Read Dagara, Northern Sɔr-nɛ́ɛ 16 Bible Online

Sɔr-nɛ́ɛ 16 - Dagara, Northern bible

Sɔr-nɛ́ɛ 16

¹Levitɩ kãw na dɩ Koore ɛ́ ɩ Yisehaar na yi Kehatɩ mɩnɛ yir pʋɔ a bidɛb a tɩ ɩ na ʋlɛ nɩ Datan nɩ Abiram nɩ Ɔ̃ zɛbr'ɩ a Moyiir. A Datan nɩ a Abiram tɩ ɩ n Eliyaavʋ bidɛbr, ɛ́ a Ɔ̃ ɩ Pelɛtɩ bidɛb, ɛ́ bɛ za tɩ ɩ Urubɛn dɔwlʋ nɩbɛ.

²A Ɩsɩrayɛl nɩbɛ kɔbr ayi dɔwlɩ lɩz'a ayi nɩ pie (250) na ɩ a lãw nɩ-bɛrɛ nɩ nɩ-yée na mɩ́ pʋɔ a kpaa-taa pʋɔ a tɩ lãwnɩ bɛ na zɛbr'ɩ a Moyiir.

³Bɛ tɩ jil'a pàw a Moyiir nɩ a Aarɔ̃ ɛ́ yel bɛ à ŋá: «A pãa sɛw nɩ lɛ! Nyɩ ƴãw nɩ manʋ! A Ɩsɩrayɛl lãw nɩbɛ za ɩ n son, ɛ́ a Sore be a tɩ za sɔgɔ. Bʋ̃ʋ n'ʋ so nyɩ tɩ́ɛrɛ kɛ́ nyɩ zuo nɩ a Sore nɩbɛ ŋmãa?»

⁴A Moyiir na tɩ wõ a ƴɛ̀r-bie á ŋá a, ʋ lo na vɔblɩ muru.

⁵Al pùorí ʋ yel a Koore nɩ a ʋ nɩbɛ: «Bio biɓaara a, a Sore na ɩ na bɛ bãw sob nɛ ʋ na so a, sob nɛ na ɩ sõw ɛ́ na tʋ̃ɔ́ taw pɩɛl ʋ a. A sob nɛ ʋ na kaa ír a n'ʋ, ʋ na bɛr ʋ taw pɩɛl ʋ.

⁶A na ɩ lɛ a, a nyɩɩm, a fʋ̃ʋ Koore nɩ a fʋ nɩbɛ, nyɩ ɩ à ŋá: nyɩ de parfɛ̃ nyɩwfʋ-koli.

⁷A bio a, nyɩ na ɩ n vũu-bie ƴãw ɛ́ ɩ tɩ-suur-zɔ̃-na-nyùur-vla-vla-a ƴãw, a Sore niŋé. A nɩr ʋl a Sore na na kaa ír a, ʋlɛ n'ʋ ɩ sõw. A nyɩɩm levitɩ mɩnɛ a, nyɩmɛ nɛbɛ ƴãw manʋ!»

⁸Al pùorí a Moyiir cãà lɛb yel a Koore: «Nyɩ bɛrɛ wone, a nyɩɩm levitɩ mɩnɛ!

⁹A Sore, a Ɩsɩrayɛl Naaŋmɩn, kaa na ír nyɩ a Ɩsɩrayɛl nɩbɛ pʋɔ, sàw kɛ́ nyɩ mɩ́ taw pɩɛl ʋ, kɛ́ nyɩ kaarɛ a ʋ kpɛb-zi-sõw zie, ɛ́ tone a ʋ tome a Ɩsɩrayɛl nɩbɛ lãw yúor ƴãw. À á ŋá bɛ sɛw nyɩ ɛ?

¹⁰A Sore sàw na k'aa fʋ̃ʋ Koore nɩ a fʋ yɛbr levitɩ mɩnɛ za mɩ́ taw pɩɛl ʋ, ɛ́ nyɩ bɔbr a bàwr-maalbɛ ɩb ƴãw pʋɔ ɔ?

