Read Dagara, Northern Sɔr-nɛ́ɛ 11 Bible Online

Sɔr-nɛ́ɛ 11 - Dagara, Northern bible

Sɔr-nɛ́ɛ 11

¹Bibir kãw, a Ɩsɩrayɛl nɩbɛ tɩ ìr'a kone kon na bɛ vɩɛl'a cɔwr a Sore. A Sore na wa wõ a a, ʋ nyɛ̃ nɩ suur ƴãw vũu dɩ a laɩ kõkowr kãw.

²A nɩbɛ tɩ ŋmɛ n cɛlsɩ zɛlɩ nɩ a Moyiir, ʋ zɛlɩ a Sore, a vũu kpiiri.

³Bɛ tɩ por'ɩ a zie nɛ yúor kɛ́ Tavera, a pɛr lɛ kɛ́ “vũu-dɩ”, bʋ̃ʋ n'ʋ vɛ̃, a be n'a a Sore tɩ ƴãw vũu a bɛ laɩ.

⁴Bibi-yũo kãw, nɛn vʋla tɩ faar'a na kʋ a nɩ-pɛ-bʋʋrɛ bʋʋrɛ na tɩ pʋɔ a Ɩsɩrayɛl nɩbɛ pʋɔ a. A Ɩsɩrayɛl nɩbɛ tɛɛ za tɩ lɛb'a tĩ kone yere nɩ: «Aa! Tɩmɛ tɩ ɩ mɛ̃ tɩ páw nɩ nɛn 'wɔb a!

⁵Tɩ cãà na bãwnɩ a zʋ́mɛ́ tɩ na mɩ́ tɩ 'wɔb mɔlɛ a Eziptɩ tẽw a, a kɔ̃kɔ̃bʋr[23], a pasɩtɛkɩ[24], a pʋaro[25], a zamãdaar nɩ a aɩ[26] a!

⁶A ka a, tɩ kpiir'ɩ kɔ̃, à á ŋá za bɛ cãà be ɩ! A mãan tɛwr dɛ n'a!»

⁷A mãan tɩ ɩ na mɛ̃ va-bʋʋrɛ kãw bɛ na bʋɔlɛ koriyãdɩr a bie, ɛ́ pɛlɩ ŋmɛ̃ mɛ̃ tɩɛ kãw na dɩ kɛ́ bɩdelɩɔm a kʋ̃ɔ.

⁸Ʋ mɩ́ tɩ lãw na lo n a ɓɩɛlʋ a tɩ̃ɩsɔw a laɩ pʋɔ. A nɩbɛ mɩ́ tɩ yi n a biɓaara zɔ yaarɩ wob. Bɛ mɩ́ tɩ ƴɛ́r a nɩ nɩɛr zu bɩɩ tɔ a tʋɔr pʋɔ. Al pùorí, bɛ dʋw nɩ ziduwle bɩɩ bɛ maal'ɩ sɛ̃sɛ̃. A mãan nʋ̃ɔ̀ mɩ́ tɩ ɩ na mɛ̃ gato bɛ na maal'ɩ kãá a.

¹⁰A Moyiir tɩ wõ n a Ɩsɩrayɛl nɩbɛ na ɓã taa, a yie yie, kone a bɛ pɛnɛ-sɛwr dɩ̃dɛɛ nʋɔr a. Nyɛɛ za tɩ kárɛ nɩ a Sore! A tɩ ɩ n kpɩɛrʋ yaga a Moyiir zie,

¹¹ʋ sowr'ʋ: «Bʋ̃ʋ n'ʋ so fʋ ɩrɛ mɛ̃ à à ŋá, Sore e? Bʋ̃ʋ n'ʋ so a fʋ pʋɔ bɛ cãà pɛlɩ a ɩ̃ ƴãw, fʋ tuo mɛ̃ a nɩbɛ bɛ ŋa za kaafʋ to-tɩbrʋ?

¹²Mãa n'ʋ tɛr a nɩ-bʋʋrɛ bɛ ŋa za pʋɔ ɔ? Mãa n'ʋ dɔw bɛ, fʋ yel mɛ̃: “Ɓori bɛ a fʋ nyãa zu, mɛ̃ bi-pɩɩla pɔw na mɩ́ ɓori a”, ɛ́ wɩɛr'ɩ bɛ a tẽw ʋl fʋ na pɔ yel kɛ́ fʋ na kʋ̀ n a bɛ sãàkʋm-kore a?

¹³Nyɩnɛ n'a ɩ̃ na páw nɛn kʋ̀ a nɩbɛ bɛ ŋa za na kone a ɩ̃ zie, yere nɩ k'ɩ̃ɩ kʋ̀ bɛ nɛn bɛ 'wɔb a?

