Read Dagara, Northern Sɔr-nɛ́ɛ 13 Bible Online

Sɔr-nɛ́ɛ 13 - Dagara, Northern bible

Sɔr-nɛ́ɛ 13

¹A Sore tɩ ƴɛ̀r'ɩ a Moyiir zie yel á ŋá:

²«Tõ nɩbɛ bɛ cen tɩ cɔlɩ jɩ́r a Kanãa tẽw kaa, ɩ̃ na kʋ̀rɛ a Ɩsɩrayɛl nɩbɛ a. Dɔwlʋ za pʋɔ a, bɛ na tõ n nɩr bɛ na kaa ír a nɩ-bɛrɛ pʋɔ a.»

³A Moyiir tɩ ɩ n a lɛ a Sore na yel a. Ʋ tɩ be n a Paran wɛja-kpalɛ pʋɔ ɛ́ tõ nɩbɛ na tɩ ɩ a Ɩsɩrayɛl nɩbɛ nɩ-bɛrɛ bɛ za a.

⁴A bɛ yée n'ɩ á ŋá: Zakuur bidɛb, Samua, na yi Urubɛn dɔwlʋ pʋɔ a.

⁵Hori bidɛb, Safatɩ, na yi Sɩmɩ̃ɔ dɔwlʋ pʋɔ a.

⁶Yefune bidɛb, Kalɛb, na yi Zuda dɔwlʋ pʋɔ a.

⁷Zuzɛb bidɛb, Yigeyal, na yi Ɩsakaar dɔwlʋ pʋɔ a.

⁸Nun bidɛb, Hosea, na yi Efarayim dɔwlʋ pʋɔ a.

⁹Arafu bidɛb, Palti, na yi Bɛ̃zamɛ dɔwlʋ pʋɔ a.

¹⁰Sodi bidɛb, Gadiyɛl, na yi Zabulɔ̃ dɔwlʋ pʋɔ a.

¹¹Susi bidɛb, Gadi, na yi Zuzɛb bidɛb Manase dɔwlʋ pʋɔ a.

¹²Gemali bidɛb, Amiyɛl, na yi Dan dɔwlʋ pʋɔ a.

¹³Mɩkayɛl bidɛb, Setuur, na yi Asɛɛr dɔwlʋ pʋɔ a.

¹⁴Vofesi bidɛb, Nabi, na yi Nɛfɩtali dɔwlʋ pʋɔ a.

¹⁵Maki bidɛb, Gewuyɛl, na yi Gadɩ dɔwlʋ pʋɔ a.

¹⁶A nɩbɛ a Moyiir na tɩ tõ bɛ tɩ cɔlɩ jɩ́r a Kanãa tẽw kaa a, yée n'ɩ à á ŋá. A Moyiir tɩ por'ɩ a Nun bidɛb Hosea kɛ́ Zozue[30].

¹⁷A Moyiir na tɩ tone a nɩbɛ bɛ ŋa a, ʋ tɩ yel bɛ na: «Nyɩ tu a Negɛɛvʋ lowr kpɛ a tẽw pʋɔ, al pùorí nyɩ kpɛ a tan pʋɔ,

¹⁸ɛ́ maal jɩ́rɛ a lɛ a tẽw na ŋmɛ̃ a: a nɩbɛ na kpɩɛr ʋ a, bɛ tɛr'ɩ fãw bɩɩ bɛ bɛ tɛr fãw, bɛ yãwmɛ na bɩɩ bɛ bɛ yãwmɛ.

¹⁹Nyɩ jɩ́r nyɛ̃, a tẽw vɩɛl'a bɩɩ ʋ bɛ vɩɛl, a ziir bɛ na kpɩɛr a, pɛnɛ-sɛwr laɩ n'a bɩɩ tẽ-bɛrɛ bɛ na mɛ dacine viiri koli a n'a.

²⁰Nyɩ jɩ́r nyɛ̃, a tẽsɔw vɩɛl'ɩ a kɔb ƴãw bɩɩ ʋ bɛ vɩɛl, tɩɩr be n be bɩɩ tɩɩr bɛ ka be. Nyɩ tɩ kpɛ socir pɔr a tẽw tɩ-wɔmɛ wa n.» Bʋ̃ʋ n'ʋ vɛ̃, divɛ̃ tɩ-wɔ̃-dan daar tɩ n'a.

²¹Lɛ n'a a nɩbɛ bɛ ŋa tɩ yi a Sin wɛja-kpalɛ pʋɔ ɛ́ cɔlɩ jɩ́r a Kanãa tẽw tɩ ta n Erehovʋ na pɩɛlɩ Lebo-Hamatɩ a.

