Read Dagara, Northern Sɔr-nɛ́ɛ 21 Bible Online

Sɔr-nɛ́ɛ 21 - Dagara, Northern bible

Sɔr-nɛ́ɛ 21

¹A Aradɩ tẽw nãà na tɩ ɩ Kanãa tẽw nɩr kãw ɛ́ tɩ kpɩɛr a Negɛɛvʋ vuo pʋɔ a, tɩ wõ na k'aa Ɩsɩrayɛl nɩbɛ tu n Atarim sɔ́r waar. Ʋ tɩ ŋmãa nɩ bɛ nɩ zɛbr, nyɔw nɩbɛ bɛ mɩnɛ.

²Lɛ n'a a Ɩsɩrayɛl nɩbɛ tɩ kõ nʋɔr ŋa a Sore zie: «Fʋ̃ʋ wa sàw ƴãw a nɩbɛ bɛ ŋa a tɩ nuru pʋɔ a, tɩ na ŋmɛr'ɩ a bɛ tẽ-bɛrɛ bɛr cʋmcʋmcʋm!»

³A Sore tɩ sàw nɩ a nʋɔr ŋa a Ɩsɩrayɛl nɩbɛ na kõ a, ɛ́ ƴãw a Kanãa tẽw dem a bɛ nuru pʋɔ. A Ɩsɩrayɛl nɩbɛ tɩ kʋ bɛ na pàw pɛr, ɛ́ ŋmɛr a bɛ tẽ-bɛrɛ bɛr, ɛ́ por a vuo ʋl yúor kɛ́ Hɔrma, a pɛr lɛ kɛ́ «Ŋmɛr cʋmcʋmcʋm.»

⁴A Ɩsɩrayɛl nɩbɛ tɩ yi n a Hoor tãgɛ̃́ tu a Bàa-kɛkɛɛ kʋ̃ɔ-kpɛ̃ɛ lowr kɛ́ bɛ cen jɩɩrɩ koli a Edɔm tẽw. Ɛcɛ a nɩbɛ kanyir za tɩ baar'ɩ a sɔ́r zu.

⁵Bɛ tɩ nyɔw nɩ a Naaŋmɩn nɩ a Moyiir yere: «Bʋnʋ ƴãw n'a nyɩ ɩ tɩ yi a Eziptɩ? Tɩ wa kpi a wɛja-kpalɛ pʋɔ ƴãw n'a bɩɩ? Dipɛ̃ nɩ kʋ̃ɔ bɛ ka ka ɩ, ɛ́ a nɩbaal-bʋ̃-dɩra ŋa na ɩ a mãan a, ɓa tɩ nʋɔr!»

⁶Lɛ n'a a Sore tɩ ƴãw wɩɩr a lɔw na vuule a, a wa a bɛ ƴãw. A tɩ dʋ̃ n Ɩsɩrayɛl nɩbɛ yaga bɛ kpi.

⁷A bɛl na cɛ a tɩ wa na wa páw a Moyiir yel ʋ à ŋá: «Tɩ maal'ɩ yel-bier tɩ na nyɔw a Sore nɩ a fʋ̃ʋ za yere a. Zɛlɩ a Sore ʋ diw a wɩɩr á ŋá bɛr tɩ.» A Moyiir tɩ zɛlɩ nɩ a Sore a nɩbɛ ƴãw,

⁸ʋ yel ʋ à ŋá: «Maalɩ waab a lɔw na vuule a ƴãw dàa ƴãw. Waab wa dʋ̃ nɩr za ʋ jɩ́r ʋ kaa a, ʋ na baa na.»

⁹A Moyiir tɩ maal'ɩ waab nɩ kur-zɩɛ, ƴãw dàa ƴãw. Lɛ n'a, waab na mɩ́ tɩ dʋ̃ nɩr, ʋ jɩ́r a kur-zɩɛ waab kaa a, ʋ mɩ́ tɩ baa na.

¹⁰A Ɩsɩrayɛl nɩbɛ tɩ ìr'a lo a sɔ́r, tɩ maalɩ a bɛ laɩ Ovɔtɩ.

¹¹Al pùorí, bɛ tɩ yi n a Ovɔtɩ ɛ́ tɩ maalɩ a bɛ laɩ Iye-Avarim, a wɛja-kpalɛ pʋɔ, Mowab tẽw saa-pɛrɩ́.

