Read Dagara, Northern Oze 4 Bible Online

Oze 4 - Dagara, Northern bible

Oze 4

¹A Sore dɩrɛ nɩ nɩ a tẽw dem ƴɛ̀rʋ. Ɩsɩrayɛl nɩbɛ ɛ, nyɩ bɛr wõ a lɛ a Sore na yere a: «Yel-mɩŋa nɩ tɔ-nɔ̃wfʋ bɛ cãà a tẽw pʋɔ ɩ. Nɩr za bɛ cãà bãw a mãa Naaŋmɩn ɛ.

²Ɛ́ ŋmɛ-ƴãw-taa nɩ ziri nɩ nɩ-kʋ nɩ nyãnyuwlu nɩ pɩ̃ɔ-yele pãa pàw a ziir za. Bɛ kʋrɛ nɩ a nɩbɛ suwle taa.

³Alɛ n'a so a tẽw ko ʋ za, ɛ́ a ʋ nɩbɛ kõwne tɩ lãwnɩ a wɛ-dʋn nɩ a saa-zu lili. A kʋ̃ɔ-kpɛ̃ɛ zʋ́mɛ́ tɛɛ za kʋ̃ cãà ɩ.»

⁴Nɩ-sãsaralɛ bɛ n'ʋ bɛ na yel k'ʋʋ sãw na ɩ, bɩɩ bɛ na zɛbr'ɩ ɛ. Bàwr-maal-kara a, fʋ̃ʋ n'ʋ ɩ̃ maalɛ nɩ a ƴɛ̀rʋ, a Sore n'ʋ yere.

⁵Fʋ na ŋmɩɛr'ɩ gbɛ́ɛ mʋ̃tɔ̃-tuo, ɛ́ a ƴɛ̀r-manɛ mɩ̀ lãwnɩ fʋ ŋmɩɛr a gbɛ́ɛ a tɩ̃ɩsɔw. Ɩ̃ na pàw nɩ a fʋ mã Ɩsɩrayɛl nʋɔr.

⁶A ɩ̃ nɩ-bʋʋrɛ báarɛ na, bɛ na bɛ bãw mɛ̃ a ƴãw. Fʋ na bɛ bɔbr a ɩ̃ bãwfʋ a, ɩ̃ mɩ̀ na zawrɩ fʋ na bɛr, ɛ́ fʋ kʋ̃ cãà ɩ a ɩ̃ bàwr-maalɛ ɩ. Fʋ na yiiri a fʋ Naaŋmɩn wulu bɛr a, a mãa mɩ̀, ɩ̃ mɩ̀ na yiir'ɩ a fʋ bibiir bɛr.

⁷A bàwr-maalbɛ za cɔ̃cɔ̃ maal'ɩ yel-bier sãw mɛ̃. Ɩ̃ na ɩ n a bɛ yúor na yi a lɩɛbɩ vĩ.

⁸A ɩ̃ nɩ-bʋʋrɛ yel-bebe n'a bɛ guole nɩ bɛ tʋɔra[9]. Bɛ bɛ nyɛrɛ a ɩ̃ nɩ-bʋʋrɛ sãwna zie ɩ.

⁹A bom nɛ na na ɩ a ɩ̃ nɩ-bʋʋrɛ a, ʋl tɔr za n'ʋ na ɩ a bàwr-maalbɛ. Ɩ̃ na dɔwrɩ bɛ na a bɛ cenu na bɛ vɩɛl a ƴãw, ɩ̃ na yáa nɩ a bɛ ɩ-faar san.

¹⁰Bɛlɛ saa mɩ́ dɩrɛ sɛw ŋmɩn a, bɛ bɛ be za na tɩw ɛ. Bɛ na mɩ́ tu n a pɔw-yɛmɛ pùor, ɛ́ kʋ̃ dɔw yɛ̀r ɛ. Bʋ̃ʋ n'ʋ vɛ̃, bɛ bɛr'ɩ a mãa Sore ƴãwfʋ.

¹¹A divɛ̃ tɩɩr wɔmɛ na na maalɩ vla a tɩɛrʋ ɩ na a ɩ̃ nɩ-bʋʋrɛ bɛ bãw yã ɩ.

¹²Dàar tɩɩb zie n'a a ɩ̃ nɩ-bʋʋrɛ sowre bʋ̃-sowri. Dakʋra n'ʋ wule bɛ bʋ̃-wuli! Pɔw-yɛm ɩ-ɩrɩ yã bɔrɛ nɩ bɛ na. A pɔw-yɛm ɩ-ɩrɩ zũú, bɛlɛ nɩ a bɛ Naaŋmɩn bʋ́r'ɩ taa.

¹³Tan zu n'a bɛ mɩ́ do tɩ maalɩ a bàwr. Tãli zu n'a bɛ nyɩwr a tɩ-suur-zɔ̃-na-nyùur-vla-vla-a. Sɛn, pepilie nɩ terebɛ̃tɩ tɩɩr ɓaarʋ na maalɩ a al ƴãw a pile n'a bɛ mɩ́ be. Lɛ so a nyɩ pɔwyaar na ɩrɛ mɛ̃ pɔw-yɛmɛ a, ɛ́ a nyɩ biir-pɔwbɛ tone pɩ̃ɔ yel-bier tome.

¹⁴Ɛcɛ ɩ̃ kʋ̃ dɔwrɩ a nyɩ pɔwyaar nɩ a nyɩ biir-pɔwbɛ a bɛ ɩ-ɩrɩ ƴãw ɛ. Bʋ̃ʋ n'ʋ vɛ̃, a bàwr-maalbɛ tɛɛ za mɩ́ tɛr'ɩ pɔw-yɛmɛ taw yi n pùor, bɛlɛ nɩ ŋmɩmɛ yir pɔw-yɛmɛ nɛbɛ lãwnɛ a bàwr bʋ̃-dɩrɩ. Mɛ̃ a lɛ a zʋkpar na yel a: “Nɩ-bʋʋrɛ na bɛ bãw yã a wɩɛrɩ bɛ loba zie.''

¹⁵«Ɩsɩrayɛl ɩ, à ŋá n'a fʋ tone a pɔw-yɛm tome. A Zuda nãá nɩ̃ɛ mɩ̀ ta lo a sãwna been nɛ pʋɔ ɩ! Nyɩ ta mɩ́ cen a Gilgal ɛ, nyɩ ta mɩ́ do a Bɛtɩ-Awɛn[10] ɛ, ɛ́ ta mɩ́ pɔ yel ɛ: “A Sore na vʋʋrɛ a...!''»

¹⁶A Ɩsɩrayɛl tɩ tõ n zu-kpɛ̃w tome mɛ̃ na-kʋ́ɔra bɛ na ƴãwnɛ dàa a nyũumɩ́ ʋ bɛ sàwr a. Bʋnʋ ƴãw n'a a Sore na kaarɛ bɛ zie mɛ̃ píir bɛ na kparɛ cere nɩ dʋn mʋ̃ɔ 'wɔbrʋ zie a?

¹⁷A Efarayim nɩbɛ nɩ tɩbɛ n'a lãwnɛ, nyɩ bɛr bɛ!

¹⁸Bɛlɛ wa nyũ tɩ kuoli a, nɩ-fa-ɩb'a cɛ, a bɛ nɩ-bɛrɛ nɔnɛ nɩ a vĩ yele.

¹⁹Sɛsɛb-pɩl na ɓáw bɛ na cere nɩ, ɛ́ a bɛ bàwr na ɩrɛ bɛ nɩ vĩ.