Read Dagara, Northern Ezekɩɛl 39 Bible Online

Ezekɩɛl 39 - Dagara, Northern bible

Ezekɩɛl 39

¹A Sore tɩ yel mɛ̃ na: «A fʋ̃ʋ nɩsaal bie, ƴɛ̀r a ɩ̃ yúor ƴãw yel kʋ̀ a Gɔgɩ: À ŋá n'a a Sore Naaŋmɩn yere: Ɩ̃ na ìr'ɩ a fʋ̃ʋ Gɔgɩ na ɩ a Mesɛkɩ nɩ a Tubal ten nɩ-bʋʋrɛ nɩ-kpɛ̃ɛ kpɛ̃ɛ za a[87] ƴãw.

²Ɩ̃ na ɩ na fʋ yi a fʋ tẽw na wɩɛr tɩ be a saa-pɛrɩ́-gʋba-lowr a. Ɩ̃ na fɛr'a ƴãw fʋ yi ɛ́ bɛr ʋ, ɛ́ cen tɩ zɛb'ɩ a Ɩsɩrayɛl tẽw tan.

³Al pùorí, ɩ̃ na ŋmɛ b'a: ɩ̃ na ɩ n a fʋ tam ʋ ka a fʋ gʋba nũú, ɛ́ a pime yi a fʋ dʋrʋ nũú lo.

⁴Lɛ n'a a fʋ̃ʋ, a fʋ zɛbr-nɩbɛ za nɩ a nɩ-yaga bɛl na wõ taa nɩ fʋ a na kpi a Ɩsɩrayɛl tẽw tan zu. Ɩ̃ na bɛr'ɩ a sidume nɩ a wɛ-dʋn a dɩ a nyɩ ƴã-gamɛ.

⁵Fʋ na kpi n wɩ̀ɛ pʋɔ mɛ̃ a lɛ ɩ̃ na yel a, a mãa Sore Naaŋmɩn n'ʋ yere.

⁶Ɩ̃ na ƴãw nɩ vũu a Magɔgɩ tẽw nɩ a bɛl na kpɩɛr a kʋ̃ɔ-kpɛ̃ɛ-sɔgɔ-ten a, bɛl na tɩɛrɛ kɛ́ bɛ be n ƴã-ɓaarʋ pʋɔ a. Lɛ n'a bɛ na bãw kɛ́ mãa n'ɩ a Sore.

⁷Ɩ̃ na ɩ na a ɩ̃ nɩ-bʋʋrɛ Ɩsɩrayɛl bãw kɛ́ mãa sɩrɩ n'ɩ a Naaŋmɩn. Ɩ̃ kʋ̃ lɛb bɛr bɛ bɛ ɩ m la ɩ, ɛ́ a nɩ-bʋʋr-yoru na bãw na kɛ́ mãa n'ɩ a Sore, a Ɩsɩrayɛl Naaŋmɩn-sɩza.

⁸Sɩza, a yele á ŋá na ta na, a tĩ na tuur, a ƴɛ̀rʋ-dɩb bibir ɩ̃ na hieri a n'ɩ ŋan waar. A mãa Sore Naaŋmɩn n'ʋ yel.

⁹A Ɩsɩrayɛl nɩbɛ na yi n a bɛ tẽ-bɛrɛ pʋɔ. Bɛ na gbɔw nɩ vũu ɛ́ nyɩw a bɛ dɔ̃ dem zɛbr bome bɛr. A zɛbr-kur-pãgalɩ za, a cãpili nɩ a bɛrɛ, a tamɛ nɩ a pime, a zɛbr-sɔ-bɛrɛ nɩ a kafine, à á ŋá za na gbɔw nɩ a vũu tɩ ta yome ayopõi.

¹⁰A nɩbɛ kʋ̃ cãà wobr dàar a wɩ̀ɛ pʋɔ ɛ́ kʋ̃ cɩɛr a a tuwe pʋɔ ɩ, bʋ̃ʋ n'ʋ vɛ̃, a zɛbr bome á ŋá n'a bɛ na mɩ́ gbɔw nɩ a vũu. Bɛ na zu n a bɛlɩ dem na zu bɛ a, a bɛlɩ dem na za a bɛ bome a, bɛ mɩ̀ na za n a bɛ bome. A mãa Sore Naaŋmɩn n'ʋ yel.