¹²A pùorí, bɛ tɩ maalɩ a bɛ laɩ Zerɛdɩ bà-fʋɔla nʋɔr.

¹³Bɛ tɩ yi n a be, ɛ́ tɩ lo gãw a Arnon, maalɩ a bɛ laɩ a be. A bàa ŋa na yi a Amoritɩ mɩnɛ tẽw a tɔl'ɩ a wɛja-kpalɛ pʋɔ, ɛ́ ɩ a Mowab tẽw nɩ a Amoritɩ mɩnɛ tẽw tʋr-bɔw.

¹⁴Bɛ ƴɛ̀r'ɩ a ʋ ƴɛ̀rʋ a Sore zɛbr sɛbɛ pʋɔ, a be bɛ na yel kɛ́: «...Vahɛb na be Sufa a, nɩ a ʋ bà-gbɛ́ɛ, a Arnon

¹⁵nɩ a ʋ bà-gbɛ́ɛ, a Arnon bà-fʋɔla ʋl na be a Aar lowr a, na ɩ a Mowab tʋr-bɔw a...»

¹⁶Bɛ tɩ yi n a be ta a zie ʋl bɛ na bʋɔlɛ Bule a. A be n'a a Sore tɩ yel à ŋá kʋ̀ a Moyiir: «Bʋɔlɩ a nɩbɛ ɓã taa, ɩ̃ɩ na kʋ̀ bɛ nɩ kʋ̃ɔ.»

¹⁷A lɛ n'a a Ɩsɩrayɛl nɩbɛ tɩ cɛ a yielu ŋa: «A kʋ̃ɔ, a ìr do a bule pʋɔ, ɛ́ bɛ cáarɛ!

¹⁸Bule a nɩ-bɛrɛ na tuw a, a nɩbɛ nɩ-bɛrɛ na yaw a, na tuw nɩ a bɛ nɩ-bɛrɛ dabɔlɛ a nɩ a bɛ nɩ-kpɛ̃ɛnʋ dabɔlɛ a!» A Ɩsɩrayɛl nɩbɛ tɩ yi n a wɛja-kpalɛ pʋɔ ɛ́ cen Matana,

¹⁹tɩ yi a be cen Nahaliyɛl, a pùorí bɛ cen Bamɔtɩ.

²⁰Bɛ pãa tɩ yi n a be cen a fʋɔla ʋl na tu tɔl a Mowab tẽw pʋɔ a, ɛ́ cere wɩɛr a Pisiga tãw nyʋɔrɩ́ a. Fʋ̃ʋ wa be a tãw ŋa zu a, fʋ mɩ́ nyɛ̃ nɩ a wɛja-kpalɛ za.

²¹A Ɩsɩrayɛl nɩbɛ tɩ tõ n nɩbɛ bɛ tɩ yel a Amoritɩ mɩnɛ nãà, Sihon, à ŋá:

²²«Tɩ bɔbr'a kɛ́ tɩ tu a fʋ tẽw pʋɔ tɔl. Tɩ bɛ bɩ̀ɛrɛ a sɔ́r kpɩɛr a póru pʋɔ, bɩɩ a divɛ̃ tɩɩr póru pʋɔ ɛ, tɩ bɛ nyúur a buli kʋ̃ɔ ɩ. A sɔ-kʋɔr-kpɛ̃ɛ n'ʋ tɩ na tu, ɛ́ gù tɩ wa tɩ tɔl a fʋ tẽw za pʋɔ.»

²³Ɛcɛ a Sihon bɛ tɩ sàw bɛ na tɔl ɛ. Ʋ tɩ ɓã n a ʋ zɛbr-nɩbɛ za taa yi tuor'ɩ a Ɩsɩrayɛl nɩbɛ tɩ ta Yahasɩ, a wɛja-kpalɛ pʋɔ, ŋmãa nɩ bɛ a zɛbr.

²⁴A Ɩsɩrayɛl nɩbɛ tɩ zɛb'a tʋ̃ɔ́ bɛ, de a bɛ tẽw za na yi a Arnon, a saa-pɛrɩ́-dʋrʋ-lowr, ɛ́ tɩ tɔ a Yabɔkɩ, a saa-pɛrɩ́-gʋba-lowr a, ɛ́ mɩ̀ lɛb tɩ tɔ a Amɔ̃ tẽw tʋr-bɔw a saa-pɛrɩ́ a, tʋr-bɔw bɛ na gù vla vla a.

