Read Dagara, Northern Sɔr-nɛ́ɛ 23 Bible Online

Sɔr-nɛ́ɛ 23 - Dagara, Northern bible

Sɔr-nɛ́ɛ 23

¹A Balaam tɩ yel'ɩ a Balakɩ: «Mɛ bàwr-maal-kube ayopõi a ka, ɛ́ bɔ nadɛɛ ayopõi nɩ pʋ́rɩ ayopõi wa kʋ̀ m.»

²A Balakɩ tɩ ɩ n a lɛ a Balaam na yel a. Al pùorí, bɛ za ayi tɩ kʋ nadɛr nɩ pʋ́ra bàwr-maal-kuur za zu maal'ɩ bàwr.

³A Balaam tɩ yel'ɩ a Balakɩ: «Àr kɔw a fʋ bàwr-maal-bome ɩ̃ɩ taw yi pùor. Kapaw a Sore na tuori mɛ̃ na. Ɩ̃ na yel'ɩ a ƴɛ̀rʋ ʋ na ɩ ɩ̃ bãw a kʋ̀ b.» Al pùorí, ʋ tɔl do tãli-kpalɛ kãw zu.

⁴A Naaŋmɩn tɩ tuor'ɩ a Balaam, ʋ yel ʋ: «Ɩ̃ ƴãw na bɛ maalɩ a bàwr-maal-kube ayopõi, ɩ̃ kʋ nadɛr nɩ pʋ́ra a been been zu.»

⁵A Sore tɩ ƴãw nɩ a Balaam nʋɔrɩ́ a ƴɛ̀rʋ a na fɛr k'ʋʋ ƴɛ̀r a, ɛ́ ƴãw ʋ lɛb cen a Balakɩ zie.

⁶A Balaam tɩ lɛb'a cen tɩ páw a Balakɩ na tɩ cãà àr kɔw a ʋ bàwr-maal-bome, ʋlɛ nɩ a Mowab tẽw nɩ-bɛrɛ a.

⁷Lɛ n'a a Balaam tɩ ƴɛ̀r lɔb'ɩ a zʋkpar ŋa: «Mowab nãà, Balakɩ, ƴãw na k'ɩ̃ yi a Siiri saa-pɛrɩ́ tan pʋɔ wa. Ʋ yel mɛ̃ na: “Wa! Wa ŋmɛ ƴãw a Zakɔb bʋʋrɛ kʋ̀ m! Wa! Wa nyar a Ɩsɩrayɛl bʋʋrɛ zu!”

⁸Ɛcɛ, ŋmɩŋmɩn n'a ɩ̃ na tʋ̃ɔ́ ŋmɛ ƴãw nɩr Naaŋmɩn mɩŋa na bɛ ŋmɩɛr ƴãwn a? Ŋmɩŋmɩn n'a ɩ̃ na tʋ̃ɔ́ nyar nɩ-bʋʋrɛ zu a Sore na bɛ nyar a?

⁹Ɩ̃ àr'ɩ a pie zu ɛ́ bɛlɛ a nɩ-bʋʋrɛ bɛ ŋa, ɩ̃ be n a tãli zu ɛ́ jɩ́rɛ bɛ. Nɩ-bʋʋrɛ na kpɩɛr bɛ yõ zie a nɛbɛ, bɛ bãwnɩ a na bɛ na ɩ bɛ tʋɔra a nɩ-bʋʋr-yoru za pʋɔ a.

¹⁰Ãa n'ʋ na tʋ̃ɔ́ sɔ́r a Ɩsɩrayɛl nɩbɛ za? Sɔr a Zakɔb bʋʋrɛ na yãwmɛ, yãwmɛ, yãwmɛ a? Ɩ̃ nãá kpi mɛ̃ a nɩ-mɩn bɛ ŋa a, a ɩ̃ nyɔ-vʋʋrʋ baarʋ nãá ɩ mɛ̃ a Ɩsɩrayɛl nɩbɛ dem a.»

¹¹A Balakɩ tɩ yel'ɩ a Balaam: «Bʋ̃ʋ n'ɩ à à ŋá fʋ na ɩ m a? Ɩ̃ tɛr fʋ na wa n a ka kɛ́ fʋ wa ŋmɛ ƴãw a ɩ̃ dɔ̃ dem, fʋ wa bɛr ɛ́ ƴɛ̀r nɔ-vla kʋ̀ bɛ!»

¹²A Balaam tɩ sɔw na: «Mãa wa ƴɛ̀rɛ a, a ƴɛ̀rʋ al a Sore na ƴãw a ɩ̃ nʋɔrɩ́ a, al tɛwr bɛ n'a a fɛr k'ɩ̃ɩ yere ɩ?»

¹³A Balakɩ tɩ lɛb'a yel à ŋá: «Wa tɩ cen zi-yoru, fʋ na na tɩ nyɛ̃ a Ɩsɩrayɛl nɩbɛ za a. A ka a, a bɛ ŋmãa tɛwr'a fʋ mɩ́ tɩ nyɛ̃. Tɩ ŋmɛ ƴãw bɛ a be kʋ̀ m.»

¹⁴A Balakɩ tɩ tɛr'ɩ a Balaam cen nɩ zie piwru zie kãw na pɩɛlɩ a Pisiga tãw nyɔ-ɓɩɩla a. Ʋ tɩ lɛb'a mɛ bàwr-maal-kube ayopõi a be, ɛ́ kʋ nadɛr nɩ pʋ́ra a za been been zu, maal'ɩ bàwr.