¹⁴A nɩ-bʋʋrɛ bɛ ŋa za na ɩ tuor a, ɩ̃ kʋ̃ tʋ̃ɔ́ a tuor ŋa tuo ɩ̃ yõ tẽtẽ ɩ, ʋ tɩbrɛ na gãw a ɩ̃ fãw.

¹⁵Alɛ wa ɩ à ŋá n'a fʋ ɩrɛ mɛ̃ a, fʋ̃ʋ nɩ̃ɛ ɩ ɩ̃ kpi! A lɛ pʋɔ a, a fʋ pʋ-pɩɛlʋ n'a fʋ na ɩ a sãá a ɩ̃ zie, ɩ̃ɩ kʋ̃ nyɛ̃ a ɩ̃ kpɩɛrʋ ɛ.»

¹⁶A Sore tɩ sɔw nɩ a Moyiir: «Bʋɔlɩ nɩbɛ lɩz'a ata nɩ pie a Ɩsɩrayɛl nɩbɛ nɩ-kore pʋɔ ɓã taa, nɩbɛ fʋ na bãw bɛ ɩ nɩ-kore, ɛ́ ɩ a nɩbɛ kaarbɛ a. Tɛr bɛ wa n a tuor-taa pɛn-sɛw pɛr. Bɛ na wa lãw nɩ fʋ na àr a be a ɩ̃ niŋé.

¹⁷Ɩ̃ na siw na wa ƴɛ̀r'ɩ fʋ a be. Ɩ̃ na ɩ n a vʋʋrʋ na be a fʋ pʋɔ a blã ƴãw bɛ. Lɛ n'a bɛ na mɩ́ lãw nɩ fʋ tuo a nɩbɛ bɛ ŋa kaafʋ na ɩ tuor a, fʋ kʋ̃ cãà ɩ fʋ yõ tuore ɩ.

¹⁸A nɩbɛ bɛl a, yel bɛ: “Nyɩ so a nyɩ dɛwr bɛr cɛlɛ nɩ a bio. Nyɩ na nyɛ̃ nɩ nɛn 'wɔb, bʋ̃ʋ n'ʋ vɛ̃, a Sore wõ n a nyɩ kon nyɩ na kone a. Nyɩ yel'a: Ãa n'ʋ na kʋ̀ tɩ nɛn tɩ 'wɔb? Bom za bɛ tɩ fɛrɛ tɩ a Eziptɩ ɛ! Alɛ n'a so, ɩ̃ na kʋ̀ nyɩ nɩ a nɛn nyɩ 'wɔb.

¹⁹Bibi-been bɩɩ bibie ayi tɛwr bɛ n'a nyɩ na 'wɔb ɛ, a mɩ́ kʋ̃ ɩ bibie anũu, bibie pie bɩɩ bibie lɩzɛr ɛ.

²⁰Cuw-ɓil za n'ʋ nyɩ na 'wɔb a nɛn a tɩ ɓa nyɩ, a nʋɔr bɛ tɩ cãà bɔbr a ɩ. A na ɩ n a nyɩ dɔwrʋ, nyɩ na zawrɩ a Sore na be a nyɩ sɔgɔ bɛr a ƴãw, nɩ nyɩ na kone yere nɩ à ŋá a: Bʋnʋ ƴãw n'a tɩ nɩ̃ɛ yi a Eziptɩ mɔ̃.”»

²¹A Moyiir tɩ yel'a: «A nɩbɛ bɛ ŋa na jil pàw mɛ̃ a ɩ n nɩbɛ tùr-kɔbr ayʋɔb (600 000), ɛ́ fʋ yel kɛ́ fʋ na kʋ̀ bɛ nɩ nɛn bɛ 'wɔb cuw-ɓil za!

²²Tɩmɛ saa na ɩ mɛ̃ tɩ kʋ n a tɩ píir, a tɩ bʋʋr nɩ a tɩ nĩi za a, ɛcɛ a cãà kʋ̃ sɛw ɛ. Tɩmɛ saa na tʋ̃ɔ́ nyɔw a kʋ̃ɔ-kpɛ̃ɛ zʋ́mɛ́ za a, a cãà mɩ̀ kʋ̃ sɛw ɛ!»

²³A Sore tɩ sɔw ʋ na: «A ɩ̃ fãw nɔ̃w bɛ ta bɩɩ? Ka nɩ blã a, fʋ na nyɛ̃ nɩ a ƴɛ̀rʋ ɩ̃ na ƴɛ̀r kʋ̀ b a, a na tu na bɩɩ a kʋ̃ tu.»