²⁵Bɛ tɩ zɛb'a de a Amoritɩ mɩnɛ tẽ-bɛrɛ za, tɩ lãwnɩ a Hɛsɩbon nɩ a tẽli-kpɔwlɩ, ɛ́ zɩ̃ a za pʋɔ.

²⁶A Hɛsɩbon tɩ n'ɩ a Amoritɩ mɩnɛ nãà, Sihon, tẽ-kpɛ̃ɛ za. Bʋ̃ʋ n'ʋ vɛ̃, ʋ tɩ zɛb'ɩ nɩ a Mowab tẽw na-dãw-niwn sob de a zie ʋl za na cen tɩ sãá a Arnon a.

²⁷À ŋá n'a a zʋkpa-lɔbrbɛ ƴɛ̀r a yel ŋa ƴɛ̀rʋ: «Nyɩ wa a Hɛsɩbon, nyɩ lɛb mɛ a Sihon tẽ-kpɛ̃ɛ!

²⁸Vũu yi n a Hɛsɩbon pʋɔ, vũu-zɛl ɩ n pelem yi a Sihon tẽ-kpɛ̃ɛ pʋɔ. Ʋ dɩ n Aar, a Mowab tẽw pʋɔ, ɛ́ dɩ a Arnon tãli ŋmɩmɛ.

²⁹Baw-bio wɛ, Mowab i! Nyɩ wɛ na, nyɩɩm Kemɔsɩ[47] puor-puorbɛ ɛ! A dɛbr na bɛ tʋ̃ɔ́ kpi a, nɩ a pɔwbɛ a, gaso nɩbɛ n'ɩ bɛ za, bɛ nyɔw tɩ kʋ̀ a Amoritɩ mɩnɛ nãà Sihon.

³⁰Ɛcɛ tɩ tɛ n a Amoritɩ mɩnɛ kʋ. Ƴɛrɛŋa a, Hɛsɩbon bɛ cãà be ɩ, ɛ́ a tẽw za sãw cen tɩ tɔ Divon. Tɩ sãw nɩ bom za tɩ sãá nɩ Nofa, tɩ sãá nɩ Medeva mɔ̃ mɩ̀.»

³¹À à ŋá n'a a Ɩsɩrayɛl nɩbɛ tɩ zɩ̃ a Amoritɩ mɩnɛ tẽw pʋɔ.

³²A Moyiir tɩ tõ n nɩbɛ bɛ tɩ piwri bãw a Yazɛɛr, al pùorí a Ɩsɩrayɛl nɩbɛ zɛb de a tẽ-kpɛ̃ɛ ŋa nɩ a tẽli-kpɔwlɩ, ɛ́ diw a Amoritɩ mɩnɛ bɛr a be.

³³Bɛ tɩ lɩɛb'a tu zi-yoru a pùorí, lo Basan sɔ́r. A Basan tẽw nãà, Ɔgɩ, tɩ yi n daadaalɛ, ʋlɛ nɩ a ʋ zɛbr-nɩbɛ za, tuori a Ɩsɩrayɛl nɩbɛ, k'ʋʋ zɛb'ɩ bɛ Edɩrɛyɩ.

³⁴A Sore tɩ yel'ɩ a Moyiir à ŋá: «Taa zɔrɛ ʋ ɛ! Ɩ̃ na ƴãw ʋ nɩ a fʋ nuru pʋɔ, ʋlɛ nɩ a ʋ zɛbr-nɩbɛ za, nɩ a ʋ tẽw za. Fʋ na ɩ ʋ na, mɛ̃ a lɛ fʋ na ɩ a Amoritɩ mɩnɛ nãà, Sihon, na tɩ dɩrɛ a naalʋ a Hɛsɩbon a.»

³⁵A Ɩsɩrayɛl nɩbɛ tɩ zɛb'a tʋ̃ɔ́ a Ɔgɩ nɩ a ʋ bidɛbr nɩ a ʋ zɛbr-nɩbɛ za. Bɛ bɛ tɩ cɛ nɩr bɛr ʋ cãà vʋʋrɛ ɩ, ɛ́ bɛ de a ʋ tẽw.