¹¹A lɛn daar a, ɩ̃ na kʋ̀ n ũùfʋ zie a Gɔgɩ, a Ɩsɩrayɛl tẽw be. A na ɩ n a Sɔr-tɔlbɛ fʋɔla pʋɔ, a Kʋ̃ɔ-kpɛ̃ɛ-kũu saa-pɛrɩ́, ɛ́ a yaa ŋa na piw nɩ a sɔr-tɔlbɛ a sɔ́r. A be n'a bɛ na ũù a Gɔgɩ nɩ a ʋ zɛbr-nɩbɛ za. Bɛ na bʋɔlɛ nɩ a zie ŋa kɛ́: “Gɔgɩ Nɩ-yaga yaga Fʋɔla”.

¹²A Ɩsɩrayɛl nɩbɛ na de nɩ cuwr ayopõi ũù a nɩbɛ bɛ ŋa za, ɛ́ ɩ a tẽw ʋ vɩɛl.

¹³A bɛlɩ dem za na kpɩɛr a vuo ŋa pʋɔ a na pʋɔ nɩ a ton ŋa pʋɔ, ɛ́ bɛ na nyʋʋr'ɩ a ʋlɩ bibir nɛ, ɩ̃ nãà wa wul bɛ a ɩ̃ yúor-vɩɛlɩ-danʋ a. A mãa Sore Naaŋmɩn n'ʋ yere.

¹⁴A cuwr ayopõi á ŋá pùorí a, bɛ na kaa na ír dɛbr ƴãw bɛ zɔrɛ cɔlɛ a tẽw. Bɛ na bɔ n a kũuni al na cãà pàw a tẽsɔw a ɛ́ ũù a, ɩ a tẽw ʋ vɩɛl.

¹⁵Bɛ na zɔ na cɔlɩ a tẽw a lõbowe za. Nɩr wa nyɛ̃ nɩsaal kɔbɛ a, ʋ na wob'ɩ kʋsɛbɛ gbõ taa pɩɛl'a. A na ɩ n bãwfʋ. Lɛ n'a a bɔw-tuwrbɛ na wa wob a kɔbɛ á ŋá tɩ ũù a Gɔgɩ Nɩ-yaga yaga Fʋɔla pʋɔ.

¹⁶Tẽ-kpɛ̃ɛ kãw mɔ̃ mɩ̀ na be n be a yúor dɩ kɛ́ Hamona, a pɛr lɛ kɛ́ “Nɩ-yaga yaga”. A baarʋ daar a, a tẽw na vɩɛl'a.»

¹⁷A Sore tɩ lɛb'a yel mɛ̃: «A fʋ̃ʋ nɩsaal bie, yel a ɩ̃ yúor ƴãw a lili-pɛ-bʋʋrɛ za nɩ a wɛ-dʋn: Nyɩ yi a ziir za wa, nyɩ ɓã taa pʋɔ a bàwr ɩ̃ na maalɛ kʋ̀rɛ nyɩ a pʋɔ. Ʋ na ɩ n bàwr-kpɛ̃ɛ a Ɩsɩrayɛl tẽw tan zu. Nyɩ na 'wɔb'ɩ ƴã-gã-nɛn ɛ́ nyũ zɩ̃ɩ.

¹⁸Nyɩ na 'wɔb'ɩ a soja-gãdaar ƴã-gamɛ ɛ́ nyũ a tẽw ŋa nɩ-bɛrɛ bɛ na lɩɛr'ɩ a Basan tẽw pʋrɩ, péli, bʋrali nɩ nadeli-'wɔɩ maal'ɩ a bàwr a zɩ̃ɩ.

¹⁹A bàwr ŋa n'ʋ ɩ̃ bʋɔlɛ nɩ nyɩ: nyɩ na 'wɔb'ɩ a nɛ̃-kãánɩ mɛ̃ a lɛ nyɩ na bɔbr a, ɛ́ nyũ a zɩ̃ɩ tɩ kuoli.