¹¹À à ŋá a, fʋ̃ʋ nɩ a fʋ nɩbɛ a, a Sore n'ʋ nyɩ zɛbr'ɩ! Ãa mɩ̀ n'ɩ a Aarɔ̃ nyɩ zɛbr'ɩ ʋ?»

¹²Al pùorí, a Moyiir tɩ tõ na kɛ́ bɛ tɩ bʋɔlɩ a Eliyaavʋ bidɛbr Datan nɩ Abiram. Ɛcɛ bɛ tɩ sɔw nɩ à ŋá tɩr kʋ̀ ʋ: «Tɩ bɛ waar ɛ!

¹³Fʋ ɩ na tɩ bɛr tẽw bʋ̀rʋ nɩ sɩwr na gbɔlɛ a[40], ɛ́ tɛr tɩ wa n a wɛja-kpalɛ pʋɔ kɛ́ tɩ wa kpi, a cãà bɛ sɛw fʋ ɛ, fʋ bɔbr kɛ́ fʋ dɩ nɩ-kpɛ̃ɛnʋ a tɩ zu u?

¹⁴Yel-mɩŋa za, fʋ bɛ tɛr tɩ cen nɩ tẽw bʋ̀rʋ nɩ sɩwr na gbɔlɛ a ɩ, fʋ bɛ kʋ̀ tɩ póru nɩ divɛ̃ tɩɩr póru tɩ so a ɩ! Fʋ de tɩ na bʋɔlɛ zɔn bɩɩ? Tɩ bɛ waar ɛ!»

¹⁵A Moyiir tɩ nyɛ̃ nɩ suur mab, ɛ́ yel a Sore à ŋá: «Taa ŋmɛlɛ kaar a bɛ de-kʋ̀b bom ɛ! Ɩ̃ bɛ dãw de bɛ bom ɛ, bõw mɩ̀ saa n'ʋ a. Ɩ̃ bɛ dãw sãw a bɛ kãw za ɩ.»

¹⁶A Moyiir tɩ yel'ɩ a Koore à ŋá: «Fʋ̃ʋ nɩ a fʋ nɩbɛ, nyɩ wa bio a Sore niŋé. A Aarɔ̃ mɩ̀ na wa na.

¹⁷Ŋa za de a ʋ parfɛ̃ nyɩwfʋ-kole. Nyɩ na ɩ n tɩ-suur-zɔ̃-na-nyùur-vla-vla-a ƴãw, ɛ́ wa n a Sore niŋé. A za na ɩ n koli kɔbr ayi dɔwlɩ lɩz'a ayi nɩ pie (250). Fʋ̃ʋ nɩ a Aarɔ̃ mɩ̀ na ɩ n a lɛ.»

¹⁸A Koore nɩ a ʋ nɩbɛ tɩ de nɩ a bɛ koli, ɩ vũu-bie ƴãw ɛ́ ɩ tɩ-suur-zɔ̃-na-nyùur-vla-vla-a ƴãw, ɛ́ wa n a tuor-taa pɛn-sɛw dɩ̃dɔr nʋɔr, bɛlɛ nɩ a Moyiir nɩ a Aarɔ̃.

¹⁹A Koore tɩ bʋɔl'ɩ a Ɩsɩrayɛl lãw nɩbɛ za ɓã taa a bɛ niŋé, a tuor-taa pɛn-sɛw dɩ̃dɔr nʋɔr. Lɛ n'a a Sore yúor-vɩɛlʋ-danʋ tɩ sãá, a lãw nɩbɛ za nyɛ̃,

²⁰ɛ́ a Sore yel a Moyiir nɩ a Aarɔ̃ à ŋá:

²¹«Nyɩ taw yi ɛ́ bɛr a nɩbɛ bɛ ŋa, ɩ̃ na kʋ bɛ na pàw pɛr a ƴɛrɛŋa.»

²²Ɛcɛ a Moyiir nɩ a Aarɔ̃ tɩ lo na vɔblɩ muru ɛ́ yel: «'Woi Naaŋmɩn i, fʋ̃ʋ n'ʋ kʋ̀rɛ a nyɔ-vʋʋrʋ a fʋ bʋ̃-íri za, nɩ-been yõ n'ʋ maalɩ a yel-bier, ɛ́ fʋ na nyɛ̃ nɩ a lãw nɩbɛ za suur ɩ?»

