Read Dagara, Northern Sɔr-nɛ́ɛ 24 Bible Online

Sɔr-nɛ́ɛ 24 - Dagara, Northern bible

Sɔr-nɛ́ɛ 24

¹A Balaam tɩ nyɛ̃ na a Sore na bɔbr a Ɩsɩrayɛl nɩbɛ maalʋ tuotuo a. Alɛ na so ʋ bɛ lɛb tɩ bɔ bãw a lɛ a Naaŋmɩn na yel, mɛ̃ a dãwdãw a ɩ. Ɛcɛ ʋ tɩ lɩɛb'a tori a wɛja-kpalɛ.

²Ʋ tɩ dʋɔ nɩ a zu nyɛ̃ a Ɩsɩrayɛl nɩbɛ na be a bɛ laɩ pʋɔ dɔwlʋ dɔwlʋ a. Lɛ n'a a Naaŋmɩn Vʋʋrʋ tɩ siw ʋ,

³ʋ ƴɛ̀r lɔb'ɩ a zʋkpar ŋa: «À ŋá n'a ɩ̃ yere, a mãa, Bewɔɔr bidɛb, Balaam, a nɩr ʋl na nyɛrɛ parpar a.

⁴À ŋá n'a ɩ̃ yere, mãa na mɩ́ wõ a Naaŋmɩn ƴɛ̀rʋ ɛ́ nyɛ̃ a bʋ̃-nyɛrɩ a Kpɛnʋ-za-sob na mɩ́ bɛr a wa a. Ʋ mɩ́ sɩrɩ na ɩ ɩ̃ nyɛ̃ ʋ a lɛn daar ɩ̃ na mɩ́ puore ʋ nɩ ɩ̃ tʋɔra-siwru a.

⁵Ɩsɩrayɛl nɩbɛ ɛ, nyɩɩm Zakɔb bʋʋrɛ ɛ, nyɛ̃ a pɛnɛ-sɛwr nyɩ na kpɩɛr a na vɩɛl a!

⁶A wɩɛr'a tɩ cere mɛ̃ fʋɔlɩ kʋ̃ɔ na darɛ taa a, mɛ̃ zaadɛnɩ na be man nʋɔr a, mɛ̃ alowɛsɩ bɩɩ sɛɛdɩr tɩɩr a Sore na sɛl bàa nʋɔr a.

⁷A ɩ na mɛ̃ kʋ̃ɔ na paalɩ yi a ƴãwfʋ zie gbɔlɛ yaga za a bʋ̃-kʋ́ɔrɩ pʋɔ a. A Ɩsɩrayɛl nɩbɛ nãà na tʋ̃ɔ́ nɩ a Agagɩ[48], ɛ́ a bɛ naalʋ-tẽw yɛlɛ cere.

⁸A Naaŋmɩn ɩ n nɩ fãw bɛ yi a Eziptɩ, fãw na bɛ tɛr tʋ̃ɔ́fʋ mɛ̃ wɛ-náab fãw a. Bɛ vɔlɛ nɩ a nɩ-bʋʋr-yoru na ŋmãa nɩ bɛ zɛbr a, bɛ karɛ nɩ a bɛ kɔbɛ, a bɛ pime kpɩɛr bɛ na cole.

⁹Bɛ ũúne na mɛ̃ gben a, bɛ ganɛ na mɛ̃ wɛ-dʋ̃-faar a. Ãa n'ʋ na fɛr bɛ bɛ ìr? Ɩsɩrayɛl nɩbɛ ɛ, a maalʋ, a tuur sob nɛ na ƴɛ̀rɛ nɔ-vla kʋ̀rɛ nyɩ a, ɛ́ a ŋmɛ-ƴãw tuur sob nɛ na ŋmɩɛr ƴãwn nyɩ a[49]!»

¹⁰A Balakɩ tɩ nyɛ̃ nɩ nɩ a Balaam suur. Ʋ tɩ vɛlɩ nɩ nũu cɔw ʋ ɛ́ yel ʋ à ŋá: «Ɩ̃ bʋɔlɩ fʋ na wa n a ka kɛ́ fʋ wa ŋmɛ ƴãw a ɩ̃ dɔ̃ dem, ɛcɛ a gb'a ata sob'ɩ à ŋá, fʋ na ƴɛ̀r a nɔ-vla kʋ̀ bɛ a!

¹¹A na ɩ à ŋá a, cere, lɛb kul a fʋ tẽw! Ɩ̃ tɩ yel'a k'ɩ̃ɩ na ƴãw fʋ nɩ yaga za, ɛcɛ a Sore sɩb fʋ nɩ a ƴãwfʋ ŋa!»

