Read Dagara, Northern Oze 13 Bible Online

Oze 13 - Dagara, Northern bible

Oze 13

¹A Efarayim na mɩ́ tɩ ƴɛ̀rɛ a, dɛ̃bɩ̃ɛ mɩ́ tɩ nyɔw nɩ a nɩbɛ za. A Ɩsɩrayɛl tẽw pʋɔ a, a ʋ yúor tɩ yi na. Ɛcɛ a Bàál ʋ na wa puore a, ʋ sãw na, ɛ́ a ʋ sãwna ŋa kʋ ʋ na.

²A ƴɛrɛŋa mɩ̀ a, bɛ cãà na maalɛ a yel-bier: bɛ nyɩlɛ nɩ salm-zɩɛ maalɛ nɩ bome, bɛ nyɩlɛ nɩ salm-zɩɛ maalɛ nɩ tɩbɛ, nɩ a bɛ bãwfʋ, nɩsaal bʋ̃-maalɩ n'ɩ à á ŋá za. Ɛcɛ a al ƴãw n'a bɛ mɩ́ yel: «A fɛr'a kɛ́ tɩ maalɩ bàwr kʋ̀ a!» Nɩsaalbɛ pãa mɩ́ wa nyɔw nadeli kɔ́rɛ mɔwrɛ, nyɩ maal'a ŋmɛ ɛ!

³Lɛ so, bɛ na tɔl'a mɛ̃ biɓaara ulu a, mɛ̃ biɓaara ɓɩɛlʋ na zore a, mɛ̃ sàwr sɛsɛb-pɩl na ɓáw cen zãá nɩ a ble vab gbãgbala a. Bɛ na ɩ na mɛ̃ zʋ̀ʋ́r na yire vʋɔrɩ́ a.

⁴Ɛ́ a mãa a, a Eziptɩ tẽw yib daar za n'a ɩ̃ ɩ a Sore fʋ Naaŋmɩn, fʋ bɛ lɛb tɛr Naaŋmɩn a bɛ ɩ a mãa n'ʋ ɛ, faarɛ kãw za bɛ be be ƴãw pʋɔ a ɩ̃ ƴãw ɛ.

⁵Mãa n'ʋ tɩ cɩ̃ɩnɛ fʋ a wɛja-kpalɛ pʋɔ, a wɛr tẽw pʋɔ fʋ na tɩ be a.

⁶Fʋ na dɛ wa tarɛ a mʋ̃ɔ 'wɔbrʋ zie a, fʋ 'wɔb'ɩ a mʋ̃ɔ tɩw, ɛ́ fʋ na wa tɩw baar'a, fʋ ɩrɛ nɩ pɔ̀l-ɩb[31], alɛ n'a so fʋ yiiri mɛ̃ bɛr.

⁷Lɛ n'a ɩ̃ lɩɛbɩ gbẽw a nyɩ ƴãw, ɩ̃ ũú na gù nyɩ a sɔ́r zu mɛ̃ nyũo a.

⁸Ɩ̃ ìr'ɩ a nyɩ ƴãw mɛ̃ ursɩ mã bɛ na nyɔw a bile a, ɩ̃ na 'hel'ɩ a nyɩ nyarʋ, ɩ̃ na 'wɔb nyɩ na mɛ̃ gbẽw-nyãw a, a wɛ-dʋn na taw nyɩ na ɓɛl ɓɛl.

⁹Ɩsɩrayɛl ɩ, fʋ̃ʋ n'ɩ ŋan bɛ ŋmɛr bɛr, mãa yõ n'ʋ na faa fʋ.

¹⁰A fʋ nãà na na faa fʋ a, nyɩnɛ n'a ʋ cen? Ɛ́ a fʋ ƴɛ̀r-maalbɛ bɛl na be a fʋ ten za pʋɔ a, nyɩnɛ n'a bɛ cen? A bɛl ƴãw fʋ na tɩ yel: “Kʋ̀ mɛ̃ nãà nɩ nɩ-bɛrɛ!”[32]

¹¹Lɛ n'a ɩ̃ tɩ kʋ̀ fʋ na-mɩnɛ nɩ suur, ɛ́ lɛb de bɛ a ɩ̃ su-yãyaar pʋɔ[33].

¹²A Efarayim sãwna gã nɩ zi-been, a ʋ yel-bier maal'a gã cɛlɛ.

¹³A pʋ-dɔwra 'wɔbrʋ dúor ʋ na, ɛcɛ ʋ bɛ bãw yã ɩ, a ʋ dɔwfʋ ta na, ʋʋ zawrɩ a mã púorí yib.

¹⁴Ɩ̃ɩ pãa na faa bɛ a kpɩmɛ tẽw nuru pʋɔ ɔ? Ɩ̃ pãa na piw bɛ tɛr bɛ ta kpi e? Kũu u, a fʋ zɛbr bome ɩ n ŋmɩn? Kpɩmɛ tẽw i, a fʋ fãw na kʋrɛ a ɩ n ŋmɩn[34]? Nɩbaalʋ zɔba kãw za bɛ cãà a ɩ̃ zie ɩ.

¹⁵A Efarayim yele za saa maalɛ vla a ʋ yɛbr sɔgɔ a, ɛcɛ saa-pɛrí sɛsɛb na wa na, Sore sɛsɛb na yi wɛja-kpalɛ pʋɔ a na wa na wa ɩ a bul-nɛ́ɛ nɩ a kʋ̃ɔ-'wɔ̃wfʋ zie a ko gã. Bɛ na faa nɩ a na-bome za, a bʋ̃-vɩɛlɩ vɩɛlɩ za cen nɩ.