¹⁵A Balaam tɩ yel'ɩ a Balakɩ: «Àr a ka, gù a fʋ bàwr-maal-bome, ɩ̃ɩ cen ka tɩ gù ƴɛ̀rʋ.»

¹⁶A Sore tɩ wa na wa páw a Balaam, ƴãw a ƴɛ̀rʋ ʋ na na yel a, a ʋ nʋɔrɩ́. Al pùorí, ʋ ƴãw ʋ lɛb cen a Balakɩ zie.

¹⁷Lɛ n'a a Balaam tɩ lɛb cen tɩ páw a Balakɩ, na cãà àr kɔw a ʋ bàwr-maal-bome, ʋlɛ nɩ a Mowab tẽw dem nɩ-bɛrɛ a. A Balakɩ tɩ sowr'ʋ na: «A Sore yel'a kɛ́ bʋnʋ?»

¹⁸Lɛ n'a a Balaam tɩ ƴɛ̀r lɔb'ɩ a zʋkpar ŋa: «Sipoor bidɛb Balakɩ i, ìr! Bɛrɛ wone! Ƴãw tobr vla a ɩ̃ ƴɛ̀rʋ ƴãw!

¹⁹Naaŋmɩn bɛ ɩ nɩsaal na ŋmarɛ ziri ɛ, nɩsaal bie a tɩɛrʋ na mɩ́ lɩɛbɛ a bɛ n'ʋ ɛ. Ʋ na tʋ̃ɔ́ na yel ɛ́ bɛ ɩ ɛ? Ʋ na tʋ̃ɔ́ na ƴɛ̀r ƴɛ̀rʋ ɛ́ bɛ tu ɛ?

²⁰Mãa a, ɩ̃ sàw na ƴɛ̀r nɔ-vla kʋ̀ a nɩ-bʋʋrɛ bɛ ŋa, a Sore na maalɩ bɛ a ƴãw, ɩ̃ bɛ lɩɛbɛ bɛrɛ ɩ.

²¹A Sore bɛ nyɛ̃ yel-bɛ-sɛwra kãw za a Ɩsɩrayɛl nɩbɛ pʋɔ ɩ, ʋ bɛ nyɛ̃ yel-faa kãw za a Zakɔb bʋʋrɛ pʋɔ ɩ. Ʋlɛ n'ɩ a bɛ Naaŋmɩn, ʋ kpɩɛr'ɩ a bɛ pʋɔ, ʋ dier'ɩ a bɛ nʋ̃ɔ̀ cɛlsɩ bɛ na ŋmɩɛr ƴãwn ʋ mɛ̃ nãà a.

²²Ʋlɛ n'ʋ ɩ bɛ yi a Eziptɩ, nɩ fãw na bɛ tɛr tʋ̃ɔ́fʋ, mɛ̃ wɛ-náab fãw a.

²³A Ɩsɩrayɛl nɩbɛ bɛ tɛr a tɩtɩblʋ nɩ a ʋ ɩ-ɩrɩ yel-ɩra ɩ. A daar mɩ́ wa ta a, bɛ mɩ́ bãw nɩ bom nɛ za a Naaŋmɩn na ɩrɛ a.

²⁴A nɩ-bʋʋrɛ bɛ ŋa ìre na mɛ̃ wɛ-dʋ̃-faa a, bɛ ìre na mɛ̃ gbẽw a. Ʋ bɛ lɛbr ganɛ ɩ, ʋlɛ bɛ wa 'wɔb a bom ʋ na nyɔw a nɛn baar'a ɩ, ʋlɛ bɛ wa nyũ a ʋ zɩ̃ɩ baar'a ɩ.»

²⁵A Balakɩ tɩ yel'ɩ a Balaam à ŋá: «Fʋ̃ʋ bɛ wa ŋmɩɛr ƴãwn bɛ a, fʋ̃ʋ ta ƴɛ̀rɛ nɔ-vla kʋ̀rɛ bɛ ɩ!»

²⁶A Balaam tɩ sɔw ʋ na: «Ɩ̃ bɛ tɩ yel kʋ̀ b, k'ɩ̃ɩ na ɩ n a lɛ za a Sore na na yel kʋ̀ m a ɩ?»

²⁷A Balakɩ tɩ lɛb'a yel à ŋá: «Wa, ɩ̃ lɛb tɛr fʋ cen nɩ zi-yoru. Kapaw, Naaŋmɩn na tɩ sàw na fʋ ŋmɛ ƴãw a nɩbɛ bɛ ŋa kʋ̀ m a be.»

²⁸Ʋ tɩ tɛr'ɩ a Balaam do n a Pewɔɔr tãw nyʋɔrɩ́, a be fʋ na mɩ́ àr ɛ́ nyɛ̃ a wɛja-kpalɛ ʋ wɩɛr tɩ cere a.

²⁹A Balaam tɩ yel'ɩ a Balakɩ à ŋá: «Mɛ bàwr-maal-kube ayopõi a ka, ɛ́ cɔbrɩ nadɛɛ ayopõi nɩ pʋ́rɩ ayopõi kʋ̀ m.»

³⁰A Balakɩ tɩ ɩ n a lɛ a Balaam na yel a, al pùorí, ʋ kʋ nadɛr nɩ pʋ́ra bàwr-maal-kuur za zu, maal'ɩ bàwr.