²³A Sore tɩ sɔw nɩ a Moyiir à ŋá:

²⁴«Yel a nɩbɛ kɛ́ bɛ taw zãá nɩ a be a Koore, a Datan nɩ Abiram na kpɩɛr a.»

²⁵A Moyiir tɩ lɛb'a ìr cen a Datan nɩ a Abiram zie. A Ɩsɩrayɛl nɩbɛ nɩ-kore tɩ tu ʋ na cen.

²⁶A Moyiir tɩ yel'ɩ a lãw nɩbɛ za à ŋá: «Nyɩ taw zãá nɩ a nɩ-faar bɛ ŋa pɛnɛ-sɛwr. Nyɩ taa tʋɔr a bɛ bom kãw za ɩ, alɛ bɛ ɩ lɛ, nyɩ mɩ̀ na kpi n a bɛ yel-bebe za zũú.»

²⁷Lɛ n'a a nɩbɛ tɩ taw zãá nɩ a be a Koore, a Datan nɩ a Abiram na kpɩɛr a. A Datan nɩ a Abiram tɩ yi na àr a bɛ pɛnɛ-sɛwr dɩ̃dɛɛ nʋɔr, bɛlɛ nɩ a bɛ pɔwbɛ, a bɛ bibiir nɩ a bɛ yan.

²⁸A Moyiir tɩ yel'ɩ à ŋá: «A na sãá nɩ a nyɩ zie k'aa Sore n'ʋ tõ m k'ɩ̃ɩ wa maalɩ à á ŋá za, kɛ́ mãa bɛ n'ʋ nyɛ̃ ɩ̃ tʋɔra ɩrɛ ɩ:

²⁹A nɩbɛ bɛ ŋa wa kpi Naaŋmɩn kũu mɛ̃ a lɛ a nɩbɛ za na kpiir a, a lɛn daar a, a Sore bɛ tõ m ɛ.

³⁰Ɛcɛ a Sore wa maalɩ nɔ-ɓãa-yel a, a tẽsɔw wa 'la gɛ̀lɛ́ vɔl bɛ, bɛlɛ nɩ a bɛ bʋ̃-tɛrɩ za a, bɛlɛ wa siw nɩ-mimie a kpɩmɛ tẽw a, a na sãá nɩ a nyɩ zie kɛ́ bɛ ɩ n a Sore la.»

³¹A Moyiir ƴɛ̀rʋ bɛ tɩ lo tẽw sɛr ɛ, ɛ́ a tẽsɔw pur a Datan nɩ a Abiram gbɛ́ɛ pile.

³²A tẽsɔw tɩ 'la n gɛ̀lɛ́ vɔl bɛ, bɛlɛ nɩ a bɛ yie dem, ɛ́ mɩ́ vɔl a Koore nɩbɛ nɩ a bɛ bʋ̃-tɛrɩ za.

³³Bɛ tɩ siw nɩ nɩ-mimie a kpɩmɛ tẽw, lãwnɩ a bɛ bʋ̃-tɛrɩ, a tẽsɔw pàw bɛ. À ŋá n'a a bɛ yele tɩ baarɩ a Ɩsɩrayɛl nɩbɛ lãw pʋɔ.

³⁴A Ɩsɩrayɛl nɩbɛ bɛl za na tɩ àr pɩɛlɩ bɛ, ɛ́ wone a cɛlsɩ bɛ na ŋmɩɛr a tɩ zɔ na. Bʋ̃ʋ n'ʋ vɛ̃, bɛ tɩ yere na: «Nyɩ ɩ tɩ zɔ, alɛ bɛ ɩ lɛ a tẽsɔw mɩ̀ na vɔl tɩ na!»

³⁵A Sore tɩ ɩ na vũu yi dɩ a nɩbɛ kɔbr ayi dɔwlɩ lɩz'a ayi nɩ pie (250) bɛl na tɩ dier a tɩ-suur-zɔ̃-na-nyùur-vla-vla-a tɩrɛ a.