²⁴A Moyiir tɩ yi n a pɛn-sɛw pʋɔ cen tɩ yel a lɛ a Sore na yel a kʋ̀ a nɩbɛ. Al pùorí ʋ bʋɔlɩ a Ɩsɩrayɛl nɩbɛ nɩ-kore lɩz'a ata nɩ pie ɓã taa, ɛ́ ƴãw bɛ àr viiri koli a pɛn-sɛw.

²⁵A Sore tɩ siw nɩ a zũzuwr pʋɔ ƴɛ̀r'ɩ a Moyiir, ɛ́ ɩ a vʋʋrʋ na be a Moyiir pʋɔ a blã kʋ̀ a nɩ-kore lɩz'a ata nɩ pie. A vʋʋrʋ na wa bere a bɛ zu wa báarɛ a, bɛ tĩ na ƴɛ̀rɛ mɛ̃ naaŋmɩn-ƴɛ̀r-manbɛ a, ɛcɛ bɛ tɩ ta n sɔgɔ bɛr.

²⁶Nɩbɛ ayi tɩ cãà na be a laɩ pʋɔ. A kãw tɩ dɩ na kɛ́ Ɛldadɩ, ɛ́ a kãw dɩ kɛ́ Medadɩ. Bɛ tɩ pʋɔ nɩ a nɩ-kore lɩz'a ata nɩ pie pʋɔ, ɛcɛ bɛ bɛ tɩ yi cen a pɛn-sɛw pɛr ɛ. A vʋʋrʋ tɩ siw nɩ a bɛ zu bɛ tĩ ƴɛ̀rɛ mɛ̃ naaŋmɩn-ƴɛ̀r-manbɛ a a laɩ pʋɔ.

²⁷Pɔlbile kãw tɩ zɔ na cen tɩ yel a Moyiir: «Ɛldadɩ nɩ Medadɩ nɛbɛ ƴɛ̀rɛ mɛ̃ naaŋmɩn-ƴɛ̀r-manbɛ a a laɩ pʋɔ!»

²⁸Nun bidɛb Zozue na tɩ ɩ a Moyiir tõ-tõ-bie a ʋ pɔ̀lʋ daarɩ́ za a tɩ yel'a: «Ɩ̃ nɩ-kpɛ̃ɛ Moyiir i, ƴãw bɛ bɛr!»

²⁹A Moyiir tɩ sɔw ʋ na: «Fʋ lɩɛr'ɩ a ɩ̃ nyuur kpɛb zie kpɛ bɩɩ? A Sore nãá kʋ̀ a ʋ vʋʋrʋ a Ɩsɩrayɛl nɩbɛ za, bɛ za lɩɛbɩ naaŋmɩn-ƴɛ̀r-manbɛ!»

³⁰A Moyiir tɩ lɛb'a cen a laɩ pʋɔ, ʋlɛ nɩ a Ɩsɩrayɛl nɩbɛ nɩ-kore lɩz'a ata nɩ pie.

³¹A Sore tɩ ɩ na sɛsɛb yi a kʋ̃ɔ-kpɛ̃ɛ lowr ɛ́ fu caparapɩɩr wa n wa fu lɔb a laɩ pʋɔ. A tɩ viir'a koli a laɩ ɛ́ duo cen zãá man bibi-been cenu, ɛ́ gbõ taa do ta mɛtɩr been.

³²A bibir ʋl za a, a tɩ̃ɩsɔw za nɩ a bio daarɩ́ bibir ʋl za a, a nɩbɛ tɩ wob'ɩ a caparapɩɩr. A sob nɛ na tɩ wob blãlɛ zuo bɛ za a tɩ tɛr'a ta kilo[27] túre túre. Bɛ tɩ dɩ̀ɛlɩ a na viiri koli a laɩ k'aa ko.

³³A nɛn tɩ cãà nɩ a bɛ nɛɛ pʋɔ bɛ bɛ 'wɔb sɛr ɛ, ɛ́ a Sore suur ìr a bɛ ƴãw, ʋ ƴãw bɛ dɔwrʋ na ɩ kpɛ̃ɛ yaga za a.

³⁴Bɛ tɩ por'ɩ a zie ʋl yúor kɛ́ Kɩvʋrɔtɩ-Hataava, a pɛr lɛ kɛ́ “Vʋla yarʋ.” Bʋ̃ʋ n'ʋ vɛ̃, a be n'a bɛ tɩ ũù a bɛlɩ dem a nɛn 'wɔbrʋ vʋla na tɩ kʋrɛ a.

³⁵A Ɩsɩrayɛl nɩbɛ tɩ yi n a Kɩvʋrɔtɩ-Hataava ɛ́ cen Aserɔtɩ. Be n'a bɛ tɩ maalɩ a bɛ laɩ.