Read Dagara, Northern Oze 2 Bible Online

Oze 2 - Dagara, Northern bible

Oze 2

¹Bibir kãw, a Ɩsɩrayɛl bibiir na yãwmɛ na mɛ̃ kʋ̃ɔ-kpɛ̃ɛ nʋɔr biire bɛ na kʋ̃ tʋ̃ɔ́ manɩ, ɛ́ kʋ̃ tʋ̃ɔ́ sɔ́r a. Ɛ́ a be a Naaŋmɩn na tɩ yere kʋ̀rɛ bɛ: «Nyɩ bɛ ɩ ɩ̃ nɩ-bʋʋrɛ ɩ», be n'a ʋ na bʋɔlɛ bɛ: «Naaŋmɩn na vʋʋrɛ a bibiir.»

²A Zuda bibiir nɩ a Ɩsɩrayɛl bibiir na lɛb'a ɓã taa ɩ been, bɛ na kaa na ír nɩ-kpɛ̃ɛ been, ɛ́ bɛ na so nɩ a tẽw. Bʋ̃ʋ n'ʋ vɛ̃, a Izireyɛl bibir na ɩ n bibi-kpɛ̃ɛ.

³Nyɩ yere a nyɩ yɛbr kɛ́: «Ɩ̃ nɩ-bʋʋrɛ!», ɛ́ a nyɩ yeepuuli kɛ́: «Pɔw-nɔna nɔna.»

⁴«Nyɩ dɩ n a nyɩ mã Ɩsɩrayɛl ƴɛ̀rʋ, nyɩ dɩ n ʋ ƴɛ̀rʋ, a Sore n'ʋ yere, bʋ̃ʋ n'ʋ vɛ̃, ʋ bɛ ɩ ɩ̃ pɔw ɛ, ɩ̃ɩ bɛ ɩ a ʋ sɩr ɛ.» «Ʋ ír a pɔw-yɛm bãwfʋ a ʋ niwn ƴãw! Ʋ ír a ʋ pɩ̃ɔ-yele bãwfʋ[4] bɛr a ʋ bɩrɛ ƴãw!

⁵Alɛ bɛ ɩ lɛ, ɩ̃ na yàa nɩ a ʋ bʋ̃-suuri ɛ́ bɛr ʋ ƴã-gã-kpãkpol, ɩ̃ na ɩ na ʋ ŋmɛ̃ mɛ̃ a ʋ dɔwfʋ bibir a! Ɩ̃ na ɩ na ʋ ŋmɛ̃ taa nɩ a wɛja-kpalɛ, ɩ̃ na ɩ na ʋ lɩɛbɩ tẽsɔw-kõw, ɩ̃ na ɩ na ʋ kpi n kʋ̃ɔ-nyúur.»

⁶«Ɩ̃ kʋ̃ nɔnɛ a ʋ bibiir ɛ: pɔw-yɛm bibiir na nɛbɛ a ƴãw.

⁷Sɩza n'a, a bɛ mã kʋɔr'ɩ ʋ tʋɔra, a ʋl na dɔw bɛ a, tone nɩ vĩ tome. Ʋ mɩ́ tɩ yel'a: Ɩ̃ na zɔrɛ na tuur a ɩ̃ sɛnbɛ, a bɛl na kʋ̀rɛ mɛ̃ a dipɛ̃ nɩ a kʋ̃ɔ a, a pi-kɔblʋ pɛnɛ nɩ a lɛ̃ fomie pɛnɛ a, a kãá nɩ a divɛ̃ a.

⁸Lɛ so, a mãa Sore, ɩ̃ na fur'ɩ a ʋ sɔ́r nɩ gʋʋr, ɩ̃ na de nɩ bom gàr pàw nɩ ʋ, ɛ́ ʋ kʋ̃ lɛb nyɛ̃ a ʋ sɛ́ɛ ɩ.

⁹Ʋ na diwr'a bɩ́ɛrɛ a ʋ sɛnbɛ ɛ́ kʋ̃ páw bɛ ɩ, ʋ na bɔbr bɛ na ɛ́ kʋ̃ nyɛ̃ bɛ ɩ. Lɛ n'a ʋ na yel: “Ɩ̃ na lɛb'a cen a ɩ̃ sɩr-dãw-niwn sob zie. Bʋ̃ʋ n'ʋ vɛ̃, ɩ̃ tɩ wone nɩ nʋ̃ɔ̀ a ʋ zie a lɛn daar zuo a ƴɛrɛŋa!”

¹⁰Ɛcɛ, ʋ bɛ tɩ bãw kɛ́ mãa n'ʋ tɩ kʋ̀rɛ ʋ a ble, a divɛ̃-paala nɩ a kãá-paala a ɩ. Ɩ̃ kʋ̀ ʋ nɩ salm-zɩɛ nɩ salm-pla sãsaralɛ, ʋ de a tõ n kʋ̀ Báàl.

¹¹Alɛ so, ɩ̃ na lɛb'a de a ɩ̃ ble a ble cɛb daar, nɩ a divɛ̃-paala a divɛ̃ daar. Ɩ̃ na faa nɩ a ɩ̃ pi-kɔblʋ pɛnɛ nɩ a ɩ̃ lɛ̃ pɛnɛ na tɩ pàw a ʋ faalʋ a.

