Read Dagara, Northern Sɔr-nɛ́ɛ 28 Bible Online

Sɔr-nɛ́ɛ 28 - Dagara, Northern bible

Sɔr-nɛ́ɛ 28

¹A Sore tɩ yel'ɩ a Moyiir à ŋá:

²«Tɩ yel à ŋá kʋ̀ a Ɩsɩrayɛl nɩbɛ: A daar mɩ́ wa ta a, nyɩ na ƴãw nɩ fãw mɩ́ wa n a de-kʋ̀b bome ɩ̃ na so a wa kʋ̀ m, a pɛr lɛ k'aa bʋ̃-dɩrɩ bɛ na nyɩw a zʋ̀ʋ́r nyũu pɛlɩ a ɩ̃ pʋɔ a.

³Bibir za a, nyɩ na mɩ́ wa n nɩ yũon-been peli ayi a ƴã-gan zie kãw za na bɛ sãw a wa kʋ̀ m. Bɛ na mɩ́ nyɩw a na a dɩ a za. Nyɩw-a-za-bàwr a na fɛr kɛ́ bɛ maalɛ kʋ̀rɛ mɛ̃ kʋralɛ a n'ʋ.

⁴Bɛ na mɩ́ kʋ̀ m'ɩ a peli-dãw-niwn sob a biɓaara, a ayi sob a zaanʋɔra,

⁵lãwnɩ kilo[56] ata zɔ̃ bɛ na naw nɩ litɩr been nɩ ŋmãa kãá-vla vla a.

⁶A bibi-vɩɛrɩ za nyɩw-a-za-bàwr ŋa nɩ a ʋl bɛ na tɩ maalɛ kʋ̀rɛ mɛ̃ a Sinayi tãw zu a na ɩ n been. A ʋ zʋ̀ʋ́r na nyùur vla a na mɩ́ pɛlɩ nɩ a ɩ̃ pʋɔ.

⁷Bɛ na mɩ́ tɩr'ɩ a biɓaara pele lãwnɩ litɩr been nɩ ŋmãa divɛ̃ de-kʋ̀b, bɛ na na mɩ́ de kʋ̀ m a zi-sõw pʋɔ a.

⁸A zaanʋɔra a, bɛ na mɩ́ kʋ̀ m'ɩ a peli ayi sob, lãwnɩ a biɓaara de-kʋ̀b bome. A ʋ zʋ̀ʋ́r na nyùur vla a na mɩ́ pɛlɩ nɩ a ɩ̃ pʋɔ.»

⁹«A pɩ̃ɛnʋ-bibir a, nyɩ na mɩ́ tɩr'ɩ yũon-been peli ayi a ƴã-gan zie kãw za na bɛ sãw a. Nyɩ mɩ̀ na mɩ́ tɩr'ɩ kilo ayʋɔb zɔ̃ bɛ na naw nɩ kãá a, de nɩ divɛ̃.

¹⁰Pɩ̃ɛnʋ-bibir za a, nyɩ na mɩ́ maal'ɩ a nyɩw-a-za-bàwr ŋa ƴãw pʋɔ a bibi-vɩɛrɩ za nyɩw-a-za-bàwr ƴãw, nɩ a divɛ̃ bɛ na mɩ́ lãwnɩ ʋ de tɩr a.»

¹¹«A cuw za bibi-dãw-niwn sob, nyɩ na mɩ́ maal'ɩ nyɩw-a-za-bàwr kʋ̀ a mãa, Sore, nɩ nadɛɛ ayi, pʋ́ra nɩ yũon-been peli ayopõi, dʋn a ƴã-gan zie kãw za na bɛ sãw a.

¹²Nyɩ na mɩ́ tɩr'ɩ zɔ̃ bɛ na naw nɩ kãá a lãwnɩ dʋ̃w za: kilo piwaɩ nadɛr za ƴãw, kilo ayʋɔb a pʋ́ra ƴãw,

¹³de nɩ kilo ata péle za ƴãw. Nyɩw-a-za-bàwr'ʋ, ɛ́ a zʋ̀ʋ́r na nyùur vla a na mɩ́ pɛlɩ nɩ a ɩ̃ pʋɔ.

¹⁴Nyɩ mɩ̀ na de nɩ divɛ̃ tɩr: litɩr ata nadɛr za ƴãw, litɩr ayi a pʋ́ra ƴãw, litɩr been nɩ ŋmãa péle za ƴãw. A bàwr'ɩ à ŋà, nyɩ na na mɩ́ maalɩ cuw za tib daar, a yũon-ɓil za pʋɔ a.

¹⁵Nyɩ mɩ̀ na mɩ́ kʋ n bʋra kʋ̀ a mãa, Sore, ʋ ɩ yel-bier ír-bɛrʋ bàwr, ƴãw pʋɔ a bibi-vɩɛrɩ za nyɩw-a-za-bàwr nɩ a ʋ divɛ̃ de-kʋ̀b ƴãw.»

