Read Dagara, Northern Ezekɩɛl 45 Bible Online

Ezekɩɛl 45 - Dagara, Northern bible

Ezekɩɛl 45

¹«A lɛn daar nyɩmɛ wa póne a Ɩsɩrayɛl tẽw a dɔwlʋ cará a, nyɩ na ŋmãa nɩ zie bɛr a Sore yõ na so a. A ʋ wogo na ɩ n mɛtɩr tùr-pie nɩ ayi dɔwlɩ kɔbr anũu (12 500) ɛ́ a ʋ yɛ̀lʋ ɩ mɛtɩr tùr-pie (10 000). A tẽsɔw ŋa za kpɛ̃lɛ̃kpɛ̃lɛ̃ na ɩ n sõw.

²A tẽsɔw ŋa zu a, bɛ na bɛr'ɩ zie a wogo nɩ a yɛ̀lʋ na ɩ been a, mɛtɩr kɔbr ayi dɔwlɩ lɩz'a ayi nɩ pie (250) a Ŋmɩn-yir-kpɛ̃ɛ ƴãw. Vo-zawla na viiri na koli ʋ a yɛ̀lʋ ɩ mɛtɩr lɩzɛr'ɩ anũu.

³A zie ŋa pʋɔ a, nyɩ na ŋmãa nɩ vuo a wogo na ɩ mɛtɩr tùr-pie nɩ ayi dɔwlɩ kɔbr anũu (12 500) ɛ́ a yɛ̀lʋ ɩ mɛtɩr túr-anũu (5 000) a. Be n'a a zi-sõw na be, zie na ɩ sõw sõw a.

⁴A tẽw zi-sõw ŋa na ɩ n a bàwr-maalbɛ na tone a Sore tome a zi-sõw pʋɔ a sób. A bɛ yie na ŋma n a tẽsɔw ŋa zu, ʋʋ na be n a zi-sõw tɛwr ƴãw.

⁵Zi-yũo kãw a wogo na ɩ mɛtɩr tùr-pie nɩ ayi dɔwlɩ kɔbr anũu (12 500) ɛ́ a yɛ̀lʋ ɩ mɛtɩr túr-anũu (5 000) a na ɩ n a levitɩ mɩnɛ na tone a Ŋmɩn-yir-kpɛ̃ɛ pʋɔ a sób. A be a, bɛ na tɛr'ɩ tẽ-bɛrɛ kpɩɛr.

⁶Bɛ na manɩ nɩ tẽsɔw a wogo na ɩ mɛtɩr tùr-pie nɩ ayi dɔwlɩ kɔbr anũu (12 500) ɛ́ a yɛ̀lʋ ɩ mɛtɩr túr-ayi dɔwlɩ kɔbr anũu (2 500) a lanɩ nɩ a tẽsɔw a Sore yõ na so a. A be a, tẽ-kpɛ̃ɛ Ɩsɩrayɛl nɩr za na tɛr sɔ́r na kpɩɛr a na be n be.

⁷A nãà ƴãw a, nyɩ na de nɩ vuo na be a tẽsɔw ʋl a Sore yõ nɩ a tẽ-kpɛ̃ɛ na so a, lowr ŋa nɩ lowr ŋa. A zie ŋa na cen nɩ a mʋ̃tɔ̃w-kpɛb-lowr ɛ́ tɩ tɔ a Mediterane kʋ̃ɔ-kpɛ̃ɛ, ɛ́ cen a saa-pɛrɩ́ lowr tɩ tɔ a Ɩsɩrayɛl tẽw saa-pɛrɩ́ tʋr-bɔw.

⁸À ŋá n'a a na-mɩnɛ na tɛr a bɛ tẽsɔw a Ɩsɩrayɛl tẽw pʋɔ. Bɛ kʋ̃ cãà nɛbr a Sore nɩ-bʋʋrɛ ɩ, bɛ na bɛr'ɩ a tẽw na cɛ a kʋ̀ a Ɩsɩrayɛl dɔwlʋ.»

⁹À ŋá n'a a Sore Naaŋmɩn yere: «Ɩsɩrayɛl na-mɩnɛ ɛ, a man nɩ lɛ! Nyɩ bɛr a po-to-fãw-ɩb nɩ a bome fab. Nyɩ sàwr a lɛ-na-tu-sɔr-a nɩ a mɩnʋ, nyɩ bɛr a ɩ̃ nɩ-bʋʋrɛ na-bome zub lɛ! A mãa Sore Naaŋmɩn n'ʋ ƴãw a nʋɔr kʋ̀ nyɩ!

¹⁰Nyɩ tɛr bʋ̃-keri nɩ bʋ̃-mánɩ na tu mɩnʋ a.

¹¹A bʋ̃-bie bʋ̃-mána bɛ na bʋɔlɛ kɛ́ efa a, nɩ a bʋ̃-kʋ̃ɔ bʋ̃-mána bɛ na bʋɔlɛ kɛ́ batɩ a, a sɛw na k'aa ɩ been. A been za ɩ n a bʋ̃-mána mã bɛ na bʋɔlɛ kɛ́ homɛɛr[96]a ziir pie sob.

¹²A salm-pla libi-been na mɩ́ ɩ n libi-ɓɛlɛ lɩzɛr, ɛ́ libi-ɓɛlɛ lɩz'a ata ɩ mɩn[97] been.

