Read Dagara, Northern Zonasɩ 4 Bible Online

Zonasɩ 4 - Dagara, Northern bible

Zonasɩ 4

¹A Zonasɩ bɛ tɩ de a lɛ towtow ɛ, ɛ́ tɩ nyɛ̃ suur.

²Ʋ tɩ puor'ɩ a Sore à ŋá: «Áa Sore e! À à ŋá tɔr za bɛ n'a ɩ̃ tɩ yere ɩ̃ na tɩ cãà be a ɩ̃ tẽw pʋɔ a ɩ? Alɛ n'a ɩ̃ tɩ yi fɔ̃w zɔrɛ cere a Tarsisɩ[7]. Ɩ̃ tɩ bãwnɩ a na fʋ na ɩ Naaŋmɩn-su-ɓaarʋ sob nɩ nɩbaal-zɔrɛ a, Naaŋmɩn a suur na bɛ páwr, ɛ́ fʋ ɩ nɔ̃wfʋ tɛwr, ɛ́ mɩ́ lɛb bɛr a dɔwrʋ fʋ na tɩɛrɩ a.

³Ƴɛrɛŋa a, Sore e, ɩ̃ zɛlɛ fʋ na, de a ɩ̃ nyɔ-vʋʋrʋ, mãa kpi a, alɛ sa ɩ̃ na na cãà vʋʋrɛ a.»

⁴A Sore tɩ sowri ʋ na: «Fʋ tɛr'ɩ yel-mɩŋa fʋ na nyɛ̃ a suur a bɩɩ?»

⁵A Zonasɩ tɩ yi n a tẽw pʋɔ tɩ zɩ̃ a tẽw saa-pɛrɩ́. Ʋ tɩ maal'ɩ sɛw a be, kpɛ zɩ̃ a ʋ ɓaarʋ, ɛ́ gù a ʋlɩ bom nɛ na na ɩ a tẽw pʋɔ a.

⁶Lɛ n'a a Sore Naaŋmɩn tɩ ƴãw tɩle kãw bul do gãw a Zonasɩ, k'ʋʋ tʋ̃ɔ́ ɩ a ʋ ɓaarʋ piw ʋ tɛr, ɛ́ ɩ a ʋ su-sãwna bàalʋ sanɩ. Nʋ̃ɔ̀ tɩ kpɛ n a Zonasɩ yaga za a tɩle ŋa ƴãw.

⁷A bio daarɩ́ a zie na wa wɛlɛ a, a Naaŋmɩn tɩ ƴãw na zãzul vʋr a tɩle ʋ kpi.

⁸Al pùorí a mʋ̃tɔ̃w na wa pur a, a Naaŋmɩn ƴãw na saa-pɛrɩ́[8] sɛsɛb-tʋlʋ tʋlʋ fu, ɛ́ a mʋ̃tɔ̃w dɩ a Zonasɩ zu, a Zonasɩ tɩ cɛ blã na ɓɛl. Ʋ tɩ zɛlɛ nɩ a kũu yere nɩ: «A kũu sa ɩ̃ na na cãà vʋʋrɛ a.»

⁹Lɛ n'a a Naaŋmɩn tɩ sowri ʋ: «Fʋ tɛr'ɩ yel-mɩŋa fʋ na nyɛ̃ suur a tɩle ŋa ƴãw a bɩɩ?» A Zonasɩ tɩ sɔw na: «Ʋ̃ʋ, ɩ̃ tɛr'ɩ yel-mɩŋa na nyɛ̃ suur tɩ zɛlɛ nɩ a kũu.»

¹⁰A Sore tɩ lɛb'a yel: «A fʋ̃ʋ a, nɩbaalʋ ɩrɛ fʋ na a tɩle ŋa ƴãw, ɛcɛ fʋ bɛ hanɩ a ʋ ƴãw ɛ, fʋ bɛ ɩ ʋ bàa ɩ, tɩ̃ɩsɔw been n'a ʋ bul ɛ́ kpi tɩ̃ɩsɔw been.

¹¹Nɩbɛ tùr-lɩz'a ayʋɔb (120 000) nɩ dɔwlɛ na bɛ bãw ʋlɩ bom nɛ na ɩ vla a bɛ zie a n'a kpɩɛr a Nɩnɩɩvʋ. Dʋn yaga yaga mɩ̀ be n be. À à ŋá ƴãw a, a bɛ tɛr sɔ́r k'aa mãa, ɩ̃ mɩ̀ zɔ a Nɩnɩɩvʋ tẽ-kpɛ̃ɛ nɩbaalʋ ɛ?»