¹⁶«A yũon cuw-dãw-niwn sob bibie pie nɩ anaar sob na mɩ́ ɩ n a Tɔl-gãw cuw, a ɩ̃ ƴãwfʋ ƴãw.

¹⁷A cuw ŋa bibie pie nɩ a nũu sob na mɩ́ ɩ n cuw bibir. Nyɩ na mɩ́ 'wɔb'ɩ dipɛ̃ na bɛ ƴãw dãbɩl a, bibie ayopõi.

¹⁸A cuw bibi-dãw-niwn sob a, nyɩ na mɩ́ ɓã n taa puori a mãa Sore nɩ nyɩ tʋɔra-siwru. Nyɩ kʋ̃ mɩ́ tõ a tome nyɩ na mɩ́ tone a bibie za a ɩ.

¹⁹Nyɩ na mɩ́ maal'ɩ nyɩw-a-za-bàwr kʋ̀ m nɩ nadɛɛ ayi, pʋ́ra nɩ yũon-been peli ayopõi, dʋn a ƴã-gan zie kãw za na bɛ sãw a.

²⁰Nyɩ na mɩ́ tɩr'ɩ zɔ̃ bɛ na naw nɩ kãá a, lãwnɩ dʋ̃w za: kilo piwaɩ nadɛr za ƴãw, kilo ayʋɔb a pʋ́ra ƴãw,

²¹kilo ata pele za ƴãw.

²²Nyɩ mɩ̀ na mɩ́ kʋ n bʋra, ʋ ɩ yel-bier-ír-bɛrʋ bàwr: a lɛn daar a, bɛ na mɩ́ tu n a suur-dɩ-kʋ̀b tub a nyɩ ƴãw.

²³A bagɛ á ŋá za na mɩ́ maal'a ƴãw pʋɔ a bibi-vɩɛrɩ za nyɩw-a-za-bàwr ƴãw.

²⁴A bibie ayopõi á ŋá pʋɔ a, nyɩ na mɩ́ kʋ̀ m'ɩ bʋ̃-dɩrɩ bibir za. A de-kʋ̀b bome á ŋá zʋ̀ʋ́r na nyùur vla a na mɩ́ pɛlɩ nɩ a ɩ̃ pʋɔ. Nyɩ na mɩ́ maal'a na ƴãw pʋɔ a bibir za nyɩw-a-za-bàwr ƴãw, nɩ a ʋ divɛ̃ de-kʋ̀b.

²⁵A bibie ayopõi sob a, nyɩ na mɩ́ lɛb'a ɓã taa puori a mãa Sore nɩ nyɩ tʋɔra-siwru, ɛ́ nyɩ kʋ̃ mɩ́ tõ a tome nyɩ na mɩ́ tone a bibie za a ɩ.»

²⁶«A bʋ̃-dieri-deb cuw[57] bibir nyɩmɛ wa waar'ɩ bʋ̃-dan kɛ́ nyɩ wa kʋ̀ a mãa Sore a, nyɩ na mɩ́ ɓã n taa kɛ́ nyɩ puori mɛ̃ nɩ nyɩ tʋɔra-siwru, ɛ́ nyɩ kʋ̃ mɩ́ tõ a nyɩ tome nyɩ na mɩ́ tone a bibie za a ɩ.

²⁷Nyɩ na maal'ɩ nyɩw-a-za-bàwr kʋ̀ m nɩ nadɛɛ ayi, pʋ́ra nɩ yũon-been peli ayopõi. A bàwr ŋa zʋ̀ʋ́r na nyùur vla a na mɩ́ pɛlɩ nɩ a ɩ̃ pʋɔ.

²⁸Nyɩ na mɩ́ tɩr'ɩ zɔ̃ bɛ na naw nɩ kãá a, lãwnɩ dʋ̃w za: kilo piwaɩ zɔ̃ nadɛr za ƴãw, kilo ayʋɔb a pʋ́ra ƴãw,

²⁹kilo ata pele za ƴãw.

³⁰Nyɩ mɩ̀ na mɩ́ kʋ n bʋra, kɛ́ bɛ tʋ̃ɔ́ tu n a yel-bebe suur-dɩ-kʋ̀b tub a nyɩ ƴãw.

³¹A bagɛ á ŋá za na mɩ́ maal'a ƴãw pʋɔ a bibi-vɩɛrɩ za nyɩw-a-za-bàwr ƴãw, nɩ a kukur de-kʋ̀b bom na mɩ́ lãw nɩ ʋ a. Dʋn a ƴã-gan zie kãw za na bɛ sãw a n'a nyɩ na mɩ́ kʋ, lãwnɩ a divɛ̃ de-kʋ̀b na mɩ́ pʋɔ a.»