ wa sõw a ɩ̃ píir, bɛ ta lɛb tʋ̃ɔ́ zu a ɩ. Ɩ̃ na ɩ n ƴɛ̀r-dɩrɛ a nyɩɩm nɩ a al cará.

²³Ɩ̃ na ƴãw nɩ pi-cɩ̃ɩn-been na na kaarɛ a ɩ̃ dʋn zie a, ʋ be a ɩ̃ dʋn niŋé. Ʋ na ɩ n nãà mɛ̃ a ɩ̃ tõ-tõ-bie Daviir[79] a. Ʋl a, ʋ na kaarɛ nɩ a dʋn zie, ɛ́ ɩ pi-cɩ̃ɩn-vla a dʋn zie.

²⁴A mãa Sore a, ɩ̃ na ɩ n a bɛ Naaŋmɩn, ɛ́ bɛ na tɛr'ɩ nãà ʋ ŋmɛ̃ mɛ̃ a ɩ̃ tõ-tõ-bie Daviir a. A mãa Sore Naaŋmɩn n'ʋ yere.

²⁵Ɩ̃ na maal'ɩ nɩ a ɩ̃ dʋn ƴã-ɓaarʋ wõ-taa, ɩ̃ɩ na ɩ n a wɛ-dʋn bɔr a tẽw pʋɔ. Lɛ n'a a ɩ̃ dʋn na tʋ̃ɔ́ kpɩɛr'ɩ ƴã-ɓaarʋ a wɛja-kpalɛ pʋɔ, ɛ́ ganɛ a tuwr pʋɔ.

²⁶Ɩ̃ na bɛr a na a vʋʋrɛ pɩɛlɩ a ɩ̃ tãw-sõw. Ɩ̃ na mɩ́ ɩ n a saa wa a ʋ daar, ɛ́ a kʋ̃ɔ á ŋá na mɩ́ maalɩ a nɩ vla.

²⁷A tɩɩr na mɩ́ wɔ̃ n wɔmɛ, a tẽsɔw na mɩ́ tɩr'ɩ a ʋ bʋ̃-dieri. Ŋa za na mɩ́ vʋʋrɛ nɩ nɩ ƴã-ɓaarʋ a tẽw pʋɔ. Ɩ̃ na kár'ɩ bom za na dine a ɩ̃ nɩ-bʋʋrɛ nɩbɛ a bɛr. Ɩ̃ na faa bɛ nɩ a bɛlɩ dem na ƴãwnɛ bɛ a gbãgbaalʋ pʋɔ a nuru pʋɔ. A lɛn daar a, bɛ na bãw na kɛ́ mãa n'ɩ a Sore.

²⁸A sãanbɛ kʋ̃ lɛb fa bɛ ɩ, a wɛ-dʋn kʋ̃ lɛb 'wɔb bɛ ɩ. Bɛ na vʋʋrɛ nɩ nɩ ƴã-ɓaarʋ, ɛ́ nɩr za kʋ̃ lɛb ɩ bɛ bɛ maw ɛ.

²⁹Ɩ̃ na kʋ̀ bɛ nɩ póru na tɛr pʋɔrʋ nɩr za bãwnɩ a, bɛ kʋ̃ lɛb kone kɔ̃ a bɛ tẽw pʋɔ ɩ. A nɩ-bʋʋr-yoru kʋ̃ cãà kpɔwrɛ bɛ ɩ.

³⁰Nɩsaal za na bãw na k'aa mãa, a Sore bɛ Naaŋmɩn, ɩ̃ be n a bɛ zie, ɛ́ a Ɩsɩrayɛl nɩ-bʋʋrɛ sɩrɩ ɩ a ɩ̃ nɩ-bʋʋrɛ. A mãa Sore Naaŋmɩn n'ʋ yere.

³¹Sɩza, a nyɩɩm nɩsaalbɛ, nyɩ ɩ n a ɩ̃ dʋn, ɩ̃ɩ kaarɛ a nyɩ zie. Sɩza, mãa n'ɩ a nyɩ Naaŋmɩn. A mãa Sore Naaŋmɩn n'ʋ yere.»