²²A Negɛɛvʋ lowr'a bɛ tɩ tu kpɛ a tẽw pʋɔ, ɛ́ cen tɩ sãá Ebrɔ̃. Be n'a a Ahiman, Sesaɩ nɩ Talmaɩ dɔwlʋ nɩbɛ tɩ kpɩɛr: a nɩ-kɛra jarmam Anakɩ bʋʋrɛ nɛbɛ. Bɛ tɩ ŋmãa nɩ a Ebrɔ̃ tẽw maalɩ yome ayopõi, ɛ́ bãw ŋmãa a Tanisɩ[31] tẽw a Eziptɩ.

²³Bɛ tɩ yi n a be cen Ɛsɩkɔl fʋɔla pʋɔ tɩ cɛ divɛ̃ tɩɛ wule na tɛr a divɛ̃ tɩ-wɔ̃-cãacul a, ƴãw dà-wogo ƴãw nɩbɛ ayi tuo. Bɛ mɩ̀ tɩ pɔr'ɩ girenadɩ tɩɛ wɔmɛ nɩ kãkamɛ.

²⁴Bɛ tɩ por'ɩ a zie ʋl yúor kɛ́ Ɛsɩkɔl fʋɔla, a pɛr lɛ kɛ́ divɛ̃ tɩ-wɔ̃-cãacul fʋɔla, a divɛ̃ tɩ-wɔ̃-cãacul a Ɩsɩrayɛl nɩbɛ na tɩ ŋmãa a be a ƴãw.

²⁵A tɩ maal'ɩ bibie lɩz'a ayi ɛ́ a nɩbɛ na cen tɩ cɔlɩ jɩ́r a tẽw kaa a lɛb wa.

²⁶Bɛ tɩ lɛb'a wa páw a Moyiir, a Aarɔ̃ nɩ a Ɩsɩrayɛl nɩbɛ lãw za a Paran wɛja-kpalɛ pʋɔ, a Kadɛsɩ. Bɛ tɩ yel'ɩ a alɩ bome nɛ bɛ na nyɛ̃ a kʋ̀ bɛ za, ɛ́ wul bɛ a tẽw tɩ-wɔmɛ.

²⁷À ŋá n'a bɛ tɩ manɩ kʋ̀ a Moyiir: «Tɩ cen nɩ a tẽw ʋl pʋɔ fʋ na tõ tɩ a. Yel-mɩŋa sa ziri, tẽw bʋ̀rʋ nɩ sɩwr na gbɔlɛ[32] a n'ʋ. Nyɛ̃ a tẽw tɩ-wɔmɛ a mɩnɛ.

²⁸Ɛcɛ a nɩbɛ na kpɩɛr a tẽw a tɛr'ɩ fãw, ɛ́ a ten ɩ tẽ-bɛrɛ bɛrɛ bɛ na mɛ dacine viiri koli a. Tɩ mɔ̃ mɩ̀ nyɛ̃ nɩ a nɩ-kɛra jarmam Anakɩ bʋʋrɛ a be.

²⁹A Amalesitɩ mɩnɛ kpɩɛr'ɩ a Negɛɛvʋ vuo pʋɔ. A Hititɩ mɩnɛ, a Zebi tẽw dem nɩ a Amoritɩ mɩnɛ be n a tan vuo pʋɔ, ɛ́ a Kanãa tẽw dem kpɩɛr a Mediterane kʋ̃ɔ-kpɛ̃ɛ nʋɔr nɩ a Zurdɛ̃ man nʋɔr.»

³⁰Kalɛb tɩ ɩ na a nɩbɛ na zɛbr'ɩ a Moyiir a, bɛ ɩ gbili. Ʋ tɩ yel'a: «Nyɩ ɩ tɩ cen! Tɩ do tɩ zɛb de a tẽw. Tɩ na tʋ̃ɔ́ na!»

³¹Ɛcɛ a nɩbɛ bɛl nɩ a ʋl na tɩ do a tɩ yel'a: «Tɩ kʋ̃ tʋ̃ɔ́ zɛb'ɩ a nɩbɛ bɛ ŋa ɩ, bɛ tɛr'ɩ fãw zuo tɩ.»

³²Ɛ́ tɩ tĩ manɛ a tẽw bɛ na cen tɩ cɔlɩ a faalʋ a Ɩsɩrayɛl nɩbɛ niŋé. Bɛ tɩ yere na: «A tẽw tɩ na cɔlɩ jɩ́r kaa a ɩ n tẽw na báarɛ a ʋ nɩbɛ a, ɛ́ a nɩbɛ tɩ na nyɛ̃ a be a ɩ nɩbɛ na kɛrɩ yaga bɛ za a.

³³Tɩ mɔ̃ mɩ̀ nyɛ̃ nɩ nɩ-kɛrɩ jarmam jarmam, a Anakɩ bʋʋrɛ. Tɩ tɩ nyɛ̃ na tɩ ɩ mɛ̃ sãsoge a, a bɛ zie, ɛ́ a lɛ n'a a bɛl tɛɛ za mɩ̀ tɩ nyɛ̃ tɩ.»