¹²A Balaam tɩ sɔw nɩ a Balakɩ à ŋá: «Ɩ̃ tɩ sʋ̃ɔm'a bul yel à ŋá kʋ̀ a nɩbɛ fʋ na tɩ tõ a ɩ̃ zie a:

¹³“A Balakɩ saa na kʋ̀ m a salm-pla za nɩ a salm-zɩɛ za na paalɩ a ʋ yir a, ɩ̃ kʋ̃ tʋ̃ɔ́ zawrɩ a Sore nʋɔr towtow ɛ. A ƴɛ̀rʋ a Sore na kʋ̀rɛ mɛ̃ a, al tɛwr'a ɩ̃ yere.”

¹⁴Ƴɛrɛŋa a, ɩ̃ lɛbr'a kule a ɩ̃ nɩ-bʋʋrɛ zie. Ɛcɛ wa, ɩ̃ bɔbr'a k'ɩ̃ɩ yel a ʋlɩ bom nɛ a Ɩsɩrayɛl nɩbɛ na na ɩ a fʋ nɩ-bʋʋrɛ a nɩdaar a kʋ̀ b!»

¹⁵Lɛ n'a a Balaam tɩ ƴɛ̀r lɔb a zʋkpar ŋa: «À ŋá n'a ɩ̃ yere, a mãa Bewɔɔr bidɛb, Balaam, a nɩr ʋl na nyɛrɛ parpar a.

¹⁶À ŋá n'a ɩ̃ yere, mãa na mɩ́ wõ a Naaŋmɩn ƴɛ̀rʋ a, mãa na bãw a Naaŋmɩn-na-do-saa-bɛ-pɩɛl-a yel-sɔwlɩ, ɛ́ nyɛrɛ a bʋ̃-nyɛrɩ a Kpɛnʋ-za-sob na mɩ́ bɛr a wa a. Ʋ mɩ́ sɩrɩ na ɩ ɩ̃ nyɛ̃ ʋ, a lɛn daar ɩ̃ na mɩ́ puore ʋ nɩ ɩ̃ tʋɔra-siwru a.

¹⁷Ɩ̃ nyɛ̃ nɩ a bom ʋl na na ɩ a, ɛcɛ ƴɛrɛŋa bɛ n'a ɩ, ɩ̃ nyɛ̃ nɩ yel kãw, ɛcɛ nɩdaar'a a yel ʋl na ɩ: Ŋmar-bir'ʋ pur a Zakɔb bʋʋrɛ pʋɔ, nãà ìr'ɩ a Ɩsɩrayɛl bʋʋrɛ sɔgɔ. Ʋ ŋmɩɛr'ɩ a Mowab tẽw dem tacɩlɛ nɩ a ʋ nãà dàa, ʋ kʋrɛ nɩ a tẽw nɩ-yʋɔrɩ.

¹⁸Ʋ mɩ̀ zɛb'a de a Seyiir, a ʋ dɔ̃ dem, Edɔm tẽw nɩbɛ, tẽw. A Ɩsɩrayɛl nɩbɛ zɛb'a tʋ̃ɔ́.

¹⁹Nɩ-kpɛ̃ɛ yi n a Zakɔb bʋʋrɛ pʋɔ, ʋ kʋrɛ nɩ a bɛ dɔ̃ dem tẽ-kpɛ̃ɛ nɩbɛ na cɛ a.»

²⁰A Balaam tɩ nyɛ̃ nɩ a Amalesitɩ mɩnɛ a pùorí, ɛ́ ƴɛ̀r a ƴɛ̀rʋ ŋa: «Amalɛkɩ n'ɩ ŋan ɩ tẽw na kpɛmɛ zuo a za a, ɛcɛ ʋ na sãw nɩ ʋ za nɩdaar.»

²¹A Balaam mɩ̀ tɩ nyɛ̃ nɩ a Kenitɩ mɩnɛ, ɛ́ yel à ŋá: «A nyɩɩm, Kenitɩ mɩnɛ, bom bɛ damnɛ nyɩ a nyɩ tẽw pʋɔ, mɛ̃ pìir zu cow pʋɔ n'a nyɩ be a.

²²Ɛcɛ bɛ na nyɩw nɩ a nyɩ yie bɛr, ɛ́ a Asiiri tẽw dem nyɔw nyɩ cen nɩ.»

²³A Balaam tɩ cãà na lɛb yel à ŋá: «'Woi! Ãa n'ʋ na cãà vʋʋrɛ a Naaŋmɩn wa ɩ baar'a?

²⁴Gbee na yi n Sɩɩpʋr wa, a nɩbɛ bɛ ŋa na dɔwr'ɩ a Asiiri tẽw dem, bɛ na dɔwr'ɩ a Ebɛɛr[50] bʋʋrɛ, ɛcɛ a bɛl mɩ̀ wɩɛr'ɩ a bɛ kũu zie.»

²⁵A ƴɛ̀rʋ á ŋá pùorí a, a Balaam tɩ lo n a sɔ́r kule a ʋ tẽw, ɛ́ a Balakɩ mɩ̀ cere a ʋ cenu zie.