Read Dagara, Northern Ezekɩɛl 6 Bible Online

Ezekɩɛl 6 - Dagara, Northern bible

Ezekɩɛl 6

¹A Sore tɩ yel mɛ̃ na:

²«Nɩsaal bie e, lɩɛb a fʋ niwn cɔw a Ɩsɩrayɛl tan ɛ́ ƴɛ̀r naaŋmɩn-ƴɛ̀r-manɛ ƴɛ̀rʋ kʋ̀ a.

³Fʋ na yel'a: Ɩsɩrayɛl tan i, nyɩ bɛr wõ a ƴɛ̀r-bie a Sore Naaŋmɩn na ƴɛ̀rɛ kʋ̀rɛ a nyɩ kpɩɛrbɛ nɩ a tãli a, a gblãkowe nɩ a bà-fʋɔlɩ kpɩɛrbɛ a: ɩ̃ na ɩ n zɛbr lo a nyɩ zu sãw a nyɩ maalʋ-ziir bɛr.

⁴Bɛ na dá n a nyɩ bàwr-maal-kube lɔb, ŋmɛr a nyɩ parfɛ̃ nyɩwfʋ ziir bɛr, ɛ́ a nyɩ yaga zie na lo na kpi a nyɩ ŋmɩn-dɛgɛ niŋé.

⁵Ɩ̃ na bin nɩ a Ɩsɩrayɛl nɩbɛ kũuni a bɛ ŋmɩmɛ niŋé ɛ́ yaarɩ a bɛ kɔbɛ viiri koli a bɛ bàwr-maal-kube.

⁶Zie za nyɩ na kpɩɛr a, a ten na ɩ n zawlɛ ɛ́ bɛ jɛ a maalʋ-ziir bɛr. A nyɩ bàwr-maal-kube na ŋmɛr'a gã, ɛ́ kʋ̃ tɛr yel-ɩra kãw za ɩ. Bɛ na ŋmɛr'ɩ a nyɩ ŋmɩmɛ bɛr, ír a bɛr, ɛ́ sãw a nyɩ parfɛ̃ nyɩwfʋ ziir bɛr. Bom nɛ za nyɩ na maalɩ a na sãw na, a nʋɔr kʋ.

⁷Nɩ-yaga na lo na kpi a nyɩ sɔgɔ. Lɛ n'a nyɩ na sàw de kɛ́ mãa n'ɩ a Sore.

⁸Ɛcɛ ɩ̃ na bɛr'ɩ nyɩ mɩnɛ bɛ cãà vʋʋrɛ a zɛbr pùorí, ɛ́ a bɛ ŋa na cɩ̃ɛ a na yaar'ɩ a tẽ-sãanbɛ pʋɔ.

⁹Bɛ na tɛr'ɩ a ɩ̃ tɩɛrʋ a nɩ-bʋʋrɛ bɛl sɔgɔ bɛ na na diw bɛ cen nɩ a. Bɛ na lɛb'a tɩɛrɩ a lɛ ɩ̃ na tɩ sãw a bɛ soci-faar na bɛ tu m'a bɛr, ɛ́ kpol a bɛ mimie na jɩ́rɛ a ŋmɩmɛ a bɛr a. Lɛ n'a a bɛl mɩŋa vʋla kʋ̃ ɩrɛ bɛ ɩ, a ɩb na bɛ maal'ɩ wob bɛ na ɩ a ƴãw.

¹⁰Bɛ na sàw na de k'aa mãa, a Sore, ɩ̃ bɛ tɩ ƴɛ̀r vuo pʋɔ a lɛn daar ɩ̃ na tɩ yel a bʋ̃-faar á ŋá a càarɩ bɛ a ɩ!»

¹¹À ŋá n'a a Sore Naaŋmɩn tɩ yel mɛ̃: «Puori nuru, tɛb tɛb gbɛ́ɛ ɛ́ yel: “We!” a Ɩsɩrayɛl nɩbɛ vĩ-ɩb nɩ a bɛ ɩb na bɛ maal'ɩ wob a ƴãw. Bɛ na kʋ bɛ nɩ a zɛbr zie, bɛ na kpi n kɔ̃ nɩ jɛ̀lmɛ̃ bàalʋ kũu.

¹²A bɛl na zãá a na kpi n a jɛ̀lmɛ̃ bàalʋ kũu, a bɛl na pɩɛl'a na kpi n a zɛbr zie, ɛ́ a bɛl na cɛ bɛ piw a na kpi n kɔ̃. Ɩ̃ na bɛr'ɩ a ɩ̃ suur ʋ ìr a bɛ zu.

¹³A bɛ kũuni na yɛ́r a pàw a tẽsɔw a bɛ ŋmɩmɛ sɔgɔ, ɛ́ viiri koli a bɛ bàwr-maal-kube, a tan nɩ a tãli nyɛɛ zu, a tɩ-va-ɓaar na tɔm zimpiri a sɔgɔ, nɩ a ziir al za bɛ na mɩ́ maalɩ bagɛ kʋ̀ a bɛ ŋmɩmɛ a. Lɛ n'a ŋa za na sàw k'ɩ̃ɩ ɩ n a Sore.

¹⁴Ɩ̃ na wul bɛ nɩ a ɩ̃ fãw. Ɩ̃ na sãw nɩ a bɛ tẽw bɛr, ɛ́ ɩ a ziir al za bɛ na kpɩɛr a ɩ zawlɛ, a na yi a wɛja-kpalɛ na be a saa-pɛrɩ́-dʋrʋ-lowr ɛ́ tɩ tɔ a Divla tẽ-kpɛ̃ɛ na be a saa-pɛrɩ́-gʋba-lowr a. Lɛ n'a bɛ za na sàw k'ɩ̃ɩ ɩ n a Sore.»