Read Dagara, Northern Amɔsɩ 2 Bible Online

Amɔsɩ 2 - Dagara, Northern bible

Amɔsɩ 2

¹À ŋá n'a a Sore yere: «A Mowab[9] nɩbɛ na gaarɩ a ɩ̃ zu gb'a ayi gb'a ata a, alɛ so ɩ̃ kʋ̃ lɩɛbɩ a dɔwrʋ ɩ̃ na yel k'ɩ̃ɩ na ƴãw bɛ na a bɛr ɛ: bɛ na nyɩw a Edɔm tẽw nãà kɔbɛ ɛ́ ɩ a lɩɛbɩ gʋɔr-pla a zũú.

²Ɩ̃ na nyɩw nɩ a Mowab tẽw bɛr ɛ́ ƴãw vũu dɩ a Keriyɔtɩ[10] tẽw yir-vɩɛlɩ vɩɛlɩ. Damnʋ pʋɔ n'a a Mowab na kpi, a lɛn daar bɛ na lɔbr zɛbr cɛlsɩ pɛblɛ nɩ wɩ́ɛ a.

³Ɩ̃ na kʋ n a nãà, ʋlɛ nɩ a ʋ sojarɩ nɩ-bɛrɛ.» A Sore n'ʋ yel.

⁴À ŋá n'a a Sore yere: «A Zuda tẽw dem na gaarɩ a ɩ̃ zu gb'a ayi gb'a ata a, alɛ so ɩ̃ kʋ̃ lɩɛbɩ a dɔwrʋ ɩ̃ na yel k'ɩ̃ɩ na ƴãw bɛ na a bɛr ɛ: bɛ na zawrɩ a ɩ̃ wulu bɛr, ɛ́ bɛ sàw de a ɩ̃ nɛ-ƴãwnɩ a, bɛ na ɩ a ŋmɩn-bɛlɛbɛlɛ a bɛ sãàkʋm mɩnɛ na tɩ tuur a bɔr bɛ bɛr a,

⁵ɩ̃ na nyɩw nɩ a Zuda tẽw bɛr, ɛ́ ƴãw vũu dɩ a Zerizalɛm yir-vɩɛlɩ vɩɛlɩ.»

⁶À ŋá n'a a Sore yere: «A Ɩsɩrayɛl nɩbɛ na gaarɩ a ɩ̃ zu gb'a ayi gb'a ata a, alɛ so ɩ̃ kʋ̃ lɩɛbɩ a dɔwrʋ ɩ̃ na yel k'ɩ̃ɩ na ƴãw bɛ na a bɛr ɛ: bɛ kʋɔr'ɩ a nɩ-mɩŋa, libir ƴãw, ɛ́ kʋɔrɩ a nã́w sob nafawr-ɓɛwlɩkɛl ƴãw.

⁷Bɛ mɩ́ nɛ̃ nɩ a bãbàalbɛ mɩɩl'ɩ uuru, ɛ́ zawrɩ na bɛr wõ a nã́w sob a ƴɛ̀rʋ-dɩb zie. Sãà nɩ bie mɩ́ ganɛ nɩ nɩ a pɔwli-been lɩɛrɛ taa, à ŋá n'a bɛ mɩ́ ɩ dɛw a ɩ̃ yo-sõw vɩɛlʋ bɛr[11].

⁸A bɛ samɛ dem bʋ̃-suuri bɛ na mɩ́ de tɛr ɛ́ gù kɛ́ bɛ wa ya a bɛ samɛ[12] a, bɛ mɩ́ yɛ́r a na gã nɩ bàwr-maal-kuur za pɛr. Bɛ mɩ́ nyúur'ɩ a divɛ̃ bɛ na fa a, a bɛ ŋmɩn yir pʋɔ.

⁹Ɛcɛ a mãa a, ɩ̃ tɩ zɛb'a tʋ̃ɔ́ a Amoritɩ mɩnɛ kʋ̀ nyɩ, bɛl na kɛrɩ mɛ̃ sɛɛdɩr tɩɩr, ɛ́ kpɛmɛ mɛ̃ sɛn tɩɩr a. Ɩ̃ kʋ bɛ na pàw pɛr.

¹⁰Ɛcɛ a mãa a, ɩ̃ tɩ ɩ na nyɩ yi a Eziptɩ tẽw, ɩ̃ɩ bɩɛlɩ nyɩ yome lɩz'a ayi a wɛja-kpalɛ pʋɔ kɛ̀ nyɩ wa so a Amoritɩ mɩnɛ mɩnɛ tẽw.

¹¹Ɩ̃ tɩ ɩ na ɩ̃ ƴɛ̀r-manɛ yi a nyɩ bibiir pʋɔ, ɛ́ ɩ naziir[13] mɩnɛ yi a nyɩ nɩ-vɩɛlɩ vɩɛlɩ za pʋɔ. Sɩrɛ bɩɩ ziri Ɩsɩrayɛl nɩbɛ ɛ? A Sore n'ʋ yel.

¹²Ɛcɛ nyɩɩm a, nyɩ ƴãw nɩ a naziir mɩnɛ nyúur divɛ̃, ɛ́ yere kʋ̀rɛ a ɩ̃ ƴɛ̀r-manbɛ: Nyɩ kʋ̃ ƴɛ̀r a Naaŋmɩn yúor ƴãw ɛ.''

¹³A na ɩ à ŋá a, mãa n'ɩ ŋan waar k'ɩ̃ɩ wa ƴɛ́r nyɩ ŋmɛr bin mɛ̃ lɛ torko na paalɩ ble a na mɩ́ ƴɛ́r bom ŋmɛr a.

¹⁴A sob nɛ na tʋɔr zɔrɛ a kʋ̃ tʋ̃ɔ́ zɔ ta a sɔwlʋ zie ɩ, a fãw sob kʋ̃ tʋ̃ɔ́ ɩ a ʋ fãw-ɩb ɛ. A gãdaa kʋ̃ cɩ̃ɛ ɩ.

¹⁵A tam-tɛbrɛ kʋ̃ cãà ɩ, a sob nɛ na zɔrɛ bɛ wone a kʋ̃ cɩ̃ɛ ɩ, lãwnɩ a wur-zɔmnɛ.

¹⁶A ʋlɩ bibir a, a gãdaar pʋɔ gãdaa za na zɔ n nɩ ƴã-gã-zawla.» A Sore n'ʋ yel.