¹²Ƴɛrɛŋa ʋl a, ɩ̃ na wul'ɩ a ʋ faalʋ a ʋ sɛnbɛ. Nɩr kʋ̃ piw mɛ̃ sɔ́r a lɛ ƴãw ɛ.

¹³Ɩ̃ na ɩ n a ʋ nʋ̃ɔ̀ za baarɩ, a ʋ cuwr, a ʋ cuw-paalɛ, nɩ a ʋ pɩ̃ɛnʋ-bibie, nɩ a ʋ cuw-bɛrɛ za.

¹⁴Ɩ̃ na sãw nɩ a ʋ divɛ̃ tɩɩr púo nɩ a ʋ kãkã-tɩɩr bɛr, al ʋ na tɩ tɛr yere nɩ: “A sã-ya n'ɩ à á ŋá a ɩ̃ sɛnbɛ na kʋ̀ m a.” Ɩ̃ na ɩ na a lɩɛbɩ tuwr, a na lɩɛb'ɩ wɛ-dʋn bʋ̃-dɩrɩ.

¹⁵A bibie al ʋ na zɔ tu a Báàl mɩnɛ pùor a, ɩ̃ na ɩ na ʋ ya a za. Ʋ mɩ́ tɩ maal'ɩ bàwr kʋ̀ a. Ʋ mɩ́ tɩ ƴãw nɩ a ʋ bamɛ nɩ a ʋ pɩ̃ɛmɛ zɔrɛ tuur'ɩ a ʋ sɛnbɛ, ɛ́ mɩ́ tɩ yiiri mɛ̃ bɛr, a Sore n'ʋ yere.

¹⁶Mãa n'ʋ na bɔ ʋ, ɩ̃ na lɛb'a tɛr ʋ kpɛ n a wɛja-kpalɛ pʋɔ tɩ ƴɛ̀r'ɩ ʋ.

¹⁷Be n'a ɩ̃ na tɩ lɛb kʋ̀ ʋ a ʋ divɛ̃ tɩɩr póru, ɛ́ ɩ a Akɔɔr bà-fʋɔla[5] lɩɛbɩ faafʋ tɩɛrʋ dɩ̃dɔr. Ɛ́ a be a, ʋ na tu m'a, mɛ̃ a ʋ pɔ̀lʋ daar ʋ na mɩ́ tɩ tu m'a, a bibir ʋl ʋ na yi a Eziptɩ tẽw a.»

¹⁸«A ʋlɩ bibir nɛ a, a Sore n'ʋ yere, ʋ na bʋɔlɛ mɛ̃ nɩ: “Ɩ̃ sɩr”, ʋ kʋ̃ cãà bʋɔlɛ mɛ̃: “Ɩ̃ Báàl, ɩ̃ zu-sob ɛ.”

¹⁹Ɩ̃ na ɩ n a Báàl mɩnɛ yée bɔr a ʋ nʋɔrɩ́, ɛ́ bɛ kʋ̃ cãà pore a yée á ŋá yúor mɩ̀ ɛ.

²⁰A ʋlɩ bibir nɛ a, mãa nɩ a wɛ-dʋn, a saa-zu lili nɩ a tẽsɔw bʋ̃-vuri na maal'ɩ wõ-taa a ɩ̃ nɩ-bʋʋrɛ ƴãw. Ɩ̃ na kár'ɩ a tam nɩ a zɛbr-sɔ-kpɛ̃ɛ bɛr, ɛ́ sãw a za bɛr, a kʋ̃ cãà a tẽw pʋɔ ɩ, ɩ̃ɩ na sàw na k'aa ɩ̃ nɩbɛ mɩ́ ɓãá ƴãw gúre.

²¹Ɩsɩrayɛl ɩ, ɩ̃ na ƴãw nɩ fʋ nɩ yúor na bɛ tɛr lɩɛb-bɛrʋ a. Mɩnʋ nɩ yel-na-tu-sɔr-a pʋɔ n'a, ɩ̃ na ƴãw nɩ fʋ a yúor. Nɔ̃wfʋ nɩ su-ɓaarʋ pʋɔ n'a, ɩ̃ na ƴãw nɩ fʋ a yúor.

²²Pùor-bɛ-lɛbrʋ pʋɔ n'a ɩ̃ na ƴãw nɩ fʋ a yúor. Lɛ n'a fʋ na bãw a Sore.

²³A ʋlɩ bibir nɛ a, a Sore n'ʋ yere, ɩ̃ na maal'ɩ a salom pʋ-tɩɛrʋ, ɛ́ a salom maalɩ a tẽsɔw pʋ-tɩɛrʋ.

²⁴Ble nɩ divɛ̃-paala nɩ kãá-paala n'a na maalɩ a tẽsɔw pʋ-tɩɛrʋ, ɛ́ à á ŋá za na maal'ɩ a Izireyɛl pʋ-tɩɛrʋ.

²⁵Ɩ̃ na bʋ̀r'ɩ a Izireyɛl a tẽw pʋɔ a mãa ƴãw, ɩ̃ na nɔnɛ nɩ a Lo-Uruhama, ɩ̃ na yel'ɩ a Lo-Ami: “Fʋ ɩ n a ɩ̃ nɩ-bʋʋrɛ”, ɛ́ ʋ na sɔw mɛ̃ na: “Ɩ̃ Naaŋmɩn.”»