Read Dagara, Northern Amɔsɩ 1 Bible Online

Amɔsɩ 1 - Dagara, Northern bible

Amɔsɩ 1

¹A Amɔsɩ na tɩ ɩ Tekowa[1] tẽw guo-guole kãw a ƴɛ̀r-bie n'a be a sɛbɛ ŋa pʋɔ. A na tɩ cɛ yome ayi a tẽsɔw-kɔbr na na dam a, a Sore tɩ ɩ na a Amɔsɩ nyɛ̃ bom a Ɩsɩrayɛl tẽw ƴãw. A tɩ ɩ n a Zuda tẽw nãà Ozɩasɩ daar, nɩ a Ɩsɩrayɛl tẽw nãà Zerobowam na ɩ Zowasɩ bidɛb a daar.

²A Amɔsɩ tɩ yere na: «A Sore be n Sɩyɔ̃ tẽw ùore a yire, ʋ be n a Zerizalɛm tanɛ. A dʋ̃-cɩ̃ɩnbɛ dʋn mʋ̃ɔ 'wɔbrʋ ziir lɩɛb'ɩ wahala ziir, ɛ́ a Karmɛl[2] tãw nyʋɔr ko ʋ za.»

³À ŋá n'a a Sore yere: «A Damasɩ[3] tẽw dem na gaarɩ a ɩ̃ zu gb'a ayi gb'a ata a, alɛ so ɩ̃ kʋ̃ lɩɛbɩ a dɔwrʋ ɩ̃ na yel k'ɩ̃ɩ na ƴãw bɛ na a bɛr ɛ. Bɛ de nɩ kur-jajaa vu tɔlɩ a Galaadɩ tẽw dem zu.

⁴À á ŋá zũú, ɩ̃ na ƴãw na vũu dɩ a nãà Hazayɛl[4] yir, vũu na dɩ n a nãà Bɛn-Hadadɩ yir.

⁵A dàar na jɩ̀r a Damasɩ tẽ-kpɛ̃ɛ dɩ̃dɛɛ a, ɩ̃ na kar a na bɛr, a nãà ʋl na be a faalʋ bà-fʋɔla pʋɔ a, ɩ̃ na ír ʋ na, ɩ̃ na diw nɩ a nãà ʋl na dɩrɛ naalʋ a nʋ̃ɔ̀ tẽw a. Lɛ n'a bɛ na diw a Aram tẽw dem cen nɩ Kɩ́ɩ̀r[5] tẽw.» A Sore n'ʋ yel.

⁶À ŋá n'a a Sore yere: «A Gaza tẽw dem na gaarɩ a ɩ̃ zu gb'a ayi gb'a ata a, alɛ so ɩ̃ kʋ̃ lɩɛbɩ a dɔwrʋ ɩ̃ na yel k'ɩ̃ɩ na ƴãw bɛ na a bɛr ɛ: bɛ na nyɔw nɩ-yaga yaga cen nɩ kɛ́ bɛ tɩ kʋɔrɩ Edɔm tẽw dem zie a zũú,

⁷ɩ̃ na ƴãw nɩ vũu a Gaza tẽw dacine, ʋʋ na dɩ n a ʋ yir-vɩɛlɩ vɩɛlɩ.

⁸Ɩ̃ na diw nɩ a Asɩdɔdɩ tẽw nãà, ɩ̃ na diw nɩ a sob nɛ na tɛr a nãà dabɔl a Asɩkalon tẽw a. Ɩ̃ na ìr'ɩ a Ekiron[6] tẽw dem ƴãw, ɛ́ a Filisɩtɛ̃ mɩnɛ ŋmãa na cɛ a na kpi na.» A Sore Naaŋmɩn n'ʋ yel.

⁹À ŋá n'a a Sore yere: «A Tɩ́ɩ̀r tẽw dem na gaarɩ a ɩ̃ zu gb'a ayi gb'a ata a, alɛ so ɩ̃ kʋ̃ lɩɛbɩ a dɔwrʋ ɩ̃ na yel k'ɩ̃ɩ na ƴãw bɛ na a bɛr ɛ: bɛ na nyɔw nɩ-yaga yaga cen nɩ tɩ kʋ̀ a Edɔm tẽw dem, ɛ́ yiiri a yɛbr wõ-taa na be bɛlɛ nɩ a Ɩsɩrayɛl nɩbɛ cará a zũú,

¹⁰ɩ̃ na ƴãw nɩ vũu a Tɩ́ɩ̀r tẽw dacine, ʋʋ na dɩ n a ʋ yir-vɩɛlɩ vɩɛlɩ.»

¹¹À ŋá n'a a Sore yere: «A Edɔm tẽw[7] dem na gaarɩ a ɩ̃ zu gb'a ayi gb'a ata a, alɛ so ɩ̃ kʋ̃ lɩɛbɩ a dɔwrʋ ɩ̃ na yel k'ɩ̃ɩ na ƴãw bɛ na a bɛr ɛ: bɛ na vʋ̃ɔ zɛbr-sɔ-kpɛ̃ɛ diwr'ɩ a Ɩsɩrayɛl nɩbɛ na ɩ a bɛ yɛbr, ɛ́ bɛ sàw nɩbaalʋ kãw kpɛ bɛ a bɛ ƴãw a. A bɛ suur nɩ a bɛ pʋ-bier na bɛ tɛr baarʋ daar a zũú,

¹²ɩ̃ na nyɩw nɩ a Teman tẽw bɛr, ɛ́ ƴãw vũu dɩ a Bɔsɩra tẽw yir-vɩɛlɩ vɩɛlɩ.»

¹³À ŋá n'a a Sore yere: «A Amɔ̃[8] tẽw dem na gaarɩ a ɩ̃ zu gb'a ayi gb'a ata a, alɛ so ɩ̃ kʋ̃ lɩɛbɩ a dɔwrʋ ɩ̃ na yel k'ɩ̃ɩ na ƴãw bɛ na a bɛr ɛ: bɛ na wɛr a Galaadɩ pɔw-pée kɛ́ bɛ tʋ̃ɔ́ ɩ a bɛ tẽw yɛ̀lɩ a zũú,

¹⁴ɩ̃ na ƴãw nɩ vũu a Araba tẽw, ʋʋ na dɩ n a ʋ yir-vɩɛlɩ vɩɛlɩ za, zɛbr bibir zɛbr cɛlsɩ pʋɔ nɩ saa-sɛsɛb pʋɔ.

¹⁵Bɛ na nyɔw nɩ a bɛ nãà cen nɩ ta-tẽw, ʋlɛ nɩ a ʋ sojarɩ nɩ-bɛrɛ.» A Sore n'ʋ yel.