¹³Á ŋá n'a nyɩ na mɩ́ ír a nyɩ bʋ̃-dieri pʋɔ: Nyɩ na mɩ́ tɩr'ɩ a nyɩ ble bɩɩ a nyɩ ɔɔzʋ nyɩ na kɔ páw a, ziir lɩz'a ata sob,

¹⁴nɩ a nyɩ kãá ziir kʋba (100) sob. Nyɩ na mɩ́ manɩ nɩ a kãá nɩ a bʋ̃-kʋ̃ɔ bʋ̃-mána bɛ na bʋɔlɛ kɛ́ a batɩ a. A bʋ̃-mána mã bɛ na bʋɔlɛ kɛ́ a homɛɛr a ziir pie sob'ʋ, ɛ́ mɩ̀ cãà lɛb ɩ kɔɔr na zɛ̃ taa nɩ a homɛɛr a, ziir pie sob.

¹⁵A Ɩsɩrayɛl tẽw dʋn mʋ̃ɔ 'wɔbrʋ ziir a, nyɩ na mɩ́ nyɔw nɩ dʋ̃-been píir bɩɩ bʋʋr kɔbr ayi (200) pʋɔ. Nyɩ na mɩ́ de ʋ na tɩr a de-kʋ̀b bome ƴãw, a nyɩw-a-za-bàwr bɩɩ a ƴã-ɓaarʋ bàwr ƴãw. Lɛ n'a nyɩ na mɩ́ páw a nyɩ yel-bebe suur-dɩ-kʋ̀b. A mãa Sore Naaŋmɩn n'ʋ yere.

¹⁶A bɛlɩ dem za na kpɩɛr a tẽw a, a fɛr'a kɛ́ bɛ mɩ́ cen nɩ a bɛ dem tɩ kʋ̀ a Ɩsɩrayɛl nãà.

¹⁷Bʋ̃ʋ n'ʋ vɛ̃, a nãà n'ʋ a na fɛr ʋ mɩ́ tɩr a bom nɛ na sɛw a a nyɩw-a-za-bagɛ nɩ a zɔ̃ de-tɩrʋ nɩ a divɛ̃ de-tɩrʋ ƴãw a cuwr daar: baa zuo a za a cuw-paala cuw, a pɩ̃ɛnʋ-bibie nɩ a Ɩsɩrayɛl nɩ-bʋʋrɛ tub za. A nãà na mɩ́ so a sãwna bagɛ maalʋ, a de-kʋ̀b bome tɩrʋ, a nyɩw-a-za-bagɛ nɩ a ƴã-ɓaarʋ bagɛ maalʋ. Lɛ n'a ʋ na mɩ́ páw a Ɩsɩrayɛl nɩ-bʋʋrɛ yel-bebe suur-dɩ-kʋ̀b.»

¹⁸À ŋá n'a a Sore Naaŋmɩn cãà lɛb yere: «A cuw-dãw-niwn sob bibi-dãw-niwn sob, nyɩ na maal'ɩ nɩ nadeli-pɔl a ƴã-gan zie kãw za na bɛ sãw a bàwr, ír'ɩ a zi-sõw dɛwr bɛr.

¹⁹A bàwr-maalɛ na ɩ n a dʋ̃w zɩ̃ɩ ƴãw a dɩ̃dɛɛ dàar zu, a bàwr-maal-kuur dɔwlʋ zie gõgone anaar zu, nɩ a sɔwlɩsɔw davʋra dɩ̃dɛɛ dàar zu.

²⁰A cuw bibie ayopõi sob a, nyɩ na lɛb'a ɩ a lɛ tɔr za a sob nɛ na bɛ sʋ̃ɔmɩ sãw bɩɩ sãw ɛ́ bɛ bãw nɩ a a ƴãw. À à ŋá n'a nyɩ na ɩ a Ŋmɩn-yir-kpɛ̃ɛ ʋ vɩɛl.

²¹A cuw-dãw-niwn sob ŋa bibie pie nɩ anaar sob a, nyɩ na tĩ nɩ a Tɔl-gãw cuw. A cuw ŋa na kɔwr'ɩ da-ɓil, ɛ́ a da-ɓil ŋa pʋɔ a, nyɩ na 'wɔbr'ɩ dipɛ̃ na bɛ ƴãw dãbɩl a.

²²A Tɔl-gãw cuw bibi-dãw-niwn sob a, a nãà na maal'ɩ nɩ nadɛr bàwr tʋ̃ɔ́ páw a yel-bebe suur-dɩ-kʋ̀b a ʋl mɩŋa ƴãw nɩ a nɩbɛ za ƴãw.

²³A cuw da-ɓil pʋɔ a, ʋ na mɩ́ maal'ɩ nyɩw-a-za-bàwr kʋ̀ m bibir za nɩ nadɛɛ ayopõi nɩ pʋrɩ ayopõi a ƴã-gan zie kãw za na bɛ sãw a. Bibir za mɩ̀ a, ʋ na mɩ́ maal'ɩ nɩ bʋrale bàwr páw a ʋ yel-bebe suur-dɩ-kʋ̀b.

²⁴Ʋ na mɩ́ tɩr'ɩ ble kilo[98] lɩzɛr'ɩ pie nɩ kãá litɩr ayʋɔb nadɛr za nɩ bʋrale za bàwr ƴãw.

²⁵A Sɛwr cuw na mɩ́ tĩ a cuwr ayopõi sob bibie pie nɩ anũu sob a ƴãw a, a nãà na mɩ́ tu n a tub-been nɛ mɛ̃ a Tɔl-gãw cuw daar a: a yel-bebe suur-dɩ-kʋ̀b bàwr-been nɛ, a nyɩw-a-za-bàwr-been nɛ, a de-kʋ̀b-been nɛ, a ble nɩ a kãá de-kʋ̀b-been nɛ.»