²⁰A ɩ̃ cuw dɩb ŋa zie a, nyɩ na 'wɔb'ɩ wie nɩ wi-zɔmnbɛ, sojarɩ nɩ zɛbr-nɩ-pɛ-bʋʋrɛ za. A mãa Sore Naaŋmɩn n'ʋ yere.

²¹Ɩ̃ na wul'ɩ a ɩ̃ yúor-vɩɛlʋ-danʋ a nɩ-bʋʋr-yoru. Bɛ za na nyɛ̃ nɩ a lɛ ɩ̃ na mɩ́ de a ɩ̃ fãw ɩ n a ɩ̃ ƴɛ̀rʋ-dɩb tu a.

²²A na dɛ tĩ a ʋlɩ bibir nɛ a, a Ɩsɩrayɛl nɩbɛ na bãw na kɛ́ mãa n'ɩ a Sore, a bɛ Naaŋmɩn.»

²³A nɩ-bʋʋr-yoru na bãw na k'aa Ɩsɩrayɛl nɩbɛ sãwna zũú n'a bɛ cen a diw-cenu zie, bɛ na bɛ tu a mãa Sore pùor a ƴãw. Alɛ n'a so ɩ̃ ŋmɛlɩ kpaar cɔw bɛ. Ɩ̃ bɛr bɛ na kʋ̀ a bɛ dɔ̃ dem kɛ́ bɛ kʋ bɛ a zɛbr zie.

²⁴Ɩ̃ ŋmɛlɩ nɩ a kpaar cɔw bɛ, ɛ́ ɩ bɛ tu n a bɛ ɩ-faar nɩ a bɛ sãwna.

²⁵Ɛcɛ à ŋá n'a a mãa Sore Naaŋmɩn yere: «A na dɛ tĩ a ƴɛrɛŋa a, ɩ̃ na zɔ n a Ɩsɩrayɛl nɩbɛ nɩbaalʋ, a bɛlɩ dem a Zakɔb na dɔw a. Ɩ̃ na ɩ na a bɛ nɩ-pàwrɩ lɛb wa, ɩ̃ɩ na fɛr bɛ na bɛ tɛr a ƴãwfʋ na sɛwnɩ a ɩ̃ yo-sõw a.

²⁶Lɛ n'a bɛ na yiiri a bɛ vĩ bɛr nɩ a yel-bebe al za bɛ na maalɩ caar'ɩ mɛ̃ a. Bɛ na kpɩɛr'ɩ nɩ ƴã-ɓaarʋ a bɛ tẽw ɛ́ nɩr kʋ̃ lɛb ɩ bɛ màwr dɛ̃bɩ̃-mawfʋ ɛ.

²⁷Ɩ̃ na ɩ na bɛ yi a bɛ dɔ̃ dem ten, ɩ̃ɩ ɓã bɛ taa tɛr bɛ lɛb wa n a bɛ tẽw. Bɛlɛ nɛbɛ ɩ̃ na wul'ɩ a nɩ-bʋʋr-yaga k'ɩ̃ɩ sɩrɩ na ɩ a Naaŋmɩn.

²⁸Mãa wa ɓã a Ɩsɩrayɛl nɩbɛ za taa a bɛ tẽw a, ɩ̃ kʋ̃ bɛr nɩr za ʋ cãà a ten al pʋɔ ɩ̃ na tɩ diw bɛ cen nɩ a ɩ. A lɛn daar a, a Ɩsɩrayɛl nɩbɛ na bãw na kɛ́ mãa n'ɩ a Sore bɛ Naaŋmɩn.

²⁹Ɩ̃ na kʋ̀ n a ɩ̃ Vʋʋrʋ a Ɩsɩrayɛl nɩ-bʋʋrɛ, ɛ́ kʋ̃ lɛb ŋmɛlɩ kpaar cɔw bɛ towtow ɛ. A mãa Sore Naaŋmɩn n'ʋ yere.»